The Latest
وحدت نیوز (لاہور) مجلس وحدت مسلمین پنجاب کے سیکرٹری جنرل علامہ مبارک علی موسوی نے لاہور میں ہنگامی اجلاس سے خطاب کرتے ہوئے کہا کہ کشمیری مسلمانوں پر ڈھائے جانیوالے مظالم کا جواب بھارت کو دینا ہوگا، بھارت خطے میں انسانیت دشمن پالیسیوں پر عمل پیرا ہے، کشمیری مسلمان جدوجہد آزادی میں تنہا نہیں پوری مسلم اُمہ کشمیری مظلومین کیساتھ ہیں، شہید برہان وانی کی برسی پر شاندار خراج عقیدت پیش کرکے بتا دینگے کہ جدوجہد آزادی کشمیر میں بہنے والے پاکیزہ لہو کو حریت پرست قوم فراموش نہیں ہونے دینگے، دشمن ہمیں تقسیم کرکے آزادی کشمیر اور پاکستان کی سلامتی کو نقصان پہنچانے کی کوشش میں ہیں، پاراچنار کے غیور عوام نے دشمن کے عزائم خاک میں ملا دیئے۔ انہوں نے کہا پاکستان میں بسنے والے تمام مکاتب فکر اور ہمارے اقلیتی برادری متحد ہیں، اختلافات اور فرقہ واریت کو ہوا دینے والے اسلام اور پاکستان کے دشمن اور استعماری قوتوں کے ایجنٹ ہیں، ان ملک دشمنوں کو باہمی وحدت سے بے نقاب کرنا ہوگا، دہشتگردی کیخلاف جنگ میں سول حکومت کی کارکردگی سوالیہ نشان بنا ہوا ہے، حکمران ملکی سالمیت سے زیادہ اپنی کرسی بچانے کی کوشش میں ہیں، پاناما ایشو کو متنازعہ بنانے والے دراصل کرپشن کیخلاف عدلیہ اور جے آئی ٹی کی تحقیقات کو متنازعہ بنا کر اپنے جرائم چھپانا چاہتے ہیں، پاکستان قوم بیدار ہیں، ملک سے کرپشن کے ناسور کے خاتمے کیلئے ہر قسم کے قربانی دینگے۔ انہوں نے کہا کہ پاکستان کے حکمران ہوش کے ناخن لیں اور مشرق وسطیٰ کے پراکسی وار سے دور رہے، ہمیں اپنے ملک کی سلامتی سب سے زیادہ عزیز ہیں، ذاتی احسانات کے عوض ملکی سلامتی کو داوُ پر لگانے سے حکمران باز رہے، ہم افغان جہاد کے قرض چکا رہے ہیں، ایسے میں مزید کسی دلدل میں ملک کو لے جانا کہاں کی دانشمندی ہے۔
وحدت نیوز(لیہ) مجلس وحدت مسلمین جنوبی پنجاب کے سیکرٹری تنظیم سازی سید عدیل عباس زیدی نے کہا ہے کہ سانحہ پاراچنار کے بعد نواز شریف حق حکمرانی کھو چکے ہیں، آرمی چیف نے مظلومین کی دادرسی کرکے قوم کے دل جیت لئے، دہشتگردی کا خاتمہ اس وقت تک ممکن نہیں جب تک دہشتگردوں کے سہولت کار اقتدار میں ہیں۔ ان خیالات کا اظہار انہوں نے ضلع لیہ کے علاقہ چوک اعظم میں سانحہ پاراچنار کیخلاف احتجاج کے دوران خطاب کرتے ہوئے کیا۔ احتجاجی مظاہرے آل پاکستان مسلم لیگ جنوبی پنجاب کے رہنماء چوہدری شاہد، پاکستان عوامی تحریک کے ضلعی رہنماء محمد شاہد آرائیں، پیپلزپارٹی کے رہنماء محمد فیاض ایڈووکیٹ اور چوک اعظم شہری اتحاد کے صدر عمر شاکر نے بھی خطاب کیا اور سانحہ پاراچنار کی شدید الفاظ میں مذمت کی۔
وحدت نیوز(کراچی) سیاسی و مذہبی جماعتوں کے رہنماوں نے کہا ہے کہ پاراچنار پاکستان کے دفاع کی فرنٹ لائن ہے جسے دہشتگردی کا سامنا ہے، پاراچنار کمزور ہوگا تو پاکستان میں داعش کے داخلے کو نہیں روکا جا سکے گا، پاکستان کو دہشتگردی کی دلدل میں پھنسایا گیا ہے، ملک میں فرقہ واریت کا جڑ سے خاتمہ ناگزیر ہے اور اس کے لئے ایک دوسرے کے عقائد کا احترام کرنا ہوگا، دہشت گردی کے خلاف تمام سیاسی و مذہبی جماعتیں ایک پیج پر ہیں، اندرونی مسائل کے حل کیلئے فوج کو نہیں بلکہ حکومت اور سیاسی جماعتوں کو کردار ادا کرنا چاہیئے، عوام پاکستان کو شام، عراق، لیبیا نہیں بننے دینگے، وفاقی حکمران اگر دہشت گردی کی روک تھام نہیں کرسکتے تو مستعفی ہوجائیں۔ ان خیالات کا اظہار مقررین نے مجلس وحدت مسلمین پاکستان کراچی ڈویژن کے زیر اہتمام ”فرقہ واریت پاکستان کے لئے زہر قاتل“ کے عنوان پر کیتھولک گارڈن سولجر بازار میں منعقدہ آل پارٹیز کانفرنس سے خطاب کرتے ہوئے کیا۔ کانفرنس سے ایم ڈبلیو ایم کے سربراہ علامہ راجہ ناصر عباس جعفری، علامہ حسن ظفر نقوی، علی حسین نقوی، پاک سر زمین پارٹی کے رہنما رضا ہارون، وسیم آفتاب، تحریک انصاف کے رہنما فردوس شمیم نقوی، ایم کیو ایم کے رکن سندھ اسمبلی قمر عباس، پیپلز پارٹی کے رہنما حبیب الدین جنیدی، جماعت اسلامی کے مرکزی نائب امیر اسد اللہ بھٹو، جمعیت علماءاسلام (ف) کے مرکزی ڈپٹی جنرل سیکریٹری محمد اسلم غوری، جمعیت علمائے پاکستان کے رہنما قاضی احمد نورانی، عوامی تحریک کے محمد اکرم مجاہد، آل پاکستان سنی تحریک کے چیئرمین مطلوب اعوان قادری، پاکستان فلاح پارٹی کے رہنما ڈاکٹر خالد اقبال و دیگر نے بھی خطاب کیا۔
علامہ راجہ ناصر عباس جعفری نے کہا کہ دنیا کی طاقت ایشیا کی طرف منتقل ہو رہی ہے، جو امریکا اور اسکے حواریوں کیلئے ناقابل برداشت ہے، امریکا اور برطانیہ سازشیں کرکے پاکستان سمیت ایشیا کو عدم استحکام کا شکار کرنا چاہتے ہیں، دہشت گردی نے پاکستان کو ہلا کر رکھ دیا ہے، تکفیری ٹولے نے شیعہ، اہلسنت اور غیر مسلموں کو بھی نشانہ بنایا ہے، استحکام پاکستان اور تکفیریت کے خاتمے کیلئے سیاسی، مذہبی، عوامی حلقوں کو متحد ہونا ہوگا۔ انہوں نے کہا کہ پاراچنار پاکستان کے دفاع کی فرنٹ لائن ہے، جسے داعش، لشکر جھنگوی کی دہشتگردی کا سامنا ہے، پاراچنار کمزور ہوگا تو پاکستان میں داعش کے داخلے کو نہیں روکا جا سکے گا، دہشت گردی کے خاتمے کیلئے پاکستان میں مضبوط مرکزی حکومت وقت کی اہم ضرورت ہے۔ انہوں نے کہا کہ قائد و اقبال کے پاکستان کا حصول تمام سیاسی و مذہبی و عوامی اکائیوں کا مقصد ہونا چاہیئے، ضیاءالحق کی سوچ نے ہم سے قائد و اقبال کے پاکستان کو چھین لیا ہے، تمام شہداء کسی مسلک و مکتب کے نہیں بلکہ پاکستان کے شہداء ہیں۔ علامہ حسن ظفر نقوی نے کہا کہ دہشت گردی کے باعث پاکستان میں اسی ہزار جانوں اور اربوں ڈالرز کا نقصان ہو چکا ہے، فرقہ واریت پاکستان کیلئے زہر قاتل ہے اور اس سازش کو ہمیشہ باہمی اتحاد کام بنائیں گے اور پاکستان کے دفاع پر آنچ نہیں آنے دیں گے۔ انہوں نے کہا کہ اس وقت ہمیں مل جل کر پاکستان کی بقاء، سالمیت و استحکام کو بچانا ہے، پاکستان کی تمام مذہبی و سیاسی جماعتیں دہشت گردی کے خلاف ایک پیج پر ہیں، سانحہ پاراچنار کے بعد ملک کے تمام مکاتب فکر کے علمائے کرام اور تمام سیاسی و مذہبی رہنماوں نے اتحاد و وحدت کے ذریعے ملک بھر میں امن کی فضا کو برقرار رکھا۔
پی ایس پی رہنما رضا ہارون نے کہا کہ فرقہ واریت کی سازش ناکام بنانے کیلئے ہمیں پیغمبر آخر، اہلبیت، خلفاء راشدین کے کردار کو سامنے رکھنا اور ایک دوسرے کے عقائد کا احترام کرنا ہوگا۔ انہوں نے کہا کہ پاکستان میں فرقہ واریت کی سازش کو سمجھنے کیلئے ہمیں عالم اسلام کے خلاف عالمی گریٹ گیم کو سمجھنے کی ضرورت ہے، تمام شہریوں کو برابر ی کی بنیاد پر حقوق حاصل ہیں لیکن وزیراعظم کا پاراچنار نہ جانا عوام میں منفی تاثر پیدا کرنے کا باعث بنا ہے، ریاست عوام کے جان و مال، عزت و آبرو کی حفاظت کیلئے اپنا کردار ادا کرے۔ پی ٹی آئی رہنما فردوس شمیم نقوی نے کہا کہ فرقہ واریت کی سازشوں کو ناکام بنانا ملکی بقاء و سالمیت کے لئے ناگزیر ہے، اس پر کوئی سمجھوتا نہیں ہونا چاہیئے، اس زہر قاتل کا خاتمہ حکومت اور سیاسی جماعتوں کی اولین ذمہ داری ہے، اندرونی مسائل کے حل کیلئے فوج کو نہیں بلکہ حکومت اور سیاسی جماعتوں کو کردار ادا کرنا چاہیئے۔ ایم کیو ایم کے رکن سندھ اسمبلی قمر عباس نے کہا کہ فرقہ واریت اور دہشت گردی کے خلاف تمام سیاسی و مذہبی اکائیوں کو عملی میدان میں نکلنا ہوگا، ہمیں دوسروں کے عقائد کو چھیڑنے سے اجتناب کرنا چاہیئے، پاکستان کی عوام متحد ہے، بیرونی ایماء پر چند مقامی ایجنٹ فرقہ واریت پھیلانے کی سازش میں ملوث ہیں لیکن پاکستانی باشعور عوام ملک کو شام، عراق، لیبیا نہیں بننے دینگے۔
