The Latest
وحدت نیوز (اسلام آباد) جامعۃ المصطفٰی العالمیہ کے زیر انتظام فاضلان حوزہ علمیہ قم کا اہم اجلاس جامعۃ الکوثر، اسلام آباد میں طلب کیا گیا، جس میں فارغ التحصیلان کی کثیر تعداد شریک ہوئی، اس اہم اجلاس میں انٹرنیشنل یونیورسٹی جامعۃ المصطفٰی العالمیہ قم کے زیرانتظام فارغ التحصیلان کی تنظیم سازی کی گئی۔ اجلاس میں جامعۃ المصطفٰی شعبہ پاکستان کے انچارج آقائے ہاشمیان کے علاوہ کثیر تعداد میں علماء کرام نے شرکت کی۔ نظامت کے فرائض انیس الحسنین نے انجام دیئے۔ حجت الاسلام آقائے حکیم انچارج ارتباط جامعۃ المصطفٰی العالمیہ نے بھی اس موقع پر خطاب کیا۔ آقائے ہاشمیان کے افتتاحی کلمات کے بعد حجت الاسلام علامہ شیخ محسن نجفی نے خطاب کیا۔ ان کا کہنا تھا کہ باقی دنیا کی طرح پاکستان میں بھی دنیا کے حقائق کو سمجھنے کے لئے علم دیا جائے۔ اجلاس میں ایم ڈبلیو ایم سربراہ علامہ ناصر عباس جعفری اورشیعہ علماء کونسل پاکستان کے سربراہ علامہ ساجد نقوی نے بھی خصوصی شرکت کی۔
مسئول جامعۃ المصطفٰی العالمیہ پاکستان شاخ نے کہا کہ آج اس اجتماع کی برکت سے بہت سے علماء کرام کی ایک دوسرے سے ملاقات ہوئی ہے کہ جو کئی سالوں سے ایک دوسرے کے ساتھ مرتبط نہیں تھے، بحمدللہ میرے لئے اور جامعۃ المصطفٰی کے لئے یہ باعث فخر ہے کہ ہم نے ایک ایسا موقع فراہم کیا ہے کہ اس علاقے کے علماء کرام ایک جگہ پر ایک فورم پر اکٹھے ہوں، ہم ان سب کے شکر گزار ہیں، بطور خاص اس اجتماع میں جتنی بھی چیدہ چیدہ شخصیات تھیں، علامہ سید ساجد علی نقوی، علامہ ناصر عباس جعفری، علامہ شیخ محسن علی نجفی، جناب سید جواد ہادی، علامہ رمضان توقیر، علامہ خورشید انور جوادی اور بہت سے بڑے بڑے نام جو اس علاقے سے تھے، سب نے ہماری دعوت پر لبیک کہا اور تشریف لائے۔ انشاءاللہ تعالٰی ہم امید کرتے ہیں کہ یہ اجلاس فارغ التحصیلان میں مزید جوش و جذبہ اور ولولہ بڑھانے میں ممد و معاون ثابت ہوگا۔
علامہ انیس الحسنین خان نے کہا کہ جامعۃ المصطفٰی کی طرف سے جو مدد فارغ التحصیلان کی کرسکتے ہیں، ہم کریں گے اور اسی طرح ہمارے پاس جو بہت بڑی استعداد اور ظرفیت پائی جاتی ہے، ہماری کوشش یہ ہے کہ ہم اس اجتماع کی برکت سے علماء کرام کی تفصیلی شناخت کرائیں، کس کس شعبہ میں ہمارے علماء کرام کام کر رہے ہیں، کن کن شعبوں میں ان کی توان ہے، اور کن کن شعبوں میں ہم ان کی خدمات سے فائدہ اٹھا سکتے ہیں، تاکہ ہم وطن عزیز پاکستان میں تشیع کے واقعی چہرے کو دنیا کے سامنے پیش کرنے میں کامیاب ہوسکیں۔ فارغ التحصیلان اور جامعۃ المصطفٰی پاکستان میں بہت بڑا لشکر ہیں، اگر ان سب کا آپس میں باہمی رابطہ ہے تو دین مبین اسلام اور مکتب تشیع کی ترویج و ترقی اور اس کی تعلیمات کو آگے بڑھانے میں ممد و معاون ثابت ہوسکتا ہے۔ اس پروگرام کا ایک مقصد یہ بھی تھا کہ ایک انجمن فارغ التحصیلان تشکیل دی جائے، جس میں سات افراد رکن ہوں گے، پھر وہ آپس میں مل بیٹھ کر صدر، نائب صدر اور جنرل سیکرٹری کا انتخاب کریں گے، جس کے لئے ووٹنگ ہوچکی ہے اور دوسری نشست میں نتائج کا اعلان کیا جائے گا۔
وحدت نیوز(میرپورخاص) مجلس وحدت مسلمین ضلع میرپورخاص کا شوریٰ اجلاس ڈگری میں منعقد ہوا،اجلاس میں صوبائی سیکریٹری تنظیم سازی علامہ نشان حیدر ساجدی اورصوبائی سیکریٹری فلاح و بہبود امتیاز حسین شاہ نے خصوصی شرکت کی، اجلاس میں تمام ضلع بھر کے یونٹس کے ذمہ داران نے شرکت کی اور اراکین شوریٰ نے کثرت رائے سے سید بشیر شاہ نقوی کو ضلعی سیکریٹری جنرل منتخب کر لیا، علامہ نشان حیدر ساجدی نے نومنتخب سیکریٹری جنرل بشیر شاہ سے ان کے عہدے کا حلف لیا، اجلاس میں یونٹ سندھڑی، یونٹ میرواہ یونٹ بانڈی شاخ، یونٹ کوٹ غلام محمد ، تحصیل ، یونٹ نوکوٹ ، تحصیل جھڈو، روشن آباد یونٹ ، ٹنڈو جان محمد ، گیل پور ، آم موری تعلقہ ڈگری یونٹ ڈاکٹر جاوید علی جروار، یونٹ علی احمد جروار، یونٹ کالے خان جروار، یونٹ دیہہ 202، یونٹ لنڈ بلوچ، یونٹ سکندر جروار کے تنظیمی ذمہ داران نے خصوصی شرکت کی۔
وحدت نیوز (راولپنڈی) راولپنڈی میں گذشتہ روز ٹارگٹ کلنگ کا نشانہ بننے والے ایک ہی خاندان کے تین اہل تشیع افراد کی نماز جنازہ لیاقت باغ راولپنڈی میں ادا کردی گئی، نماز جنازہ مجلس وحدت مسلمین کے سربراہ علامہ ناصرعباس جعفری کی زیر اقتداء ادا کی گئی، اس موقع پر ہزاروں سوگواروں نے نمازجنازہ میں شرکت کی اوقاتلوں کے خلاف شدید ر نعرے بازی کی۔نماز جنازہ کے شرکاء سے خطا ب میں مجلس وحدت مسلمین کے سربراہ علامہ ناصر عباس جعفری کا کہنا تھا کہ ہمیں شہادتیں سے ڈرایا یا دھمکایا نہیں جاسکتا، پنجاب حکومت کالعدم جماعتوں کو سپورٹ کررہی ہے، جبکہ یہ ایک حقیقت ہے کہ دہشتگردوں کے روٹس شہروں میں موجود ہیں جن کیخلاف تاحال کارروائی نہیں کی جارہی، انہوں نے کہا کہ اکیسویں آئینی ترمیم کے بعد حکومتی رٹ مضبوط ہونی چاہیئے تھی اور دہشتگردوں اور ان کے حامیوں کیخلاف فیصلہ کن کارروائی کی جاتی لیکن افسوس کا مقام ہے کہ کالعدم تنظیموں کے سربراہ اسلام آباد میں بیٹھ کر پریس کانفرنسز کررہے ہیں جبکہ انتظامیہ ان کی سیکیورٹی پر لگی ہوئی ہے جبکہ عوام کو قاتلوں کے آگے تنہا چھوڑ دیا گیاہے۔
