وحدت نیوز(سجاول) مجلسِ وحدت مسلمین پاکستان کے مرکزی ترجمان علامہ مقصود علی ڈومکی نے مرکزی امام بارگاہ سجاول  میں عشرہ محرم کی  مجلسِ عزا سے خطاب کر تے ہوئے کہا ہے کہ نواسہ رسول امام حسین عالیمقام ع نے صحرائے کربلا میں جو بے مثال قربانی دی وہ دین کی بقاء اور سربلندی کا باعث بنی۔ کربلا فقط  ایک واقعہ نہیں بلکہ نظام زندگی ہے کربلا اہل حق کی درسگاہ ہے۔

ان کاکہناتھاکہ کربلا ہر دور کے ظالم کے لئے بربادی کا پیغام ہے ۔ آج بھی کربلا اقوامِ عالم کے لئے نجات کا پیغام رکھتی ہے ۔انہوں نے کہا کہ ہر دور کا یزید کربلا سے خائف رہا اور گذشتہ چودہ سو سال میں چودہ مرتبہ وقت کے یزید نے کربلا پر حملہ کرکے اسے مٹانے کی ناپاک کوشش کی مگر وہ خود مٹ گئے کربلا آج بھی زندہ و تابندہ ہے۔

انہوں نے کہا کہ کشمیر کے مظلوم مسلمان کربلا کو اپنے لئے مشعلِ راہ قرار دے کر ظالم کے مقابلے میں ڈٹ جائیں اور یقین رکھیں فتح ہمیشہ حق والوں کا مقدر ہوتی ہے۔انہوں نے کہا ایام عزا میں ملک بھر سے بجلی لوڈشیڈنگ کی شکایات موصول ہو رہی ہیں خصوصاً رات کے پہلے حصے میں لوڈشیڈنگ مجرمانہ غفلت شمار ہوگی واپڈا محرم کے دوران بلا تعطل بجلی کی فراہمی یقینی بنائے اور حکومت عزاداری کے روٹس کی صفائی اور سیکورٹی کو یقینی بنائے۔

وحدت نیوز(اسلام آباد) کربلا کے عظیم واقعے کو سمجھنے کی ضرورت ہے۔ یہ کہنا کہ لوگوں پر ظلم ہو رہا تھا اس لئے سید الشہداءؑاما م حسین ؑ نے قیا م کیا ایسانہیں ہمیں اپنی مرضی سے کربلا کو نہیں سمجھنا بلکہ ویسے سمجھنا ہے جسے کہ سید الشہدا امام حسینؑ نے کہا ۔ان خیالات کا اظہار سربراہ مجلس وحدت مسلمین پاکستان  علامہ راجہ ناصر عباس جعفری نے عشرہ محرم کی پہلی مجلس سے خطاب کرتے ہوئے کیا۔

 انہوں نےکہا کہ حضرت امام حسین ؑ نے آخر مکہ میں حج کیوں نہ کیا جب لوگ مکہ حج کے لئے جا رہے تھے اور امام مکہ سے کربلا کے سفر کے لئے نکل کھڑے ہوئے اتنی بڑی قربانی کیوں دینی پڑی اسکا مقصد کیا تھا خون دیا، ہجرت کی ، اولاد، چادریں کیوں قربان کی یہ اتنا عظیم واقعہ ہے اس کو سمجھنے کی ضرورت ہے کوئی یہ نہیں کہ سکتا کہ لوگوں پر ظلم ہو رہا تھا کہ امام ؑ نے اتنی بڑی قربانی دے دی ایسا نہیں ہے ہمیں اپنی مرضی سے قیاس آریاں نہیں کرنی اور نہ اپنی مرضی کربلا کوسمجھنا بلکہ ویسے سمجھنا جیسے امام نے کہا۔

انہوں نےکہا کہ لوگ احادیث ،تفسیر،کا ترجمہ عقیدہ اور عمل اپنی مرضی کا چاہتے ہیں جو سرا سر باطل ہے اگر عمل چاہئے تفسیر چاہئے یا پھر قرآن فہمی چاہئے جو کچھ چاہئے وہ اہلیبت کے گھر سے لے ان کی لسان عصمت سے جاری شدہ احادیث لے لیں رسالت کا گھرانہ قران ناطق ہیں جن کے لئے رسول اکرم نے کہا کہ میں تم میں دو گراں قدر چیزیں چھوڑے جار ہا ہوں ایک قران اور دوسری میری عترت  اہلبیت جب تک تم ان دونوں سے متمسک رہو گے کبھی گمراہ نہ ہو گےاور یہ دونوں کبھی ایک دوسرے سے جدا نہیں ہونگے یہاں تک کے حوض کوثر پر یہ دونوں میرے پاس آئیں گے۔

