The Latest
وحدت نیوز(اسلام آباد) مجلس وحدت مسلمین پاکستان کے وائس چیئرمین علامہ سید احمد اقبال رضوی کی والدہ محترمہ مختصر علالت کےبعد داعی اجل کو لبیک کہہ کر خالق حقیقی سے جا ملی ہیں۔ مرحومہ و مغفورہ کے انتقال پر ملال پر ایم ڈبلیوایم کے سربراہ علامہ راجہ ناصرعباس جعفری سمیت مرکزی جنرل سیکریٹری سید ناصرعباس شیرازی ، تمام اراکین مرکزی کابینہ ،صوبائی صدور ، ضلعی ویونٹ مسئولین نے علامہ سید احمد اقبال رضوی و دیگر اہل خانہ سے دلی افسوس اور رنج و غم کا اظہار کیا ہے ۔
مرکزی سیکریٹریٹ سے جاری تعزیتی پیغام میں قائدین نے کہا کہ ماں جیسی عظیم ہستی کا فراق سب سے بڑا نقصان تصور کیا جاتا ہے، یہ انسان پر مصیبتوں ، بلاؤں ، پریشانیوں کو ٹالنے والی سب سے بڑی ڈال ہوتی ہے ۔ لیکن مشیت الہیٰ کے آگے کسی کا زور نہیں چلتا۔ اس دنیا میں جوآیا ہے اس نے ایک دن ضرور جانا ہے ۔
مرحومہ ومغفورہ ایک انتہائی مومنہ اور مجاہدہ خاتون تھیں، وہ زمانے سے باخبر حالات کا ادراک رکھتی تھیں، پاکستان اور بین الاقوامی سطح پر امت مسلمہ کے مسائل سے آگاہ خاتون تھیں، مظلومین جہاں کے لیئے اپنے دل میں درد کا احساس رکھتی تھیں، انہوں نے اپنے اولاد کی اسلامی و انقلابی خطوط پرتربیت کا شاندار فریضہ بھی بحسن وخوبی انجام دیااور لائق اور قابل نسل کی پرورش کی ۔
خدا وند متعال سے دست بادعاہیں کہ وہ مرحومہ کو جوار جناب صدیقہ طاہرہ سلام اللہ علیہا میں جگہ عنایت فرمائے، ان کے تمام گناہان کبیرہ و صغیرہ کو معاف فرمائے اور آقائے احمد اقبال رضوی سمیت تمام پسماندگان کو اپنی بارگاہ سے صابرین کا اجر عظیم مرحمت فرمائے۔ آمین
وحدت نیوز (پشاور) قومی اسمبلی میں مجلس وحدت مسلمین پاکستان کے پارلیمانی لیڈر ایم این اے انجینئر حمید حسین نے خیبر پختونخوا کے چیف سیکرٹری ندیم اسلم چوہدری سے ان کے آفس میں ملاقات کی۔ اس موقع پر ضلع کرم کے حالات پر تبادلہ خیال کیا گیا۔ایم این اے انجینئر حمید حسین نے کہا کہ روزانہ کی بنیاد پر ضلع کرم کی اہم شاہراہوں پر مسافروں کے قتل و غارت کے واقعات رونماء ہو رہے ہیں، جن میں درجنوں افراد جاں بحق و زخمی ہوئے ہیں، جن میں بچے و خواتین شامل ہیں۔ ایسے واقعات منصوبہ بندی کے تحت ہو رہے ہیں۔ ان دہشتگردی کے واقعات کے بعد ٹل، پاراچنار مین شاہراہ سمیت ضلع کرم کی اہم سڑکیں بند ہیں، جس سے عوام کو شدید مشکلات کا سامنا ہے۔ ٹل پاراچنار روڈ پچھلے 18 دنوں سے بند ہے۔ چونکہ یہ ضلع کرم کی آمدورفت کی واحد شاہراہ ہے، اس کی بندش کی وجہ سے اشیائے خورد و نوش، پیٹرولیم مصنوعات، ادویات، گھریلو سلنڈر وغیرہ ناپید ہو چکے ہیں۔ تعلیمی ادارے بند پڑے ہیں، ضلع کرم کے طلباء جو ملک کے دوسرے علاقوں کے کالجز و یونیورسٹیوں میں پڑھتے ہیں محصور ہو کر رہ گئے ہیں، باہر ممالک جانے والے مسافروں کے ویزے ختم ہو رہے ہیں، شدید مریضوں کو علاج کے لئے پشاور منتقل کرنا ناممکن ہے۔