پیپلز پارٹی کے رہنما حبیب الدین جنیدی نے کہا کہ پاکستان میں تمام مذاہب و مکاتب فکر کے شہریوں کو برابر کے حقوق و آزادی حاصل ہے، آج پاکستان کے خلاف عالمی سازش کی جا رہی ہے، لیکن ہمارے مقامی لوگ کیوں اس سازش کا حصہ بن رہے ہیں، وفاقی حکمران اگر دہشت گردی کی روک تھام نہیں سکتے تو مستعفی ہوجائیں۔ انہوں نے مزید کہا کہ ہم ایک ترقی پسند قوم ہیں، ہمیں ایک قوم بننا ہوگا، ہمیں ثابت قدم ہوکر پاکستان کا نام دنیا بھر میں روشن کرنا ہوگا، فرقہ واریت پھیلانے میں ملوث عالمی سامراج کے مقامی ایجنٹوں کو ناکام بنانا اور انہیں تنہا کرکے فرقہ واریت پھیلانے کی سازش کو ناکام بنانا ہوگا۔ جماعت اسلامی کے نائب امیر اسد اللہ بھٹو نے کہا کہ تمام سیاسی و مذہبی جماعتیں پاکستان میں فرقہ واریت اور دہشت گردی کے خلاف ہیں، لیکن انہیں آگے بڑھ کر عملی کردار ادا کرنا ہوگا، پاراچنار کا سانحہ ہو یا کوئٹہ یا کراچی میں، سب سے اظہار یکجہتی کرنا تمام پاکستان کے شہریوں کی ذمہ داری ہے، تاکہ ملک میں فرقہ واریت پھیلانے کی امریکی، اسرائیلی، بھارتی سازش کو یکسر ناکام بنایا جا سکے، دشمن کی سازشوں کو اتحاد و وحدت کے ذریعے ہی ناکام بنایا جا سکتا ہے۔
جے یو آئی کے رہنما اسلم غوری نے کہا کہ ملک بھر میں سنی شیعہ مسلمانوں کا اتحاد مثالی ہے، فرقہ واریت کے خلاف اے پی سی بلانا قابل تحسین ہے، جے یو آئی ہر قسم کی دہشت گردی کی مذمت کرتی ہے۔ جے یو پی رہنما علامہ قاضی احمد نورانی نے کہا کہ پہلے پاکستان کو دہشت گردی کی دلدل میں پھنسایا گیا، مدارس کے نام پر دہشت گردی کے تربیتی مراکز قائم کئے گئے اور اب امریکی مفاد کی جنگ میں پھر جھونکنے کی کو شش کی جارہی ہے جسے کامیاب نہیں ہونے دیں گے، تمام سیاسی و مذہبی رہنماوں کو پاراچنار کا دورہ کرنا چاہیئے۔ پاکستان عوامی تحریک کے محمد اکرم نے کہا کہ پاکستان نا صرف پاکستان کیلئے بلکہ تمام عالم اسلام کیلئے زہر قاتل ہے، پاکستان میں خوارج دہشت گردوں کی ناپاک سازش کو ملک کے اندر تمام اکائیاں مل جل کر ہی ناکام بنا سکتی ہیں۔ آل پاکستان سنی تحریک کے چیئرمین مطلوب اعوان قادری نے کہا کہ آج پاکستان کو عدم استحکام سے دوچار کرنے کیلئے فرقہ واریت پھیلانے کی سازش کی جا رہی ہے، جسے تمام سیاسی و مذہبی جماعتیں اور عوام اتحاد و وحدت کے ذریعے ہی ناکام بنا سکتے ہیں۔ اے پی سی میں علامہ باقر عباس زیدی، علامہ صادق جعفری، علامہ علی انور، علامہ احسان دانش، علامہ مبشر حسن، میثم عابدی سمیت دیگر رہنما بھی شریک تھے۔
وحدت نیوز(کراچی) ضیا ءالحق کی ملک دشمن پالیسیوں نے ہم سے قائد اعظم کا پاکستان چھین لیا ہے۔ہمیں وہ پاکستان واپس چاہیے جس کے لیے قائد اعظم نے جدوجہد کی۔اس ملک کو انتہا پسندوں کی جاگیر نہیں بننے دیا جائے گا۔دہشت گردی کا نشانہ بننے والے کسی مسلک کے شہید نہیں بلکہ پاکستانی شہدا ء ہیں۔یہ وطن کے بیٹے ہیں۔ملک دشمن عناصر وطن کے بیٹوں کا نشانہ بنا رہے ہیں۔ہمارے ریاستی ادارے بالخصوص سیاسی حکومتیں ناکام ہو چکی ہیں۔پورے ملک میں احتجاج گزشتہ نو دنوں تک جاری رہا لیکن سیاسی حکومت نے غیر ذمہ داری کا مظاہرہ کیا اور پارا چنار نہ گئی۔آرمی چیف جنرل قمر جاوید باجوہ نے حالات کی سنگینی کے پیش نظر خود پارا چنار کا دورہ کیا اور الحمد اللہ حفاظتی حوالے سے تمام امور طے ہو گئے۔ان خیالات کا اظہار مجلس وحدت مسلمین کے ڈپٹی سیکر ٹری جنرل علامہ حسن ظفر نقوی نے کراچی پریس کلب میں دیگر رہنماوں کے ہمراہ کراچی پریس نیوزکانفرنس سے خطاب میں کیا ۔
