وحدت نیوز(چنیوٹ) گزشتہ سالوں کی طرح اس سال بھی مجلس وحدت مسلمین ضلع چنیوٹ شعبہ خواتین نے ۲۹ محرم الحرام تا ۳ صفر المظفر ٹھٹھی شرقی امامبارگاہ میں خمسہ مجالس عزا کا انعقاد کیا،ان مجالس ہائے عزا سے ذاکرہ اہل بیتؑ محترمہ انجم زہراء کاظمی(چنیوٹ) محترمہ سمیرا نقوی(فیصل آباد)اور محترمہ رباب رسول(فیصل آباد) نے خطاب کیا ، اپنے خطاب میں ان معلمات نے جناب زینب سلام الله علیھا کی سیرت و کردار کواجاگر کیا ، محترمہ سمیرا نقوی نے واقعہ کربلا کے بعد ام المصائب سیدہ زینب ع کے کردار کو پیش کیا ،کوفہ و شام کے بازاروں میں بے مقنعہ و چادر بی بی کے خطبوں نے دربار ابن ذیاد و یزید کو لرزا کر رکھ دیا اور اپنے بابا علیؑ کی فصاحت و بلاغت کا عکس پیش کیا ۔

محترمہ رباب رسول نے آج کے دور میں خواتین کے لیے کردار زینبی کو بہترین اسوہ قرار دیا اورکہا کہ سیدہ زینب ع کی سیرت پر عمل کرتے ہوے ہی ہم مردہ معاشروں کو زندہ کر سکتے ہیں اور ایک انقلابی روح پھونک سکتے ہیں ، جب دین پر بات آجاے تو عورت چار دیواری تک محدود نہیں رہتی بلکہ جناب فاطمہ و زینب ع کی طرح میدان میں اتر آتی ہے اور دفاع ولایت و امامت اور دفاع دین میں اپنا کردار ادا کرتی ہے ۔خانم زھرا کاظمی نے ان ایام کو بی بی زینب سلام الله علیھا سے مخصوص کیا اور سیرت سیدہ کے مختلف پہلوؤں پر بھرپور روشنی ڈالی ۔ مجالس ہائے عزا کا اختتام نوحہ خوانی و ماتمداری کے بعد دعا و زیارت سے ہوا ۔

وحدت نیوز(راولپنڈی) مجلس وحدت مسلمین شعبہ خواتین کی مرکزی سیکریٹری جنرل اور رکن پنجاب اسمبلی محترمہ سیدہ زہرانقوی کی ہدایت پر ملک بھر میں ماہ صفر المظفرکے پہلے عشرے کو حضرت زینب سلام اللہ علیہا سے منسوب کیا گیا ،  اسی مناسبت سےمجلسِ وحدت مسلمین شعبہ خواتین راولپنڈی کی جانب سے یومِ زینب (س) کے عنوان سے گوالمنڈی امام بارگاہ راولپنڈی میں مجلسِ عزا کا انعقاد کیا گیامجلس عزا کے آغاز میں محترمہ روبینہ نے تلاوت حدیث کساء کا شرف حاصل کیا اس کے بعد ننھی ثنا خواں بچیوں نے منقبت کی صورت میں شان اھل بیت ع بیان کی۔ محترمہ عفت بتول اور محترمہ مہوش کاظمی نے بھی جناب زینب (س) کی شان میں ھدیہ منقبت پیش کیے۔ محترمہ تسمیہ زھرا اور خواہران نے سوز و سلام پیش کرنے کی سعادت حاصل کی ،اور آخر میں مجلس وحدت مسلمین (شعبہ خواتین) راولپنڈی کی سیکرٹری جنرل محترمہ قندیل زھرا نے یوم زینبؑکے عنوان سے مجلس عزا سے خطاب کیا۔۔جس میں انھوں نے سیرت سیدہ زینبؑ اور ان کے کوفہ و شام کے دربار میں دیے گئے تاریخی خطبوں پر روشنی ڈالی اور آج کے دور کی خواتین کے لیے ان کے شجاعانہ اور با بصیرت کردار کو کنیزان زینب س کے لیے مشعل راہ قرار دیا۔

وحدت نیوز (گلگت)  توہین عدالت کے نام پر ملک کے وفادار بیٹوں کے ساتھ ظلم ناقابل برداشت ہے۔سید فیصل رضا عابدی ملک دشمنوں اور کالعدم جماعتوں کے خلاف ایک موثر آواز ہیں جن کا جرم صرف یہ ہے کہ وہ ملک کے دشمنوں کے خلاف آواز اٹھاتے رہے ہیں۔فیصل رضا عابدی کے خلاف انسداد دہشت گردی ایکٹ کے تحت مقدمہ درج کرنا مضحکہ خیزہے۔