علامہ ناصر عباس جعفری نے حکومت کو متنبہ کرتے ہوئے کہا کہ اگر حکومت نے کالعدم جماعتوں اور دہشتگردی میں ملوث مدارس کیخلاف کارروائی کا آغا ز نہ کیا تو ہم حکومت مخالف تحریک کا آغاز کریں گے جو حکومت کو اپنی لپیٹ میں لے لی گی۔ انہوں نے کہا کہ حکومت کو آخری موقع دیتے ہیں کہ وہ اپنی پوزیشن واضح کرے اور کالعدم جماعتوں اور دہشتگردی میں ملوث مدارس کیخلاف کارروائی کرے۔ علامہ ناصر عباس کا کہنا تھاکہ پنجاب حکومت کالعدم جماعتوں کی سرپرست ہے۔ رانا ثناء اللہ جیسے کردار راولپنڈی سمیت پنجاب بھر کے حالات کے ذمہ دار ہیں۔ افسوس کا مقام ہے کہ امام بارگاہ چٹیاں ہٹیاں کا واقعہ پیش آیا لیکن کسی حکومتی وزیر یا ایم این اے نے سوگواروں سے اظہار تعزیت تک نہ کی۔ آج جناز ے میں مسلم لیگ ن کے نمائندوں کا نہ ہونا ثابت کرتا ہے کہ حکومت دہشتگردوں کی حامی ہے، ورنہ وہ مظلوموں کے ساتھ ہوتی۔
وحدت نیوز (لاہور) مجلس وحدت مسلمین کے مرکزی سیکرٹری سیاسیات ناصرعباس شیرازی نے وفد کے ہمراہ پاکستان مسلم لیگ (ق )کے صدر اور سابق وزیراعظم چودھری شجاعت حسین اور سابق نائب وزیراعظم چودھری پرویز الٰہی سے ان کی رہائش گاہ پر ملاقات کی ۔ ملاقات میں ایم ڈبلیو ایم کی کورکمیٹی کے ممبران اسد عباس نقوی اور محمد علی شریک تھے۔ملاقات میں دونوں جماعتوں کے رہنماوں نے گلگت بلتستان کے آئندہ انتخابات کے حوالے سے غور کیا اور انتخابات کے حوالے سے نئے اتحاد کی تشکیل پر بات چیت کی ۔ اس موقع پر چودھری شجاعت حسین کا کہنا تھا کہ گلگت بلتستان کے عوام کے مسائل کے حل اور ترقی کیلئے یکساں سوچ رکھنے والی جماعتوں کو مشترکہ جدوجہد کرنا پڑیگی، اس سلسلہ میں دیگر سیاسی جماعتوں سے رابطہ کیا جائیگا۔ ملاقات میں گلگت بلتستان کے موجودہ الیکشن اور نگران کابینہ کو ردکیا گیا اور قرار دیا گیا کہ پری پول رگنگ کا آغا ز کردیا گیا ہے جس کو کسی صورت برداشت نہیں کیا جائیگا۔ اس کیخلاف عوامی تحریک چلانے پر بھی غور کیا گیا۔ اس موقع پر ایم ڈبلیو ایم شعبہ سیاسیات کے سیکرٹری ناصر عباس شیرازی کا کہنا تھا کہ پیپلزپارٹی کی گذشتہ حکومت نے گلگت بلتستان کے عوام کچھ نہیں دیا، پانچ سال حکومت کی گئی لیکن ڈلیور نہیں کیا گیا۔ مجلس وحدت مسلمین عوامی جدوجہد کیلئے کوشاں ہے، اس موقع پر مسلم لیگ (ق) کے سینیٹر راجا محمد بشارت، صوبائی صدر مرزا حسین اور مسلم لیگ قاف کی خواتین ونگ کی نائب صدر آمنہ انصاری بھی موجود تھیں۔