انہوں نے کہا پاراچنار کے لوگ نے اطمینان کا اظہار کرتے ہوئے دھرنا ختم کرنے کا اعلان کیا۔ان کو دیکھتے ہوئے ہم نے بھی ملک بھر میں دھرنے ختم کر دیے ہیں۔وطن عزیز میں شیعہ سنی اتحاد مثالی ہے۔شیعہ سنی مکاتب فکر کے علما ء و مشائخ قومی سلامتی کے امور میں ہم خیال اور یکجا ہیں۔وحدت و اخوت کے اس عملی مظاہرے سے دشمن کو ناکامی کا سامنا کرنا پڑا۔پاکستان میں شیعہ سنی مسالک میں مذہبی منافرت پیدا کرنے کی کسی سازش کو کامیاب نہیں ہونے دیا جائے گا۔ہم کوئٹہ و کراچی میں ہونے والے دہشتگردی کے واقعات کی مذمت کرتے ہیں اور سانحہ احمد پور شرقیہ کے لواحقین سے بھی اظہار ہمدردی کرتے ہیں۔ پاکستان کی سرزمین پر پیدا ہونے والا ہر فرد بلاتخصیص مذہب و مسلک ہمارا پاکستانی بھائی ہے۔پاکستان کی سرزمین پر امریکہ اور اسرائیل اپنے آلہ کاروں پر بھرپور سرمایہ کاری کر کے بھی نتائج حاصل کرنے میں ناکام رہی ہے۔پاکستان کو مسلکی ریاست بنانے کی مذموم کوششیں شیعہ سنی اتحاد کی بدولت اپنی موت آپ مر رہی ہیں۔اب امریکہ اور ملک دشمن قوتیں پاکستان میں داعش کو منتقل کر کے ملک کو انتشار کا شکار بنانا چاہتی ہیں۔ہم ملک دشمن عناصر کو کسی بھی ناپاک مقصد میں کامیاب نہیں ہونے دیں گے۔41ممالک کے اتحاد کو سنی الائنس کا نام دیا جا رہا ہے حالانکہ متعدد سنی ممالک اس میں شامل نہیں۔دراصل ڈونلڈ ٹرمپ کی سربراہی میں بننے والا یہ اتحاد اسرائیل کے تحفظ کو یقینی بنانے کے لیے تشکیل دیا گیا ہے۔حکومت کو اس الائنس کا حصہ نہیں بننے دیا جائے۔جنرل راحیل کے جانے سے پاکستان کے قومی مفاد کو نقصان پہنچا ہے۔
انہوں نے کہا کہ مجلس وحدت مسلمین نے اتنے ظلم و ستم کے باوجود ہمیشہ پرتشدد اور انتشار کی سیاست کی حوصلہ شکنی کی ہے۔اس جماعت نے اپنے حقوق کے حصول کے لیے آئینی راہ اختیار کی۔پاکستان کی دوسری بڑی اکثریت اہل تشیع ہیں۔ جب کسی ملک کی اکثریت کو دیوار کے ساتھ لگانے کی کوشش کی جاتی ہے تو معاملات بگڑتے ہیں۔ہم آپ کے شکر گذر ہیں کہ پیمرا کی طرف سے دباوہونے کے باوجود میڈیا نے پارا چنار کے حوالے سے شاندار صحافتی کردار ادا کیا ہے اس کے علاوہ دنیا کے مختلف ممالک میں پارا چنار کے حق میں مظاہرے کرنے والوں،این جی اوز، انسانی حقوق کی تنظیموں اور مختلف مذہبی و سیاسی جماعتوں کے رہنماو?ں کا بھی شکریہ ادا کرتے ہوئے انہیں تحسین کا مستحق قرار دیتے ہیں۔اس موقع سید علی حسین نقوی میثم عابدی،،مولانا صادق جعفری،مولانا غلام عباس،مولانا فدا حسین ،شیعہ ایکشن کمیٹی کے رہنما صغیر عابدرضوی ،حسن رضا سہیل،پیام ولایت فاؤنڈیشن کے رہنما،اسلم علی، و دیگر موجود تھے۔
وحدت نیوز(گلگت) پیپلز پارٹی کے مقامی قائدین جنرل الیکشن میں بدترین شکست کھانے کے بعد ذہنی توازن کھو چکے ہیں۔پوری قوم سانحہ کوئٹہ، سانحہ پاراچنار اور کراچی کے شہداء کے غم میں ڈوبی ہوئی تھی اور پیپلز پارٹی نگر میں جلسے منعقد کرکے ان علماء کے خلاف ہرزہ سرائی میں مصروف تھے جو مظلوم پاکستانیوں کی حمایت میں سڑکوں پر دھرنے دیئے بیٹھے تھے۔
مجلس وحدت مسلمین گلگت بلتستان کے ترجمان محمد الیاس صدیقی نے کہا کہ بڑی جماعت کا دعویٰ کرنے والی جماعت کے قائدین مرکز میں دینی جماعتوں کے تلوے چاٹ رہے ہیں ۔ان کی جماعت کے رہنما پارٹی کی غلط پالیسیوں سے اختلاف کرکے خزاں کے پتوں کی طرح جھڑ رہے ہیں۔سو سو کھانے ہضم کرنے کے بعدکرپشن کے بے تاج بادشاہ آصف علی زرداری نے اپنے پیٹی بندھ بھائی نوازشریف کو بچایا ہے،یہ جماعت کس منہ سے نواز شریف لیگ کی مخالفت کا دعویٰ کرتی ہے۔