چیف سیکرٹری نے ایم این اے انجینئر حمید حسین کو یقین دلایا کہ ضلع کرم کے عوام کی مشکلات جلد از جلد حل کی جائیں گی، ٹل، پاراچنار روڈ کو محفوظ بنانے کیلئے اقدامات اٹھائے جائیں گے جن کے اثرات ایک دو دن میں نظر آئیں گے۔ چیف سیکرٹری ندیم اسلم چوہدری نے ضلع کرم کے زمینی تنازعات و دیگر مسائل کے حل کے لئے طریقہ کار و تجاویز طلب کیں۔ واضح رہے کہ ملاقات کے شروع میں چیف سیکرٹری کے آفس کے مطابق ضلع کرم میں حالات بالکل نارمل بتائے گئے اور یہ بھی کہا گیا کہ ٹل پاراچنار مین شاہراہ آمدورفت کے لئے مکمل طور پر کھلی ہے اور عوام کو ضلع کرم میں آنے جانے میں کوئی مشکل نہیں ہے اور نہ ہی ضروریات زندگی کی کوئی کمی ہے۔ ایم این اے انجینئر حمید حسین نے ضلع کرم سے غلط رپورٹنگ پر شدید برہمی کا اظہار کیا ہے اور چیف سیکرٹری سے کہا گیا کہ ضلع کرم میں جاری بدامنی و دہشتگردی کے واقعات میں مقامی انتظامیہ مکمل طور پر ملوث ہے۔
وحدت نیوز(اسلام آباد) ملت جعفریہ پاکستان کے زیر اہتمام مرکزی مجلس عزاء بسلسلہ چہلم شہید مقاومت سردار سید حسن نصراللہؒ کے حوالے سے مرکزی جنرل سیکرٹری ایم ڈبلیو ایم پاکستان برادر ناصر عباس شیرازی کی زیر صدارت مجلس وحدت مسلمین پاکستان ضلع راولپنڈی و اسلام آباد وومن ونگ کی کابینہ کا اہم اجلاس منعقد کیا گیا جس میںفلسطین، لبنان اور پاراچنار کی صورتحال پر سیر حاصل گفتگو کی گئی اور سوال جواب کئے گئے اس موقع پر 10 نومبر مرکزی مجلس عزاء کے حوالے سے وومن ونگ کو زمہ داریوں کے حوالے سے آگاہ کیا گیا جس پر انہوں نے بھرپور عزم کا اظہار کیا اور اب تک کی فعالیت سے آگاہ کیا۔
وحدت نیوز(کوئٹہ)مجلس وحدت مسلمین بلوچستان نے بی این پی کے سربراہ سردار اختر جان مینگل و دیگر رہنماؤں کے خلاف جعلی مقدمات اور سابق رکن اسمبلی اختر حسین لانگو کی گرفتاری کے خلاف بلوچستان نیشنل پارٹی کی کال پر صوبے بھر میں 30 اکتوبر کو شٹر ڈاؤن اور 2 نومبر کو پہیہ جام ہڑتال کی مکمل حمایت کا اعلان کر دیا۔ اپنے مشترکہ بیان میں مجلس وحدت مسلمین کے صوبائی رہنماؤں علامہ علی حسنین حسینی اور علامہ ولایت حسین جعفری نے کہا کہ وفاقی حکومت کی جانب سے ناقص پالیسیوں پر تنقید کرنے والی جماعتوں کو انتقامی کارروائیوں کا نشانہ بنایا جا رہا ہے۔ حکمران بخوبی جانتے ہیں کہ بی این پی رہنماؤں نے کوئی غیر قانونی فعل سرانجام نہیں دیا ہے، تاہم جمہوری دور میں آمرانہ رویہ اختیار کرکے جمہوریت کی ساکھ کو کمزور کرنے کی کوشش کی جا رہی ہے۔ ایم ڈبلیو ایم بلوچستان کے رہنماؤں نے کہا کہ تحریک تحفظ آئین پاکستان اپنی سیاسی و آئینی جدوجہد سے پیچھے نہیں ہٹے گی۔ آئین کی بحالی ہی ملک کے مسائل کا حل اور ملک و قوم کے بہتر مستقبل کا راستہ ہے۔ انکا کہنا تھا کہ حکومت اپنی مخالف جماعتوں کے رہنماؤں اور اراکین اسمبلی پر دباؤ ڈالنے اور طاقت کا غلط استعمال کرتے ہوئے سیاسی کارکنوں اور قائدین کو نشانہ بنانے کا سلسلہ بند کرے۔ مجلس وحدت مسلمین بلوچستان صوبے بھر میں بلوچستان نیشنل پارٹی کے ساتھ یکجہتی کا اظہار کرتے ہوئے تیس اکتوبر کو ہونے والے شٹر ڈاؤن ہڑتال اور دو نومبر کو پہیہ جام ہڑتال کی حمایت کرتی ہے۔
وحدت نیوز(سکردو)اپوزیشن لیڈر گلگت بلتستان اسمبلی و پارلیمانی لیڈر مجلس وحدت مسلمین گلگت بلتستان محمد کاظم میثم نے فاطمہ جناح ویمن کالج اور گرلز ڈگری کالج کے زیراہتمام عالمی یوم ذہنی صحت کے حوالے منعقدہ کانفرنس میں شرکت کی۔ اپوزیشن لیڈر نے کانفرنس سے خطاب کرتے ہوئے کہا کہ ذہنی صحت جسمانی صحت سے زیادہ اہم ہے کیونکہ یہ خیالات، طرز عمل اوررویوں کا تعین کرتی ہے۔ ذہنی صحت کی جتنی اہمیت ہے اسکو اتنا ہی نظر انداز کیا گیا ہے۔ ذہنی طور پر انسان اسی صورت میں صحت مند رہ سکتا ہے کہ اگر تحمل اور صرف نظر سے انسان کام لے۔ تعلیمی ادارہ ہو یا دیگر ادارے ذہنی صحت کے مراکز ہمیشہ نظر انداز رہے ہیں۔ یہ ایک طرح سے ٹیبو بھی بنا رہا ہے۔ ذہنی صحت کے معاملے کو نظر انداز نہیں کیا جاسکتا۔
انہوں نے مزید کہا کہ ذہنی طور پر صحت مند کا اندازہ اس بات سے لگایا جاسکتا ہے کہ اسکی اجماعی شعور کتنا ہے۔ انہوں نے کہا کہ اس اہم دن اور مناسبت سے کانفرنس کا انعقاد دونوں اداروں کا قابل تحسین عمل ہے۔ ذہنی صحت کے حوالے سے اجتماعی شعور کو فروغ دینا وقت کی ضرورت ہے۔
وحدت نیوز(شیخوپورہ) جناب سید اسد عباس نقوی مرکزی سیکریٹری سیاسیات مجلس وحدت مسلمین پاکستان کی زیر صدارت ضلع شیخوپورہ کی ضلعی کابینہ کی ضلع شیخوپورہ کو ماڈل ضلع بنانے کے لئے اہم میٹنگ کا انعقاد ۔
حجۃ الاسلام والمسلمین جناب علامہ سید علی اکبر کاظمی صوبائی صدر مجلس وحدت مسلمین پنجاب ، جناب سید حسن رضا کاظمی صوبائی جنرل سیکریٹری ، جناب مولانا ظہیر کربلائی صوبائی آفس سیکریٹری بھی میٹنگ میں موجود تھے ۔
ضلعی صدر جناب سید عرفان نقوی اور ان کی 12 رکنی ضلعی کابینہ کے علاوہ یگر4افراد(ماتمی دستوں کے سالاربھی) مبصر کی حیثیت سے شریک تھے ۔ میٹنگ بہت ہی اچھے انداز میں ہوئی ۔
سید اسد عباس نقوی، علامہ سید علی اکبر کاظمی ، اور سید حسن رضا کاظمی نے اپنی اپنی گفتگو میں تنظیم کی اہمیت ،ضرورت اور فعالیت پر بہت ہی عمدہ مفہوم کے ساتھ بیان فرمایا ۔میٹنگ میں سید عرفان نقوی ضلعی صدر ضلع شیخوپورہ نے اپنے ضلع کی اب تک کی کارکردگی اور موجودہ صورتحال پر بریفنگ دی ۔
