The Latest
وحدت نیوز(جیکب آباد)شہدائے سانحہ شب عاشور جیکب آباد کی ساتویں برسی کے سلسلے میں وارثان شہداء کا اہم اجلاس علامہ مقصود علی ڈومکی کی زیر صدارت مدرسہ خاتم النبیین صلی اللہ علیہ وآلہ وسلم جیکب آباد میں منعقد ہوا۔ اجلاس سے خطاب کرتے ہوئے مجلس وحدت مسلمین پاکستان کے مرکزی رہنماء علامہ مقصود علی ڈومکی نے کہا کہ اہل حق نے ہر دور میں دین خدا کی سربلندی کے لئے قربانیاں دیں۔ حسینیت کی چودہ سو سالہ تاریخ راہ خدا میں قربانیوں سے عبارت ہے۔ پنجاب میں ذاکر اہل بیت نوید عاشق حسین بی اے اور کابل میں شیعہ ہزارہ طلباء و طالبات کی شہادت راہ خدا اور راہ حسینیت میں ہے۔ انہیں عشق اہل بیت علیہم السلام کے جرم میں دہشتگردی کا نشانہ بنایا گیا۔ انہوں نے کہا کہ پاکستان میں ایک مرتبہ پھر دہشتگرد منظم ہو رہے ہیں۔
حکومت اور ریاستی ادارے دہشتگردوں کی سرگرمیوں پر کڑی نظر رکھیں اور انہیں دوبارہ منظم ہونے سے روکیں۔ کالعدم تنظیموں اور دہشت گردوں کی بڑھتی ہوئی سرگرمیاں ملکی عزت وقار اور سالمیت کے لئے سنگین خطرہ ہے۔ نئے دہشتگرد ٹولے کے پیچھے کون سی ملک دشمن قوتیں ہیں اس پر نظر رکھنے کی ضرورت ہے۔ انہوں نے کہا کہ 23 اکتوبر 2022 بروز اتوار کو شہدائے جیکب آباد کی برسی کے موقع پر مقتل شہداء جیکب آباد پر عظیم الشان ریلی اور عظمت شہداء کانفرنس کا انعقاد کیا جائے گا۔ عظمت شہداء کانفرنس سے علماء کرام اور تنظیمی رہنما خطاب کریں گے۔ اس موقع پر وارثان شہداء علمائے کرام اور اکابرین نے برسی شہداء کے سلسلے میں اپنی تجاویز سے آگاہ کیا۔
وحدت نیوز(لاہور) ذاکر اہل بیت نوید عاشق بی اے کو گورنر ہاؤس لاہور کے سامنے نماز جنازہ کی ادائیگی اور دھرنا دینے کے بعد قبرستان مومن پورہ میں سپرد خاک کردیاگیا ہے۔ نماز جنازہ میں مجلس وحدت مسلمین پاکستان کے وائس چیئرمین حجت الاسلام و المسلمین علامہ سید احمد اقبال رضوی ،صوبائی نائب صدر علامہ سید حسن رضا ہمدانی ،شیعہ علماءکونسل،آئی ایس او، تحریک نفاذ فقہ جعفریہ سمیت دیگر شیعہ جماعتوں کے رہنماؤں،ذاکرین اور کارکنوں نے شرکت کی۔ نماز جنازہ کے شرکاءنے ماتم کیا اور حکومت کیخلاف شدید نعرے بازی بھی کی۔ قبل ازیں مقتول کی رہائش گاہ سے اُن کی میت سخت سکیورٹی اور جلوس کی شکل میں لائی گئی، گورنر ہاؤس کے باہر مقررہ وقت سے پہلے ہی سوگواروں کی بہت بڑی تعداد موجود تھی۔
نماز جنازہ کی ادائیگی سے قبل مولانا حسن رضا ہمدانی سمیت دیگر شیعہ جماعتوں کے رہنماؤں نے بھی خطاب کیا اور کہا کہ ملک میں کوئی فرقہ واریت نہیں، یہ ایک مخصوص گروہ ہے، جو بیرونی قوتوں کا آلہ کار بن کر ملک کا امن داو پر لگا رہے ہیں۔