انہوں نے کہا کہ ایک سوچی سمجھی سازش کے تحت پیپلز پارٹی مذہبی جماعتوں کی مخالفت پر تلی ہوئی ہے چونکہ انہی مذہبی جماعتوں نے پیپلز پارٹی کے دور میں سانحہ کوئٹہ کے موقع پر دھرنا دیکر پیپلز پارٹی کا مکروہ چہرہ بے نقاب کروایا تھا اور بلوچستان میں پیپلز پارٹی کے تخت کو پائوں تلے روندھ ڈالا تھا جو کہ پیپلز پارٹی بھول نہیں پارہی ہے۔آج یہ مذہبی جماعتیں پاراچنار، کوئٹہ اور کراچی میں ہونے والی بربریت کے خلاف سراپا احتجاج تھے تو پیپلزپارٹی نے نگر میں جلسہ کرکے اُن قاتلوں کی ہم آواز بنکر ظلم و بربریت کے خلاف آواز اٹھانے والے علماء کے خلاف غلیظ زبان استعمال کرکے ثابت کردیا کہ مظلوموں کے حقوق کی بات ان سے ہضم نہیں ہورہی ہے۔
انہوں نے کہا کہ شہداء کی سرزمین نگر کے باشعور لوگ پیپلز پارٹی کے دور میں ہونے والی ظلم و زیادتیوں کو نہیں بھولے ہیں اور بھاری اکثریت سے انہیں مستردکرکے ثابت کردینگے کہ لوگ اب ان کھوکھلے نعروں سے متاثر ہونے والے نہیں۔
وحدت نیوز(ملتان) مجلس وحدت مسلمین کے زیراہتمام ملک کے دیگر شہروں کی طرح جنوبی پنجاب میں بھی 8شوال 3جولائی کو عالمی یوم انہدام جنت البقیع منایا جائے گا، مجلس وحدت مسلمین جنوبی پنجاب کے سیکرٹری جنرل علامہ اقتدار حسین نقوی، ڈپٹی سیکرٹری جنرل محمد اصغر تقی اور صوبائی ترجمان ثقلین نقوی نے اپنے مشترکہ بیان میں کہا کہ آل سعود حکومت کی جانب سے 8شوال کو جنت البقیع میں صحابہ کرام، اُمہات المومنین اور آئمہ اطہار کی قبور کو مسمار کرادیا گیا تھا، جس کے بعد 8شوال کو دنیا بھر میں آل سعود کی اس اسلام دشمن حرکت کے خلاف یوم احتجاج منایا جاتا ہے، علامہ اقتدار نقوی نے کہا کہ مجلس وحدت مسلمین کے زیراہتمام ملک کے دیگر شہروں کی طرح جنوبی پنجاب کے تمام اضلاع میں احتجاجی مظاہرے کیے جائیں گے، اُنہوں نے کہا کہ 8شوال 3جولائی کو ملتان پریس کلب کے سامنے احتجاجی مظاہرہ کیا جائے گا ، احتجاجی مظاہرے میں دیگر جماعتوں کو بھی شرکت کی دعوت دی جائے گی۔ اُنہوں نے مزید کہا کہ سعودی حکومت کی جانب سے صحابہ کرام، اُمہات المومنین اور آئمہ اطہار کی قبور کو مسمار کرانا عالم اسلام کے منہ پر طمانچہ ہے،اُمہات المومنین ، آئمہ اطہار اور صحابہ کرام کی قبور مسلمانوں کے لیے مرکز ہدایت ہیں۔
وحدت نیوز(آرٹیکل) ہاں ہم جذباتی قوم ہیں ہاں ہم جذباتی ہیں حرمت رسول ص کے بارے میں ہاں ہم جذباتی ہیں عزادری سید الشہداء سے متعلق ہاں ہم جذباتی ہیں اپنے ارض پاک کے بارے میں ہاں ہم جذباتی ہیں اپنی پاک فوج کے بارے میں. ہاں ہم ہیں جذباتی کیوں کہ ہمیں اپنی مٹی سے پیار ہے ہمیں پاکستان سے عشق ہے اور اس وطن کے غیور بہادر سپوتوں اس وطن کے محافظوں سے جنون کی حد تک محبت ہے،ہاں ہم جذباتی قوم ہیں کیونکہ ہم اپنے وطن کیخلاف اور اپنے قومی سلامتی کے ضامن اداروں کیخلاف کسی کی بکواس سننے کو قطعی طور پرتیار نہیں. ہاں ہم ہیں جذباتی کیوں کہ ہمیں اپنے نیشنل انٹرسٹ سے بڑھ کر اور کچھ عزیز نہیں،ہاں ہم جذباتی قوم ہیں مگر پاراچنار میں دہشتگردی کے واقعہ کے بعد ساوتھ افریقہ لندن بھارت اور ملک کے اندر موجود چند ضمیر فروشوں کی جانب سے سوشل میڈیا پر جاری پاکستان اور پاکستانی اداروں کے خلاف چلائی جانے والی مہم اور انکے مذموم مقاصد سے بخوبی آگاہ ہیں،ہاں ہم جذباتی قوم ہیں مگر فورتھ جنریشن وار فیئر سے بخوبی آگاہ ہیں۔
ہاں ہم جانتے ہیں کہ امریکی اسرائیلی اور بھارتی خفیہ مشترکہ اتحاد پاکستان کے خلاف ایک ایسی جنگی حکمت عملی ترتیب دے چکا ہےجس کے تحت افغان جنگ کو بتدریج پاکستان کے اندر لے کر جانا ھے اور پاکستان میں پاک آرمی کے خلاف محاذ بنانا ھے ۔ درحقیقت یہی وہ ڈاکٹرائن ہے جس کے تحت اس وقت پاکستان کی کم از کم دو لاکھ فوج حالت جنگ میں ھے اور اب تک ھمارے 20 ہزار سے زائد فوجی جوان اس مٹی کا قرض چکانے اور پاکستان کی سالمیت کے لیئے ہمیں پرامن ماحول فراہم کرنے کے لیئے اپنی جانوں کا نذرانہ پیش کرچکے ہیں جو پاکستان کی انڈیا کے ساتھ لڑی جانی والی تینوں جنگوں میں شہید ہونے والوں کی مجموعی تعداد سے زیادہ ہے۔
