وحدت نیوز(گلگت)گلگت بلتستان کونسل کے ممبران ایوب شاہ،شیخ احمد علی نوری،اقبال نصیر،سید شبیہ الحسنین،عبد الرحمٰن اور حشمت اللہ نے حزب اللہ کے سربراہ سید حسن نصر اللہ کی شھادت پر اپنے ایک تعزیتی پیغام میں کہا کہ حزب اللہ سربراہ حسن نصر اللہ کی شہادت پر اظہار افسوس کرتے ہیں اور اسرائیلی حملوں کی مذمت کرتے ہیں۔حسن نصر اللہ کی شہادت عالم اسلام کا ایک ناقابل تلافی نقصان ہے۔انہوں نے سید حسن نصراللہ کو خراج عقیدت پیش کرتے ہوئے کہا کہ سید حسن نصراللہ معرکہ طوفان الاقصیٰ کے شہید ہیں۔ انہوں نے بیت المقدس اور فلسطین کے لیے اپنی جان کا نذرانہ پیش کیا، اس شہادت سے اسرائیل کے خلاف جنگ کو مزید طاقت ملے گی۔

انہوں نے کہا کہ لبنان اورغزہ میں جس بے دردی اور بے رحمی کے ساتھ نہتے لوگوں کا قتل عام کیا جا رہا ہے اس پر عالمی برادری، مسلم اور عرب ممالک کی مجرمانہ خاموشی قابل مذمت ہے۔انہوں نے مزید کہا کہ اللہ تعالیٰ ان کی شہادت کو اپنی بارگاہ میں قبول فرمائے اور اس عظیم قربانی کو امت مسلمہ کے لیے سودمند قرار دیں آمین۔

وحدت نیوز(لندن)مجلس وحدت مسلمین برطانیہ کے زیر اہتمام مسجد علی لوٹن میں ایک عظیم الشان وحدت کانفرنس بمناسبت برسی قائد شہید علامہ سید عارف حسین الحسینی رح کا انعقاد کیا گیا۔ اس کانفرنس میں برطانیہ کے مختلف شہروں سے مومنین و مومنات اور علماء کرام و زعماء ملت کی کثیر تعداد نے شرکت کی۔ کانفرنس کی نظامت کے فرائض ایم ڈبلیو ایم برطانیہ کے چیف کوارڈینیٹر جناب سید وجاہت علی گیلانی نے سرانجام دیئے۔ کانفرنس کا آغاز تلاوت کلام پاک سے ایم ڈبلیو ایم برطانیہ کے یوتھ ونگ کے صدر جناب مولانا ہاشم الحسینی نے کیا ۔ اہل سنت عالمی شہرت یافتہ نعت خواں نے ہفتہ وحدت ربیع الاول کے حوالے سے نعت خوانی سے اس کانفرنس میں جوش و جذبہ برپا کر دیا اور روح پھونک دی ۔

 باقی مقررین میں ایم ڈبلیو ایم کے صدر جناب حجت الاسلام مولانا ابرار حسین الحسینی صاحب، جناب حجت الاسلام مولانا سید رضا حیدر رضوی صاحب،  حجت الاسلام والمسلمین جناب علامہ مشرف حسین الحسینی صاحب، حجت الاسلام والمسلمین جناب علامہ غلام حسین عدیل صاحب،  جناب مولانا ہادی صاحب، جناب حجت الاسلام مولانا حمزہ  حسینی صاحب ، آغا سید ذکی رضوی صاحب، صدر ادارہ مسجد علی لوٹن سید راحت گیلانی ،  ایم ڈبلیو ایم لوٹن کے نمائندہ جناب غلام عباس صاحب نے نعت رسول مقبول بھی پیش کی ۔

