The Latest
وحدت نیوز(گلگت) سیکورٹی کے ادارے خواب خرگوش میں اور دہشت گرد سرگرم عمل ہیں۔حراموش وین بم دھماکے میں ملوث دہشت گردوں کی گرفتاری عمل میں آتی تو یہ واقعہ ہرگز رونما نہ ہوتا۔سلپی میں نصب کردہ ریموٹ کنڑول بم اور حراموش مسافر وین بم دھماکہ کی کڑیاں آپس میں ملتی ہیں۔حکومت گلگت بلتستان دہشت گردوں اور ان کے پشت پناہوں کے خلاف کاروائی سے خوفزدہ نظر آرہی ہے،اگر ،مگر، چونکہ ،چنانچہ کے ذریعے دہشت گردوں کی حمایت میں کمربستہ عناصر سے چشم پوشی کی جارہی ہے۔
ان خیالات کا اظہار مجلس وحدت مسلمین گلگت بلتستان کے سیکرٹری جنرل شیخ نیئرعباس مصطفوی نے اپنے ایک بیان میں کیا ہے۔ انہوں نے کہا کہ حراموش مسافر وین دھماکہ جس میں تین بیگناہ افراد شہید ہوئے متعصب انتظامیہ نے بارود کا دھماکہ قرر دیکر تحقیقات کو سرد خانے کی نذر کردیا اور دہشت گردوں سے دانستہ طور پر چشم پوشی کی گئی ۔غذرکے مقام سلپی میں نصب کردہ بم انہی دہشت گردوں کی کارستانی جنہوں نے حراموش مسافر وین کو دھماکے سے اڑایا تھا۔ہم بارہا حکومت سے مطالبہ کرتے آئے ہیں کہ گلگت بلتستان میں دہشت گردوں کے خلاف فوجی آپریشن کیا جائے لیکن ہمارے مطالبے کو کوئی اہمیت نہیں دی جارہی ہے حالانکہ وزارت داخلہ کی جانب سے بھی دہشت گردی کے ممکنہ خطرات سے حکومت گلگت بلتستان کو مسلسل آگاہ کیا جارہا ہے۔باوجودیکہ حکومت گلگت بلتستان دہشت گردوں کے ناک میں نکیل ڈالتی،دہشت گردوں سے ہمدردی جتارہی ہے۔حکومت گلگت بلتستان کا یہ رویہ علاقے کے عوام کے ساتھ دشمنی اور دہشت گردوں کے ساتھ ہمدردی کے مترادف ہے۔ انہوں نے کہا کہ دہشت گردوں اور ان کے سرپرستوں کے خلاف موثر کاروائی نہ کی گئی تو مجلس وحدت مسلمین گلگت بلتستان میں احتجاج پر مجبور ہوگی۔انہوں نے کہا کہ ہم حکومت کی کارکردگی کا بغور جائزہ لے رہے ہیں اور اگر حکومت نے اپنی سابقہ روش کو ترک نہ کی تو اس کے نتائج حکومت کے حق میں بہتر نہیں ہونگے۔
وحدت نیوز(اسکردو) مجلس وحدت مسلمین پاکستان بلتستان ڈویژن کے سیکرٹری جنرل علامہ آغا علی رضوی نے کہا کہ ملک بھر کی طرح بلتستان بھر میں یوم ولادت باسعادت رسول اکرم کو نہایت تزک و احتشام کیساتھ منایا جائے گا اور ہفتہ وحدت بلتستان میں امن ، محبت ،بھائی چارگی کا مکمل آئینہ دار ہوگا۔ انہوں نے کہا کہ حضور ختمی مرتبت کی ذات اقدس امت مسلمہ کے لیے شمع ہدایت اور مرکز اتحاد ووحدت ہے۔ عالم اسلام کو درپیش تمام مسائل کا حل اس چیز میں پوشیدہ ہے کہ امت مسلمہ حضور پاک کی سیرت طیبہ پر گامزن ہو اور انکی تعلیمات کی روشنی میں اپنی نجی معاملات سے لے کر خارجہ پالیسیوں کو وضع کریں۔عالم اسلام کو درپیش مشکلا ت اور پریشانیوں کا اصل سبب حضور پاک کی سیرت طیبہ کو پس پشت ڈالنا ہے۔ انہوں نے کہا کہ اسلام محمدی کی تعلیمات پر عمل پیر اہوجائے تو جہاں تمام اسلامی ممالک کامیابی و کامرانی سے سرفراز ہو سکتے ہیں وہاں دنیا امن و محبت کاگہوارہ بن سکتا ہے۔ عالم اسلام کو اسلام محمدی کی طرف پلٹ آنے کی ضرورت ہے جو کہ تمام تر کامیابیوں کا ضامن ہے۔
وحدت نیوز (گلگت) ڈویژنل ہیڈ کوارٹر دیامر کا تعین ایک حساس مسئلہ ہے دونوں ضلعوں کے عوام کے سہولت کو پیش نظر رکھ کر فیصلہ کیا جائے صرف کسی ایک ضلعے کے مفاد کو پیش نظر نہ رکھا جائے ۔حکومت کسی دیاؤ میں آئے بغیر زمینی حقائق کو مدنظر رکھتے ہوئے ہیڈ کوارٹر کیلئے مناسب جگہ تلاش کرے۔