وحدت نیوز(ملتان) مجلس وحدت مسلمین ملتان کے سیکرٹری جنرل علامہ قاضی نادر حسین علوی نے فرانسیسی میگزین چارلی ایبدو کی طرف سے پیامبر اسلام حضرت محمد مصطفے (ص) کی شان میں گستاخانہ خاکے شائع کرنے کی شدید مذمت کرتے ہوئے کہا کہ اسلام کے امریکہ اور یورپ میں پھیلنے کی وجہ سے اسلام دشمن طاقتیں خوف زدہ ہو گئی ہیں کیونکہ وہ دن دور نہیں جب اسلام یورپ کا سب سے بڑا مذہب ہو گا جس کو روکنے کے لئے یہ لوگ آئے روز سازشیں اور بہانے تلاش کر رہے ہیں اور نت نئے حربے استعمال کر رہے ہیں ۔کبھی ورلڈٹریٹ سنٹر میں دھماکہ کر وا کر اسلام اور مسلمانوں کے خلاف جارحیت کی جاتی ہے ۔ان خیالات کااظہار اُنہوں نے جامعہ شہید مطہری میں ضلعی کابینہ کے اجلاس سے خطاب کرتے ہوئے کیا ۔
اُنہوں نے کہا کہ کبھی اپنے پالتو ایجینٹوں القاعدہ ،طالبان ،اور داعش کے ہاتھوں لاکھوں لوگوں کا قتل عام کروا کر اسلام کی راہ میں رکاوٹیں ڈالنے کی ناکام کوشش کی جاتی ہے اور اب چند گستاخ لوگوں کے مرنے پر پورے عالم اسلام کی دل آزاری کی گئی ہے جس کی جتنی بھی مذمت کی جائے کم ہے کیونکہ پیامبر اعظم (ص) کی عزت و توقیر کی خاطر ہم سب اپنی جانوں کی قربانی دینے سے بھی ہرگز گریز نہیں کریں گے۔علامہ قاضی نادر نے کہا آج اسلام دشمن طاقتیں مسلمانوں کی نا اتفاقی سے فائدہ اور ہمارے مقدسات کی توہین کی جرات کر رہی ہیں اور اگر ہمیں دشمن کا مقابلہ کرنا ہے تو پھر ہمیں پیامبر اکرم(ص)کی تعلیمات کو اپنا کر آپس میں اتفاق و اتحاد کو فروغ دینا چاہیے جسکے بعدکوئی دشمن ،اسلام اور ہمارے مقدسات کی طرف میلی آنکھ اٹھانے کی بھی جرات نہیں کر سکتا۔
وحدت نیوز (اسلام آباد) مدارسِ جعفریہ پاکستان کی مجلس نظارت اور مرکزی کابینہ کا اجلاس اسلام آباد میں منعقد ہوا جس میں مدارسِ جعفریہ پاکستان کی مجلسِ نظارت کے اراکین ، علّامہ راجہ ناصر عبّاس جعفری ، علامہ محمّد حسنین گردیزی ،علامہ علی محمّد شاہ نقوی ،علامہ راجہ مظہر علی خان ،علامہ ناظم رضا عترتی ،علّامہ ملک نصیر حُسین ، مرکزی صدر علّامہ سید حُسین نجفی،نائب صدر ،علّامہ سیّد مہدی حسن کاظمی ، سیکرٹری جنرل ، علّامہ حسنین عارف ، سیکرٹری مالیات،علّامہ اقبال کامرانی ، سیکرٹری روابط ،علّامہ سیّد امتیاز عباس کاظمی ،سیکرٹری نشرواشاعت علّامہ ابوزر مہدوی نے شرکت کی ۔
