وحدت نیوز (مظفرآباد) سیکرٹری جنرل مجلس وحدت مسلمین علامہ سید تصور حسین نقوی الجوادی مرکزی میلاد جلوس کے استقبالیئے سے خطاب کرتے ہوئے کہا کہ سلام ہو آج نکلنے والوں ، سلام ہو آج لبیک یا رسول اللہ کی صدائیں بلند کرنے والوں پر ، سلام ہو عاشقان مصطفےٰ پر، کہ پورا ملک بارود کی بوسے اٹا پڑا ہے، اور آپ نے لبیک یا رسولؐ اللہ اور درود سے ماحول کو منور کر دیا، رسول ؐ امن،رسولؐ رحمت کے ماننے والے آج وحدت اسلامی کا عملی مظاہرہ کر کے دنیا کو یہ بتا رہے ہیں کہ ہم دہشت گرد و دہشت گردی کوملک و اسلام کا دشمن سمجھتے ہیں ، ملک بارود کی بو سے اٹا پڑا ہے، عاشقان مصطفےٰؐ نے درود کی خوشبو سے سنوار دیا،انہوں نے کہا کہ شیعہ سنی وحدت ہی ملک و قوم کی بقاء ہے، وہ ملک کہ جس کی بنیاد لا الہ الا اللہ محمد رسول اللہ پر ہو ، اس ملک کے وسیع تر مفاد میں ہے کہ ملک کے حقیقی فرزند ایک پیج پر ہوں ، دشمنان اسلام و پاکستان کے خلاف کمر بستہ ہوں، قائداعظم و اقبال کے پاکستان کے حقیقی وجود کی خاطر اتحاد و یگانگت ہی واحد راستہ ہے، ہفتہ وحدت اسی عنوان سے منا رہے ہیں کہ وقت کی اہم ضرورت ہے کہ مسلمان وحدت کے پرچم تلے ایک ہوجائیں ، آج وقت کا طاغوت اپنی پوری توانایاں صرف کیئے ہوئے ہے کہ کسی طرح سے ملک و قوم کو نقصان پہنچایا جائے، مسلمانوں کو آپس میں لڑایا جائے، ظلم کا بازار گرم کیا جائے، اس بات کا عملی ثبوت کہیں ننھے پھولوں کو گولیوں سے بھون کر دیتا ہے، کہیں اساتذہ کو جلا کر دیتا ہے، کہیں مساجد میں حملے کر کے بتاتا ہے، کہیں امام بارگاہوں کو نشانہ بنا کر دکھاتا ہے، کہیں مزارات کو مسمار کر کے اپنے مقاصد کی تکمیل چاہتا ہے ، کہیں پرامن و نہتے شہریوں کی جانیں لیکر ملک و قوم کو ٹکڑوں میں تقسیم کرنا چاہتا ہے ،انہوں نے کہا کہ ضرورت اس امر کی کہ ہم دشمن شناس بن جائیں ، فروعی اور نہ ہونے کے برابر اختلاف کو ہوا دینے والوں کو تسلیم نہ کریں ، انہیں کالی بھیڑیں قرار دیکر اپنی صفوں سے نکال باہر کریں ، ہاتھوں میں ہاتھ ڈال کر ، کندھے سے کندھا ملا کر اغیار یا اغیار کے ایجنٹوں کو اپنے درمیان آنے کی جگہ نہ دیں ، ظلم و جبر کے خلاف ایک ہو جائیں ، رحمت دو عالم ؐ کے پرچم تلے جمع ہو جائیں۔انہوں نے کہا کہ الحمدلللہ پاکستان و خصوصاً پرامن خطہ آزاد کشمیر میں ہم سب کا ایک ہونا دنیا کے لیئے واضح پیغام ہے کہ ہم عاشقان رسول ؐ و آل ؑ رسول ؑ ہیں ، ہم بہادروں کے بہادر پیرو ہیں ، ہم ایک ہیں ، متحد ہیں ، خوشی و غمی ملکر کرتے ہیں ، اور وحدت کا عملی ثبوت پیش کرتے ہیں۔یہ شیعہ سنی وقت کے یزیدوں ، وقت کے ابن زیادوں ، وقت کے ابو لہبوں اور وقت کے یزویدوں کے خلاف ایک ہیں اس کا ثبوت سب کا ایک ساتھ نکل کر لبیک یا رسول اللہ کا نعرہ فضا میں بلند کرنا ہے۔