مجلس وحدت مسلمین گلگت بلتستان کے ترجمان محمد الیاس صدیقی نے کہا ہے کہ ملک میں انصاف کیلئے آواز بلند کرنا جرم بن چکا ہے۔معصوم پاکستانیوں کو بم دھماکوں اور دہشت گردی کے ذریعے نشانہ بنانے والے آزادانہ دندناتے پھر رہے ہیں جبکہ مظلوم پاکستانیوں کے حق میں بولنے والے کو جیل کی سلاخوں کے پیچھے دھکیل دینا انصاف کے ساتھ کھلا مذاق ہے۔پاکستان کے ساتھ وفاداری نبھانے والوں کو تختہ مشق بناکر ظلم کی نئی تاریخ رقم کی جارہی ہے جبکہ ملک کو دونوں ہاتھوں سے لوٹنے والے اور بدنام زمانہ دہشت گرد عدالتوں سے پاک صاف ہوکر نکلتے ہیں۔

انہوں نے کہا کہ فیصل رضا عابدی کا گناہ صرف یہ ہے کہ اس نے اپنی زندگی کو خطرے میں ڈال کر ملک دشمنوں سے ٹکرلیا ہوا ہے اور ایک رضاکار کے طور پر وہ پاکستان کا مقدمہ لڑرہے ہیں ،ایسے شخص کے خلاف انسداد دہشت گردی ایکٹ کے تحت مقدمات قائم کرکے گرفتار کرنا سمجھ سے بالاتر ہے۔انہوں نے کہا سید فیصل رضا عابدی نے جن حقائق پر سے  پردہ اٹھایا ہے ایک کمیشن بناکر تحقیقات کی جائے تاکہ اصل حقائق سامنے آجائیں ۔ گرفتاریوں کے ذریعے حقائق پر پردہ نہیں ڈالا جاسکتا۔

وحدت نیوز(اسلام آباد) سربراہ مجلس وحدت مسلمین پاکستان علامہ راجہ ناصر عباس جعفری کی وفد کے ہمراہ گورنر گلگت بلتستان راجہ جلال حسین مقپون سے ملاقات،گلگت بلتستان کے عوامی مسائل و دیگر ملکی امور پر تبادلہ خیال،ملاقات میں اپوزیشن لیڈر گلگت بلتستان اسمبلی کیپٹن ریٹائرڈ محمد شفیع ترجمان ایم ڈبلیو ایم گلگت بلتستان الیاس صدیقی اور مظاہر شگری شریک تھے،علامہ راجہ ناصر عباس جعفری نے گورنر گلگت بلتستان کو عہدہ سنبھالنے پر نیک خواہشات کا اظہار کیا اور کہا کہ گلگت بلتستان کے عوام کی محرومیوں کو حل کرنے اور آئینی حقوق کے حصول کی جدو جہد میں جو بھی سیاسی جماعت کردار ادا کریگی ایم ڈبلیو ایم ان کا بھرپور ساتھ دیگی،ہمیں سیاسی مصلحتوں سے بالا تر ہو کر گلگت بلتستان کے محب وطن عوام کے حقوق کے لئے کردار ادا کرنا ہے،گلگت بلتستان میں ن لیگ کی حکومت انتقامی کارروائیاں کرتے ہوئے علاقے کے عوامی مسائل کے لئے آواز بلند کرنے والوں کو شیڈول فور میں ڈال کر ہراساں کرنے میں مصروف ہے حالانکہ یہ قانون کشمیر میں نافذ نہیں گلگت بلتستان والوں کے ساتھ ناروا سلوک رکھنے والے دراصل ملک قوم سے مخلص نہیں،یہ وہ خطہ ہے جو پاکستان کا فطری دفاع ہے۔

انہوں نے کہا کہ وفاقی حکومت کو چاہیئے اور ہمارا مطالبہ بھی ہے کہ گلگت بلتستان  کے محب وطن عوامی رہنماؤں کے ساتھ دہشتگردوں جیسے سلوک کرنے والوں کا محاسبہ کریں اور گلگت بلتستان میں بھی بے رحمانہ احتساب کرکے قومی وسائل پر شب خون مارنے والوں کو نشان عبرت بنایا جائے۔علامہ راجہ ناصر عباس جعفری نے کہا کہ گلگت بلتستان کے مدنی وسائل پر حق وہاں کے باسیوں کا ہے،وفاقی حکومت گزشتہ ادوار میں جاری لیزز کا آڈٹ کرےاور وہاں کے وسائل پر ڈاکہ ڈالنے والوں کیخلاف کارروائی کرے،گورنر گلگت بلتستان راجہ جلال مقپون نے علامہ راجہ ناصر عباس جعفری کا شکریہ ادا کرتے ہوئے کہا کہ انشاالله وفاقی حکومت سے مل کر گلگت بلتستان کے عوامی مسائل کو ترجیحی بنیادوں پر حل کرنے کی کوشش کریں گے،ایم ڈبلیو ایم کی خدمات اور اتحاد بین المسلمین کے لئے ملک بھر خصوصاََ گلگت بلتستان میں کوششوں کو ہم قدر کی نگاہ سے دیکھتے ہیں،آئندہ بھی گلگت بلتستان کے سیاسی معاملات میں مل کر آگے بڑھیں گے۔

