The Latest
وحدت نیوز(سکردو) منسٹر ایگریکلچر گلگت بلتستان و صوبائی رہنما مجلس وحدت مسلمین محمد کاظم میثم نے رکن اسمبلی و صوبائی رہنما اسلامی تحریک ایوب وزیری اور کوآرڈینیٹر ٹو سی ایم محمد علی قائد کے ہمراہ نگر میں زرعی کوآپریٹو سوسائٹی کے زیر اہتمام منعقدہ دو روزہ زرعی ایکسپو کے افتتاحی تقریب میں شرکت کی اور مختلف سٹال کا دورہ کیا۔
اس موقع پر صوبائی وزیر نے ETI-GB اور کوآپریٹو سوسائٹی کے ممبران کی کاوشوں اور کاشتکاروں کے مسائل کو حل کرنے، فصل سے پہلے اور بعد میں ہونے والے نقصانات، پیکیجنگ، برانڈنگ اور مارکیٹنگ کو سراہا۔
انہوں نے زرعی مہم 2022 کی تکمیل پر ضلعی کسانوں کے نیٹ ورک اور کوآپریٹیو کو مبارکباد دی اور ETI-GB کی سرگرمیوں کو وسعت دینے اور مضبوط کرنے کے لیے مختلف شعبوں میں بہترین کارکردگی کا مظاہرہ کرنے والے کوآپریٹیو کے لیے مسلسل تعاون کا یقین دلایا۔
انہوں نے مارکیٹنگ، پیکیجنگ، سرٹیفیکیشن، اور مختلف مصنوعات کی برانڈنگ میں مزید بہتری پر زور دیا تاکہ اعلیٰ قیمت والی منڈیوں تک پہنچ سکے۔
وحدت نیوز(کوئٹہ)مجلس وحدت مسلمین بلوچستان کے صوبائی صدر علامہ ظفر عباس شمسی نے افغانستان کے دارلحکومت کابل کے ایک تعلیمی ادارے میں ہونے والے دہشتگردی کے واقعہ کی سخت الفاظ میں مذمت کرتے ہوئے کہا ہے کہ کابل کے تعلیمی ادارے میں معصوم بچوں کو خودکش دھماکہ کے ذریعے شہید کرنا کھلی دہشتگردی ہے۔ ہزارہ شیعیان حیدر کرار کو مختلف مقامات پر جان بوجھ کر بزدلانہ دہشتگردی کا نشانہ بنایا جا رہا ہے۔
دہشتگردانہ واقعات میں ملت جعفریہ کے افراد کو بے دردی سے شہید کر دیئے گئے ہیں۔ اس دلخراج واقع پر انسانی حقوق کی علمبردار تنظیموں اور اداروں کی خاموشی سمجھ سے بالاتر ہے۔ عالمی انسانی حقوق کے اداروں کو چاہیئے کہ اس افسوسناک واقعہ پر آواز اٹھائیں۔
وحدت نیوز(ملتان)مجلس وحدت مسلمین ملتان کے صدر علامہ وسیم عباس معصومی نے کہا ہے کہ سیالکوٹ میں دوران مجلس دہشتگرد کی فائرنگ سے ذاکر نوید عاشق حسین کی شہادت کی پزور مذمت کرتے ہیں۔ ایک بار پھر مجالس عزا میں دہشتگردی کے واقعات سیکیورٹی اداروں کی کارکردگی پر سوالیہ نشان ہے۔
علامہ وسیم عباس معصومی نے اپنے مذمتی بیان میں کہا کہ ایک سوچی سمجھی سازش کے تحت ملک کے حالات خراب کیے جارہے ہیں، ملک میں ایک مخصوص ٹولے کو اپنے نظریات تھوپنے کی اجازت دی جا رہی ہے، اگر یہی صورتحال رہی تو ملک خانہ جنگی کی طرف جائے گا، انہوں نے کہا کہ یہ ملک لاالہ کی بنیاد پر بنا اور یہاں تمام مکاتب فکر کو اپنی عبادات انجام دینے کا حق ہے، اداروں کی آشیر باد سے کالعدم جماعتوں کو ہیرو بنا کر پیش کیا جا رہا ہے، حکومت اور سیکیورٹی ادارے فی الفور اس قاتل کی پشت پناہی کرنے والوں کے خلاف سخت کاروائی کرے، اور متشدد نظریات کے حامل افراد اور جماعتوں کا قلعہ قمع کرے۔