علامہ راجہ ناصر عباس جعفری نے کہا کہ ظالم جابر طاقتوں اور نظام سے ٹکرانے کا درس ہمیں کربلا سے ملتا ہے کربلا حق پرستوں اور حریت پسندوں کی درسگاہ ہے،جن جن قوموں نے کربلا کو اور امام مظلوم علیہ السلام کو اپنا رول ماڈل مانا ہے انہوں نے دنیا بھر کے ظالم جابر قوتوں کو رسوا کیا ہے اور حقیقی معنوں میں اسلامی نظام کو اپنے سر زمین پر نافذ کیا۔

وحدت نیوز(کراچی) مجلس وحدت مسلمین ضلع جنوبی کراچی کے تحت امام خمینی ؒ لائبریری سولجر بازار پر عشرہ محرم الحرام کی پہلی مجلس عزا سے علامہ سید کاظم عباس نقوی نے ’عبرت ہائے عاشورہ‘ کے عنوان پر گفتگو کرتے ہوئے کہا کہ بصیرت عاشورہ کے نتیجہ میں عاشورہ سے عبرت حاصل ہوتی ہے۔قرآن مجید نے صاحبان بصیرت کے لئے عبرت لینے کی تاکید کی ہے۔اللہ نے تمام معاملات میں صاحبان بصیرت کے لئے عبرت رکھی ہے۔انہوں نے کہا کہ آزمائش کے بغیر ایمان مکمل نہیں ہوسکتا اور تمام آزمائشیوں سے آسانی سے گزارنے والی خوبی بصیرت ہے۔

انہوں نے کہا کہ بصیرت وہ نور ہے جو مومن کے قلب میں موجود ہوتا ہے۔انہوں نے بتایا کہ عبرت جہل سے علم کی صورت میں بدل کر عمل میں نمایاں ہوتی ہے۔عبرت کا حقیقی فائدہ تب ہے جب انسان اسے عمل میں بروئے کار لائے۔انسان کے لئے بعض عبرتیں بے حد ضروری ہے۔انسان گمان کرتا ہے کہ اسے سب معلوم ہے مگر بعض مرتبہ وہ ایسی غیر مرئی جہالت میں مبتلاء ہوتا ہے کہ ولایت کے امتحان میں ناکام ہوجاتا ہے۔

انہوں نے کہا کہ بصیرت کا چراغ انسان کو زمانے کی حجت تک پہنچادیتا ہے۔اشیاء کے باطن کو دیکھنے کے لئے بصیرت نور قلبی ہے۔قرآن میں اندھے کا لفظ دل کے اندھوں کے لئے استعمال ہوا ہے۔انہوں نے کہا کہ کربلا شعور کا رزق تقسیم کرتی ہے۔

وحدت نیوز(سکردو) تحریک انصاف گلگت بلتستان کے صوبائی صدر جناب جسٹس (ر) سید جعفر شاہ صاحب کی اپنی ٹیم کے ساتھ آغا علی رضوی کے گھر آمد۔ مختلف سیاسی و قومی امور پر گفتگو۔

سید جعفر شاہ صاحب نے آغا علی رضوی کی گلگت بلتستان کے عوام کی خدمات پر ان کی تعریف کی اور آئیندہ مل کر گلگت بلتستان کے عوام اور جی بی کے حقوق کے لیے آواز بلند کرنے کی یقین دھانی بھی کرائی۔ سید جعفر شاہ کا اس موقع پر کہنا تھا کہ شاہ جی کا موقف جی بی کے حوالے سے بڑا واضح ہے۔خدا ان کو اپنے نیک مقاصد میں کامیاب کرے۔

سید جعفر شاہ کے ہمراہ ناٸب صدر پی ٹی آٸی سید امجد زیدی، سکریٹری اطلاعات اکبر حسین اکبر و دیگر شام تھے۔ آغا علی رضوی کے رضوی ہاوس میں مجلس وحدت مسلمین کے ڈپٹی سکریٹری جنرل علامہ شیخ احمد علی نوری، اور دیگر صوباٸی و ضلعی رہنماوں سمیت سکریٹری جنرل ضلع کھرمنگ شیخ اکبر رجاٸی بھی شریک گفتگو رہے۔

وحدت نیوز(کراچی) شھید ڈاکٹر سید حیدر عسکری کی نماز جنازہ کی ادائیگی کے موقع پر اہل خانہ و عزیز و اقارب سمیت مذہبی و سیاسی جماعتوں کے رہنماؤں ،ماتمی انجمنوں کے نمائندوں ،اہل علاقہ سمیت ہزاروں کی تعداد میں مومنین و مومنات شریک تھی۔

ذرائع کے مطابق گزشتہ جمعہ کے روز گلشن اقبال بلاک 3 میں کے ڈی اے مارکیٹ کے پاس کالعدم تکفیری جماعت کے سفاک دہشتگردوں کی فائرنگ سےشھید ہونے والے ماہر امراض قلب ڈاکٹر سید حیدر عسکری کی نماز جنازہ آج اتوار کے روز شھید کی بیرون ملک مقیم اکلوتی بیٹی کی آمد پر مسجد خیرالعمل انچولی بلاک 20 میں مولانا محمد حسن کی اقتداء میں ادا کردی گئی۔