 مقررین نے شہید قائد علامہ سید عارف حسین الحسینی رح کے حالات زندگی پر روشنی ڈالی کہ وہ اتحاد بین المسلمین و اتحاد بین المومنین کے داعی تھے کہ انہوں نے 4 سال کی مختصر قیادت میں انہوں نے  کافی کامیابی حاصل کی،  قائد شہید نے ملت تشیع کو قومی و ملکی  سیاست میں شامل کیا اور 6 جولائی 1987 کو مینار پاکستان لاہور میں ملت تشیع کو صرف نہیں بلکہ ملت اسلامیہ کو سبیل و نا کے نام سے ایک فلاحی و اسلامی ریاست کے  لئے سیاسی دستور و منشور دیا ۔ قائد شہید نے ملک کے طول عرض کے دورہ جات کر کے ملت تشیع میں ایک انقلابی بیداری پیدا کی اور ملت تشیع کی عالمی و ملکی سطح پر صحیح ترجمانی کی ۔ اسی لئے عالمی استکبار نے ملکی و  مقامی اپنے ایجنٹوں کے ساتھ مل کر یہ سازش کی اور بھانپ لیا کہ یہ حقیقی فرزند امام خمینی رح پاکستان کی سرزمین پر ایران کی طرز کا اسلامی انقلاب برپا کہیں نہ کر دے تو ان دجال کے کارندوں نے ھمارے محبوب قائد علامہ سید عارف حسین الحسینی رح کو پشاور میں  نماز  فجر کے وقت 5 اگست 1988 کو اپنے زیر تعمیر مدرسے میں شہید کر دیا۔ کانفرنس میں دنیا بھر کے  مظلومین کی حمایت کا اعلان کیا گیا اور استعماری طاقتیں جو ظلم و بربریت ڈھا رہی ھیں ان کی سخت الفاظ میں مذمت کی گئی۔

کانفرنس کے شرکاء نے حالیہ واقعات جو فلسطین میں پیش آئے جس میں خصوصی طور پر جو ناحق خون بہایا گیا اور بزاروں افراد اب تک بیگناہ شہید ھو چکے ھیں اس کی شدید الفاظ میں مذمت کی  ، آخر میں تمام شہداء اسلام کے لئے فاتحہ خوانی کی گئی اور دعائے امام زمانہ عج سے مولانا ہاشم الحسینی نے کانفرنس کا اختتام کیا۔

اس کے بعد مومنین و مومنات میں نیاز بھی تقسیم کی گئی اور مغربین کی نماز باجماعت ادا کی گئی،  برطانیہ بھر  کے تمام اداروں اور خصوصی طور پر مسجد علی لوٹن کی انتظامیہ کا اس وحدت کانفرنس کے لئے تعاون کرنے پر  ایم ڈبلیو ایم برطانیہ کی طرف سے تہہ دل سے شکریہ ادا کیا گیا ۔

وحدت نیوز(جیکب آباد)ڈی او آفس جیکب آباد میں سالانہ محفل ثنائے سید المرسلینﷺ کا اہتمام کیا گیا۔ جس میں مختلف مکاتب فکر کے لوگوں کے ساتھ ساتھ شیعہ سنی علماء کرام نے خطاب کیا۔ اس موقع پر محفل ثنائے سید المرسلینﷺ سے خطاب کرتے ہوئے مجلس وحدت مسلمین پاکستان کے مرکزی رہنما علامہ مقصود علی ڈومکی نے کہا ہے کہ سید المرسلین صلی اللہ علیہ والہ وسلم کی حیات طیبہ عالم انسانیت کے لئے نمونہ عمل ہے۔ حضور سید کونین نے اپنے پاکیزہ کردار کے ذریعے عالم انسانیت کو اعلی انسانی اقدار اخلاق حسنہ اور پاکیزہ کردار کی طرف رہنمائی کی۔

سید الانبیاء،ص کی ذات گرامی امت مسلمہ کے لئے نقطہ وحدت اور اتحاد ہے۔ آج فلسطین اور لبنان میں اسلام دشمن سامراجی قوتوں کے ہاتھوں معصوم اور بے گناہ انسانوں کا خون بہایا جا رہا ہے 41 ہزار سے زیادہ مظلوم فلسطینیوں اور ہزاروں لبنانی مسلمانوں کا خون بہانے والے امریکہ اور اسرائیل ہی عالم انسانیت کے قاتل اور مجرم ہیں۔

