The Latest
وحدت نیوز(جیکب آباد)مجلس وحدت مسلمین پاکستان کے مرکزی رہنما علامہ مقصود علی ڈومکی نے متاثرین سیلاب، شیعہ سنی اکابرین اور سیاسی سماجی اور مذہبی رہنماؤں کے ہمراہ مدرسہ خاتم النبیینؐ جیکب آباد میں پریس کانفرنس کی۔ اس موقع پر گفتگو کرتے ہوئے علامہ مقصود ڈومکی نے کہا کہ متاثرین سیلاب حکومتی امداد کے منتظر ہیں مگر حکومت کہیں نظر نہیں آ رہی ہے، متاثرین کی امداد سرعام بازاروں میں بک رہی ہے، اسسٹنٹ کمشنر کی یہ وضاحت کہ سیلاب متاثرین کا امدادی سامان بیچ کر ہم کچھ اور خریدنا چاہتے تھے شرمناک ہے، بیوروکریسی اور حکومت عوام کو روزانہ کی بنیاد پر پریس ریلیز جاری کرکے بتائیں کہ متاثرین کے لئے کتنی امداد آئی اور کہاں تقسیم ہوئی حکومت اور انتظامیہ کی مسلسل خاموشی اور مارکیٹ میں امدادی سامان بکنے نے متعدد سوالات کو جنم دیا ہے۔
علامہ مقصود ڈومکی نے کہا کہ صوبائی حکومت اور ضلعی انتظامیہ کہیں نظر نہیں آ رہی، شہری کئی دن سے فریاد کر رہے ہیں مگر کوئی نکاسی آب کے لئے پروگرام نہیں، مسلسل وعدوں کے باوجود حکومت میونسپل انتظامیہ اور ڈپٹی کمشنرز نے متاثرہ علاقوں سے پانی نکالنے کے لئے بھی کوئی اقدام نہیں کیا، جو کہ انتہائی افسوس ناک ہے۔ انہوں نے کہا کہ مجلس وحدت مسلمین کے بہادر کارکنوں نے جذبہ حب الوطنی اور خدمت خلق کے تحت متاثرین سیلاب کے لئے بے لوث خدمات انجام دیں۔ اس موقع پر متاثرین سیلاب سادات اور مستحقین میں راشن کپڑے مچھر دانیاں چپل اور ٹینٹ تقسیم کئے گئے۔
وحدت نیوز(ڈی آئی خان)مجلس علمائے شیعہ خیبر پختونخوا کے رہنماء علامہ سید عبد الحسین الحسینی نے ڈیرہ اسماعیل خان کا دورہ کیا، اس موقع پر وہ اہلسنت مدرسہ جامعہ مرکز اسلامی ڈیرہ اسماعیل خان بھی گئے، جہاں انہوں نے مدرسہ کے مدیر اعلیٰ مولانا سید نسیم علی شاہ ہاشمی سے ملاقات کی۔
اس موقع پر مجلس وحدت مسلمین کے صوبائی رہنماء علامہ ارشاد علی اور کربلائی نوروز علی بھی ان کے ہمراہ تھے۔ اس ملاقات میں مختلف دینی امور پر گفتگو ہوئی اور دونوں علمائے کرام نے اتحاد بین المسلمین کو امت مسلمہ کے لئے ناگزیر قرار دیا۔
وحدت نیوز(کوئٹہ) مجلس وحدت مسلمین کوئٹہ سٹی کے صدر ارباب لیاقت علی ہزارہ نے الحجت ہاؤس کوئٹہ میں پارٹی کارکنوں سے خطاب کے دوران کہا کہ دنیا بھر میں رنگ، نسل، مسلک و مذہب کی بنیاد پر انسانوں کا قتل اور اقوام متحدہ سمیت نام نہاد مہذب مغربی معاشرے کی خاموشی انکی ڈبل سٹینڈرڈ کا ثبوت ہے۔ نسلی، لسانی اور مسلکی تعصبات کی بنیاد پر شیعہ ہزارہ قوم کا قتل عام آج بھی جاری ہے، عالمی برادری کی خاموشی افسوسناک ہے۔ ارباب لیاقت علی ہزارہ نے کہا کہ برطانوی سامراج کے ایجنٹ امیر عبدالرحمٰن نے اپنے دور میں خواتین اور بچوں سمیت ہزارہ قوم کے 63 فیصد افراد کا قتل عام کیا اور باقی افراد دنیا کے مختلف ممالک کی جانب ہجرت کر گئے۔