مجلس وحدت مسلمین پاکستان کے سربراہ اور مدارس جعفریہ پاکستان کی مجلس نظارت کے رکن علامہ ناصر عباس جعفری نے اجلاس کے شرکاء سے گفتگو کرتے ہوئے کہا کہ متوازن اور معتدل معاشرے کی تشکیل میں مدارس دینیہ کا کردار انتہائی اہمیت کا حامل ہے، شیعہ مدارس دینیہ نے ہمیشہ اسلام کے روشن چہرے کو روشناس کروانے کی سعی کی ہے، پاکستان کی تاریخ گواہ ہے کہ ہمارے مدارس کبھی کسی ملک دشمن یا اسلام دشمن اقدام میں ملوث نہیں ہوئے، ملک کو درپیش دہشت گردی کی عفریت میں اہل تشیع مدارس حکومت اور فوج کی جانب سے مدارس دینیہ کی اصلاحات کے اقدام کو سراہتے ہیں، مدارس جعفریہ پاکستان کے زیر انتظام قائم مدارس دہشت گردی اور انتہاپسندی کے خاتمے کیلئے ہر ممکن تعاون کیلئے تیار ہے۔
اجلاس میں مدارس کے لئے جدید نصاب کی تدوین کے بارے میں مشاورت کی گئی ، ملکی و عالمی موجودہ صورتحال پر گفتگو کی گئی اور اس بات کا مطالبہ کیا گیا کہ دہشت گردی کے فروغ میں شامل مدارس کے خلاف آپریشن کیا جائے ، تکفیری عناصر اور ان کے مددگار پاکستان میں امن نہیں چاہتے اس لئے وہ آرمی عدالتوں اور آپریشن ضربِ عضب کے خلاف ہیں،پیغمبرِ اکرم ؐ کے گستاخانہ خاکے بنا کر مسلمانوں کے جذبات کو مجروح کرنے والے عالمی دہشت گرد ہیں، گستاخانہ مواد چھاپنے والے جریدے کے مددگار اسرائیل جیسے عالمی دہشت گرد ہیں اس سے ان کے مقاصد ثابت ہوتے ہیں ، اجلاس میں مدارس کے نصاب اور رابطہ بہتر بنانے پر زور دیا گیا۔
وحدت نیوز (اسلام آباد) آزادی اظہار کی آڑ میں دوسروں کے مقدسات کی اہانت اور انکی آزادی سلب کرنا آزادی اظہار نہیں بلکہ بغض و حسد اور دشمنی کا اظہار ہے۔ فرانس کے اک جریدے میں گستاخانہ خاکہ جات چھپنے کے حوالے سے مذمت کرتے ہوئے سیکریٹری امور خارجہ مجلس وحدت مسلمین پاکستان ڈاکٹرعلامہ شفقت شیرازی کا کہنا تھا کہ یہودی لابی بعثت رسول اکرم صلی اللہ علیہ وآلہ وسلم سے پہلے بھی ان کی دشمنی اور قتل کے درپے تھی جس سے بصری شام کے راہب بحیرہ (عیسائی پادری) نے حضرت ابوطالب کو آگاہ کیا تھا اور اس خطرے کے پیش نظر مشورہ دیا تھا کہ جس طرح میں نے علامات دیکھ کر نبی خاتم (ص) کو پہچان لیا ہے اگر یہودیوں نے پہچان لیا تو وہ انہیں اذیت پہنچائیں گے۔ جس طرح سے یہودی لابی ہمارے پیارے نبی اکرم (ص) کی زندگی میں مسلسل سازشیں کرتے رہے ہیں آج بھی زمانے کے ابوجہل و ابولہب اور ابوسفیان مل کر پیغمبر اکرم (ص) اور انکے دین اسلام کے خلاف سازشیں کر رہے ہیں۔ مسلمانان عالم کو اپنے دشمن پہچان لینا چاہیئے اور ان کی سازشوں کو ناکام کرنا چاہیئے اور متفق و متحد ہو کر ایسے اقدامات کرنے چاہیئیں کہ کسی کو دین اسلام اور محبوب خدا حضرت محمد مصطفی (ص) کی جسارت کی جرات نہ ہو۔ اس ترقی یافتہ دور کے ابوجہلوں کے اس بھیانک فعل کی پرزور مذمت کرتے ہیں اور ان کی حکومت سے مطالبہ کرتے ہیں کہ دنیا کے امن کو خطرے میں ڈالنے والے ان ابلیسوں کو عبرت ناک سزا دی جائے۔
