وحدت نیوز (آرٹیکل)  علم کلام کےاہم مباحث میں سے ایک حسن و قبح عقلی کا بحث ہے ۔اس سے مراد یہ ہے کہ کچھ افعال ذاتی طور پر حسن {اچھے} اور کچھ افعال ذاتی طور پر قبیح{ برے} ہیں ۔ معتزلہ اور امامیہ حسن و قبح عقلی کے قائل ہیں جبکہ اشاعرہ اس کی نفی کرتے ہیں۔ بہت سے کلامی  مسائل اس بحث پر موقوف ہیں مثلا انسان کا اپنے اعمال میں خود مختار ہونا،خدا وند متعال کی بعض صفات کمالیہ کا ثبوت جیسے خدا کا عادل ہونا،اسی طرح بعض صفات سلبیہ بھی اسی بحث پر موقوف ہے جیسے خدا سے قبیح کا سرزد نہ ہونا،خداکا ظلم نہ کرنا وغیرہ ۔ جو لوگ حسن اور قبح کے قائل ہیں وہ انسانی افعال میں انسان کو مختار،خدا کو عادل مانتے ہیں جبکہ حسن و قبح کے مخالفین انسان کو مجبور اور خداکی عدالت سے انکار کرتے ہیں ۔حسن و قبح کا مسئلہ یونانی فلسفۂ اخلاق میں موجود تھا کیونکہ وہ اخلاقی اقداروں کی بنیاد حسن و قبح کو قرار دیتے تھے ۔1۔اسی طرح اسلام سے پہلے ثنویہ ، تناسخیہ و براہمہ بھی حسن و قبح ذاتی کے معتقد تھے۔2۔ دوسری صدی میں کلام اسلامی میں حسن و قبح کی بحث کو ایک خاص مقام حاصل ہوا جس کی بنا پر متکلمین عدلیہ اور اشاعرہ وجود میں آئے۔

حسن و قبح کے  تین معانی ذکر ہوئےہیں:

الف۔ کمال و نقص
حسن و قبح سے کمال اور نقص مراد لئے جاتے ہیں نیز حسن وقبح افعال اختیاری کیلئے صفت بنتے ہیں ۔ مثلا علم حاصل کرنا حسن  جبکہ جہل قبیح ہے۔ یعنی علم حاصل کرنا نفس کیلئے کمال ہے اور جہل نفس کی نسبت نقص ہے۔اس معنی کے لحاظ سے اکثر اخلاقی صفات حسن اور قبیح  ہیں یعنی ان کا ہونا نفس کیلئے کمال اور نہ ہونا نقص ہوتا ہے ۔

ب۔ ملائمت نفس یا منافرت نفس
مثلایہ منظر خوبصورت ہےیا یہ منظر خوبصورت نہیں ہے ۔ان افعال میں حسن اور قبح کی بازگشت حقیقت میں نفس کی طرف لوٹتی ہے یعنی انسانی نفس کو اس سے لذت محسوس ہونے کی وجہ سے انسانی نفس اس کی طرف میلان رکھتا ہے یا انسانی نفس اس سے قبح کا احساس کرتا ہے اور اس سے دوری اختیاری کرتا ہے ۔اس قسم میں کبھی حسن و قبح کو مصلحت اور مفسدہ سے بھی تعبیر کرتے ہیں۔3۔یہ قسم پہلی قسم سے زیادہ وسیع تر ہے ۔ یہ قسم اشاعرہ اور عدلیہ کے درمیان محل نزاع نہیں ہے ۔