ان خیالات کا اظہار مجلس وحدت مسلمین گلگت ڈویژن کے سیکرٹری جنرل شیخ محمد بلال سمائری نے اپنے ایک بیان میں کیا ہے۔ انہوں نے کہا کہ ڈویژنل ہیڈ کوارٹر کو چلاس منتقل کرنے کی صورت میں ضلع استور کے غریب عوام کا مالی استحصال ہوگا اور استور کے دور دراز کے علاقوں کے عوام کو اپنے مسائل کے حل کیلئے شدید مشکلات درپیش ہونگی۔انہوں نے کہ ضلع استور پہلے سے پسماندہ علاقہ ہے جہاں کے عوام غربت کی لکیر سے نیچے زندگی گزارنے پر مجبور ہیں اور اب ضلعی ہیڈ کوارٹر کو چلاس منتقل کرنے کی صورت میں ان کی مشکلات میں مزید اضافہ ہوگا۔ دونوں اضلاع کے عوام کو اعتماد میں لیکر ہیڈ کوارٹر کسی ایسی جگہ منتقل کیا جائے جہاں تک رسائی کیلئے دونوں اضلاع کے عوام آسانی کے ساتھ سفری اخراجات برداشت کرسکیں۔انہوں نے کہا کہ ضلع استور کے عوام کے تحفظات کو دور نہ کیا گیا تو مستقبل میں دونوں اضلاع کے عوام کے دلوں میں ایک دوسروں کیلئے کدورت اور عناد پروان چڑھنے کا اندیشہ ہے لہٰذا کسی بھی فیصلے تک پہنچنے سے پہلے دونوں اضلاع کے عوام کو اعتماد میں لیا جائے۔
وحدت نیوز(اسلام آباد/لاہور/کراچی/کوئٹہ/مظفرآباد/گلگت) مجلس وحدت مسلمین پاکستان کے زیراہتمام ملک بھر میں جشن عید میلادالنبی ﷺ نہایت عقیدت و احترام سے منایا گیا، اس سلسلے میں گلگت بلستان اور آزاد کشمیر سمیت چاروں صوبوں کے تمام اضلاع میں ریلیوں میں شرکت کی گئی اور جلوسوں کے راستوں میں استقبالیہ کیمپس لگائے گئے اور عاشقان رسول ﷺ پر گل پاشی کی گئی، ایم ڈبلیو ایم میڈیا سیل سے جاری تفصیلات کے مطابق، مجلس وحدت مسلمین کے سربراہ علامہ ناصر عباس کے حکم پر ملک بھر میں جشن عید میلادالنبی مذہبی جوش و جذبے کے ساتھ منایا گیا، علامہ ناصر عباس نےسندھ کے ضلع جیکب آبادمیں جلوس میلاس البنی ﷺ کی قیادت کی، علامہ امین شہیدی نے راولپنڈی میں جبکہ صوبائی سیکریٹری جنرل پنجاب علامہ عبد الخالق اسدی نے لاہور، صوبائی سیکریٹری جنرل سندھ علامہ مختار امامی نے نواب شاہ، صوبائی سیکریٹری جنرل بلوچستان علامہ مقصود ڈومکی نے جیکب آباد، صوبائی سیکریٹری جنرل خیبر پختونخوا علامہ سبطین حسینی نے پشاور، صوبائی سیکریٹری جنرل گلگت بلتستان علامہ نیئر عباس نے گلگت سٹی ، صوبائی سیکریٹری جنرل آزاد جموں کشمیر علامہ تصور جوادی نے مظفر آبادمیں جلو س میلاد البنی ﷺ میں شرکت کی اور اتحاد بین المسلمین کا عظیم الشان مظاہرہ پیش کیا ، اسلام آباد کے سیکٹر جی ٹین سے برآمد ہونے والی ریلی میں علامہ اصغر عسکری نے وفد کے ہمراہ شرکت کی۔جشن عید میلاد النبی ﷺ کے مبارک موقع پر عظیم الشان شیعہ سنی اتحاد کا عملی مظاہرہ دیکھنے میں آیا،ملک بھر میں نکالے جانے والی میلادریلیوں جلوس اورمحافل میں شیعہ سنی محبت واخوت کے بھرپورمناظر دیکھے گئے اور مجلس وحدت مسلمین پاکستان کی جانب سے 250 سے زائد مقامات پرریلیوں اور محافل کا انعقاد کیا اور میلاد کے جلوسوں کا پُرجوش استقبال کیا گیامیلاد کے جلوسوں پر سبیلوں کا اہتمام کیاگیااس موقع پر مقررین کا کہنا تھا کہ انشااللہ ہم اسی طرح شیعہ سنی اتحاد کے ساتھ دشمن کی ناپاک منصوبوں کو ناکام بناتے رہے ہیں اور محبت کی اس فضا کو قائم رکھیں گے۔
