وحدت نیوز (سکردو) مجلس وحدت مسلمین پاکستان بلتستان سیکرٹریٹ سے جاری ایک اعلامیہ کے مطابق ایم ڈبلیوایم بلتستان کے سیکرٹری جنرل و رکن شوریٰ عالی علامہ آغاسید علی رضوی نے پارٹی ڈسپلن کی خلاف ورزی پررکن جی بی اسمبلی کاچو امتیاز حیدر خان کی بنیادی تنظیمی رکنیت معطل کر دی ہے۔ گلگت بلتستان الیکشن 2015 میں کاچو امتیاز نے سکردو حلقہ 2 مجلس وحدت مسلمین کے پلیٹ فارم سے الیکشن لڑا اور کامیاب ہوئے۔گلگت بلتستان کونسل کے حالیہ انتخابات میں ان پر بھاری مالی فائدہ کے عوض سیاسی وفاداری تبدیل کرنے کا الزام ہے۔انہوں نے اپنا ووٹ مجلس وحدت مسلمین کے امیدوار کی بجائے مد مقابل کو دے کر ایم ڈبلیو ایم کو ایک اہم نشست سے محروم کرنے میں بنیادی کردار ادا کیا اور جماعت کی سیاسی ساکھ خراب کرنے کی کوشش کی ہے جس پر ایم ڈبلیو ایم بلتستان کی اعلیٰ صوبائی قیادت نے سخت نوٹس لیتے ہوئے رکن اسمبلی کی پارٹی رکنیت کی فوری معطلی کے احکامات صادر کیے ہیں۔ جماعت کے مرکزی سیکرٹری جنرل علامہ راجہ ناصر عباس جعفری نے تین سینئر عہدیدران پر مشتمل تحقیقاتی کونسل بنانے کے حکم دیتے ہوئے اس واقعہ کی دس روز کے اندر رپورٹ طلب کر لی ہے۔کاچو امتیاز اگر دس یوم کے اندر اندر کوئی اطمینان بخش جواب نہ دے سکے توانہیں اسمبلی کی رکنیت سے خارج کرنے کے لیے بھی قانونی و آئینی کاروائی کی جائے گی۔

وحدت نیوز (اسلام آباد) مجلس وحدت مسلمین کے مرکزی رہنماعلامہ امین شہیدی نے کہاہے کہ گلگت بلتستان کوآئینی حقوق نہ دیئے گئے توعلیحدگی پسندتحریکوں کو تقویت ملے گی،ایک روزنامے کو خصوصی انٹرویو دیتے ہوئے انہوں نے کہا کہ بھارت گلگت بلتستان کے بارے میں غافل نہیں بھارت جتنا گلگت بلتستان کےاشوزکو اٹھا تا ہے،پاکستان نہیں اٹھاتا، انہوں نے کہا کہ گلگت بلتستان کے عوام گذشتہ سڑسٹھ سالوں سے اپنے بنیادی حقوق سے محروم ہیں ،یہ احساس محرومی روز بروز بڑھتا جا رہا ہے،گلگت بلتستان کو متنازعہ حیثیت کی وجہ سے اگر مکمل آئینی صوبہ نہیں بنایا جاسکتا تو پھرحکومت پاکستان گلگت بلتستان کے عوام کووہ  حقوق دے جو بھارت نے مقبوضہ کشمیرکے عوام کو دیئے ہیں،مقبوضہ کشمیر کے عوام کو لوک سبھا اور راج سبھا میں نمائندگی دی ہوئی ہے، حالانکہ کے مقبوضہ کشمیربھی اقوام متحدہ کی قراردادوں کے تحت متنازعہ ہے، انہوں نے کہا کہ جب تک اقوام متحدہ اپنا فیصلہ نہیں دیتااس وقت تک گلگت بلتستان کو بھی مقبوضہ کشمیر طرزکے حقوق دیئے جائیں ،سینٹ ،قومی اسمبلی میں نمائندگی دی جائے،آئینی حقوق نہ دینا اور اس معاملے کو طول دینا خود مسلم لیگ نواز اورریاست پاکستان کے لئے بھی نقصان دہ ہے،وزیر اعظم میاں نواز شریف نے الیکشن میں آئینی حقوق کے وعدے کیئے اب ان کا فرض ہے کہ وہ ان پر عمل کریں انہوں نے کہا کہ گلگت بلتستان کے عوام کو پاک چین اقتصادی راہداری منصوبے پر بے وقوف بنایا جا رہا ہے۔

وحدت نیوز(کراچی) ایم ڈبلیویم ضلع ملیر کے سیکریٹری امور فلاح وبہبود سید اسدعلی زیدی نے جاری ایک بیان میں کہا ہے کہ مجلس وحدت مسلمین کراچی ، ضلع ملیر کے فلاحی شعبے خیر العمل فائونڈیشن کی جانب سے مسجد وامام بارگاہ نادعلی ؑپپری گوٹھ میں سکیورٹی خدشات کے باعث CCTVکیمرے نصب کردیئے گئے ہیں،مذکورہ کیمروں کی تنصیب کی درخواست مسجد کے پیش امام مولانا منصور علی روحانی نے فلاحی شعبے کو پیش کی تھی، جس پر عمل درآماد کرتے ہوئے  مسجدکے داخلی اورخارجی چارمقامات پر جدیدقسم کےیہ CCTVکیمرے نصب کیئے گئے ہیں،مانٹرنگ سسٹم کا باقائدہ افتتاح روز ولادت امام علی ؑکے موقع پر کیا جائے گا، CCTVکیمروں کی تنصیب پر مسجدکے خطیب مولانا منصور علی روحانی اور متولی محمد علی پیرزادہ نے ایم ڈبلیوایم کا شکریہ ادا کیا ہے۔