وحدت نیوز(ملتان)صدر مجلس وحدت مسلمین جنوبی پنجاب علامہ اقتدار حُسین نقوی کہتے ہیں کہ افغانستان ہمیشہ عالمی سامراجی طاقتوں کی سازشوں کا مرکز رہا ہے۔ عالمی طاقتیں کبھی افغانستان میں امن نہیں ہونے دینگے۔ دنیا کی دو بڑی طاقتوں کی لڑائی میں ہمیشہ مسلمان و اسلام اور خصوصاً شیعہ مسلک کو ہی نشانہ بنایا جاتا رہا ہے۔دنیا کا ہر غیرِ اسلام معاشرہ و نظام اس وقت اسلام اور شیعہ مسلمانوں سے خائف ہے۔
اس بات کا اظہار انہوں نے میڈیا سیل اور شعبہ اطلاعات کے دوستوں سے کیا کہ تشیع کے پاس اس وقت نظریہِ آخر الزمان ہے اور یہ عقلی و منطقی اور حتمی نظریہ ہے۔ دنیا کی سامراجی طاقتیں اپنے مکڑی سے کمزور نظاموں کو بچانے کیلئے اوچھے ہتھکنڈے استعمال کررہی ہیں کبھی مسلم ممالک کے اندر خانہ جنگی کرواتی ہے تو کبھی عراق و شام اور افغانستان کی مثل خود قابض ہوجاتی ہیں۔اور افغانستان و پاکستان کے ہزارہ شیعہ افراد کی نسل کشی دراصل عراق و شام میں ان سامراجی طاقتوں کو پہنچنے والی شکست کی خفت مٹانے کی کوششیں ہیں جو اس نسل اور شیعہ قوم نے انکو دھول چٹائی ہے۔
علامہ اقتدار حُسین نقوی کا کہنا تھا کہ شیعہ قوم کے تحرک کا نکتہ و مؤجب کربلا ہے۔ خونِ حسین ع وہ شعلہ ہے جو قیامت تک ہر شیعہ کو حرارت بخشتا رہے گا۔ ہماری گردنیں امام حُسین ع کی امانت ہیں، اور شھادتوں کا سلسلہ کبھی ختم نہ ہوگا۔ یہ مبارزہ، یہ جنگ، یہ مزاحمت و مقاومت تا انقلابِ غلبہِ امامِ زمانہ عج جاری ساری رہے گی۔
وحدت نیوز(اسلام آباد)مجلس وحدت مسلمین پاکستان کے چیئرمین علامہ راجا ناصر عباس جعفری نے افغانستان کے دارالحکومت کابل کے شیعہ اکثریتی علاقے دشت برچی میں معصوم بچیوں پر ہونے والے وحشیانہ حملے کی شدید الفاظ میں مذمت کرتے ہوئے اسے بزدلانہ اقدام قرار دِیا ہے۔
انہوں نے کہا ہے کہ افغانستان میں طالبان حکومت کے برسر اقتدار آنے کے دوران شیعہ ہزارہ برادری پر ظالمانہ اور غیر انسانی کارروائیوں میں اضافہ ہوا ہے جن میں سینکڑوں معصوم جانوں کا نقصان ہو چکا ہے لیکن طالبان حکومت ہزارہ برادری کا تحفظ کرنے میں مسلسل ناکام رہی ہے۔ایک سال کے عرصے میں کئی سفاکانہ حملے کیئے گئے ہیں جن میں ہسپتال ،تعلیمی مراکز مساجد و امام بارگاہ شدید متاثر ہوئے ہیں معصوم بچیوں پر کیا گیا یہ تیسرا بزدلانہ حملہ ہے ۔اس بربریت پر انسانی حقوق کا ڈھنڈورا پیٹنے والے عالمی اداروں اور ممالک کی خاموشی افسوس ناک ہے۔