وحدت نیوز(سکردو) مجلس وحدت مسلمین گلگت بلتستان کی صوبائی شوری کے اجلاس سے خطاب کرتے ہوئے رکن مرکزی کردار سازی کونسل شیخ محمدجان حیدری نے کہا کہ تنظیمی تربیت اور خدا سے رابطہ سید مقاومت کی بنیادی صفات تھے۔ایک تنظیمی فرد کی کامیابی کا لازمی اور ضروری امر نظم وضبط ہے اسلئے امیر کائنات نے تقوی الہی کیساتھ نظم وضبط کو ایک الہی انسان کےلئے ضروری قرار دیا۔نظم تنظیم کیساتھ غیبی اور الہی امداد پر یقین ایک تنظیمی فرد کےلئے ضروری ہے۔شھید مقاومت کی کتاب امام مھدی اور اخبار غیب کی محوریت میں سید مقاومت کی کامیابی کا ایک لازمی عنصر آپ کا امداد غیب پر یقین کامل ہے۔آپ ایک تقریر میں فرماتے ہیں کہ محصور ہونا ہمیں مکتب میں معنی نہیں رکھتا ہم کھبی کسی کے ہاتھوں محصور نہیں ہوتے کیونکہ کائنات کا ہر موجود ہماری مدد کرتاہے کیونکہ ہمارا رابطہ ہمارے رب سے ہے۔
وحدت نیوز(دادو)مجلس وحدت مسلمین پاکستان کے مرکزی رہنماء علامہ مقصود علی ڈومکی نے کہا ہے کہ سید مقاومت شہید علامہ سید حسن نصر اللہ اور شہید یحییٰ سنوار عالم اسلام کے عظیم ہیرو تھے۔ جن پر پوری امت مسلمہ کو ناز ہے۔ پاکستان کے عوام کو چاہئے کہ اس عظیم شہید کے چہلم کے موقع پر پورے پاکستان میں عظیم اجتماعات منعقد کرکے لشکر اسلام کے علمبردار کو زبردست خراج عقیدت پیش کریں۔ ان خیالات کا اظہار انہوں نے مجلس وحدت مسلمین پاکستان یونٹ جوہی کے زیر اہتمام منعقدہ عظمت شہداء کانفرنس سے خطاب کرتے ہوئے کیا۔ علامہ مقصود علی ڈومکی نے کہا کہ تحریک آزادی فلسطین نے امت مسلمہ کو آپس میں جوڑ دیا ہے۔ حماس اور حزب اللہ کے سنی اور شیعہ قائدین اور جوانوں نے مل کر جس طرح سے اسلام دشمن سامراجی ممالک اسرائیل اور امریکہ کا مقابلہ کیا ہے۔ وہ بیداری امت اور اتحاد بین المسلمین کا عملی نمونہ ہے۔ امت مسلمہ اپنے اختلافات بھلا کر مجاہدین اسلام حماس، حزب اللہ اور انصار اللہ کا ساتھ دے۔ آج فلسطین اور تحریک آزادی فلسطین امت مسلمہ کے اتحاد اور بیداری کا مظہر بن چکے ہیں۔
انہوں نے کہا کہ پارا چنار میں شیعہ سنی مسلمانوں کو آپس میں لڑانے کے لئے مسلسل سازشیں جاری ہیں۔ پارا چنار کے شیعہ اور سنی مسلمانوں کو اپنی بیداری، ہوشیاری اور وحدت سے دشمن کی اختلاف اور انتشار پر مبنی سازش کو ناکام بنانا ہوگا۔ انہوں نے کہا کہ پارہ جنار قائد شہید علامہ سید عارف حسین الحسینی رحمہ اللہ علیہ کی سرزمین ہے۔ جو ملت اسلامیہ پاکستان کے عظیم محسن اور اتحاد بین المسلمین کے علمبردار تھے۔ پارا چنار ہمارے دلوں میں بستا ہے اور ہمارے دل پارہ چنار کے غیور عوام کے ساتھ دھڑکتے ہیں۔ انہوں نے مطالبہ کیا کہ پارا چنار کا محاصرہ ختم کرتے ہوئے پارا چنار پشاور شاہراہ کو پارہ چنار کے عوام کے لئے پرامن بنایا جائے۔ صوبائی اور وفاقی حکومت کی ذمہ داری بنتی ہے کہ وہ پارا چنار میں دیر پا امن کے لئے سنجیدہ اقدامات کریں۔ مجلس وحدت مسلمین پاکستان اور ملت جعفریہ کبھی بھی پارا چنار کے مظلوم عوام کو تنہا نہیں چھوڑے گی۔ ہم قائد وحدت علامہ راجہ ناصر عباس جعفری کے حکم کے منتظر ہیں، اگر قائد وحدت نے پارہ چنار کی طرف لانگ مارچ کا حکم دیا تو ملک بھر سے قافلے قائد وحدت کے حکم پر پارا چنار کا رخ کریں گے۔