تفصیلات کے مطابق مجلس وحدت مسلمین آزاد جموں و کشمیر ضلع مظفرآباد کے زیر اہتمام عظیم الشان ریلی کا انعقاد کیا گیا، ریلی کا آغازریاستی سیکرٹریٹ مجلس وحدت مسلمین آزاد جموں وکشمیر سے ہوا، ریلی میں کثیر تعداد میں میں مجلس وحدت مسلمین کے کارکنان و عہدیداران نے شرکت کی ، ریلی کی قیادت سیکرٹری جنرل مجلس وحدت مسلمین علامہ سید تصور حسین نقوی الجوادی ، ریاستی کابینہ ، ضلعی سیکرٹری جنرل مولانا سید طالب حسین ہمدانی و ضلعی کابینہ نے کی، ریلی شہر کی مین شاہرا بینک روڈ سے ہوتی ہوئی مرکزی جلوس میں شامل ہوئی ، جبکہ فضا لبیک یا رسولؐ اللہ کے نعروں سے گونجتی رہی ، مرکزی جلوس میں شامل ہونے پر انجمن تاجران مدینہ مارکیٹ، سنی تحریک،سیرت کمیٹی اور تحریک منہاج القرآن نے پرتباک استقبال کیا ۔اس کے علاوہ مجلس وحدت مسلمین کے زیر اہتمام تمام اضلاع میں ریلیز کی صورت میں شرکت میلاد جلوس میں شرکت کی گئی، میرپور میں سیکرٹری جنرل ضلع میرپور سید ناظر عباس، کوٹلی میں سیکرٹری جنرل سید طاہر حسین بخاری، باغ میں سیکرٹری مالیات قیصر عباس بانڈے ، ہٹیاں بالا میں سیکرٹری جنرل ڈاکٹر عارف حسین کاظمی، میرپورہ ضلع نیلم میں سیکرٹری جنرل پیر سید ظاہر حسین نقوی کی قیادت میں ریلیز و وفود نے اہلسنت کے زیر اہتمام جلوسوں میں شرکت کی ۔

وحدت نیوز (مظفرآباد) پولیس گردی ناقابل قبول ، آزاد ی صحافت پر کسی قدغن کو برداشت نہیں کیا جائے گا، ایڈیٹر روزنامہ شمال پر پولیس گردی کی بھرپور مذمت کرتے ہیں ، ان خیالات کا اظہارڈپٹی سیکرٹری جنرل مجلس وحدت مسلمین آزاد جموں وکشمیر خالد محمود عباسی نے ریاستی سیکرٹریٹ سے جاری پریس ریلیز میں کیا ، انہوں نے کہاکہ روزنامہ شمال کے ایڈیٹر پر پولیس کی جانب سے بیہمانہ تشدد ناقابل قبول ، مجلس وحدت مسلمین آزاد جموں وکشمیر صحافی برادی کے ساتھ مکمل اظہار یکجہتی کرتی ہے، پولیس باعزت شہریوں کا خیال کرے اور خصوصی طور پر صحافی برادری کو تحفظ فراہم کرے ، پولیس کا کام تحفظ دینا ہوتا ہے، غنڈہ گردی نہیں ، ہم اس کی بھرپور مذمت کرتے ہیں ، اور وزیراعظم ، چیف سیکرٹری و آئی جی پی سے نوٹس لینے کا مطالبہ کرتے ہیں ، ایس ایس پی مظفرآباد معاملے کی سنگینی کا ادراک کریں ، آزادی صحافت پر کوئی بھی باعزت طبقہ میڈیا کی آزادی اور میڈیا سے وابستہ افراد سے ایسا نہیں کرتا، پولیس کو متحرک بنانے کے ساتھ ساتھ مہذب بھی بنایا جائے۔