اس جنگ کے لئے امریکہ اور انڈیا کا آپس میں آپریشنل اتحاد ھے اور اسرائیل کی تیکنیکی مدد حاصل ھے۔ حال میں پاراچنار سمیت ملک کے مختلف حصوں میں دہشتگردی کی وارداتیں کروائی گئیں جبکہ ماضی میں کرم ایجنسی اور ہنگو میں شیعہ سنی فسادات کروائے گئے وادی سوات میں نفاذ شریعت کے نام پر ایسے گروہ کو مسلط کیا گیا جنہوں نے وہاں عوام پر مظالم ڈھائے اور فساد برپا کیا جس کے لئے مجبوراً پاک فوج کو پہلی بار انکے خلاف ان وادیوں میں داخل ہونا پڑا ۔ پاک فوج نے عملی طور پر انکو پیچھے دھکیل دیا لیکن نظریاتی طور پر ابھی بھی انکو بہت سے جاہلوں اور احمق نام نہاد فساد فی الارض کے متمنی مذہبی جنونی افرادکی حمایت حاصل ہے۔
فورتھ جنریشن وار (Fourth-generation warfare) ایک نہایت خطرناک جنگی حکمت عملی ہے جسکے تحت ملک کی افواج اور عوام میں مختلف طریقوں سے دوری پیدا کی جاتی ہے، مرکزی حکومتوں کو کمزور کیا جاتا ہے ، صوبائیت کو ہوا دی جاتی ہے ، لسانی اور مسلکی فسادات کروائے جاتے ہیں اور عوام میں مختلف طریقوں سے مایوسی اور ذہنی خلفشار پھیلایا جاتا ہے ۔ اسکے ذریعے کسی ملک کا میڈیا خریدا جاتا ہے اور اسکے ذریعے ملک میں خلفشار ، انارکی اور بے یقینی کی کیفیت پیدا کی جاتی ہے۔
فورتھ جنریشن وار کی مدد سے امریکہ نے پہلے یوگوسلاویہ ، عراق اور لیبیا کا حشر کر دیا اب اس جنگی حکمت عملی کو پاکستان پر آزمایا جا رھا ھے اور یہ ہماری خوش قسمتی ہیکہ اس میں انہیں ابھی تک وہ کامیابی حاصل نہ ہوسکی جسکا وہ خواب دیکھ رہے تھے،پاکستان کے خلاف فورتھ جنریشن وار کے لیے امریکہ ، انڈیا اور اسرائیل اتحادی ہیں، باراک اوباما نے اپنے منہ سے کہا تھا کہ وہ پاکستانی میڈیا میں 50 ملین ڈالر سالانہ خرچ کریں گے، آج تک کسی نے یہ سوال نہیں اٹھایا کہ کس مقصد کے لئے اور کن کو یہ رقوم ادا کی جائینگی جبکہ انڈیا کا پاکستانی میڈیا پر اثرورسوخ دیکھا جا سکتا ہے ، پاکستان کی ساری قوم اس امریکن فورتھ جنریشن وار کی زد میں ہے۔
یہ واحد جنگ ھوتی ھے جسکا جواب فوج نے نہیں قوم نے دینا ہوتا ہے،فورتھ جنریشن وار بنیادی طور پر ڈس انفارمیشن وار ہوتی ہے اور اسکا جواب سول حکومتیں میڈیا اور محب وطن عوام دیتی ہے ۔ پاکستان میں لڑی جانے والی اس جنگ میں سول حکومتوں سے کوئی امید نہیں اسلئے عوام میں سے ھر شخص کو خود اس جنگ میں عملی طور پر حصہ لینا ہوگا،اس حملے کا سادہ جواب یہی ہے کہ عوام ہر اس چیز کو رد کر دیں جو پاکستان ، نظریہ پاکستان اور دفاع پاکستان یا قومی سلامتی کے اداروں پر حملہ آور ہو،اگر اس مٹی کا قرض اور اپنا فرض ادا کرنا ہے تو ہم سب محب وطن عوام پاکستان پر یہ واجب ہیکہ ہم من حیث القوم متحد ہوں پاکستان اور افواج پاکستان کے شانہ بشانہ کھڑے ہوکر اس مسلط کردہ جنگ سے نجات کے لیئے اپنا اپنا کردار ادا کریں.اور تفرقہ پیدا کرنے والوں کو شٹ اپ کال دیں۔
پاکستان پائندہ باد
تحریر۔۔۔سید علی حسین نقوی
(سیکریٹری امور سیاسیات ایم ڈبلیوایم صوبہ سندھ)
وحدت نیوز(مظفرآباد) مجلس وحدت مسلمین آزاد کشمیر کی ریاستی کابینہ کا انتہائی اہم اجلاس وحدت ہائوس مظفرآباد میں منعقد ہوا۔اجلاس کی صدارت ڈپٹی سیکرٹری سید طالب حسین ہمدانی نے کی۔اجلاس میںپاکستان و ریاست آزاد جموں و کشمیر میں ہوینوالے اہم واقعات پر تبادلہ خیالات کیا گیا۔ اجلاس سے خطاب کرتے ہوئے سید طالب حسین ہمدانی نے کہا کہ حکومت پاکستان نے ایک با ر اپنی بے حسی اور بے غیرتی کی تمام حدیں پار کر دیں ہیں،سانحہ پاراچنار ،کوئٹہ اور ملک میں دیگر دہشت گردی کے واقعات پر مجرمانہ خاموشی حکومت پاکستان کا وطیرہ بن چکی ہے۔