علامہ سید حسن رضا ہمدانی نے کہا کہ بدقسمتی سے ہمارے ملک کو اشرافیہ نے قائد اعظم محمد علی جناح کے دیئے ہوئے اصولوں سے ہٹا کر مسلکی مملکت بنانے کے لیے دہشت گرد پال کر قوم کی گردن پر مسلط کر دئیے پاکستان بنانے کی مخالف قوتوں کو پاکستانیوں کے سر پر سوار کر کے ملک کو تباہی کے دھانے پر لا کھڑا کر دیا گیا۔ ہزاروں شہادتیں دینے کے بعد ملک امن کی آغوش میں آنے سے پہلے ہی نہ امن کردیا جاتا ہے۔بین الاقوامی شہرت یافتہ ذاکر اہل بیت نوید عاشق بی اے دوران مجلس فائرنگ سے شہید کرنا پولیس اور قانون نافذ کرنے والے اداروں پر سوالیہ نشان ہے ان کے بیگناہ قتل کی پر زور مذمت کرتے ہیں،حکومت شہید کے قاتل کا جلد ٹرائل کر ے اور اس کے سہولت کاروں کوفی الفور گرفتار کر کے کیفر کردار تک پہنچائے۔
شہیدکا قاتل فقط وہ ملعون نہیں جس نے گولی چلائی۔ شہید کے قتل پر جوڈیشل انکوائری مقرر کر کے حقائق سامنے لائے جائیں۔ ان تمام افراد کو کٹہرے میں لایا جائے جنہوں نے ذہن سازی کی،نشانہ بازی کی تربیت دی ،اسلحہ فراہم کیا۔ہر سہولت کار قانون کے شکنجے میں آنا چاہیے۔ سیالکوٹ سمیت ملک بھر میں انتہا پسندوں کی دہشت گردانہ کارروائیوں کیخلاف پنجاب حکومت کی مجرمانہ خاموشی افسوسناک ہے۔ لاقانونیت کی تمام حدیں پار کی جا رہی ہیں۔ ہم پاکستانی ہیں ہمیں بھی جینے کا حق دیا جائے۔ قتل بھی ہم ہوتے ہیں پابندی بھی ہمارے اوپر لگائی جاتی ہے۔
وحدت نیوز(مظفرآباد)ذاکر آل محمدؑ نوید عاشق بی اے کی شہادت ایک المناک سانحہ اور قانون نافذ کرنے والے اداروں کی کارکردگی پر سوالیہ نشان ہے، دہشت گردی اور شیعہ نسل کشی کی جو لہر تھمی تھی، لگتا ہے کہ دوبارہ اس کا منظم آغاز کر دیا گیا ہے۔ حکومت کے اندر دہشتگردوں کے سرپرست اور سابقہ سیاہ کار دہشتگرد موجود ہیں جو شیعہ نسل کشی اور دہشتگردی کے واقعات کی سرپرستی کرتے ہیں۔ ان خیالات کا اظہار مولانا سید تصور حسین نقوی الجوادی ممبر علماء و مشائخ کونسل حکومت آزاد کشمیر و رہنماء مجلس وحدت مسلمین نے ذاکر نوید عاشق بی اے کی پرملال شہادت پر اپنے تعزیتی و مذمتی بیان میں کیا۔ انہوں نے مزید کہا کہ ذاکر نوید عاشق کے والد مرحوم ذاکر و شاعر اہلیبیتؑ عاشق حسین بی اے بھی ایک شہرہ آفاق شاعر اور ذاکر تھے جنھوں نے طویل عرصہ تک پاکستان اور دنیا بھر میں ولایت امیر المومنین ع و عزاداری سید الشھدا ع کی تبلیغ و ترویج کے لیے خدمات سرانجام دیں۔
مولانا سید تصور حسین نقوی الجوادی نے کہا کہ ان کے فرزند ذاکر نوید عاشق بھی ان کے حقیقی جانشین تھے۔ دونوں باپ بیٹا طویل عرصہ تک دربار بی بی پاک دامن کی خدمت میں بھی مشغول رہے۔ مولانا جوادی نے مسلح افواج پاکستان اور ماتحت خفیہ اداروں سے ذاکر آل محمد ع نوید عاشق کے قاتلوں میں بے نقاب کرنے اور انکے ورثاء کو انصاف دلانے میں اپنا کردار ادا کرنے کا مطالبہ کیا ہے چونکہ ضرب عضب اور نیشنل ایکشن پلان کے بعد ان واقعات میں کافی حد تک کمی آگئی تھی جبکہ ملت تشیع کی نظریں بھی افواج پاکستان کی طرف ہیں۔