نماز جنازہ میں شھید کے اہل خانہ،عزیز و اقارب کے علاوہ مجلس وحدت مسلمین کراچی ڈویژن کے رہنماء علامہ صادق جعفری ،علامہ مبشر حسین،علامہ ملک محمد عباس،زین رضا رضو ی ،حسن رضا،رضوان پنجوانی ، سمیت مختلف مذہبی و سیاسی جماعتوں کے رہنماؤں،ماتمی انجمنوں،امام بارگاہوں کے ٹرسٹیز سمیت ہزاروں کی تعداد میں مومنین و مومنات نے شرکت کی۔

اطلاعات کے مطابق گلشن اقبال بلاک 3 کے رہائشی شھید ڈاکٹر سید حیدر عسکری نماز جمعہ کی ادائیگی کے لئے مسجد جانے کیلئے گھر سے نکل کر گاڑی میں بیٹھے ہی تھے کہ پہلے سے گھات لگائے ہوئے تکفیری دہشتگردوں نے ان پر فائرنگ کردیاور فرار ہوگئے۔موقع پر موجود اہل محلہ نے ڈاکٹر حیدر عسکری کو شدید زخمی حالت میں پہلے پٹیل اسپتال منتقل کیا کہ جہاں درندہ صفت اسپتال انتظامیہ نے ڈاکٹر حیدر عسکری کو طبی امداد دینے سے انکار کردیا،جس کے بعد انکو آغا خان اسپتال منتقل کیا ہی جا رہا تھا کہ وہ زخموں کی تاب نا لاتے ہوئے راستے میں ہی شھادت کے اعلیٰ درجے پر فائز ہوگئے۔

بعد ازاں شھید کا جسد مبارک پوسٹم مارٹم کے لئے جناح اسپتال اور پھر امام بارگاہ شھدائے کربلا انچولی منتقل کیا گیا کہ جہاں آج بیرون مل مقیم انکی اکلوتی بیٹی کے آمد پر بعد نماز ظہرین ان کی نماز جنازہ مسجد خیرالعمل انچولی بلاک 20 میں مولانا محمد حسن کی اقتداء میں ادا کردی گئی۔شھید کی تدفین سپر ہائی وے پر واقع وادی حسینؑ قبرستان میں کی گئی۔

وحدت نیوز(کراچی) امام حسینؑ نے فرمایا کہ میں اپنے جد کی امت کی اصلاح کے لئےقیام کر رہا ہوں،امام حسینؑ کا قیام ،کائنات میں موجود تمام برائیوں کے خلاف تھا، اور تمام اچھائیوں اور فضائل کے اپنے صحیح مقام پر آنے کے لئے تھا۔ذرائع کے مطابق ان خیالات کا اظہار مجلس وحدت مسلمین صوبہ سندھ کے سیکریٹری جنرل علامہ سید باقرعباس زیدی نے محرم الحرام کی مناسبت سے جاری ہونے والے اپنے خصوصی پیغام میں کیا ۔

 علامہ باقر زیدی کا کہنا تھا کہ امام حسینؑ کا یہ قیام تمام باطل کے مقابلے میں تمام حق کے لئے ہے۔آج بھی امامؑ کا راستہ عزت و شرف کا راستہ ہےاور انکے مقابل جو بھی راستہ ہے وہ ذلت و رسوائی کا راستہ ہے،جو کہ بدبختی اور دنیا و آخرت کی ناکامی کی طرف لے جاتا ہے۔

انھوں نے کہا کہ آج بھی جو قوتیں امام حسینؑ کے نظریہ اور تعلیمات سے منسلک ہیںوہ کامیاب تھیں،ہیں اور انشاء اللہ رہیں گی اور یہی قوتیں انشاء اللہ زمین ہموار کریں گی،اور دنیا کے جتنے بھی طاغوت اور ظالم ہیں ،انھیں شکست ہوگی۔

 علامہ باقر عباس زیدی کا مزید کہنا تھا کہ حق و باطل کی یہ جنگ جسکا آغاز 1400 سال قبل ہوچکا ہے ،اپنے آخری مراحل میں یعنی آہستہ آہستہ فرزند امام حسینؑ،امام زمانہ عجل اللہ تعالیٰ فرجہم شریف کے ظہور کے لئے زمین ہموار کر رہی ہے۔خداوند عالم کی بارگاہ میں دعاگو ہیں کہ یہ محرم بھی مومنین کے ایمان کو کربلائی بنا دے،اور ہم سب انشاء اللہ کربلائے عصر میں امام زمانہ عجل اللہ تعالیٰ شریف کے حامی و ناصر ہوں۔