انہوں نے کہا کہ اب وقت آ چکا ہے کہ دنیا بھر کے مسلمان اپنے جزوی اور فروعی اختلافات کو بھلا کر آپس میں متحد ہو جائیں اتحاد بین المسلمین قران کریم کا حکم اور وقت کی ضرورت ہے۔ انہوں نے کہا کہ ہمیں اپنی نوجوان نسل کو حضور سید الانبیاء کی پاکیزہ سیرت اور قران کریم کی تعلیمات سے آشنا کرنا ہوگا تاکہ وہ اسلام دشمن استکباری قوتوں کے شیطانی منصوبوں اور مغربی ثقافتی یلغار سے خود کو محفوظ رکھ سکیں۔

وحدت نیوز(اسلام آباد)غاصب صہیونی ریاست کے فضائی حملے میں سید حسن نصر اللہ کی عظیم شہادت کے خلاف اور مقاومتِ اسلامیِ جہان کے ساتھ اظہار یکجہتی کیلئے ملی یکجہتی کونسل پاکستان کے مرکزی جنرل سیکرٹری لیاقت بلوچ اور سربراہ مجلس وحدت مسلمین پاکستان سینیٹر علامہ راجہ ناصر عباس جعفری کی دیگر مرکزی قائدین علامہ سید احمد اقبال رضوی، حسیب امیری، اشفاق نذیر، علامہ عارف واحدی، سید ناصر عباس شیرازی اور سید مرتضی نقوی کے ہمراہ پریس کانفرنس۔

مرکزی رہنما لیاقت بلوچ نے گفتگو کرتے ہوئے کہا اس وقت پوری امت، پورا عالم اسلام ایک شدید غصہ اور اضطراب میں ہے، خطہ کی صوتحال کی وجہ سے پوری امت اسلام دو ٹوک موقف ہے کہ غزہ میں فلسطینیوں پر مظالم کے پہاڑ توڑے جا رہے ہیں، غزہ میں 43ہزار سے زائد شہادتیں ہو چکی ہیں، بڑی تعداد میں گرفتار فلسطینی عقوبت خانوں میں انسانی تاریخ کے بدترین مظالم برداشت کر رہے ہیں، لبنان پر اسرائیلی صیہونی حملے خوفناک شکل اختیار کر رہے ہیں، ٹیکنالوجی کا بدترین استعمال انساننوں کو شہید کرنے کے لیئے استعمال کی جا رہی ہے، جابر و استعماری قوتیں ہلکان ہو چکے ہیں کیونکہ مزاحمت کو خاموش نہیں کر پا رہے، احمد یاسین کو ٹارگٹ کیا گیا، جبکہ اسماعیل ہنیہ کی شہادت دہرا وار تھا، لبنان کے مزاحمت کار و عظیم رہنما حسن نصر اللہ کو شہید کیئے جانے کے باوجود آزادی کی تحریک جاری ہے، آزادی کی تحریکیں نہ اسطرح رکتی ہیں اور نہ کوئی روک سکے گا۔

 امت مسلمہ کو سمجھ آ رہی ہے کہ ایک ایک کر کے سب کی باری ہے، گریٹر اسرائیل کا نقشہ باقاعدہ پوری دنیا میں بانٹا گیا ہے، ہم سمجھتے ہیں کہ اقوام متحدہ اس پوری مدت میں ناکام نظر آتا ہے، اقوام متحدہ کے سیکرٹری جنرل مسلسل جنگ بندی کا مطالبہ کر رہے ہیں لیکن کوئی شنوائی نہیں، پوپ کی جنگ بندی کی آواز کو بھی نہیں سنا جا رہا، عالمی عدالت انصاف کے فیصلہ کو بھی اسرائیل ماننے کو تیار نہیں، او آئی سی کی سطح کے اجلاس اور جنگ بندی کے مطالبات پر بھی کوئی شنوائی نہیں ہوئی، عالم اسلام اسرائیل اور صیہونیت کے ظلم کے خلاف یہ آواز ہے، کیوں لاتعلق رہنے کا اظہار کیا جا رہا ہے؟ اتحاد امت ہی عالم اسلام کا سب سے بڑا حل ہے، ملت اسلامیہ کی رسوائی سے بچنے کے لیئے سب کو اکٹھا ہونا ہو گا۔