وحدت نیوز(کراچی)مجلس وحدت مسلمین پاکستان کے وائس چیئرمین علامہ سید احمد اقبال رضوی کی وفد کے ہمراہ کراچی کے تھانہ درخشاں ڈیفنس آمد، مزار امام زادہ حضرت عبد اللہ شاہ غازی علیہ السلام پر ان کے جد امجد حضرت امام حسن مجتبی علیہ السلام کی شہادت کے موقع پر عزاداری کے جرم میں گرفتار شیعہ سنی عزاداروں سے ملاقات اور ان کی حوصلہ افزائی۔ اس موقع پر ایم ڈبلیو ایم کراچی ڈویژن کے صدر علامہ صادق جعفری، علامہ ملک غلام عباس، علی احمر زیدی، ضلع ملیر کے صدر سید احسن عباس رضوی، ضلع شرقی کے صدر حسن رضا، ثمر سعید رضوی، کاظم نقوی، سلیم کاظمی و دیگر بھی موجود تھے۔
علامہ سید احمد اقبال رضوی نے حوالات کے دروازے پر کھڑے ہوکر فضائل و مصائب باب الحوائج امام موسی کاظم علیہ السلام و اسیران کوفہ و شام بیان کئے اور تمام عزاداروں کی جلد رہائی اور شہید ذاکر اہل بیت (ع) نوید عاشق بی اے کی مغفرت کی اجتماعی دعا بھی کی۔ اس موقع پر تھانہ درخشاں کی فضاء نعرہ حیدری و محمدؐ و آل محمدؑ پر درود اور گریہ و زاری سے گونج رہی تھی۔ علامہ صادق جعفری و دیگر رہنماؤں نے کہا کہ انشاءاللہ تمام عزادار رہا ہوکر اپنے گھروں کو واپس جائیں گے، ہم آخر وقت تک آپ کے شانہ بشانہ کھڑے ہیں۔
وحدت نیوز(اسلام آباد) مجلس وحدت مسلمین پاکستان کے وائس چیئرمین علامہ سید احمد اقبال رضوی نے اپنے ایک بیان میں کہا ہے کہ ہم وفاقی دارالحکومت اسلام آباد میں گزشتہ ایک ہفتے سے جاری کسان اتحاد کے پر امن احتجاج اور مطالبات کی حمایت کرتے ہیں جن میں بجلی کے بلوں میں اضافی ٹیکس کا خاتمہ ، ٹیوب ویل کے یونٹوں پر دی گئی سبسڈی کی بحالی ،کھادوں کی قیمتوں میں کمی، معیاری بیجوں کی فراہمی اور سستی کیڑے مار ادویات کا میسر ہونا شامل ہے فصل کی کاشت سے لے کر کٹائی تک اٹھنے والے بھاری اخراجات نے کسانوں کی کمر توڑ کر رکھ دی ہے کسان اتحاد کے مطالبات جائز اور حقیقت پر مبنی ہیں۔
انہوں نے کہا ہے کہ حکومت جواب دے کہ آخر کسانوں کا کونسا مطالبہ ناجائز ہے جس کی وجہ سے مذاکرات ناکام رہے ہیں اور کسان سات دنوں سے دھرنا دینے پر مجبور ہیں کسان اس کمر توڑ مہنگائی میں اپنا پیٹ پالے یا ملک کے لیے اناج اگائے جب فصل پر لاگت ہی آمدن سے زیادہ ہوگی تو کسان فصل اگانے کو ترجیح کیسے دے گا لہذا حکومت کو چاہیے کہ ہوش کے ناخن لے اور کسانوں کے مطالبات کو فی الفور منظور کرے تاکہ ان کے ساتھ ہونے والی زیادتیوں کا ازالہ ہو سکے۔