انہوں نے کہا کہ موجودہ طالبان حکومت اس ظلم وبربریت کے ذمہ دار ہیں اس طرح کے مسلسل حملے جاری رہنا اور حکومتی اداروں کیطرف سے انہیں روکنے میں مسلسل ناکامی انکی کارکردگی اور سوچ پر سوالیہ نشان ہے ، اب تک ان حملوں میں ملوث افراد اور شدت پسند گروہوں کی حکومتی سطح پر نہ تو باقاعدہ نشاندہی کی کئی ہے اور نہ ہی منصوبہ بندی کرنے دہشت گرد قانون کی گرفت میں آئے۔
وحدت نیوز(ملتان)ترجمان مجلس وحدت مسلمین جنوبی پنجاب عاطف حسین کا کہنا تھا کہ مجلس وحدت مسلمین پاکستان کے مرکزی چیئر مین علامہ راجہ ناصرعباس جعفری تین روزہ دورے پر جنوبی پنجاب کا دورہ کریں گے ۔3اکتوبر کو عمائدین ملت ملتان سے مسجد ولی العصر گلشن واحد کالونی میں خصوصی خطاب کریں گے۔
4،اکتوبر کو ملتان میں ملی یکجہتی کونسل جنوبی پنجاب کیطرف سے صبحانہ دیا جائے گا اور ملتان ڈسٹرکٹ بارسے خطاب فرمائیں گے اور تنظیمی اجلاسوں میں خصوصی شرکت کریں بعد از نماز مغرب مجلس علمائے شیعہ جنوبی پنجاب کے اجلاس میں شرکت کریں گے۔5،اکتوبر کو جنوبی پنجاب کے حالیہ سیلابی علاقوں ڈی جی خان اور تونسہ کا،دورہ کریں گے۔سیلاب متاثرین سے ملاقات کریں گے عمائدین شہر کیطرف سے منعقدہ سیمینار میں شرکت کریں گے۔
وحدت نیوز(جیکب آباد)کابل کے مظلوم شیعہ ہزارہ شہداء کی یاد میں مدرسہ خاتم النبیین صلی اللہ علیہ وآلہ وسلم جیکب آباد میں تقریب شمعیں روشن کی گئیں۔ اس موقع پر مجلس وحدت مسلمین پاکستان کے مرکزی رہنما علامہ مقصود علی ڈومکی نے شہدائے کابل کو زبردست خراج عقیدت پیش کرتے ہوئے کہا کہ افغانستان شیعیان علی علیہ السّلام کی مقتل گاہ بن چکا ہے۔ طالبان حکومت اھل تشیع کے تحفظ میں بری طرح ناکام ہوچکی ہے۔ جس کے سبب لوگ یہ کہنے پر مجبور ہوئے ہیں کہ اس قتل عام کی تمام تر ذمہ داری طالبان پر عائد ہوتی ہے۔
انہوں نے کہا کہ تعلیمی اداروں پر حملہ کرنے والے علم اور انسانیت کے دشمن معصوم بچوں اور خواتین پر حملہ کرکے یزید اور شمر کے مظالم کی یاد تازہ کر رہے ہیں۔ حسین ابن علی علیہما السلام کے پیروکار آج بھی بے مثال قربانیاں دے کر حسینیت کی راہ کو زندہ رکھے ہوئے ہیں۔ ہزارہ قوم کو اہل بیت علیہم السلام سے عشق و محبت کے جرم میں ہر دور کے یزیدیوں نے ظلم و بربریت کا نشانہ بنایا۔
انہوں نے کہا کہ ہم کابل کے مظلوموں کے ساتھ ہیں اور ان کے غم میں برابر کے شریک ہیں۔ اقوام متحدہ اور عالمی ادارے کابل افغانستان میں جاری شیعہ ہزارہ نسل کشی کا نوٹس لیں۔انہوں نے طالبان حکومت سے اس قتل عام کو روکنے کا مطالبہ کیا۔ اس موقع پر شہدائے کابل افغانستان کے لئے دعائے مغفرت کی گئی۔