جو باقی رہ گئے، انہیں انکی زمینوں سے محروم رکھا گیا۔ آج بھی وہی ظلم روا رکھا جا رہا ہے۔ طالبان حکومت کے ہوتے ہوئے ہزارہ قوم کے زرعی زمینوں اور جائیداد پر قبضہ کرنا عدل و انصاف کے منافی عمل ہے۔ ایم ڈبلیو ایم کوئٹہ کے صدر ارباب لیاقت علی ہزارہ نے کہا کہ تعصبات کی بنیاد پر مخصوص ہزارہ قوم کے ساتھ مظالم روک دیا جائیں۔ تمام انسان اللہ کے بندے ہیں۔ قوم، قبیلہ، رنگ و نسل پہچان کیلئے ہے۔ معیار انسانیت، تقویٰ الٰہی اور عالم بشریت کی فلاح و بہبود کیلئے کام کرنا ہے۔ پوری دنیا میں جہاں جہاں ہزارہ قوم ہجرت کر گئے ہیں، وہاں کے قانون کے احترام کو اپنا شعار بنا کر تعمیر و ترقی، علم و ہنر میں پیش پیش نظر آتے ہیں۔
وحدت نیوز(سکردو)ممبر گلگت بلتستان کونسل و صوبائی رہنما ایم ڈبلیو ایم شیخ احمد علی نوری نے شہادت امام حسن ؑ کے موقع پر کہا ہے کہ نواسہ رسول اکرم ص حضرت امام حسن علیہ السلام کی صلح عالم اسلام کے لئے نقطہ آغاز کا مقام رکھتی ہے، جس سے سبق حاصل کرکے مسلمان انتشار و افتراق، جنگ و جدل اور قتل و غارت گری سے محفوظ رہ سکتے ہیں۔ حضرت امام حسن ؑ نے جن مشکل کٹھن اور سنگین حالات میں امت مسلمہ کو جنگ اور فساد سے بچانے کے لئے اور اسلام کی بقاء کے لئے اپنے حریف سے صلح کی یہ ان کے کردار کی خصوصیت اور سیرت کا امتیاز ہے۔ تنگ نظری، ذاتی خواہش اور انفرادی مفاد کو بالائے طاق رکھتے ہوئے مسلمانوں کے اجتماعی مفادات کے حصول اور اسلام کے استحکام کے لئے باہمی رواداری اور صلح و محبت کا ماحول بنا کر آپ نے گہرے نقوش چھوڑے ہیں۔
انہوں نے کہا کہ امام حسن علیہ السلام جوانان جنت کے سردار ہیں۔ آپ کے علم، حلم، جلالت اور کرامت میں عکس رسول اکرمﷺ واضح طور پر نظر آتا ہے۔ آپ وارث علیؑ و نبیﷺ ہونے کے ناطے حضرت علی علیہ السلام کے بعد امامت کا درجہ رکھتے ہیں، آپ نے جس انداز میں ظاہری زندگی بسر فرمائی اور امن و اخوت اور صلح و محبت کی لاثانی روایات قائم کیں ان سے سیرت رسول ﷺکی عکاسی ہوتی ہے۔ انہوں نے مزید کہا کہ ہم سمجھتے ہیں کہ اتحاد بین المسلمین کا فروغ اور اخوت و وحدت ہمارا دینی و اسلامی فریضہ ہے۔ اسلام کی بقاء اور امت کی وحدت کے لئے ہم ہر قسم کی قربانی دینے کے لئے تیار ہیں۔
وحدت نیوز(ملتان) ڈویژنل امن کمیٹی ملتان کا اجلاس کمشنر ملتان انجینیئر عامر خٹک کی زیرصدارت منعقد ہوا، اجلاس میں ڈپٹی کمشنر ملتان طاہر وٹو، تمام متعلقہ اداروں کے سربراہان اور ممبران امن کمیٹی مجلس وحدت مسلمین ملتان کے رہنما انجینئر سخاوت علی سیال، خاور شفقت بھٹہ، سید علی رضا گردیزی، مزین عباس چاون، مخدوم عباس شمسی، اسسٹنٹ کمشنر سٹی خواجہ عمیر علی اور دیگر موجود تھے۔ اجلاس میں ماہ صفرالمظفر اور ربیع الاول کے جلوسوں کے حوالے سے تبادلہ خیال کیا گیا۔