وحدت نیوز(کراچی) مجلس وحدت مسلمین پاکستان کراچی کے زیر اہتمام کابل میں بے گناہ طلبا و طالبات کے قتل عام و ذاکر اہل بیتؑ نوید عاشق کے قتل کے خلاف خراسان تا نمائش چورنگی ریلی نکالی گئی۔ ریلی سےخطاب کرتے ہوئے علامہ باقر عباس زیدی، علامہ شیخ محمد صادق جعفری، علامہ حیات عباس نجفی و دیگر نے خطاب کرتے ہوئے کہا کہ نامور ذاکر نوید عاشق بی اے کو دہشت گردی کا نشانہ بنائے جانے کی شدید الفاظ میں مذمت کرتے ہوئے اسے سیکورٹی اداروں کی نااہلی قرار دیا ہے۔ انہوں نے کہا ہے کہ ملک میں ایک بار پھر شیعہ ٹارگٹ کلنگز کا منظم آغاز کیا جارہا ہے، دہشت گرد عناصر کے پشت پناہ حکومت کے اندر موجود ہیں، ملکی سالمیت و بقاء کو ذاتی مفادات کی بھینٹ چڑھانے کی کوشش کو کامیاب نہیں ہونے دیا جائے گا، مقتدر قوتیں ہوش کے ناخن لیں، شدت پسند طاقتوں کا راستہ روکنے کے لئے سخت ترین اقدامات کرنے ہوں گے۔
ان کا کہنا تھا کہ ریاستی ادارے ملک بچانے کے لئے قومی سلامتی کے دشمنوں پر آہنی ہاتھ ڈالیں، قانون و انصاف کے تقاضوں کی راہ میں تعصب، مسلکی سوچ اور جانبداری جیسی چیزوں کو رکاوٹ نہ بننے دیا جائے۔ انہوں نے نوید عاشق کے قاتل اور دیگر ذمہ داران کو قانون کے مطابق سخت ترین سزا کا مطالبہ کیا ہے۔ انہوں نے کہا کہ جرائم پیشہ عناصر کی سزا میں تاخیر ان کے حوصلے میں اضافے کا باعث بنتی ہے، شدت پسند ملک و قوم کے مجرم ہیں انہیں قانون کے شکنجے میں لانا ریاستی اداروں کی اولین ذمہ داری ہے۔ مقررین نے کہا کہ دارالحکومت کابل کے شیعہ اکثریتی علاقے دشت برچی میں معصوم بچیوں پر ہونے والے وحشیانہ حملے کی شدید الفاظ میں مذمت کرتے ہوئے اسے بزدلانہ اقدام قرار دیا ہے۔ رہنماؤں نے کہا ہے کہ افغانستان میں طالبان حکومت کے برسر اقتدار آنے کے دوران شیعہ ہزارہ برادری پر ظالمانہ اور غیر انسانی کارروائیوں میں اضافہ ہوا ہے جن میں سینکڑوں معصوم جانوں کا نقصان ہو چکا ہے لیکن طالبان حکومت ہزارہ برادری کا تحفظ کرنے میں مسلسل ناکام رہی ہے۔
ان کا کہنا تھا کہ ایک سال کے عرصے میں کئی سفاکانہ حملے کئے گئے ہیں جن میں ہسپتال، تعلیمی مراکز مساجد و امام بارگاہ شدید متاثر ہوئے ہیں معصوم بچیوں پر کیا گیا یہ تیسرا بزدلانہ حملہ ہے، اس بربریت پر انسانی حقوق کا ڈھنڈورا پیٹنے والے عالمی اداروں اور ممالک کی خاموشی افسوسناک ہے۔ رہنماؤں نے کہا کہ موجودہ طالبان حکومت اس ظلم وبربریت کے ذمہ دار ہیں، اس طرح کے مسلسل حملے جاری رہنا اور حکومتی اداروں کی طرف سے انہیں روکنے میں مسلسل ناکامی انکی کارکردگی اور سوچ پر سوالیہ نشان ہے، اب تک ان حملوں میں ملوث افراد اور شدت پسند گروہوں کی حکومتی سطح پر نہ تو باقاعدہ نشاندہی کی کئی ہے اور نہ ہی منصوبہ بندی کرنے دہشت گرد قانون کی گرفت میں آئے۔