انہوں نے کہا کہ آرمی چیف نے ایک بار پھر عوام کے دل جیت لیے ہیں اور یہ ثابت کر دیا ہے کہ اگر ملک کے اندر کوئی طاقت موجود ہے تو وہ صرف پاک افواج ہیں اور سیاسی جماعتیں پانامہ پانامہ کھیلنے میں مصروف ہیں۔وزیراعظم پاکستان کا پارا چنار کا دورہ کرنا تو درکنار وہاں کی مظلوم عوام سے ہمدردی کرنے کے لیے ایک لفظ بھی ادا نہ کرنا انتہائی افسوسناک ہے۔ نواز شریف کی کرپشن کا دیدہ دلیری سے دفاع کرنیوالے وفاقی وزراء بھی پاراچنار کے سانحہ پر خاموش رہے۔ وفاقی حکومت کا دہشت گردی کے واقعات کے خلاف منہ نہ کھولنا اس بات کی طرف واضح اشارہ ہے کہ یہ خود ان واقعات میں ملوث ہے یا پھر دہشت گردوں کو تحفظ فراہم کیا جا رہا ہے۔
انہوںنے کہا کہ آل شریف یاد رکھیں حکومت کفر سے تو قائم رہ سکتی ہے مگر ظلم سے نہیں،پاکستان کو شیعہ سنی نے مل کر بنایا تھا انشااللہ ہم مل کر بچائیں گے،آرمی چیف نے پاراچنار میں مظلومین کے زخموں پر مرہم رکھ کر ثابت کیا کہ پاکستان اور پاکستانیوں کا اصل وارث کون ہے،انہوں نے کہا ہمیں محب وطن اور دہشتگردوں کے ہمدروں کے درمیان لکیر کھینچنا ہوگی،پاکستان کے مظلوم عوام لاشیں اٹھا اٹھا کر تھک چکی ہے۔اجلاس میں بات کرتے ہوئے عابد قریشی نے کہا کہ آزاد حکومت کا حال بھی حکومت پاکستان جیسا ہے۔ خطہ میں وحدت کے لیے کوشاں شخصیت علامہ تصور جوادی اور ان کی اہلیہ پر دن دیہاڑے حملہ کر کے فرار ہونیوالے شر پسند عناصر کا قانون کی گرفت میں نہ آنا ریاستی حکومت اور قانون نافذ کرنیوالے اداروں کی کارکردگی پر سوالیہ نشان ہے۔ہم نے صبرو تحمل سے انتظامیہ کے ساتھ تعا ون کیا لیکن انہوں نے سخت مایوس کیا۔لہذا اب ہم بھی پاراچنار کے غیور عوام کی طرح سڑکوں پر نکلیں گے اور اپنے ساتھ ہونیوالی نا انصافی پر صدائے احتجاج بلند کریں گے۔ انہوں نے کہا کہ اب ہمارا احتجاج صرف مظفرآباد کی حد تک محدود نہ ہو گا بلکہ اس کو پاکستان تک پھیلایا جائے گا۔
وحدت نیوز(لاہور) مظلومین پارا چنار کی داد رسی کر کے افواج پاکستان اور آرمی چیف نے قوم کو متحد کیا،افواج پاکستان نے بروقت کردار ادا کر کے قوم کوتقسیم کرنے والے ملک دشمنوں کے عزائم خاک میں ملا دیے،ہم ان قابل ستائش اقدامات پر افواج پاکستان اور چیف آف آرمی سٹاف کو خراج تحسین پیش کرتے ہیں،سیاسی ومذہبی جماعتوں۔ سول سوسائٹی اور میڈیا کے بھی شکر گذار ہیں کہ دکھ کی اس گھڑی میں ہمارا ساتھ دیا اور ان مظلومین سے اظہار یکجہتی کی،ان خیالات کا اظہار مجلس وحدت مسلمین پنجاب کے ڈپٹی سیکرٹری جنرل ڈاکٹر سید افتخار حسین نقوی نے اجلاس سے خطاب کرتے ہوئے کیا ۔
انہوں نے کہا کہ اہم انتظامیہ کو بھی خراج تحسین پیش کرتے ہیں کہ انہوں نے ہمارے پرامن آئینی قانونی احتجاجی مظاہروں اور علامتی دھرنوں میں کوئی رکاوٹ نہیں ڈالی بلکہ مکمل سکیورٹی انتظامات کیے،ڈاکٹر افتخار نقوی نے کہا کہ ن لیگ اور شریف برادران کو الیکشن سے پہلے اللہ نے ملت جعفریہ کے سامنے ایکسپوز کیا،جن حکمرانوں میں انسانیت کی قدر و قیمت نہ ہو ان سے عدل و انصاف کی امید رکھنے والے احمقوں کی جنت میں رہتے ہیں،ملک میں جمہوریت نہیں بادشاہت ہے،سارے وسائل ایک ہی صوبے میں جھونک کر وفاق پاکستان کو کمزور کرنے کی سازش ہو رہی ہے، جے آئی ٹی اور اعلیٰ عدلیہ کیخلاف ہرزہ سرائی کرکے کرپشن پر پردہ ڈالنا چاہتے ہیں،عوام کرپٹ لوگوں کیخلاف متحد ہیں، پاکستانی غیور عوام بلا رنگ ونسل مذہب و ملت ان ظالم اور کرپٹ حکمرانوں کیخلاف جدو جہد کے لئے تیار ہیں،ہم پاکستان سے کرپٹ مافیا کے خلاف وقت آنے پر سڑکوں پر آنے کو تیار ہیں،پرامن معاشرے،کرپشن فری پاکستان ہمارا منشور ہے،اور انشااللہ امید ہے کہ ملک سے اس کرپٹ مافیا کا صفایا ہوگا۔