جڑواں شہروں میں عاشقان رسول خدا ﷺ نے عید میلادالنبی انتہائی عقیدت و احترم کیساتھ منایا،اس موقع پر مختلف ریلیاں اور جلوس برآمد ہوئے، ہر طرف دورد و سلام کا سماں تھا، عاشقان رسول ﷺ مدحت رسول خدا ﷺ و اہل بیت علیہ السلام نہایت عقیدت و احترام کے ساتھ پیش کرتے رہے۔ اس موقع پر مختلف تنظیموں کی جانب سے خصوصی اسٹالز بھی لگائے تھے، نعت خوانی کے خصوصی محفلیں سجائی گئیں اور نعت خوانوں میں انعامات بھی تقسیم کیے گئے۔ اس بار خاص بات شیعہ سنی اتحاد کی تھی، مجلس وحدت مسلمین کی جانب سے راولپنڈی اور اسلام آباد میں خصوصی کمپس لگائے تھے جن میں شیعہ سنی علمائے کرام نے خصوصی شرکت کی اور وحدت کا عظیم الشان مظاہرہ کیا۔ ایم ڈبلیو ایم کے مرکزی ڈپٹی سیکرٹری جنرل علامہ امین شہیدی، پنجاب کے ترجمان علامہ اصغر عسکری، ضلع راولپنڈی کی کابینہ سمیت اسلام آباد کے سیکرٹری جنرل نے خصوصی طور پر شرکت کی۔
کراچی سمیت سندھ کے تمام چھوٹے بڑے اضلاع میں مجلس وحدت مسلمین کے زیر اہتمام جلو س میلاد البنی ﷺ کی گذرگاہوں پر استقبالیہ کیمپ اور سبیلوں کا اہتمام کیا گیا، مختلف شہروں ، قصبوں اور دیہاتوں میں شیعہ سنی عوام نے مشترکہ جلوس برآمد کیئے، کراچی میں ایم اے جناح روڈ پر ایم ڈبلیوایم کے زیر اہتمام مرکزی استقبالیہ کیمپ اور سبیل کا اہتمام کیا گیا تھا، جہاں ایم ڈبلیوایم کے رہنما علامہ علی انور جعفری ، علامہ مبشر حسن اور ناصر حسینی نےسنی اتحاد وکونسل ، پاکستان عوامی تحریک، آل پاکستان سنی تحریک، جمیعت علمائے پاکستان کے جلوس ہائے میلاد النبی ﷺ کو خوش آمدید کہااور چائےاور شربت سے شرکائے جلوس کی تواضع کی گئی۔اس کے علاوہ کراچی کے باقی چھ اضلاع وسطی، جنوبی ، شرقی ، ملیر، کورنگی اور غربی میں مجموعی 40سے زائد مقامات پر جلوس میلاد البنی ﷺ کے لئے استقبالیہ کیمپ اور سبیلیں لگائی گئیں ۔
اسی طرح اندرون سندھ کے تمام اضلاع میں بھی مجلس وحدت مسلمین کے زیر اہتمام جلو س ہائے میلاد البنیﷺ کا انعقاد کیا گیا، حیدرآبادمیں ضلعی رہنما علامہ امداد نسیمی، ایڈووکیٹ رحمان رضااو ر عالم کربلائی نے جلو س میلادالبنیﷺ میں خصوصی شرکت کی، ٹنڈو محمد خان میں ایم ڈبلیوایم کے کارکنان کی جانب سے اقصیٰ مسجد کے سامنے جلوس میلاد البنی ﷺ کے استقبال کیلئے کیمپ لگایا گیا ، جہاں اہل سنت برادران کو سبیل پیش کی گئی، ضلعی سیکریٹری جنرل محب علی بھٹواور دیگر نے جلوس میلاد میں خصوصی شرکت کی ، قمبر شہدادکوٹ میں ایم ڈبلیوایم کی جانب سے جلوس میلاد البنی ﷺ کے شرکاء کو خوش آمدید کہنے کیلئے استقبالیہ کیمپ لگایا گیا، جبکہ ضلعی رہنما مولانا حبدار علی ، سید اکبر علی شاہ اور دیگرنے اہل سنت برادارن کے جلوس کا استقبال کیااور جلوس میلاد البنی میں شرکت کی، نوشہروفیروز میں ضلعی سیکریٹری جنرل اعجاز ممنائی کی زیر قیادت جلوس میلاد البنیﷺ میں ایم ڈبلیوایم کے کارکنان نے شرکت کی، جبکہ سبیل اور استقبالیہ کیمپ کا بھی اہتمام کیا گیا، کشمور میں بھی ایم ڈبلیوایم کے زیر اہتمام سبیل کا اہتمام کیا گیا۔