ج۔ استحقاق مدح و ذم
عقلا کے نزدیک فعل حسن کو انجام دینے والا قابل مدح اور ستائش ہے نیز ثواب کا مستحق ہےجبکہ فعل قبیح کو انجام دینے والا قال مذمت ہے اور عقاب کا مستحق ہے ۔ بعبارت دیگر حسن وہ چیز ہے جسے عقلا کے نزدیک بجا لانا چاہئے اور قبیح وہ ہے جسے عقلا کے نزدیک بجا نہیں  لاناچاہئے ۔عقل اس بات کو درک کرتی ہے کہ حسن فعل کو انجام دینا چاہئے اور قبیح کو ترک کرنا چاہئے۔ 4۔ پہلے اور دوسرے معنی کے اعتبار سے عدلیہ اور اشاعرہ میں کوئی اختلاف نہیں ہے جبکہ تیسرےمعنی کی نسبت عدلیہ کی طرف دیتے ہیں یعنی بعض افعال کے حسن اور قبح کے قائل ہیں جبکہ اشاعرہ کلی طور پر اس بات سے انکار کرتے ہیں ۔5

شیعہ مذہب میں عدل الہیٰ کی تفسیر حسن و قبح عقلی  کے ذریعےکی جاتی ہے ۔حسن و قبح عقلی سے مراد یہ ہے کہ فاعل مختار سے جو بھی کام سرزد ہوتا ہے وہ حقیقت میں یا مستحسن ہے یا قبیح ،یعنی یا اچھا ہے یا برا ۔انسان کی عقل بعض  کاموں کے اچھے اور برے ہونے میں تمیز کر سکتی ہے  اگرچہ عقل تمام کاموں کےاچھےاور برے ہونے کی شناخت نہیں کر سکتی جس کی بنا پر وہ وحی الہیٰ کی محتاج ہے ۔بعبارت دیگر حسن و قبح عقلی مقام ثبوت اور نفس الامر میں عمومیت رکھتےہیں لیکن مقام اثبات میں افعال کے حسن و قبح کی شناخت کا دائرہ عام نہیں ہے۔یہاں انسان کی عقل محدود پیمانے پر افعال کے حسن و قبح کو درک کرتی ہے ۔ قرآن کریم کی آیات سے مذکورہ مطالب واضح طورپر سامنے آتے ہیں جیساکہ قرآن کریم پیغمبر اسلام صلی اللہ علیہ وآلہ وسلم کی ماموریت کے بارے میں ارشاد فرماتا ہے :{ يَأْمُرُہُم بِالْمَعْرُوفِ وَ يَنہاہُمْ عَنِ الْمُنکَر}6۔وہ نیکیوں کا حکم دیتاہے اور برائیوں سے روکتاہے ۔ اس آیت  کے ظاہر سےیہی معلوم ہوتا ہے کہ افعال حقیقت میں دو قسم کے ہیں جن میں سے بعض معروف { حسن }اور بعض منکر {قبیح}ہیں۔پیغمبر اسلام صلی اللہ علیہ وآلہ وسلم معروف کا حکم دیتے اور منکرات سےنہی کرتے تھے۔ امیر المومنین علیہ السلام  اپنی وصیت میں امام حسن مجتبی علیہ السلام سے مخاطب ہو کر فرماتے ہیں :{انہ لم یامرک الا بحسن ولم ینہک الا عن قبیح}7۔اس نے تجھے حکم نہیں دیا مگر اچھی چیز کا اور تجھے منع نہیں کیا مگر بری چیز سے ۔قرآن کریم میں بہت سارے مقامات پر خداوند متعال انسانی عقل و ضمیر کو فیصلے کی دعوت دیتاہے یعنی انسانی عقل بعض افعال کے {خواہ وہ نظری ہوں یا عملی } کےحسن و قبح کو درک کرنے کی صلاحیت رکھتی ہےجیساکہ ارشاد ہوتا ہے :{ ہَلْ جَزَاءُ الْاحْسَانِ إِلَّا الْاحْسَان}8۔کیا احسان کا بدلہ احسان کے علاوہ کچھ اور ہو سکتا ہے ؟{ قُلْ ہَلْ يَسْتَوِی الَّذِينَ يَعْلَمُونَ وَ الَّذِينَ لَا يَعْلَمُون}9۔کہہ دے کہ کیا وہ لوگ جوجانتے ہیں ان کےبرابر ہیں جو نہیں جانتے ۔