وحدت نیوز (قم) جمعہ الوداع کے دن پارا چنار میں قیامت صغریٰ بپا ہوئی اور سیکڑوں خاندان ایک لمحے میں اجڑ گئے،عصر حاضر کے خوارج نے یکے بعد دیگرے دو دھماکوں سے بیگناہ انسانیت کا قتل عام کیا،لیکن پاراچنار کے غیرتمند جوانوں اور تمام شہریوں نے مسلسل ایک ہفتہ دھرنا دیکر بزدل دہشتگردوں اور انکے سہولتکاروں کو پوری دنیا میں رسوا کیااور خون کو تلوار پر فتح نصیب ہوئی،ان خیالات کا اظہار مجلس وحدت مسلمین پاکستان کے مرکزی سیکریٹری امور خارجہ علامہ ڈاکٹر سید شفقت حسین شیرازی نے وارثان شہدائے پاراچنار کے دھرنے کے کامیاب اختتام پر اپنے تہنیتی پیغام میں کیا ۔
انہوں نے مذید کہا کہ اس پوری جدوجہد میں عنایت الٰہی شامل تھی، پاکستانی حکمرانوں، سیاستدانوں، اور قومی ومذہبی لیڈروں اور میڈیا کی زبان گنگ تھیکہ ہمیشہ کی طرح دشمن کے سامنے ہراول دستے کی قیادت کرنے والا ناصر ملت علامہ راجہ ناصر عباس جعفری اپنی ٹیم اور کارکنان کے ساتھ میدان میں اترا اور سوئے ہوئے ضمیروں کو جگانے کے لئے اسلام آباد میں پاراچنار کے بہادر اور غیور لوگوں کی بھرپور حمایت کے لئے خیمہ احتجاج نصب کیاتاکہ زمانے کا یزید ان مظلوموں کے بہنے والے اس بیگناہ خون کو ان بلند وبالا پہاڑوں کے درمیان وادی کرم میں دبا نہ دے اور انکی حوصلہ افزائی اور غمزدہ خاندانوں سے اظہار ہمدردی کے لئے تمام تر خطرات کے باوجود بائی روڈ اپنے باوفا ساتھیوں کے ساتھ پارا چنار پہنچ گئے، ملک کا وزیراعظم اور اسکی حکومت کے تمام زمہ داران مجرمانہ خاموشی سے زخموں پر نمک چھڑک رہے تھے. ہمدرد لیڈر بھی متذبذب نظر آتے تھےکہ ملک کے سیکڑوں شہروں میں اور بیرون ملک احتجاج اور مظلوموں کی حمایت کرنے والے سوشل میڈیا کے مجاہدوں نے خاموشی کا طلسم توڑ دیااور پوری قوم سراپا احتجاج بن گئی اور مظلوموں کا خون رنگ لایا،ہم خداوند تبارک وتعالیٰ کا جتنا شکر ادا کریں کم ہے کہ جس نے یہ نصرت فتح عطا کی ،اس کامیابی میں ایک اہم بنیادی کردار ہمارے مخلص وبہادر لیڈر، مرد میدان، عالم باعمل علامہ راجہ ناصر عباس جعفری کا ہے،اللہ تعالیٰ ان کا سایہ اس مظلوم ملت پر مستدام فرمائے۔
علامہ شفقت شیرازی کا کہنا تھا کہ دنیا بھر کے مختلف ممالک اور شہروں میں جہاں بھی ہم وطنان عزیز اور مومنین وعلماء کرام نے پاکستان کے ہائی کمیشنز اور سفارت خانوں کے سامنے مظاہرے کئے اور اپنی بیداری اور انسانی ہمدردی کے جذبے کا ثبوت دیتے ہوئے پارا چنار کے شہداء کے ساتھ ایفاء عہد کیا یا انکے لئے مجالس ترحیم وقرآن خوانی کا اہتمام کیااور انکے غمزدہ خانوادوں کے ساتھ اظہار ہمدردی کیا یا کلمہ حق کی الیکٹرانک فورس کے رضا کار جنہوں نے سوشل میڈیا پرحق کی آواز دبانے والوں کی چیخیں نکال دیں اور میڈیا سے پابندیاں اٹھانے پر مجبور کیا ، ہم دل کی اتھاہ گہرائیوں سے ان سب کے بیحد ممنون ومشکور ہیں ، آپکی کوششوں اور ملک بھر میں ہونے والے علامتی دھرنوں اور مظاہروں کی بدولت وطن عزیز پاکستان کو بڑی کامیابی ملی اور دشمنانِ ملت و وطن تکفیری دہشتگرد ذلیل اور رسوا ہوئےاور ہمارا ایمان ہے کہ سب مسلمانان پاکستان و بالخصوص ملت تشیع اور باقی بھی تمام ادیان ومذاہب کے پاکستانی بھائی وحدت ملی سے ہر دشمن کو شرمناک شکست دے سکتے ہیں اور سیاسی ومذہبی جماعتوں کے قائدین ، سول سوسائٹی اور پاکستانی اسٹبلشمنٹ کا ہمیشہ اسی طرح کا ان صہیونی وآل سعود وآل ہنود کے ایجنٹوں کے خلاف مشترکہ اسٹینڈ پاکستان کے استقلال اور استحکام کی ضمانت ہے، اللہ تعالیٰ وطن عزیز پاکستان اور سب اہلیان پاکستان کو ہر دشمن بالخصوص ان تکفیریوں کے شر سے محفوظ رکھے۔