وحدت نیوز(جیکب آباد) انتظامیہ کی جانب سے روکے گئے زائرین کربلا کو این او سی مل گئی اور زائرین اپنی منزل کی طرف روانہ ہوگئے،تفصیلات کےمطابقسندھ بلوچستان بارڈر پر زائرین کا قافلہ روکا گیا۔ زائرین کی 22 گاڑیوں کو روک کر پولیس نے این او سی طلب کرلیا۔مجلس وحدت مسلمین سندھ اور بلوچستان کے سیکریٹری جنرلز علامہ مقصودعلی ڈومکی اور علامہ برکت علی مطہری نے بارڈر پر پہنچ کر زائرین سے یکجہتی کا اظہار کیا۔ اور زائرین سے خطاب کیا۔

اس موقع پر علامہ مقصودعلی ڈومکی نے ہوم سیکریٹری بلوچستان، ڈپٹی کمشنر جعفر آباد، ایس ایس پی جعفرآباد مجلس وحدت مسلمین کے مرکزی رہنما سید ناصر عباس شیرازی ،زائرین کمیٹی کے رہنما علامہ مظہر عباس علوی و دیگر سے رابطہ کیا۔

اس موقع پر میڈیا سے گفتگو کرتے ہوئے علامہ مقصودعلی ڈومکی نے کہا کہ ملت جعفریہ اور زائرین کے ساتھ امتیازی سلوک قبول نہیں اپنے ہی ملک میں این اوسی امتیازی سلوک کا عکاس ہے۔ حکومت رکاوٹیں کھڑی کرنے کی بجائے زائرین کو سہولتیں فراہم کرے۔ جب عراقی حکومت اور عوام چند کروڑ زائرین کا انتظام کرسکتی ہے تو پھر پاکستان گورنمنٹ اپنے ہی ملک کے چند لاکھ زائرین کے لئے کیوں بروقت انتظام نہیں کرتی۔

انہوں نے کہا کہ عمران خان زائرین سے متعلق اپنے وعدے پورے کریں اور نواز حکومت کے عبرتناک انجام سے درس حاصل کریں۔حکومت سے روابط اور کوششوں کے نتیجہ میں الحمد للہ زائرین کی بسز کو این او سی مل گئی اور وہ اپنی منزل کی جانب روانہ ہوگئے۔

وحدت نیوز (سکردو) عوامی ایکشن کمیٹی بلتستان کے سربراہ و مجلس وحدت مسلمین گلگت بلتستان کے سیکرٹری جنرل آغا علی رضوی نے اپنے ایک بیان میں کہا ہے کہ سوشل میڈیا پہ دیامر سے منسوب خبر کی سختی سے تردید کرتا ہوں اور واضح کرنا چاہتا ہوں کہ گورنر گلگت بلتستان کے ساتھ کسی قسم کی ملاقات ہوئی ہے اور نہ ہی خطے کو کسی بھی حوالے سے تقسیم ہونے دیں گے۔ ہم گلگت بلتستان کی ایک ایک انچ زمین کی حفاظت کرکے دم لیں گے۔ میرے لیے دیامر ، ہنزہ، غذر اور بلتستان میں کوئی فرق نہیں ہے۔ پورے گلگت بلتستان کو میں اپنا گھر سمجھتا ہوں ۔ انہوں نے کہا کہ سابقہ ادوار میں گلگت بلتستان کو تقسیم کرنے کی بات کی تو سب سے زیادہ ہم نے ہی اس پہ آواز بلند کی ہے جس کی تاریخ شاہد ہے۔ گلگت بلتستان کا ہر فرد خطے کا اور پاکستان کا محافظ و امین ہے۔ اس خطے کو ٹکرے کرنے کے خواب دیکھنے والوں کے خواب ٹکرے ٹکرے کرکے دم لیں گے۔

آغا علی رضوی نے کہا کہ عوام کسی قسم کے منفی پروپیگنڈے میں نہ آئیں اور اپنی صفوں میں اتحاد قائم کریں۔ چند عناصر گلگت بلتستان کے غیور عوام کو حقوق سے پیچھے ہٹانے کے لیے لسانیات، علاقائیت اور فرقہ واریت جیسی لعنت کا طوق گلے میں لٹکانا چاہتے ہیں۔جسے کسی صورت کامیاب نہیں ہونے دیں گے۔ گلگت بلتستان ایک اکائی کی صورت ہے اور ایک گھر کی مانند ہے اور ہر فرد آپس میں اخوت کے رشتے میں بندھے ہوئے ہیں۔ دیامر کے ڈیم متاثرین کا مسئلہ ہو یا سوست بارڈر پہ تاجرین کا مسئلہ،  بلتستان میں زمینوں کا مسئلہ ہویا کوئی اور مسئلہ جب تک ہماری جان میں جان ہے خطے میں ہونے والے ہر ظلم کے خلاف آواز بلند کرتے رہیں گے۔ہمیشہ سے دیامر کے مسائل کے حل کے لیے بلتستان کے علماء نے آواز بلند کی ہے اور بلتستا ن کے مسائل کے حل کے لیے دیامر کے علماء نے کردار ادا کیا ہے اور یہ سلسلہ جاری رہے گا۔