{أَ فَمَن يہَدِی إِلیَ الْحَقّ أَحَقُّ أَن يُتَّبَعَ أَمَّن لَّا يہَدِّی إِلَّا أَن يہُدَی  فَمَا لَکمُ کَيْفَ تحَکُمُون}10۔اور جو حق کی ہدایت کرتا ہے وہ قابل اتباع ہے یا  وہ جو ہدایت کرنے کے قابل نہیں ہے مگر یہ کہ اس کی ہدایت کی جائے ؟تو آخر تمہیں کیا ہو گیا ہے اور تم کیسے فیصلے کررہے ہو؟{ أَمْ نجَعَلُ الَّذِينَ ءَامَنُواْ وَ عَمِلُواْ الصَّالِحَاتِ كاَلْمُفْسِدِينَ فیِ الاَرْضِ أَمْ نجَعَلُ الْمُتَّقِينَ كاَلْفُجَّار}11۔کیاہم ایمان لانےوالوں اور نیک عمل کرنےوالوں کو زمین میں فسادبرپا کرنے والوں جیسا قرار دیدیں یا صاحبان تقوی کو فاسق و فاجر افراد جیسا قرار دیدیں؟

اگر ہم حسن و قبح عقلی کو قبول نہ کریں توہم حسن وقبح شرعی کوبھی ثابت نہیں کر سکتے کیونکہ حسن و قبح شرعی کوہم اس وقت ثابت کر سکتے ہیں جب پیغمبر اسلام صلی اللہ علیہ وآلہ وسلم کی نبوت اور عصمت ثابت ہو جبکہ شرعی دلیل سے ان دونوں کو ثابت کرنے سے دور لازم آتا ہے جوکہ محال ہے ۔ اگر ہم  عقل کے اس حکم کو قبول کریں {جو یہ ہے کہ کسی جھوٹے شخص کو معجزہ دینا نیز کسی ایسے شخص کو لوگوں کی ہدایت کےلئےمنتخب کرنا جو خود  خطا کارا و رگناہگار ہو ،قبیح ہے جبکہ خداوند متعال ہر قسم کے قبیح کاموں سے منزہ ہے }تو  پھرہم نبوت اور شریعت کو ثابت کر سکتے ہیں  نیز اسی طریقے سے حسن و قبح شرعی کو بھی ثابت کر سکتے ہیں ۔ تجرید الاعتقاد میں محقق طوسی  لکھتےہیں :اگر حسن و قبح کو ثابت کرنے کا راستہ شرع تک محدود رہے تو افعال کا حسن و قبح کلی طور پر منتفی ہوگا اور شرع و عقل دونوں سے ثابت نہیں ہوگا ۔12۔حسن و قبح عقلی کی اثبات کے بارے  میں متعدد دلائل میں سے نمونے کے طور پرتین دلیلوں کی طرف اشارہ کرتے ہیں:

الف: یہ ایک حقیقت ہے کہ ہر مسلک سے تعلق رکھنے والا شخص عدل و انصاف کی خوبی ،ظلم و ستم کی بدی، عہد وپیمان پر پابند رہنےکی اچھائی ،عہدشکنی کی برائی اور نیکی کاجواب نیکی سے دینے کودرک کرتا ہے۔ تاریخ بشریت کا مطالعہ  اس حقیقت کی گواہی دیتا ہے اور آج تک اس امر کا مشاہدہ نہیں ہوا کہ کسی عاقل انسان نے اس حقیقت کا انکار کیا ہو ۔

 ب: اگر فرض کریں کہ عقل تمام افعال کے حسن و قبح کو درک کرنے میں کلی طور پر ناتواں ہے اور انسانوں کو تمام افعال کے حسن و قبح جاننے کے لئے شریعت کی طرف رجوع کرناچاہیے توہمیں یہ ماننا پڑے گا  کہ حسن و قبح شرعی بھی قابل اثبات نہیں کیونکہ خود شریعت کے ذریعہ شریعت کو ثابت نہیں کر سکتے کیونکہ اس سے دورلازم آتاہے جوکہ  محال ہے۔اس کے علاہ قرآنی آیتوں  سے معلوم ہوتاہے کہ انسانی عقل بعض افعال کے حسن و قبح کو درک کرنے کی صلاحیت رکھتی ہے ۔اس بنا پر خداوند کریم ،انسانی عقل و ضمیر کوفیصلہ کی دعوت دیتا ہے جیساکہ ارشاد ہوتا ہے :{افنجعل المسلمین کالمجرمین ۔مالکم کیف تحکمون}13۔کیاہم اطاعت گذاروں کو مجرموں جیسا بنا دیں؟تمہیں کیا ہوگیا ؟ کیسا فیصلہ کر رہے ہو  ۔14