لاہور میں مجلس وحدت مسلمین کے زیر اہتمام 10مقامات پر برادران اہل سنت کے جلوس ہائے میلاد البنی ﷺ کا استقبال کیا گیا،اس سلسلے میں استقبالیہ کیمپ لگائے گئے اور سبیلیں لگائی گئیں ،مرکزی استقبالیہ کیمپ چوک رنگ محل پر لگایا گیا ، جہاں ایم ڈبلیوایم کے رہنما علامہ جعفر موسوی، علامہ امتیاز کاظمی، اسد عباس نقوی ، عمران زیدی اور دیگر رہنماوں نے اہل سنت براداران اور جلوس میں شریک علمائے اہل سنت کا پھول نچھاور کرکے استقبال کیا، ایم ڈبلیو ایم لاہورنشتر ٹاون یونٹ کے زیر اہتمام عید میلادالنبی پر جلوس نکالا گیا ،مرکزی صوبائی رہنما علامہ حسنین عارف، علامہ جعفر موسوی اور علامہ امتیاز کاظمی نے جلوس میلاد البنی ﷺ کی قیادت کی،شرکا پر میلاد ریلی کے رستوں میں جگہ جگہ گل پاشی کی گئ۔ایم ڈبلیوایم شاہ عالمی یونٹ کے زیر اہتمام جلوس میلاد البنی ﷺ کا والہانہ استقبال کیا گیااور شرکاء میں نیاز تقسیم کی گئی، اس موقع پر ایم ڈبلیوایم کے صوبائی ڈپٹی سیکریٹری جنرل اسد عباس نقوی ، رائے ناصر علی ، رائے ماجد علی بھی موجود تھے۔جبکہ سرگودھا، جھنگ،فیصل آباد، چنیوٹ،علی پور، بہاولپور، بہاولنگر،ساہیوال، میانوالی،ملتان، رحیم یار خان، ٹوبہ ٹیک سنگھ،شیخوپورہ،پنڈ دادن خان، جہلم ، گجرات، گجرانوالہ میں بھی مجلس وحدت مسلمین کے زیر اہتمام جلوس میلاد البنیﷺ کے استقبال کیلئے کیمپ اور سبیلوں کا اہتمام کیا گیا۔
کوئٹہ میں میزان چوک سے جماعت اہل سنت کے زیر اہتمام مرکزی جلوس میلاد البنی ﷺ برآمد ہوا، جس میں مجلس وحدت مسلمین پاکستان کے مرکزی رہنما علامہ سید ہاشم موسوی، ڈویژنل سیکریٹری جنرل عباس علی، کونسلر رجب علی اور دیگر رہنماوں نے خصوصی شرکت کی جبکہ ایم ڈبلیوایم کے کارکنان کی بھی بڑی تعداد جلو س میں شامل تھی، علامہ ہاشم موسوی اہل سنت علمائے کرام کے ہاتھوں میں ہاتھ ڈال کر صف اول میں جلوس میلاد البنی ﷺ کی قیادت کررہے تھے، جبکہ مسجد اسماعیل میں اہل سنت برادارن کے زیر اہتمام منعقدہ محفل نعت اور سیرت میں علامہ ہاشم موسوی کی زیر قیادت ایم ڈبلیوایم کے وفد نے خصوصی شرکت کی جبکہ ایم ڈبلیوایم کے کارکنان نے بارگاہ رسالت مآب میں نذرانہ عقیدت بھی پیش کیا، اہل سنت علمائے کرام نے مجلس وحدت مسلمین کے رہنماوں کا تہہ دل سے شکریہ بھی ادا کیا۔
آزاد جموں کشمیر میں لبیک یا رسول صلی اللہ علیہ و آ لہ وسلم ریلی 11 ربیع الاول دومیل مظفرآباد تا چکوٹھی سیکٹر تک نکالی گئی جبکہ اختتامی جلسہ بمقام چکوٹھی بازار ’’ لائن آف کنٹرول مقبوضہ کشمیر‘‘پر منعقد ہوا،سیکرٹری جنرل مجلس وحدت مسلمین آزاد جموں و کشمیر علامہ سید تصور حسین نقوی الجوادی ، صدر مرکزی سیرت کمیٹی ہٹیاں بالا قاضی پروفیسر محمد ابراہیم چشتی ، سابق وزیر حکومت دیوان علی خان چغتائی، جماعت اہلسنت آزاد کشمیر کے رہنماء علامہ سید اسحاق نقوی، مولانا پیر سید فیاض حسین کاظمی، سیاسی و مذہبی جماعتوں کے قائدین نے شرکت کی جبکہ اس موقع پر ایم ڈبلیوایم کے کارکنان کی بڑی تعداد بھی اہل سنت برادران کے ہمراہ جلوس میلاد البنی ﷺ میں شریک تھی۔
ملتان میں امام بارگاہ حسین آباد دولت گیٹ ملتان پر مرکزی استقبالیہ کیمپ، چائے اور پانی کی سبیل لگائی گئی۔ مجلس وحدت مسلمین پنجاب کے ڈپٹی سیکرٹری جنرل علامہ اقتدار حسین نقوی نے استقبالیہ کیمپ کا خصوصی دورہ کیا۔ استقبالیہ کیمپ مجلس وحدت مسلمین ملتان کے سیکرٹری جنرل علامہ قاضی نادر حسین علوی کی قیادت میں لگایا گیا۔ کیمپ میں بین المذاہب امن کمیٹی پنجاب کے کوارڈینیٹر علامہ غلام مصطفی انصاری، مولانا عمران ظفر، ثقلین نقوی، سید دلاور عباس زیدی، وسیم زیدی، ثمر عباس کھوکھر اور دیگر موجود تھے۔