اس موقع پرگفتگو کرتے ہوئے رہنمائوں نے کہا کہ چہلم امام حسین علیہ السلام کے موقع پر عزاداروں کے خلاف بنائے گئے مقدمات واپس لیے جائیں، ملتان ایک پُرامن شہر ہے لیکن بعض عناصر اسے فرقہ واریت کی دلدل میں دھکیلنا چاہتے ہیں۔ رہنمائوں نے مطالبہ کیا کہ شہر کے امن کو ایک سوچی سمجھی سازش کے تحت تباہ کیا جا رہا ہے، چند روز قبل ایک ٹولے کی جانب سے فرقہ واریت کو پھیلانے کے لیے احتجاج کیا گیا حکومت اس حوالے سے اقدمات کرے۔
وحدت نیوز(ملتان) مجلس وحدت مسلمین ملتان کے صدر علامہ وسیم عباس معصومی نے وفد کے ہمراہ شہادت امام حسن مجتبیٰ علیہ السلام کی مناسبت سے نکلنے والے مرکزی جلوس میں شرکت کی۔ اس موقع پر ضلعی کابینہ کے رہنما غلام حسنین انصاری، انجینیئر سخاوت علی سیال، سید عاصم رضا نقوی، عون رضا انجم ایڈووکیٹ، عاشق حسین، ناصر عباس، جہانزیب حیدر اور دیگر موجود تھے۔
ایم ڈبلیو ایم ملتان کے وفد نے امام بارگاہ حسین آباد دولت گیٹ کے منتظم شجر عباس کھوکھر سے بھی ملاقات کی۔ مرکزی جلوس کے موقع پر ہزاروں کی تعداد میں عزادار موجود تھے۔ اس موقع پر پولیس کی جانب سے سیکیورٹی کے سخت انتظامات کیے گئے تھے۔
ضلعی صدر علامہ وسیم عباس معصومی نے کہا کہ امام حسن علیہ السلام نے سیاسی تدبر اور حکمت عملی سے اپنے محبین کو ان کی جانوں اور ناموس کا تحفظ فراہم کیا۔ امام ع کی سیرت سے ہمیں درس ملتا ہے کہ اپنی قوم کی جانوں کا دفاع ہر عہدے اور ہر اختیار پر مقدم ہے۔ صاحبان اقتدار کے ہر تعلق کو قربان کیا جا سکتا ہے لیکن قوم کے حقوق کی پاسداری سے ایک انچ بھی پیچھے نہیں ہٹا جا سکتا۔
وحدت نیوز(شکارپور) مجلس وحدت مسلمین ضلع شکارپور کے صدر اصغرعلی سیٹھار نےعلامہ راجہ ناصرعباس جعفری اور علامہ باقرعباس زیدی کی خصوصی ہدائت پر مسلسل کوششوں کی بدولت تعلقہ لکی غلام شاہ چک سفر عشق اربعین کے دن مومنین عزاداروں پر درج ماورائے آئین درج ایف آئی آرمیں نامزد تمام عزاداروں کی عبوری ضمانتیں کروالیں۔
اصغر علی سیٹھا ر نے معزز عدالت سیشن کورٹ شکارپور نے تمام مومنین عزاداروں کے عبوری ضمانت منظور کروائی اور ضمانت کے بعد مجلس وحدت مسلمین ضلع شکارپور کے صدر اصغر علی سیٹھار کے جانب سے نیاز امام حسین علیہ السلام کا بندوبست وحدت ہاوؑس پر کیا گیا اور چک کے عزادار اور مومنین نے دل سے دعا کی۔
وحدت نیوز(جیکب آباد) مدرسہ خاتم النبیین صلی اللہ علیہ وآلہ وسلم جیکب آباد میں سیلاب متاثرین کے مسائل اور ان کا حل کے موضوع پر علامہ مقصود علی ڈومکی کی زیر صدارت اہم مشاورتی اجلاس منعقد ہوا اجلاس میں ضلع بھر سے علماء کرام و تنظیمی شخصیات شریک ہوئیں۔
اس موقع پر خطاب کرتے ہوئے مجلس وحدت مسلمین پاکستان کے مرکزی رہنما علامہ مقصود علی ڈومکی نے کہا کہ حکومت سیلاب متاثرین کو بھکاری بنانے کی بجائے متاثرین کے لئے چھوٹے کارخانے لگا کر بے روزگاری اور افلاس کا خاتمہ کرے اور لوگوں کو اپنے پیروں پر کھڑا کرے۔