ج:اگر حسن اور قبح عقلی نہ ہو بلکہ شرعی ہو تو  اس صورت میں شارع حسن کو قبیح اور قبیح کو حسن قرار دے سکتا ہے۔اس صورت میں لازم آتا ہے کہ احسان کرنا حسن ہونے کی بجائے قبیح اور برے اعمال قبیح ہونے کی بجائے حسن میں تبدیل ہو جائے جبکہ یہ بدیہی طور پر باطل ہے کیونکہ انسان کی وجدان اور ضمیر  اس بات کی گواہی دیتا  ہے کہ محسن کی مذمت کرنا صحیح نہیں  اسی طرح برے انسان  کی مدح کرنا  بھی درست نہیں ہے ۔15

حسن و قبح کے منکرین اپنی دلیل اس طرح سے پیش کرتے ہیں:
الف:انسان اپنے افعال میں مجبور ہے ۔جو انسان اپنے افعال میں مجبور ہو وہان عقل حسن اور قبح کا حکم نہیں لگاسکتی ہے ۔ 16
ب:اگر جھوٹ  بولنے میں  ذاتی قباحت موجود ہو  تو بعض اوقات  بعض مصالح کی خاطر جھوٹ بولنے کو قبیح تصور نہیں کیا جاتا ہے جبکہ جو چیز کسی چیز کی ذات یا لازم صفت ذات ہواس کا جدا ہونا ممکن نہیں ہے۔مثلا جھو ٹ بول کر نبی کی جان کو ظالموں سے  بچائے ۔اگرجھوٹ بولنے میں  ذاتی قباحت ہوتی تو  اس مقام پر جھوٹ  بولنےکو  قبیح  ہوناچاہئے تھا ۔بنابرین حسن و قبح ذات کا حصہ نہیں ہیں یا ذات  کے صفات لازم میں سےنہیں ہیں۔17
 حسن  و قبح کے منکریں کے لئے جواب یہ ہے کہ انسان اپنے افعال و اعمال میں خود مختار و آزاد ہے ۔اسی طرح اگر کسی اہم مصلحت کی خاطر جیسے نبی کی جان بچانا اگر جھوٹ بولنے پر موقوف ہو تو اس سے جھوٹ کی ذاتی قباحت ختم نہیں ہوتی بلکہ صرف اس اہم مصلحت کی خاطر اس شخص کے لئے جھوٹ بولنا جائز ہے۔18

تحریر: محمد لطیف مطہری کچوروی

حوالہ جات:
1.    محمد کاظم عماد زادہ،مقالہ بررسی تطبیقی حسن و قبح وثمرات آن در اندیشہ شیعہ ،معتزلہ ، اشاعرہ و ماتریدیہ۔
2.    شہرستانی، محمد، نہایہ الاقدام، ص۳۷۱
3.    شیخ مظفر ،اصول الفقہ ، ج 2 ص 274 با حوالۂ قوشجی ،شرح التجرید،ص338 ۔ایجی، المواقف ج 3 ص 262۔
4.    شیخ محمد رضا مظفر ،اصول الفقہ،ج 1 ؛ میثم بحرانی ،قواعد المرام،ص 104؛ایجی ،المواقف ج3 ص262؛قاضی جرجانی ، شرح المواقف،ض8 ص 181۔
5.     جعفر سبحانی،الٰہیات،ض 231۔
6.    اعراف،157۔
7.    نہج البلاغۃ  ،نامہ،31۔
8.    الرحمن،60۔
9.    زمر،9
10.    یونس،35۔
11.    ص،28۔
12.    تجرید الاعتقاد،محقق طوسی۔
13.    قلم،35- 36۔
14.    جعفر سبحانی ،عقائد امامیہ، ص 140۔
15.    جعفرسبحانی،الہیات ص 246
16.    قاضی جرجانی ،شرح المواقف،ج8 ص185۔ایجی،المواقف ج3 ص 262
17.     قاضی جرجانی ،شرح المواقف،ج8 ص189۔ایجی،المواقف ج3 ص 262
    18۔    علامہ  بہبہانی الفوائد الحائریہ، ص 372۔