وحدت نیوز (حیدرآباد) ملت جعفریہ پاکستان کی واحد سیاسی شناختہ شدہ جماعت مجلس وحدت مسلمین پاکستان کے حالیہ شیعہ سنی اتحاد،نواز حکومت کے ظلم وجبر کے مقابل آہنی دیوار بننے ، ماڈل ٹاون کے مظلوم مقتول سنی بھائیوں کے ساتھ عہد وفا بنھانےاور ایم ڈبلیوایم کی دیگر اہل سنت جماعتوں کی ساتھ تشکیل کردہ (Political Stretegic Partnership)پرایم ڈبلیوایم سندھ کی شوریٰ نے علامہ ناصر عباس جعفری کی سیاسی بصیرت، حکمت عملی، تدبر، تذکر، ہمت ،حوصلے ، شجاعت ، ایثار وفداکاری اور وحدت بین المسلمین کے قیام کیلئے کی گئی تمام فعالیت پر مکمل اعتماد کا اظہار کر دیا، نہ فقط اعتماد کا اظہار کیا بلکہ علامہ ناصرعباس جعفری کو مکمل مینڈیٹ بھی دیا کہ آپ مجلس وحدت کی سیاسی و اجتماعی جدوجہد کواسی سمت میں جاری رکھیں جس سمت پر آپ نے اسے گامزن کیا ہے، ہم آپ کے شانہ بشانہ اس جدوجہد کوظلم کی اس طویل سیاہ رات کےعدل وانصاف، امن و امان ، محبت و اخوت ،صلح و رحم کی روشن صبح میں تبدیل ہونے تک جاری رکھیں گے۔
مجلس وحدت مسلمین پاکستا ن صوبہ سندھ کی شوریٰ کے چوتھے اجلاس میں صورت حال اس وقت انتہائی غیر معمولی ہو گئی کہ جب سربراہ مجلس وحدت مسلمین پاکستان قائد وحدت ناصر ملت علامہ ناصرعباس جعفری نے اپنے خطاب کے اختتام شرکائے اجلاس کو مخاطب کر کے فرمایا کہ پچھلے 6ماہ سےجاری شیعہ سنی وحدت کے قیام کی کوششوں اورماڈل ٹاون کےظالموں کے مقابلے میں مظلوموں کی حمایت کی پالیسی پر بعض داخلی اور خارجی ناقدین نے مجھ پر ہماری جماعت پر اسٹبلشمنٹ کا مہرہ بننے، ڈاکٹر قادری کا مرید بننے ،دھرنے کے خاتمے پر پیسہ وصول کرنے کے سنگین الزامات لگائے اور بہتان تراشیاں کی گئیں، آپ مجھے بتائیں کہ کیا سانحہ ماڈل ٹاون کے بعد ان مظلوم سنیوں کا ساتھ دینا اور ظالم نواز حکومت کے خلاف قیام کرنا کیا اسٹبلشمنٹ کا مہرہ بننا تھا، کیایاعلی ؑ اور لبیک یا حسین ؑکا وہ نعرہ جس سے تکفیریت پچھلے30سال سے لڑی اس نعرے کا قادری صاحب کی زبان سے بلند کروانا قادری صاحب کی مریدی تھی یا تشیع کی فتح و نصرت کا اعلان اور تکفیریت کی موت کا باعث تھا ،پہلے ہمارے لاہور سے اسلام آباد لانگ مارچ پر طرح طرح کے فتویٰ لگائے گئے، لیکن ہماری استقامت کو دیکھتے ہوئےپوری ملک کی تمام سیاسی و مذہبی جماعتوں ہمارے14نکاتی اصلاحاتی ایجنڈے کو جائز قرار دیابلکہ حکومت سے ایجنڈے کی منظوری کا مطالبہ بھی کیا، جو کہ ہمارے موقف کی فتح تھی، نوازحکومت کے خلاف میدان میں ہمارے نکلنےکی بدولت یا علی ؑ اور لبیک یا حسین ؑ کےنعرےآج پاکستان کی تمام دینی و سیاسی جماعتوں میں سنائی دینے لگے، کیا یہ کوئی خفیہ اسکرپٹ تھا، جی نہیں یہ کوئی خفیہ بلکہ واضح اسکرپٹ ہے جو ہمارا ہے، جو ہمارے شہید قائد نے تشکیل دیا،آپ آج فیصلہ کریں کیا ہم نے کوئی خیانت کی، کوئی دھوکہ کیا،ہمارے کسی عمل سے تشیع کو رسوائی ہوئی ہوتو ہم مجرم ہیں ، اس موقع پر تمام شرکائے اجلاس نے یک زبان ہوکر لبیک یاحسین ؑ اور راجہ ناصر قدم بڑھاو ہم تمارے ساتھ ہیں کہ شعار بلند کیئے،آخر میں ان کا کہنا تھا کہ ہماری سیاسی حکمت عملی کی بدولت آج تکفیریت تاریخ کے مشکل ترین مرحلے میں داخل ہورہی ہے، تکفیریت کے جوڑ جوڑ پر ضربیں لگ رہی ہیں، ہمیں ملک بھر میں تکفیریت کے خلاف قائم اس اتحاد کو مذید مضبوط کرنے کی ضرورت ہے۔