وحدت نیوز(اسلام آباد) مجلس وحدت مسلمین شعبہ خواتین کی مرکزی صدر سیدہ معصومہ نقوی نے افغانستان کے دارلحکومت کابل کے نواح دشت برجی کے ایک تعلیمی ادارے میں ہونے والے دہشتگردی کے واقعہ کی سخت مذمت کرتے ہوئے کہا کہ ایک سوچی سمجھی سازش اور پلاننگ کے تحت افغانستان میں شیعہ مسلک کو نشانہ بنایا جارہا ہے کبھی مساجد اور کبھی تعلیمی ادارے کبھی بزرگ و جوان تو کبھی معصوم بچے ان دہشتگرانہ واقعات میں بے دردی سے شہید کر دیے گئے عالمی میڈیا اور انسانی حقوق کے ادارے اس انسانیت سوز واقعے پر ایک بار پھر مجرمانہ خاموشی کا شکار ہیں۔
انہوں نے کہا دہشتگردوں نے افغان ہزارہ برادری کے مستقبل کو نشانہ بنایا ہے جس سے یہ بات ثابت ہے کہ دشمن شیعیان امام علی علیہ سلام سے کس قدر خوفزدہ ہے جو ہمیشہ غیر مسلح نمازیوں ، معصوم بچوں اور طلباء و طالبات کو نشانہ بنا کر اپنی بزدلی کا ثبوت پیش کرتے ہیں یہ شہادتیں ان شاء اللہ اپنے قاتلوں کو کیفر کردار تک پہنچائیں گی۔
وحدت نیوز(شگر) ڈپٹی کمشنرضلع شگر شہریار شیرازی نے کہا ہے کہ جو معاملہ پچھلے چھ سالوں سے حل نہیں ہو پا رہا تھا وہ آغا علی رضوی صاحب نے چند گھنٹوں میں حل کرکے عوام اور انتظامیہ پر احسان کیا ہے،جس پر آغاعلی رضوی صاحب کے مشکور ہیں۔
دیرینہ تصفیہ طلب ہسپتال کا معاملہ دونوں فریق اور انتظامیہ کے ساتھ کامیاب مذاکرات کے بعد حل ہوگیا اور ہسپتال پر کام بھی شروع ہوگا۔ایم ڈبلیوایم ضلع شگر کے ضلعی سیکریٹریٹ میں اجلاس منعقد ہوا جس کی صدارت آغاسید علی رضوی نے کی اجلاس میں ڈپٹی کمشنرضلع شگر شہریار شیرازی سمیت دیگر اعلیٰ حکام اور علاقہ معززین شریک تھے۔
اس موقع پر ڈسی شگر نےکہا کہ جو معاملہ پچھلے6 سالوں سے حل نہیں ہو پا رہا تھا وہ مجلس وحدت مسلمین گلگت بلتستان کے صوبائی صدر آغا علی رضوی صاحب نے چند گھنٹوں میں حل کرکے عوام اور انتظامیہ پر احسان کیا ہے۔جس پر آغاعلی رضوی صاحب کے مشکور ہیں۔
وحدت نیوز(کوئٹہ)مجلس وحدت مسلمین بلوچستان کے صوبائی نائب صدر سہیل اکبر شیرازی نے اپنے جاری کردہ بیان میں افغانستان میں ہزارہ نشین علاقہ میں تعلیمی ادارے پر خودکش حملہ میں شہادتوں پر نہایت افسوس کا اظہار کرتے ہوئے کہا ہے کہ افغانستان کے دارالحکومت کابل کے ہزارہ اکثریتی علاقے دشت برچی میں تعلیمی ادارے کے باہر خودکش دھماکہ میں معصوم نوجوان طالب علموں کو خون کی ہولی میں نہلانا بزدلانہ کارروائی ہے۔
انہوں نے کہا کہ افغانستان میں ہزارہ شیعہ برادری کو مسلسل دہشتگردی کا نشانہ بنایا جا رہا ہے۔ معصوم بچوں کو بے دردی سے شہید کرنا کھلی دہشتگردی ہے اور دہشتگردی پر عالمی حقوق کی تنظیموں و اداروں کا مجرمانہ خاموشی اختیار کرنا نہایت افسوسناک عمل ہے۔ ہم اس سفاکانہ فعل کی پرزور مذمت کرتے ہیں۔ انہوں نے دعا کی کہ اللہ تعالیٰ پسماندگان کو صبر جمیل عطاء فرمائے۔