وحدت نیوز (چنیوٹ)  مجلس وحدت مسلمین ضلع چنیوٹ شعبہ خواتین کے زیر اہتمام عظمت شہداٗ کانفرنس کا انعقاد چنیوٹ شہر کی قدیمی امام بارگا ہ ٹھٹی شرقی میں مجلس وحدت مسلمین پاکستان شعبہ خواتین فیصل آباد ڈویژن اور ضلع چنیوٹ کے زیر اہتمام ایک عظیم ’’عظمت شہداء ملت کانفرنس ‘‘ منعقد ہوئی اس کانفرنس میں مجلس وحدت مسلمین پاکستان شعبہ خواتین کی مرکزی سیکریٹری جنرل خواہر سیدہ زہراء نقوی بطور مہمان خصوصی کراچی سے تشریف لائیں ۔ اس کے علاوہ برادر سید ناصر شیرازی مرکزی ڈپٹی سیکریٹری جنرل مجلس وحدت مسلمین پاکستان، پروفیسر سمیرا نقوی رکن نظارت امامیہ اسٹوڈنٹس پاکستان شعبہ طالبات اور خواہر سیدہ معصومہ نقوی مرکزی سیکریٹری تنظیم سازی مجلس وحدت مسلمین پاکستان شعبہ خواتین نے بھی بطور مہمان خصوصی شرکت فرمائی ۔

اس کانفرنس میں فیصل ڈویژن اور ضلع چنیوٹ کی خواہران کی ایک بڑی تعداد شریک تھی ۔خواہر سیدہ زہراٗ نقوی نےاپنے خطاب میں شہداٗ ملت کو نذرانہ عقیدت پیش کرتے ہو ئے کہا کہ کہ شہداء ملت جعفریہ کی گراں قدر خدمات کو ہمیشہ یاد رکھا جائیگا اور جن مقاصد کیلئے شہداء نے اپنی جان قربان دی ہے اس کو پایہ تکمیل تک پہنچایا جائیگا۔ شہید کی موت قوم کیلئے حیات کا درجہ رکھتی ہے۔ شہیدوں کا نام اور شہادت کی ثقافت کو زندہ رکھنا ملک وملت کی بنیادی ضرورت ہے۔ شہادت کی ثقافت کا مطلب ہے عوام اور تمام انسانیت کے بلند مدت اہداف و مقاصد کے لئے ایثار اور قربانی پیش کرنے کی ثقافت اور یہ ثقافت مغرب کی انفرادیت کے کلچر کے بالکل برخلاف ہے جو ہر چیز اور ہر اقدام کو اپنے ذاتی و شخصی مفادات کی کسوٹی پر تولنے کی دعوت دیتا ہے۔ جس معاشرے میں بھی شہادت اور ایثار کا جذبہ عام ہو جائے، تووہ معاشرہ ترقی کرتا ہے اور ایسے معاشرے میں ترقی کا سفرمیں رکاوٹ یا پسماندگی کا کوئی امکان نہیں رہتا۔معاشرے میں شہدا کی یاد اور شہادت کا موضوع ایک زندہ حقیقت کے طور پر پیش کیا جاتا رہے گا تو پھر شکست کا کوئی تصور ہی باقی نہیں رہے گا اور ایسی قوم ہمیشہ بے خوفی کے ساتھ ترقی و پیشرفت کے راستے پر آگے بڑھتی رہے گی۔آخر میں انہوں نے حکومت وقت سے مطالبہ کیا کہ دہشت گردی اور ٹارگٹ کلنگ کے نیٹ ورک کو توڑنے میں اپناکردار ادا کرے۔ تسلسل سے ہونیوالی قتل و غارت گری سے عوام پریشان ہیں۔