وحدت نیوز (حیدرآباد) ہدف الہٰی نہ ہو توایک عرب انسان بھی معاشرے میں کوئی خاص تبدیلی نہیں لاسکتے، تنظیمی کارکنان کی مراقبت اور ریاضت کی جانب ہر صورت توجہ مقصود ہے،ایسا نہ ہو کہ سفر کا آغازالہیٰ مقاصد و اہدافات کو مدنظر رکھ کرشروع کیا جائےلیکن دوران سفر ہدف معنوی سے مادی ہوجائے،راہ خدامیں استقامت شرط ہے،صبر کا معنیٰ ضبط نفس ہے،خدا نے ایسے بندوں کو ایسا اذن و مقام دیا کہ وہ طاقتوروں پر غالب آگئے، فلسطینی اور لبنانی توکل علیٰ اللہ کے ساتھ اسرائیل پر غلیل سے حملہ آور نہ ہوتے تو آج جدید ٹینکوں اور میزائلوں کی دولت سے مالامال نہ ہوتے،ہمارے شیعہ سنی اتحاد کی بدولت آج تکفیریت پاکستان میں جائے پناہ کی تلاش میں دربدر ہے، مکہ ، لاہوراور اسلام آباد میں دشمنوں کا جمع ہونا اس بات کی دلیل ہے، ایم ڈبلیوایم مرکز سے صوبے تک جلد (Stregetic Management Program)کا آغاز کرے گی، سندھ کے تمام اضلاع میں مرحلہ وار دفاتر کا قیام یقینی بنایا جائےگا۔ان خیالات کا اظہارانہوں نے صوبائی رابطہ آفس حیدرآباد میں مجلس وحدت مسلمین صوبہ سندھ کی شوریٰ کے چوتھےسہہ ماہی اجلاس کے شرکاء سے خطاب کرتے ہوئے کیا،اجلاس میں ایم ڈبلیوایم کے مرکزی سیکریٹری اطلاعات سید مہدی عابدی، مرکزی سیکریٹری امور تنظیم یعقوب حسینی، ایم ڈبلیوایم سندھ کے سیکریٹری جنرل علامہ مختار امامی سمیت صوبائی کابینہ کے تمام اراکین اور سندھ بھر کے26اضلا ع سے تنظیمی ذمہ داران نے شرکت کی۔
علامہ ناصر عباس جعفری کا اجلاس سے خطاب میں کہنا تھا کہ مجلس وحدت مسلمین پاکستان کے کارکنان میں ایمان باللہ اور توکل الاللہ کی موجودگی لازم ہے، جاذبہ کو پروان چڑھایا جائےاور دافعہ سے اجتناب برتاجائے،فاسق اور فاجر ترین شیعہ کو بھی خود سے دور نہ جائے، کہیں وہ حوادث زمانہ اور خونخوار بھیڑیوں کا نشانہ بن جائے، آج کا دور تشیع کے گھروں میں چھپنے کا نہیں بلکہ میں میدان میں اتر کر دشمن کے مقابلے کا ہے، عالمی سطح پر تشیع کی سرفرازی، کامیابی اور کامرانی کے سفر آغاز ہوچکا ہے، افغانستان کی موجودہ پارلیمنٹ اور حکومت ، کویت کے سیاسی بساط ، لبنان کی پولیٹیکل ڈیموگرافی،عراق میں صدام کے بعد تشکیل کردہ حکومت ، بحرین میں چار برس سے جاری عوامی جدوجہد ، یمن میں حوثی قبائل کا غالب آجانا، فرد واحد علامہ شیخ عیسیٰ زکزاکی کے ہاتھوں ایک کروڑسے زائدافراد کا مشرف با اسلام ہونا اس بات کی روشن دلیلیں ہیں ، یمن کا سات روز میں سعودیہ پر قبضے کا دعواکوئی معمولی بات نہیں ، دنیا بھر کی ضرورت کا %80تیل انہی شیعہ نشین علاقوں سے حاصل ہوتا ہے، پاکستان اور سعودیہ کی تشیع ابھی بیداری کے اس سفر کو تہ نہیں کرسکی ہے،پاکستان میں مشکلات اور رکاوٹوں کے باوجود تشیع کو وہ آزادی حاصل ہے جو دنیا کے دیگر ممالک میں حاصل نہیں ، پاکستان میں مختلف میدانوں میں کام کی کثیر گنجائش موجود ہے، توجہ دینے اور امور میں نظم پیدا کرنے کی شدید ضرورت ہے۔