 عالم اسلام کے پاس عالم اسلام کے پلیٹ فارم کو متحرک کرنے کے علاوہ کوئی حل نہیں۔ ہم دنیا بھر کے حکمرانوں سے مطالبہ کرتے ہیں کہ لاتعلقی کا سلسلہ ختم ہونا چاہیئے اور موئثر عملی اقدام کیا جانا چاہیئے، پاکستان عالمی قوتوں کا ہدف ہے۔ خطہ کے عوام کے تحفظ کے لیئے تمام ممالک کی قیادت کو آگے بڑھنے کی ضرورت ہے، اسرائیل کی بدمعاشی کو رکنے کی ضرورت ہے۔ ملی یکجہتی کونسل نے فیصلہ کیا ہے کہ ہم اسرائیل کی ناجائز ریاست کے سامنے کبھی سرینڈر نہیں کریں گے، اقوام متحدہ میں شہباز شریف کا موقف دو ریاستی حل ایک کمزور موقف ہے، اقوام متحدہ میں فلسطین کے حوالہ سے کمزور موقف اختیار کیا جائے گا تو کل کشمیر کے حل پر بھی کمزور موقف اختیار کیا جائے گا، ہم حکومت پاکستان کے کمزور موقف کو مسترد کرتے ہیں، 4 اکتوبر کو پورے ملک میں لبنان میں اسرائیلی دہشتگردی اور عالم اسلام کے عظیم مجاہد سید حسن نصراللہ کی شہادت پر اتحاد امت کا عملی مظاہرہ کرتے ہوئے اس ظلم کیخلاف اپنی آواز بلند کرے۔غزہ میں نوجوانوں کی مزاحمت تمام ظلم و جبر کے باوجود اپنی جگہ ڈٹی ہوئی ہے، 7 اکتوبر کو ہمیں بھی فلسطینیوں، لبنانیوں، کشمیریوں، شامیوں کے ساتھ اظہار یکجہتی کے لیئے نکلنا ہے، پوری قومی قیادت کو مظبوط موقف اختیار کرنے کی ضرورت ہے۔

ملی یکجہتی کونسل کے رہنما اور سربراہ مجلس وحدت مسلمین پاکستان سینیٹر علامہ راجہ ناصر عباس جعفری نے کہا کہ پیچیدہ جنگ انتہائی اہمیت کی حامل ہے جس میں مجاہدین کا مقابلہ عالم کفر سے ہے، اس جنگ کے نتائج فیصلہ کریں گے کہ آنے والی دنیا کیسی ہو گی، اگر آج مقاومت گر گئی تو اسرائیل کے آگے کوئی بند نہیں رہ سکے گا، اسرائیل سٹریٹیجک اہداف حاصل نہیں کر سکا ۔ ناکام رہے، یہ پورے جہان اسلام کی لڑائی ہے اور ہمیں ڈٹ کر ساتھ کھڑا ہونا ہے، اگر اسرائیل کے جرائم نہ رکے تو اسرائیلی ہماری گلیوں میں گھومیں گے، 7 اکتوبر کو سب نے اپنی حمایت کا اظہار کرتے ہوئے احتجاج میں شرکت کرنی ہے، فلسطین نہر سے بحر تک سارا علاقہ فلسطینیوں کا ہے، کراچی میں مظلومین فلسطین کی حمایت میں نکلنے والی ریلی پر بہیمانہ تشدد اور جابرانہ ایف آئی آر کی شدید مذمت کرتے ہیں اور اسے فوری خارج کرنے کا مطالبہ کرتے ہیں حکمرانوں کو اسرائیل کے حوالے سے منافقانہ رویہ ترک کرنا ہو گا۔

علامہ عارف واحدی نے کہا کہ 28 معتبر جماعتی اتحاد ملی یکجہتی کونسل مل کر اسرائیل مخالف احتجاج کر رہے ہیں، اسرائیل کے مقابلے میں امت مسلمہ دفاعی محاز پر کھڑی ہے، ہم سب کو ساتھ دینا ہو گا۔