برادر ناصر عباس شیرازی مرکزی ڈپٹی سیکریٹری جنرل مجلس وحدت مسلمین پاکستان نے شہداء کو ہمیشہ خراج عقیدت پیش کئے جانے اور ان کی گراں بہا یادوں کو فراموش ہونے سے بچانے پر تاکید کرتے ہوئے کہا کہ شہیدوں کی یاد میں نشستوں کا اہتمام در حقیقت جہاد اور شہادت کی روش کو زندہ رکھنے کی کوشش ہے اور ضروری ہے کہ معاشرے میں شہیدوں کی یاد اور ان کی زندگی میں پائے جانے والے اہم نکات کی ترویج کی جائے۔

  امامیہ اسٹوڈنٹس پاکستان شعبہ طالبات کی رکن نظارت پروفیسر خواہر سمیرا نقوی نے کہا کہ شہداء قوم کے محسن ہیں اور زندہ قومیں اپنے محسنوں کو یاد رکھتی ہیں۔ شہدائے راہ حق سے تجدید عہد کرتے ہوئے ہم یہ بتانا چاہتے ہیں کہ ہم شہداء کے مشن کو پایہ تکمیل تک پہنچائیں گے۔خواہر سیدہ معصومہ نقوی مرکزی سیکریٹری تنظیم سازی شعبہ خواتین نے اپنے خطاب میں کہا کہ عظمت شہداء کانفرنس کے انعقاد کا یہ پیغام ہوگا کہ ہم شہداء کے مشن اور مقصد کو فراموش ہونے نہیں دیں گے۔آج کے اس عظیم اجتماع کا مقصد بھی یہی ہے کہ ہم اپنے شہداء کو نہ بھولے ہیں اور نہ کبھی بھولیں گے ۔بعد ازاں شہداء کی بلندی درجات کیلئے خصوصی دعا بھی کی گئی۔

وحدت نیوز (کراچی) مجلسِ وحدت مسلمین کراچی ضلع جنوبی محمود آباد منظور کالونی یونٹ میں مجلسِ وحدت مسلمین پاکستان کے فلاح و بہبود کے ادارے خیر العمل فاونڈیشن کے تعاون سے بازار مہربانی کا انعقاد کیا گیاتھا۔ جس میں علاقے کی خواہران نے بطور والنٹیرز بہترین کارکردگی سرانجام دی۔ اس سلسلے میں انکی حوصلہ افزائی کے لئے اعزازی سرٹیفکیٹ دینے کے لئے ایک نشست کا اہتمام کیا گیا۔جس میں مجلسِ وحدت مسلمین شعبہ خواتین پاکستان کی جانب سے مرکزی ڈپٹی سیکرٹری خواہر ام البنین اور ضلع وسطی کی سیکرٹری جنرل خواہر یاسمین نے شرکت کی۔سرٹیفکیٹ کی تقسیم کے ساتھ ساتھ بالخصوص 13 مئ یومِ مردہ باد امریکا ریلی کی مناسبت سے خواتین کو بریفنگ بھی دی گئی اور انہیں مرکزی مردہ باد امریکا ریلی میں بھر شرکت کی تاکید کی گئی۔