وحدت نیوز(ملتان) مجلس وحدت مسلمین ملتان کے زیراہتمام شھدائے ملت جعفریہ، شہدائے مقاومت، شہدائے قدس بالخصوص شہید سید حسن نصراللہ، اسماعیل ھنیہ، یحیی سنوار اور سید ہاشم صفی الدین کی یاد میں مسجد الحسین کے باہر شمعیں روشن کی گئیں۔ جس میں صوبائی صدر مجلس وحدت مسلمین جنوبی پنجاب علامہ سید اقتدار حسین نقوی، صوبائی سیکرٹری فنانس غلام حسنین انصاری،صوبائی سیکرٹری سیاسیات سید وسیم زیدی نے خصوصی شرکت کی، اس موقع پر گفتگو کرتے ہوئے ایم ڈبلیو ایم کے رہنمائوں کا کہنا تھا کہ آج پوری دنیا میں بسنے والے بیدار لوگ اسرائیلی بربریت اور جارحیت کے خلاف سراپا احتجاج ہیں، ظالم کے خلاف کم از کم عملی جہاد کی ضرورت ہے، پروگرام کا باقاعدہ اختتام دعائے سلامتی امام زمانہ عج سے کیا گیا۔
وحدت نیوز (اسلام آباد) مجلس وحدت مسلمین پاکستان کے سربراہ سینیٹر علامہ راجہ ناصرعباس جعفری حفظہ اللہ نے تحریک مقاومت اسلامی حزب اللہ لبنان کی قیادت شیخ نعیم قاسم کے سپرد کیئے جانے پر سماجی رابطے کی ویب سائٹ ایکس پر ایک پیغام جاری کیا ہے ۔
علامہ راجہ ناصرعباس نے کہا کہ میںخدا وند متعال سے شیخ نعیم قاسم کیلئےاستقامت اور رہنمائی چاہتا ہوں کیونکہ وہ اس غیر معمولی اورمشکل وقت میں حزب اللہ کی قیادت سنبھال رہے ہیں۔ غزہ میں اسرائیل کی جانب سے جاری نسل کشی اور لبنان میں جارحیت نے حسن نصر اللہ اور ہاشم سیف الدین کی شہادت کے باوجود حزب اللہ کے جنگجوؤں کی غیر متزلزل مزاحمت کو جنم دیا ہے۔
شیخ نعیم قاسم کا وژن اور اسٹرٹیجک مہارت اس کٹھن دور کو آگے بڑھانے میں اہم کردار ادا کرے گی۔ ان کے حالیہ بیانات اسرائیلی جارحیت کے خلاف مزاحمت اور لبنان کی خودمختاری کے تحفظ کے لیے حزب اللہ کے عزم کا اعادہ کرتے ہیں۔ ہم سب اسرائیل کے علاقائی استحکام کے لیے خطرے کو تسلیم کرتے ہیں اور اس طرح حزب اللہ صرف لبنان کی نہیں بلکہ پورے خطے کی سلامتی اور استحکام کے لیے لڑ رہی ہے۔
مجھے اس میں کوئی شک نہیں کہ شیخ قاسم کی قیادت میں حزب اللہ اسرائیلی افواج کا مقابلہ کرنے کے لیے تنظیمی طاقت کا فائدہ اٹھاتے ہوئے موثر جنگی حکمت عملیوں کا استعمال جاری رکھے گی۔ آنے والے دن اہم ہیں۔ میں حزب اللہ کو فتح کی طرف لے جانے، لبنان کی حفاظت اور وقار کو یقینی بنانے میں شیخ قاسم کی کامیابی کے لیے نیک تمناؤں کا اظہار کرتا ہوں۔
اللہ تعالیٰ امام زمانہ (عج) کے فضل سے شیخ قاسم کو اس نیک کاوش میں ہمت اور استقامت عطا فرمائے۔
اللہ شیخ قاسم کی حفاظت فرمائے اور لمبی عمر عطا فرمائے۔