مقررین نے امامزادہ حضرت عبد اللہ شاہ غازیؑ کے مزار پر عزاداری کے جرم میں گرفتاراسیروں کی فوری رہائی کا مطالبہ بھی کیا اور کہا کہ سندھ حکومت متعصبانہ ورویہ ترک کرکے تمام اسیروں کو فوری رہا کرے، دہشت کردی کی دفعات پر مشتمل بلاجواز ایف آئی آرفوری ختم کی جائےاور کمشنر کراچی کی جانب سے مزار پر عزاداری کے خلاف جاری نوٹیفکیشن فوری واپس لیا جائے ۔
وحدت نیوز(جیکب آباد) مدرسہ المصطفی خاتم النبیین صلی اللہ علیہ وآلہ وسلم جیکب آباد میں متاثرین سیلاب اور وارثان شہداء کے درمیان 70 راشن اور 115 مچھر دانیاں تقسیم کی گئیں۔ اس موقع پر مجلس وحدت مسلمین پاکستان کے مرکزی رہنماء علامہ مقصود علی ڈومکی نے کہا کہ دکھی انسانیت کی خدمت عظیم عبادت ہے۔ ہم مولائے کائنات حضرت علی مرتضیٰ علیہ السلام کے ماننے والے ہیں جو راتوں کو روٹی کی بوریاں اٹھا کر غریبوں کے گھر جاتے اور ان کی مدد فرماتے تھے۔ پیروان اہل بیت آل رسول کی سیرت طیبہ کی روشنی میں خدمت انسانیت کو اپنا شعار بنائیں۔ ہم متاثرین سیلاب کی مکمل بحالی تک حسب استطاعت ان کی خدمت جاری رکھیں گے۔
انہوں نے کہا کہ ملک بھر میں شیعہ سنی مسلمان مل کر عید میلاد النبی صلی اللہ علیہ وآلہ وسلم اور ھفتہ وحدت منائیں گے۔ اتحاد بین المسلمین قرآن کریم سنت نبوی اور سیرتِ اہل بیت علیہم السلام سے ثابت ہے۔ اسلام دشمن سامراجی قوتیں امت مسلمہ کے درمیان اختلافات کو ہوا دے کر انتشار اور افتراق پیدا کرنا چاہتی ہیں جو ان کے سامراجی اھداف لڑاؤ اور حکومت کرو کے استکباری منصوبے کا حصہ ہے۔ انہوں نے کہا کہ اتحاد امت مسلمہ کے جذبے کے تحت شیعہ سنی علماء کرام مشائخ عظام وارثان شہداء و اکابرین کی قیادت میں 23 اکتوبر کو جیکب آباد میں عظیم الشان لبیک یا رسول اللہ ریلی نکالی جائے گی۔
وحدت نیوز(شکارپور)چہلم امام حسینؑ کے موقع پر تعلقہ لکی غلام شاہ ضلع شکارپورچک میں جلوس اربعین میں پیدل شریک ہونے والے عزاداروں پر ریاستی مدعیت میں درج ایف آئی آر میں نامزد تمام عزادار مجلس وحدت مسلمین ضلع شکارپور کے صدر اصغر علی سیٹھار کی شب وروز کوششوں سے سول کورٹ سے باعزت بری کردیئے گئے۔
تفصیلات کے مطابق جلوس اربعین میں پیدل شرکت کرنےکو جرم قرار دیکر ماورائے آئین و قانون تعلقہ لکی غلام شاہ ضلع شکارپورچک کے درجنوں عزاداروں پر درج مقدمے کا فیصلہ سناتے ہوئے سول جج نے کیس کو خارج کرتے ہوئے تمام نامزد عزاداروں کو باعزت بری کرنے کا حکم جاری کردیا ہے۔
اس موقع پر تمام عزاداروں اور ان کے اہل خانہ سمیت مومنین شکار پور نے مجلس وحدت مسلمین ضلع شکارپور کے صدر اصغر علی سیٹھار کا خصوصی شکریہ ادا کیاجن کی مسلسل جدوجہد اور کوششوں سے عدالت نے ان تمام عزاداروں کو باعزت بری قرار دیا ہے ۔
وحدت نیوز(اسلام آباد) مجلس وحدت مسلمین کے زیر اہتمام مرکزی کردار سازی ورکشاپ نومبر کے پہلے ھفتہ میں اسلام آباد میں ہوگی۔جسمیں ملک بھر سے صوبائی کابینہ کے اراکین شریک ہونگے۔مرکزی رہنما اور سینئر اساتید مختلف علمی ،فکری اور ثقافتی موضوعات پر لیکچر دینگے۔