وحدت نیوز (راولپنڈی)  مجلس وحدت مسلمین شعبہ خواتین راولپنڈی کی جانب سے "جشنِ مھدئ موعود حجتِ خدا امامِ زمانہ علیہ سلام" منعقد کیا گیا۔پروگرام کا باقائدہ آغاز تلاوت کلامِ پاک سورۃ الرحمان سے قندیل زہرا کاظمی نے کیا۔ اس کے بعد نعتِ سرکارِ روعالم کا ہدیہ پیش کیا گیا۔خواہر مہویش زہرا کاظمی نے پروگرام میں نظامت کے فرائض سر انجام دیے۔ بعد از نعتِ مقبول (ص) دعاءِ امامِ زمانہ (ع) پڑھی گئ۔اس کے بعد خواہر عنبرین زہرا اینڈ سسٹرز ،خواہر فراہ اور دیگر خواہران نے ہدیہ منقبت پیش کیا۔ اس کے بعد اگلا سیشن پینل ڈسکشن کا تھا۔ پینل ڈسکشن میں ایم ڈبلیو ایم شعبہ خواتین کی مرکزی سیکریٹری جنرل محترمہ زہرا نقوی، سیکریٹری جنرل ضلع راولپنڈی محترمہ قندیل زہرا کاظمی، محترمہ نگین زہرا ،محترمہ نایاب زہرا سے سوالات کئے گئے جن کے انہوں نے خوبصورت الفاظ میں جوابات دئیے۔پینل ڈسکشن سیشن میں نظامت کے فرائض محترمہ روبی نے ادا کیئے۔

اس کے بعدمحترمہ پروفسر انجم نقوی نے امامِ زمانہ (ع) کے ظہور پر خصوصی خطاب کیا۔ اس کے بعد ایم ڈبلیو ایم شعبہ خواتین کی مرکزی سیکریٹری جنرل محترمہ زہرا نقوی نے پابندی ِ وقت پر آنے والی خوہران کو انعامات سے نوازا اور ایم ڈبلیو ایم راولپنڈی ڈویژن کی ارکان خواتین خواہر سمن زہرا ، خواہر فروا نقوی، خواہر تنویز، خواہر شاہین، خواہر ناہید، خواہر سمینہ،خواہر فرہت اور خواہر پھول بی بی میں حسنِ کارکردگی اسناد تقسیم کیں۔اس کے بعد محترمہ زہرا نقوی نے امامِ وقت (ع) کی بارگاہ میں خصوصی استغاثہ پیش کیا۔اس پُر مسرت موقع پر کیک کاٹا گیا اور قندیلیں روشن کی گئیں۔جشن میں خیمئہ امامِ زمانہ (ع) بھی نصب کیا گیا تھا جہاں خواہران نے نمازِ حاجات اور ہدیہ نمازیں ادا کیں۔ اس کے علاوہ عہد بورڑ بھی بنایا گیا تھا۔ پروگرام کے آخر میں محترمہ زہرا نقوی نے خصوصی دعائیں بھی کرائیں اور راولپنڈی ڈویژن کی جانب سے منعقد کردہ اس جشن کو بھی بہت سراہااور پوری راولپنڈی کیبنٹ کی جانب سے محترمہ زہرا نقوی کی خصوصی شرکت پر ان کا شکریہ بھی ادا کیا گیا۔

وحدت نیوز(رحیم یارخان)  مجلس وحدت مسلمین شعبہ خواتین رحیم یارخان کی جانب سے استقبال ماہ رمضان ،بقیۃ اللہ کانفرنس کا انعقادکیا گیا ۔ کانفرنس کا باقاعدہ آغاز’’حدیث کساء‘‘ سے ہوا جس کی سعادت خواہر کنیز فاطمہ (ایڈووکیٹ) نے حاصل کی ۔اس کے بعد بچیوں نے دعائے زہراء(س) پڑھی ۔نظامت کے فرائض آفس سیکریٹری خواہر نزہت خلیل نے انجام دیئے ۔خواہر کنیز فاطمہ ایم ڈبلیو ایم سیکریٹری تبلیغات نے ’’آمد ماہ رمضان المبارک ‘‘ اور روزے کی فضیلت پر تفصیل سے روشنی ڈالی۔اس کے بعد خواہر عصمت زیدی صاحبہ ضلعی سیکریٹری جنرل نے کوئز پروگرام کے حوالے سے بچیوں سے سوالات پوچھے ۔کوئز پروگرام کا موضوع’’  چودہ معصومینؑ  ‘‘ کے حوالے سے انتخاب کیا گیا تھا ۔