انہوں نے مذید کہاکہ یہ زمانہ عروج تشیع اور زوال تکفیریت کا زمانہ ہے، اجتماعی کاموں میں کوتاہی اور کمزوری سنگین نقصان کا باعث بنے گی، ہمارے شیعہ سنی اتحاد کی بدولت آج تکفیریت پاکستان میں جائے پناہ کی تلاش میں دربدر ہے، مکہ ، لاہوراور اسلام آباد میں دشمنوں کا جمع ہونا اس بات کی دلیل ہے،آج تشیع پاکستان میں اپنی ہمت ، حوصلے، شجاعت، بہادری، وفا ، ایثار ، فداکاری کی بدولت سیاسی ، اجتماعی اور مذہبی منظر نامے میں اپنا مخصوص نقش و رول رکھتی ہے،کل تک ہم سینکڑوں جنازے لے کر دھرنے دیتے اور فوجی آپریشن کا مطالبہ کرتے تھے، آج نہ فقط پاک فوج بلکہ اٹھارہ کروڑ عوام یہ مطالبہ کرنے پر مجبور ہے،مجلس وحدت مسلمین، سنی اتحاد کونسل اور پاکستان عوامی تحریک کے سیاسی و اجتماعی رابطوں کی بدولت ، شیعہ سنی یونٹی کے رواج کی بدولت حکومت اور دشمنان اسلام ہماری جانب متوجہ ہوئے ہیں، امریکی و سعودی لابی پاکستان میں مجلس وحدت کو اپنے لیئے تھریڈ تصور کررہی ہے، ہماری مشترکہ جدوجہد نےشیعہ سنی کو یکجاکرنے کے ساتھ ساتھ تکفیریت کو نہ فقط پاکستان میں (Isolate)تنہا کیا بلکہ عالمی سطح پر تکفیریت تنہائی کا شکار ہوئی ہے۔
Strategic Management Program
وحدت نیوز (اسلام آباد) مجلس وحدت مسلمین پاکستان کے سربراہ علامہ ناصرعباس جعفری نے جمعیتہ الوفاق البحرین کے سربراہ علامہ شیخ علی سلمان کی آل خلیفہ کے ہاتھوں بلاجواز گرفتاری کی شدید الفاظ میں مذمت کی ہے، مرکزی سیکریٹریٹ سے جاری اپنے بیان میں انہوں نے کہا ہے کہ آل خلیفہ ریاستی ظلم و جبر کی بنیاد پر بحرینی عوام کو ان کے جائز حقوق سے محروم رکھے ہوئے ہیں ، آل خلیفہ نے انتخابی ڈرامے سے مطلوبہ نتائج کے عدم حصول کے باعث بحرینی عوام کے ہر دل عزیز لیڈر اور مذاہمتی تحریک کے قائد المجاہد حجتہ السلام علامہ شیخ علی سلمان کو گرفتار کیاہے، بحرینی غیور عوام گذشتہ پانچ برس سے مسلسل آل خلیفہ کے ظلم واستبداد کے آگے آہنی دیوار بن کر کھڑے ہیں، معصوم بچوں ، نہتی خواتین، بزرگ شہریوں کو سفاکیت اور بربریت کا نشانہ بنایا جا رہاہے، امریکی اور سعودی اسٹریجیٹک اور انٹیلجنس سپورٹ سے بحرینی قابض شاہی حکومت حریت پسند بے گناہ بحرینی شہریوں پر عرصہ حیات تنگ کیئے ہوئے ہے، انہوں نے اقوام متحدہ کے سیکریٹری جنرل بان کی مون سے مطالبہ کیا کہ پاکستان میں قاتل دہشت گردوں کی پھانسی کے معاملے پر فکر مند ہونے کے بجائے بحرین میں انسانی حقوق کی سنگین خلاف ورزیوں اورعوامی قائد علامہ شیخ علی سلمان کی بلاجواز گرفتاری پر اپنا اصول پسندانہ موقف اختیار کریں ۔
وحدت نیوز (پشاور) مجلس وحدت مسلمین خیبر پختونخوا کے رہنماء ارشاد حسین بنگش نے کہا ہے کہ پاکستان سے دہشت گردی کے ناسور کو ختم کرنے کیلئے فوجی عدالتوں کے قیام کی مکمل حمایت کرتے ہیں، اس اقدام سے دہشتگردی کا قلع قمع کرنے میں مدد ملے گی۔ وحدت ہاوس پشاور سے جاری ایک بیان میں ان کا کہنا تھا کہ پشاور جیسے سنگین سانحے سے بھی نواز شریف اور اعلیٰ عدلیہ نے سبق نہیں سیکھا، آئین کے آرٹیکل 245 کے تحت ملک بھر میں دہشت گردوں کے خلاف فوجی آپریشن ہی قیام امن کی ضمانت ہے، دہشت گردوں کی پھانسیوں میں تعطل عوام کی خواہشات کی نفی ہے، فوجی عدالتیں دہشت گردوں کو کیفر کردار تک پہنچانے میں موثر کردار ادا کریں گی، فوجی عدالتوں کے قیام کی مکمل حمایت کرتے ہیں، انہوں نے پشاور پریس کلب کے سامنے صحافیوں پر تشدد کی شدید مذمت کرتے ہوئے کہا کہ ملوث افراد کو گرفتار کرکے سخت سے سخت سزا دی جائے۔