انہوں نے کہا کہ نیویارک میں پاکستانی وزیر اعظم اور وزراء کی شاہ خرچیاں سیلاب متاثرین کے زخموں پر نمک پاشی کے مترادف ہے جس ملک کے عوام بھوک و افلاس کا شکار ہوں اور لاکھوں لوگ سیلاب کے باعث روڈوں پر بیٹھے دو وقت روٹی سے محروم ہوں اس ملک کے عیاش حکمرانوں کو دس ہزار ڈالر پر ڈے کے ہوٹل میں رہتے شرم تو آئی ہوگی۔
انہوں نے کہا کہ یہ بات دردناک ہے کہ سندھ ہو یا بلوچستان کہیں پر نا صوبائی حکومت سیلاب متاثرین کی مدد کرتی نظر آرہی ہے اور نا ہی وفاقی حکومت۔ کرپٹ سیاستدان اور بیوروکریسی مل کر سیلاب متاثرین کیلئے ملنے والی امداد کو دونوں ہاتھوں سے لوٹ رہے ہیں۔
اس موقع پر مشاورتی اجلاس سے مولانا محسن علی مفکری ،مولانا حاجی سیف علی ڈومکی، مولانا ارشاد علی سولنگی، آئی ایس او کے ڈویژنل صدر فضل عباس بہشتی، مدرسہ امام مہدی علیہ السلام کے مسؤل زوار ارباب علی و دیگر نے خطاب کیا۔
وحدت نیوز(پشاور)مجلس علمائے شیعہ پاکستان خیبر پختونخوا کے صدر علامہ احمد علی روحانی نے کابینہ کے اراکین سے خطاب کرتے ہوئے کہا کہ علماء کرام نے اس سال محرم الحرام اور اربعین چہلم امام حسین علیہ السلام کے موقع پر بہترین کردار ادا کیا اور امام حسین علیہ السلام کی سیرت، تبلیغ دین، امربالمعروف و نہی عن المنکر کی تبلیغ کی۔
انہوں نے کہا کہ صوبہ کے علمائے کرام، خصوصاً مجلس علمائے شیعہ پاکستان نے تمام سیلاب ذدگان کے ساتھ ہمدردی اور بھائی چارہ کیلئے بہترین کردار ادا کیا، ان تمام علماء کرام کے دل سے شکرگزار ہیں۔ ان کا مزید کہنا تھا کہ پاراچنار میں پیواڑ کے ایک سکول میں بدبخت ایجوکیشن آفیسر نے شان ابو طالب علیہ السلام میں جو گستاخی کی ہے، ہم اس کی شدید الفاظ میں مذمت کرتے ہیں اور حکومت وقت سے مطالبہ کرتے ہیں کہ اس ایجوکشین آفیسر کیخلاف فوری اور سخت کارروائی کی جائے۔
وحدت نیوز(سکردو)مجلس وحدت مسلمین گلگت بلتستان کے صوبائی صدر آغا علی رضوی نے اپنے ایک بیان میں کہا ہے کہ پاکستانی وفد کے دورہ اسرائیل کی گردش کرنے والی خبریں انتہائی تشویشناک اور پاکستان کی نظریاتی اساس پہ حملہ ہیں۔ انہوں نے کہا کہ اسرائیلی اخبارات میں پاکستان کے وفد کا دورہ اسرائیل اور پاکستان و اسرائیل کے مابین تعلقات قائم کرنے کی کوششوں کا ذکر اگر مبنی بر حقیقت ہے تو یہ ناقابل برداشت عمل ہے۔ امپورٹڈ حکومت سے بعید بھی نہیں، کیونکہ امریکہ کی خوشنودی اور اپنی حکومت کو طول دینے کے لیے کسی حد تک بھی جا سکتی ہے۔
وطن عزیز پاکستان کو نظریاتی اصولوں سے دور کرنے کی کوشش دراصل ملک دشمنی ہے۔ پاکستان کا اصل وہ نظریہ جس کی بنیاد پر یہ عظیم ملک قائم ہے۔ بانی پاکستان نے بھی اسرائیل اور پاکستان کے درمیان سرخ لکیر کھینچی ہے، اسے عبور کرنے والے فلسطینی مسلمانوں کے خون میں برابر کے شریک اور پاکستان کے دشمن تصور ہونگے۔ آغا علی رضوی نے مزید کہا کہ ریاستی اداروں کو چاہیئے کہ پاکستان کی اساس پر حملہ کرنے کی کوشش کرنے والوں کا رستہ روکیں، بصورت دیگر اسے وطن کی بقاء پر حملہ سمجھا جائے گا۔