وحدت نیوز (قم المقدسہ) مجلس وحدت مسلمین پاکستان شعبہ قم آفس میں ایک اہم اجلاس ہوا، جس کی صدارت ایم ڈبلیو ایم شعبہ قم کے سیکرٹری جنرل حجت الاسلام والمسلمین علامہ ڈاکٹرغلام محمد فخرالدین نے کی۔ اجلاس میں حوزہ علمیہ قم کے علماء اور طلاب نے شرکت کی۔ علامہ ڈاکٹرغلام محمد فخرالدین نے علماء اور فضلاء کے مشورے سے مجلس وحدت مسلمین شعبہ قم کی نئی کابینہ کا اعلان کیا اور آئندہ فعالیت کے لئے تین کمیٹیوں کا بھی اعلان کیا، تعلیم و تحقیق کمیٹی، ثقافت و تعلقات عامہ کمیٹی، میڈیا اور سیاست کمیٹی۔ اس اہم اجلاس سے خطاب میں حجت الاسلام والمسلمین علامہ ڈاکٹر غلام محمد فخرالدین کا کہنا تھا کہ ملت تشیع کے قومی پلیٹ فارم مجلس وحدت مسلمین کی پاکستان، قم المقدس اور دیگر ممالک اور شہروں میں خدمات کسی سے پوشیدہ نہیں۔ ڈاکٹر غلام محمد فخرالدین نے علماء اور طلاب کو نئے عزم و خلوص کے ساتھ ملت تشیع کی خدمت اور طلاب کی علمی و فکری مدد کی دعوت دی۔ آخر میں دعا امام زمان کے ساتھ اجلاس اختتام پذیر ہوا۔
وحدت نیوز (مشہدمقدس) مجلس وحدت مسلمین شعبہ مشہد مقدس کے سیکریٹری جنرل حجۃ الاسلام علامہ عقیل حسین خان نے فرانسیسی میگزین چارلی ہیبڈو کی طرف سے پیامبر اسلام حضرت محمد مصطفے ﷺ کی شان میں گستاخی کرنےکی پر زور مذمت کی اور کہا کہ امریکہ اور یورپ میں اسلام کے پھیلاوکی وجہ سے اسلام دشمن طاقتیں خوف زدہ ہو گئی ہیں کیونکہ وہ دن دور نہیں جب اسلام یورپ کا سب سے بڑا مذہب ہو گا جس کو روکنے کے لئے یہ لوگ آئے روز سازشیں اور بہانے تلاش کررہے ہیں اور نت نئے حربے استعمال کر رہے ہیں ۔کبھی ورلڈٹریٹ سنٹر میں دھماکہ کر وا کر اسلام اور مسلمانوں کے خلاف جارحیت کی جاتی ہے ۔کبھی اپنے پالتو ایجنٹوں القاعدہ ،طالبان ،اور داعش کے ہاتھوں لاکھوں لوگوں کا قتل عام کروا کر اسلام کی راہ میں رکاوٹیں ڈالنے کی ناکام کوشش کی جاتی ہے اور اب چند گستاخ لوگوں کے مرنے پر پورے عالم اسلام کی دل آزاری کی گئی ہے جس کی جتنی بھی مذمت کی جائے کم ہے کیونکہ پیامبر اعظم ﷺ کی عزت و توقیر کی خاطر ہم سب اپنی جانوں کی قربانی دینے سے بھی ہرگز گریز نہیں کریں گے۔