وحدت نیوز (لاہور) سنی اتحاد کونسل کے چیئرمین صاحبزادہ حامد رضا نے لاہورمیں طالبان کے گمراہ کن فلسفہ جہاد کے رد کیلئے بنائے گئے علما بورڈ کے تھنک ٹینک کے پہلے اجلاس سے خطاب کرتے ہوئے کہا کہ فوجی عدالتوں کا قیام پوری قوم کی آواز ہے، فوجی عدالتوں کے معاملے میں بعض سیاسی جماعتیں منافقت کر رہی ہیں، دہشت گردی جیسے اہم مسئلے پر سیاست نہ کی جائے۔ انہوں نے کہا کہ دہشت گردی کے ایشو پر اگر مگر کرنے والے پھر میدان میں آ گئے ہیں۔ دہشتگردوں کے خلاف قوم کی یکسوئی کو خراب کیا جا رہا ہے، غیر ضروری بحثیں چھیڑنا دہشت گردوں کو بچانے کے مترادف ہے، حکومت غیر ضروری اجلاس میں وقت ضائع کر رہی ہے۔ انہوں نے کہا کہ حکومت کی سطح پر دہشت گردی کے خلاف صرف اجلاس ہو رہے ہیں، ایکشن نہیں ہو رہا، فوجی عدالتوں کے مخالفین دہشت گردی کے خلاف بننے والی قومی یکجہتی کی فضا کو ضائع کر رہے ہیں، حکمران حکمت عملی اور عزم سے محروم ہیں۔ انہوں نے کہا کہ جماعت اسلامی اور جے یو آئی دہشت گردوں کی حمایت اور دہشت گردی کے مخالفت کی پالیسی پر عمل پیرا ہیں۔ صاحبزادہ حامد رضا نے کہا کہ علما طالبان کی خود ساختہ شریعت کے رد کے لئے میدان میں آئیں اور قوم کے سامنے حقیقی فلسفہ جہاد پیش کریں تاکہ مسلم نوجوانوں کو جہاد کے نام پر گمراہ کرنے کی کوششیں ناکام بنائی جا سکیں۔ انہوں نے کہا کہ طالبان کا فکری توڑ علما کی ذمہ داری ہے، کیوں کہ طالبان کی وجہ سے اسلام بدنام ہو رہا ہے۔
وحدت نیوز (پشاور/ہنگو/کوہاٹ) مجلس وحدت مسلمین خیبر پختونخوا کے سیکرٹری جنرل علامہ سید سبطین الحسینی اور شیر آف پاکستان کے مسئول سید حیدرعباس زیدی نے پشاور، کوہاٹ اور ہنگو کا دورہ کیا، جہاں انہوں نے شہداء کے خانوادوں سے تعزیت کی، دورہ پشاور کے موقع پر انہوں نے سانحہ پشاور میں زخمی ہونے والے انوارعلی اور شہید ٹیچر کے اہل خانہ سے تعزیت کی اور آئی آر سی کی جانب سے امدای چیک پیش کئے۔ ہنگو اور کوہاٹ کے دورہ کے موقع پر انہوں نے شہید باقر حسین اور دیگر شہداء کے گھروں میں جاکر تعزیت کی اور شہیداء کے لواحقین کو امدای چیک دیئے۔ اس موقع پر سید حیدرعباس زیدی نے کہا کہ ہم صرف اس وجہ سے یہاں آئے ہیں کہ یہاں سے دور رہ کر بھی ہمیں بھی اتنا ہی درد اور دکھ ہے جو آپ لوگوں کو ہے، ہمارے آنے کا مقصد بھی یہی تھا کہ ہم بتا سکیں کہ امریکہ، لندن، کراچی جہاں جہاں مومنین ہیں آپ کے لئے پریشان اور آپ کے دکھ میں شریک ہیں۔ علامہ سید سبطین کا کہنا تھا کہ شہداء کے پاک لہو سے پاکستان میں ایک بیداری کا سماء ہے، مگر اللہ کرے کہ حکمران بھی اس بیداری سے کچھ فائدہ عوام کو پہچائیں، سانحہ پشاور کے شہداء ہمیشہ زندہ رہیں گے، ان کو کھبی بھلایا نہیں جا سکے گا۔ اس موقع پر مجلس وحدت مسلمین کے صوبائی ڈپٹی سیکرٹری جنرل علامہ ارشاد علی، صوبائی آفس مسئول ارشاد حسین بنگش، ضلع کوہاٹ کے سیکرٹری جنرل حاجی علی داد خان، انصار الحسین کے رہنماء علامہ لیاقت حسین، نسیم عباس اور دیگر معززیں بھی شریک تھے۔