ایم ڈبلیوایم کےوائس چئیرمین علامہ سید احمد اقبال رضوی نے کہا کہ ایم ڈبلیوایم کے زیر اہتمام مرکزی کردارسازی ورکشاپ برائے صوبائی مسئولین انشاءاللہ 4،5،6 نومبر کو جامعہ امام صادق ؑ اسلام آباد میں منعقد ہوگی ۔
وحدت نیوز(لاہور)مجلس وحدت مسلمین پنجاب کے سینئر نائب صدر علامہ سید حسن رضا ہمدانی نے دیگر شیعہ جماعتوں کے رہنمائوںاور ذاکرین عظام کے ہمراہ پریس کانفرنس سے خطاب کرتے ہوئے کہا ہے کہ بانی پاکستان قائد اعظم محمد علی جناح کےدو ٹوک انداز میں فرمایا تھا کہ ریاست کو آپ کے مذہب سے سروکار نہیں آپ سب آزاد ہیں ہر کوئی اپنی مذہبی آزادی کے ساتھ عبادات بجا لائے لیکن بدقسمتی سے ہمارے ملک کو اشرافیہ نے قائد اعظم محمد علی جناح کے دیئے ہوئے اصولوں سے ہٹا کر مسلکی مملکت بنانے کے لیے دہشت گرد پال کر قوم کی گردن پر مسلط کر دئیے پاکستان بنانے کی مخالف قوتوں کو پاکستانیوں کے سر پر سوار کر کے ملک کو تباہی کے دھانے پر لا کھڑا کر دیا گیا۔
رہنماؤں نے کہا کہ ہزاروں شہادتیں دینے کے بعد ملک امن کی آغوش میں آنے سے پہلے ہی نہ امن کردیا جاتا ہے۔بین الاقوامی شہرت یافتہ ذاکر اہل بیتؑ جناب نوید عاشق بی اے دوران مجلس فائرنگ سے شہید کرنا پولیس اور قانون نافذ کرنے والے اداروں پر سوالیہ نشان ہے ان کے بیگناہ قتل کی پُر زور مذمت کرتے ہیں،حکومت شہید کے قاتل کا جلد ٹرائل کر کےاور اس کے سہولت کاروں کو فلفور گرفتار کر کے کیفر کردار تک پہنچائے۔ شھید کا قاتل فقط وہ ملعون نہیں جس نے گولی چلائی ۔شھید کے قتل پر جوڈیشل انکوائری مقرر کر کے حقائق سامنے لائے جائیں۔ ان تمام افراد کو کٹہرے میں لایا جائے جنہوں نے ذہن سازی کی،نشانہ بازی کی تربیت دی ،اسلحہ فراہم کیا۔ہر سہولت کار قانون کے شکنجے میں آنا چاہیے۔ سیالکوٹ سمیت ملک بھر میں انتہا پسندوں کی دہشتگردانہ کاروائیوں کیخلاف پنجاب حکومت کی مجرمانہ خاموشی افسوسناک ہے۔ آج گجرات میں ایک نامور خطیب کو مجلسِ عزا سے خطاب کرنا تھا شہر میں داخلہ پر پابندی لگا دی کہ ان پر ایف آئی آر ہے یہ بھی قتل نہ ہو جائیں۔ لاقانونیت کی تمام حدیں پار کی جا رہی ہیں۔ ہم پاکستانی ہیں ہمیں بھی جینے کا حق دیا جائے۔ قتل بھی ہم ہوتے ہیں پابندی بھی ہمارے اوپر لگائی جاتی ہے ۔ہم گھر میں مجلس کروانا چاہیں تو ہمیں کہا جاتا ہے اجازت لو۔آئین پاکستان کی کس شق کے تحت ہم سے اجازت کا مطالبہ کیا جاتا ہے۔