وحدت نیوز (جعفرآباد) مجلس وحدت مسلمین بلوچستان کے زیر اہتمام صوبائی سیرت مصطفیٰ ﷺ کانفرنس و تربیتی ورکشاپ منعقد کی گئی۔اس موقع پر صوبہ ،ڈویژن ،ضلع اور یونٹس کے ۲۵۰ عھدیدار اور کارکن شریک ہوئے۔ تین روزہ صوبائی تربیتی ورکشاپ سے خطاب کرتے ہوئے ایم ڈبلیو ایم پاکستان کے سیکریٹری جنرل علامہ ناصر عباس عباس جعفری نے کہا ہے کہ ہم سیرت انبیاء ؑ کے پیروکار ہیں اور عید میلاد النبی ﷺ کے مبارک موقع پر حضور سید الانبیاءﷺ سے تجدید عہد کرتے ہیں کہ ہم انکی سیرت طیبہ کو اپناتے ہوئے دور حاضرکی باطل طاغوتی قوتوں کا مقابلہ کریں گے۔انہوں نے کہا کہ قرآن کریم مکمل نظام حیات ہے۔ جس کے ہوتے ہوئے ہمیں کسی اور نظام کی ضرورت نہیں۔

انہوں نے کہا کہ ۱۲تا ۱۷ ربیع الاول کے مبارک موقع پر تمام مسلمان اتحاد، وحدت اور اسلامی اخوت کا مظاہرہ کریں۔عید میلاد النبی کے جلوس عشق رسول ﷺ کا مظہر ہیں۔ ان جلوسوں میں بھر پور شرکت کی جائے۔اس موقع پرمجلس وحدت مسلمین پاکستان کے مرکزی رہنما علامہ احمد اقبال، محمد مہدی، یعقوب حسینی ، صوبائی سیکریٹری جنرل علامہ مقصود ڈومکی،  ممتاز عالم دین علامہ سید باقر زیدی ،علامہ سید قمر عباس نقوی،علامہ سیف علی حیدری ، صوبائی ڈپٹی سیکریٹری جنرل مولانا سیدظفر عباس شمسی،مولانا حسن رضا غدیری، عبد الوھاب لغاری و دیگر نے خطاب کیا۔ اس موقعہ پر دعائے توسل کا روح پرور اجتماع منعقد ہوا۔تین روزہ معرفت ولایت صوبائی تربیتی ورکشاپ میں ضلع صحبت پور، ضلع سبی، ضلع نصیر آباد، ضلع جعفر آباد، ضلع جھل مگسی، ضلع کچھی، بولان، ضلع لہڑی، تنظیمی ضلع گنداخہ کے ۲۵۰ کارکن شریک ہیں۔

وحدت نیوز (ایبٹ آباد) مجلس وحد ت مسلمین ڈسٹرکٹ ایبٹ آباد کے زیر اہتمام کل ہزارہ نعتیہ مشاعرہ رکھا گیا جس میں صوبائی سیکرٹری جنرل علامہ سید سبطین حسین الحسینی نے خصوصی شرکت کی ۔نعتیہ مشاعرہ کا آغاز سید فدا حسین شاہ نے تلاوت قرآن پاک سے کیا اس کے بعد پیر سید مہر علی شاہ نے ہدیہ نعت رسول مقبول ؐ پیش کی ۔تلاوت و نعت کے بعد شعراء اکرام نے اپنے اپنے انداز میں سرکار دوعالم حضرت محمد مصطفی ؐ سے اپنی عقیدہ کا اظہار اپنے کلام کے ذریعہ کیا ۔ہزارہ بھر کے مشہور شعراہ اکرام میں سے سید اویس کاظمی ، سید نجم الحسن نجمی ، عابد محمود ہاشمی ، عرفان تبسم،نذیر احمد کسیلوی،ماجد خان اور دیگر شعراء اکرام نے اپنا اپناکلام پیش کیا ۔ان کے علاوہ تحصیل حویلیاں میلاد کمیٹی کے صدر طارق خان ،حویلیاں گاؤ ں میلاد کمیٹی کے چیئر میں جنید خان اور سادات ایکٹوسٹیزن کمیونٹی کے صدر سید عباس ترمذی نے خصوصی شرکت کی۔ آخر میں کل ہزارہ نعتیہ مشاعرے کے مہمان خصوصی صوبائی سیکرٹری جنرل علامہ سید سبطین حسین الحسینی نے خطاب کیا ۔جس میں انہوں نے سرکار دوعالم حضرت محمد مصطفی ؐ کی حیات طیبہ پر روشنی ڈالتے ہوئے وحد ت و اتحا د کا درس دیا اور فرمایا کے حضرت محمد مصطفی ؐ کو اپنی امت سے بے حد محبت تھی اور ہمیشہ اللہ تبارک و تعالیٰ سے بھی اپنی امت کی بخشش کی دعا مانگتے تھے۔