سیکریٹری جنرل مجلس وحدت مسلمین شعبہ مشہد مقدس نے کہا آج اسلام دشمن طاقتیں مسلمانوں کی نا اتفاقی سے فائدہ اور ہمارے مقدسات کی توہین کی جراٗت کر رہی ہیں۔ اور اگر ہمیں دشمن کا مقابلہ کرنا ہے تو پھر ہمیں پیامبر اکرمﷺ کی تعلیمات کو اپنا کر آپس میں اتفاق و اتحاد کو فروغ دینا چاہیے جسکے بعدکوئی دشمن ،اسلام اور ہمارے مقدسات کی طرف میلی آنکھ اٹھانے کی بھی جراٗت نہیں کر سکتا۔
وحدت نیوز (گلگت) گلگت بلتستان کے نگران وزیراعلیٰ کی جانب سے نگراں کابینہ کے انتخاب سے محسوس ہورہا ہے کہ موصوف نجم سیٹھی کا کردار ادا کرنا چاہتا ہے اور وفاقی حکومت نگران وزیراعلیٰ اور اس کی کابینہ کے ذریعے گلگت بلتستان میں بڑے پیمانے پر دھاندلی کے ذریعے تخت گلگت بلتستان پر قبضہ جمانا چاہتی ہے۔نگران کابینہ کے چناؤ میں ضلع غذر، ضلع ہنزہ نگر اور ضلع گانچھے کو مکمل نظرانداز کرنے کے ساتھ ساتھ میرٹ کا کوئی خیال نہیں رکھا گیا اور میٹرک فیل کو بھی وزارت کیلئے منتخب کیا گیاہے۔
ان خیالات کاا ظہار مجلس وحدت مسلمین گلگت بلتستان کے سیکریٹری سیاسیات غلام عباس نے اپنے ایک بیان میں کیا ہے۔ انہوں نے کہا کہ مجلس وحدت مسلمین کابینہ کی تشکیل کو مسترد کرتی ہے جس میں گلگت بلتستان کے عوام پر نااہل اور چاپلوس قسم کے افراد کو مسلط کرنے کی کوشش کی گئی ہے۔اگر نگران وزیر اعلیٰ کو کابینہ کے چناؤ میں اعتماد میں نہیں لیا گیا تو انہیں چاہئے کو مستعفی ہوجائیں۔ نگران حکومت میں ایسے افراد کو شامل کیا گیا ہے جو موجودہ پیکیج کے مخالف رہے ہیں، گلگت بلتستان کو کشمیر کا حصہ گردانتے ہیں اور گلگت بلتستان کے عوام کے آئینی حقوق کی جدوجہد کی مخالفت میں کمربستہ رہے ہیں۔نگران وزیر اعلیٰ جس طرح ایک عرصے تک قراقرم بنک کے مطلق العنان بادشاہ بنے رہے ہیں اور اسی طرز پر یہ حکومت چلانے چاہتے ہیں جو کہ ناقابل برداشت ہے۔ ان کے دور اقتدارمیں گلگت بلتستان سے نیشنل بنک کے ریجنل دفتر کو ختم کردیا گیا ہے جو کہ اس علاقے کے عوام کے ساتھ ناانصافی ہے۔انہوں نے کہا کہ نگران وزیر اعلیٰ اور اس کی منتخب کردہ کابینہ کے زیر انتظام شفاف انتخابات کا انعقاد ممکن نہیں، دھاندلی کے پیداوار نواز حکومت ملکی حالات سے سبق سیکھتے ہوئے گلگت بلتستان کے عوامی مینڈیٹ کو چرانے کی کوشش نہ کرے اور اگر ایسا ہوا تو حکمرانوں کو اس کی بہت بڑی قیمت چکانا پڑے گی۔صاف اور شفاف انتخابات نگران حکومت کی اولین ذمہ داری بنتی ہے اور اگران نگران حکومت شفاف انتخابات کے انعقاد میں ناکام ہوجاتی ہے تو گلگت بلتستان کے عوام ڈی چوک اسلام آباد کا رخ کرسکتے ہیں۔