خواہر عصمت زیدی ضلعی ڈپٹی سیکریٹری جنرل ضلع رحیم یارخان اور خواہر عطیہ عباس زیدی نے کوئز پروگرام میں شامل بچیوں کو انعامات سے نوازا بچیوں نے دعائے امام زمانہ (عج) اور منقبت بھی پیش کی ۔ آخر میں ایم ڈبلیو ایم پاکستان ضلع رحیم یار خان ،شعبہ خواتین کی ضلعی سیکریٹری جنرل خواہر سیدہ تنویر زہرہ کاظمی نے ’’بقیۃ اللہ کانفرنس ‘‘ کے موضوع پر خصوصی خطاب کیا اور ہال میں موجود خواتین سے سوالات بھی پوچھےگئے ۔درست جواب دینے والوں میں انعامات تقسیم کیے گئے ۔بارگاہ امام زمانہ (عج) کی خدمت تمام حاضرین نے ملکر استغاثہ پیش کیا ۔ ضلعی سیکریٹری جنرل شعبہ خواتین تمام حاضرین کا شکریہ ادا کیا ۔کانفرنس کا اختتام دعائے ’’فرج امام زمان ۰عج) ‘‘ سے ہوااور حاضرین میں تبرک تقسیم کیا گیا ۔ کانفرنس میں شامل خواہران اس پروگرام کے انعقاد پر ضلعی سیکریٹری جنرل کو مبارک باد پیش کی اور کہا کہ آئندہ بھی اس طرح کے علمی ،دینی اور مذہبی پروگرامات کے انعقاد کو جاری رکھا جائے ۔

وحدت نیوز (اسلام آباد)  13 مئی کو عالمی دہشتگرد امریکہ و اسرائیل کے خلاف یوم مردہ باد امریکہ منایا جائے گا۔ امریکہ اور اس کے اتحادیوں نے نہتے اور جنگ سے بے حال شامیوں پر جارحیت کی۔ دنیا بھر میں جتنی بھی بد امنی ہے اس کے پیچھے امریکہ اور اس کے حواری ہیں جو دنیا پر اپنا تسلط برقرار رکھنے کے لئے دنیا بھر میں انسانوں کا خون بہارہے ہیں۔ان خیالات کا اظہار مجلس وحدت مسلمین کے رکن شوریٰ عالی اور سیکریٹری جنرل ایم ڈبلیوایم خیبرپختونخوا ہ علامہ محمد اقبال بہشتی نے مرکزی سیکریٹریٹ میں منعقدہ اجلاس سے خطاب کرتے ہوئے کیا،اس میٹنگ کی صدارت جناب برادر اقرار ملک مرکزی سیکریٹری روابط نے کی اور برادر نثار فیضی مرکزی سیکریٹری تعلیم نے اپنے خطاب میں کہا کہ ہمیں 13 مئی کا احتجاج رسماً ادا نہیں کرنا بلکہ یہ ہماری اخلاقی اور شرعی ذمہ داری ہے کہ ہم عالمی حالات کے تناظر میں اور حضرت امام علیؑ کے فرمان کے مطابق ظالم کے خلاف اور مظلوموں کے حق میں اپنی آواز بلند کریں ۔

اس میٹنگ میں ضلع راولپنڈی اوراسلام آباد کی کابینہ کے علاوہ وحدت یوتھ کے نمائندے بھی شریک ہوئے ۔ ضلع راولپنڈی اور اسلام آباد کے مسئولین نے 13 مئی کے احتجاج کو بھرپور طریقے سے اسلام آباد پریس کلب پر منانے کا اعلان کیا اور اس عزم کا اظہار کیا کہ اس بار دونوں اضلاع ملکریوم مردہ باد امریکہ منائیں گے ۔ مولانا علی شیر انصاری نے تلاوت کلام پاک سے اس میٹنگ کا آغاز کیا اور اختتام پر علامہ راجہ ناصر عباس جعفری سربراہ مجلس وحدت مسلمین پاکستان کے بھانجے نمبردار فخرعباس مرحوم اور انکی اہلیہ کے علاوہ علامہ علی اکبر کاظمی کے چچا زاد بھائی کے انتقال پر مرحومین کے لئے دعائے مغفرت کرائی گئی ۔