مقررین نے کہا کہ پنجاب بھر میں اربعین کے جلوس میں منظم ہو کر شامل ہونے پر ایف آئی آرز درج کر لی جاتی ہیں۔ہم اپنے پیشواؤں کی مشکلات و مصیبتوں اور ان پر ہونے والے مظالم کا تذکرہ کسی کے مقدسات کا نام لئے بغیر کریں تو بھی ایف آئی آرز درج کر لی جاتی ہیں۔ فور شیڈول ،سولہ ایم پی او ،سیون اے ٹی اے، پانچ منٹ مجلس و جلوس لیٹ ہونے پر لگا دی جاتی ہے۔دوسری طرف سر عام خاتون جنت سیدہ فاطمۃ الزہرا سلام اللہ علیہا کی شان میں گستاخی کرنے والا نہ صرف دندناتا پھرتا ہے بلکہ نوجوانوں کو ورغلا کر نفرت کے بیج بوتا پھرتا ہے ۔چند شر پسند امن کا کھلواڑ کرتے ہیں اور ادارے آڈیو لیکس بناننے اور پھیلانے پر لگے ہیں ۔ہم سات کروڑ شیعان حیدر کرار پاکستان میں بستے ہیں ۔ہمارے صبر کا اور کتنا امتحان لیا جائے گا ۔بس کر دو !خدا کے لیے دہشت گرد بنانا اور پالنا بند کریں۔ وفاقی وزیر داخلہ جو دہشت گردوں کی پشت پناہی میں شہرہ رکھتا ہے،اس کے وزیر داخلہ بنتے ہی پنجاب میں قتل و غارت گری شروع ہو جاتی ہے۔وفاقی حکومت کے مشیرعطا تارڑ کالعدم جماعتوں کے دفاتر جا کر ان کو شہہ دیتے ہیں ۔گورنر پنجاب جھنگ میں کالعدم جماعت کے دفتر جاتے ہیں اور ان کی پشت پناہی کرتے ہیں۔قانون نافذ کرنے والے ادارے ان شرپسندوں کی پس پردہ پشت پناہی کرتے ہے،جس کی زندہ مثال ایام عزا بلخصوص چہلم امام حسین علیہ السلام کے پر امن شرکاء پر پنجاب بھر میں درجنوں غیر قانونی ایف آئی آرز کا اندراج ہے۔ہم پنجاب حکومت کی منافقانہ پالیسی کی مذمت کرتے ہیں اور متنبہ کرتے ہیںکہ ہمیں مجبور نہ کیا جائے کہ ہم بلوچستان کی طرح آپ کی بھی حکومت کو پورے ملک کے لئے ایک مثال بنا دیں۔
بروز منگل شہید کا جسد خاکی ان کی رہائش گاہ مرغزار کالونی سے اٹھایا جائے گا ان کی نماز جنازہ تقریباً 12:30بجے دن گورنر ہاؤس کے سامنے ادا کی جائے گی ،ان کی تدفین مومن پورہ قبرستان لاہور میں کی جائے گی لاہور انتظامیہ،تمام متعلقہ اداروں سے گزارش ہے کہ سیکورٹی ودیگر انتظامات میں تعاون کریں۔آئندہ کے لائحہ عمل کا اعلان شہید کے نماز جنازہ میں کیا جائے گا ۔
پریس کانفرنس میں علامہ محمد باقر گھلو وفاق المدارس شیعہ پاکستان، علامہ کرامت عباس حیدری چیرمین خطباء و ذاکرین کونسل پاکستان، علامہ وقار الحسنین نقوی مرکزی کنوینر شیعہ شہریان پاکستان ،پیر سید نوبہار شاہ،چیئرمین شیعہ پولیٹیکل پارٹی پاکستان،سید حسن رضا کاظمی صوبائی رہنماء ایم ڈبلیو ایم پنجاب ،علامہ امتیاز عباس کاظمی،امام جمعہ سمن آباد لاہور ،علامہ حافظ کاظم رضا نقوی امام جمعہ بحریہ ٹاؤن لاہور،سیٹھ عدنان حیدر رہنماء ایم ڈبلیو ایم ،خرم نقوی رہنماء ایم ڈبلیو ایم ،امیر عباس مرزا رہنماء ایم ڈبلیو ایم ،نجم عباس خان صدر ایم ڈبلیو ایم لاہور، قاسم علی قاسمی صدر شیعہ علماء کونسل لاہور ڈویژن،حیدر ثقفی صدر امامیہ اسٹوڈنٹس آرگنائزیشن لاہور ڈویژن ،چوہدری صغیر ورک چیرمین تحفظ عزا کونسل پنجاب اورملک امیر مختار ،قمر عباس جدون ودیگر بھی شریک تھے۔