وحدت نیوز (ٹنڈومحمدخان) سانحہ شکارپورمیں ملوث دہشتگرد ماسٹرمائنڈحماد معاویہ کی ٹنڈومحمد خان سے گرفتاری کے بعدمجلس وحدت مسلمین کے تحت دہشت گردوں کے سہولت کارو ں کے خلاف آپریشن کی حمایت میں احتجاجی ریلی نکالی گئی ، احتجاجی ریلی جامع مسجد علی ؑ سے نکالی گئی جو کہ  تین بتی چوک پہنچ کے اختتام پذیر ہوئی،جس کی قیادت ضلعی سیکریٹری جنرل محب علی بھٹو نے  کی جبکہ مولانامحمد بخش غدیری نے شرکائے احتجاج سے خطاب کیا، اس موقع پر خطیب جامع مسجد مولانا امیر حسین رحمانی سمیت عوام کی بڑی تعداد نے شرکت کی ، مقررین نے کہا کہ سانحہ شکار پورکے ماسٹر مائنڈ کا ٹنڈومحمد خان سے گرفتار ہونا باعث تشویش ہے، اس سفاک دہشت گرد کی ٹنڈومحمد خان سے گرفتاری علاقائی امن کیلئے خطر ہے، حماد معاویہ کے سہولت کاروں کے خلاف کسی قسم کی کاروائی نہ ہونا شکوک وشبہات کو جنم دے رہی ہے، قانون نافذ کرنے والے ادارے اس خطرناک دہشت گرد کے سہولت کاروں کو بھی جلد اس جلد کیفرکردار تک پہنچائیں۔

وحدت نیوز (شکارپور) شہداء کمیٹی شکارپور کے زیر اہتمام آل پارٹیز امن کانفرنس میں ضلع بھر میں رینجرز سے آپریشن کروانے کا مطالبہ کیا گیا،22اپریل کو احتجا جی ریلی نکالنے کا اعلان کیا ،تفصیلات کے مطابق جمعے کو پریس کلب کے شیخ ایاز ہال میں شہداء کمیٹی کی جانب سے ’’بارود کے ڈھیر پر کھڑا ہوا شکارپور اور سرکارکی خاموشی‘‘کے عنوان کے تحت آل پارٹیز امن کانفرنس ہوئی ، جس کی صدارت شہداء کمیٹی کے چیئرمین اور مجلس وحدت مسلمین کے مرکزی رہنماء علامہ مقصود علی ڈومکی نے کی، جبکہ آل پارٹیز میں مختلف مکتبہ فکر کے رہنما شریک ہوئے ،مولوی سکندر دل،بار کونسل کے صدر ایڈوکیٹ انور شیخ،زاہد بھنبرو ، شیول داس ،زاہد پہوڑ ،دانش حیدری و دیگر نے خطاب کیا ، شرکاء نے رینجرز سے ضلع شکارپور میں دہشت گردوں کے خلاف آپریشن کا مطالبہ کیا ،انہوں نے 22اپریل کو احتجاجی ریلی نکالنے کا بھی اعلان کیا ۔
علامہ مقصود علی ڈومکی نے کہا کہ شکارپور کے چپے چپے پر کالعدم تنظیموں کے جھنڈے لگے ہوئے ہیں جبکہ اس وقت شکارپور میں 2خودکش بمبار داخل ہوچکے ہیں جب تک دہشتگردوں کی نر سری ختم نہیں ہوتیں، تب تک کے لئے نئے دہشتگرد جنم لیتے رہیں گے سندہ میں مستونگ کے دہشت گرد آرہے ہیں ،مگر کوئی ان کو روکنے والا نہیں ہے ۔

وحدت نیوز(ٹنڈوالہیار) مجلس وحدت مسلمین ضلع ٹنڈوالہیارکی جانب سے یونٹ سازی کا سلسلہ جاری ہے، اس حوالے سے گوٹھ حاجی احمد خان شالاری میں ایم ڈبلیوایم کے نئے یونٹ کے قیام کیلئے جنرل باڈی اجلاس منعقد کیا گیا جس کی صدارت ضلعی سیکریٹری جنرل غلام رسول نے کی، اس موقع پراراکین نے کثرت رائے سے مولانا ضامن علی کو ایم ڈبلیوایم گوٹھ حاجی احمد خان شالاری کاسیکریٹری جنرل منتخب کرلیا ، ضلعی سیکریٹری جنرل غلام رسول نے نومنتخب یونٹ سیکریٹری جنرل سے انکے عہدے کا حلف لیا۔