وحدت نیوز (کوئٹہ) مجلس وحدت مسلمین بلوچستان کے صوبائی سیکریٹری جنرل علامہ برکت علی مطہری نے ایک بیان میں کہاکہ بلوچستان کے ضلع نصیر آباد اور سندھ کے ضلع خیرپورمیں عزاداری کے اجتماعات پر بے بنیاد مقدمات کا اندراج شہری آزادی پر شب خون مارنے کے مترادف ہے، خیر پور میں شھادت امام حسن علیہ السلام کے سلسلے میں سالہا سال جلوس اور تابوت امام حسن علیہ السلام نکالا جاتا ہے اس سال پولیس نے بانی جلوس پر ایف آئی آر درج کر دی ہے۔

انہوں نے کہاکہ عزا داری خاندان رسالت ہماری شہہ رگ ہے جس پر کسی قسم کی پابندی کو قبول نہیں کریں گے اور پولیس کے اس اقدام کی پر زور مذمت کرتے ہے ۔واضح رہے کہ اس سال بلوچستان سندھ اور پنجاب میں پولیس اور انتظامیہ کا بانیان مجالس و عزادارن سے نارواں سلوک رہا ہے محرم میں باری شاخ تحصیل تمبو ضلع نصیرآباد میں D C نصیرآباد نے جلوس نکالنے اور مجالس پر پابندی لگائی تھی ضلع صحبت پور میں چہلم کا جلوس نکالاگیا تو پولیس نے بانی جلوس سیکریٹری جنرل مجلس وحدت مسلمین بلوچستان اور عزاداران حسین علیہ السلام پر ایف آئی آر کاٹ دی پنجاب رحیم یار خان کے علاقہ میں مجلس امام حسین علیہ السلام ہورہی تھی تو پولیس نے مجلس والوں پر دھاوا بول دیا لاٹھی چارج اور آنسو گیس کا استمال کیا گیا اب جبکہ خیر پور سندھ میں 28 صفر کو امام حسن علیہ السلام کی یوم شہادت کے سلسلے کا جلوس نکالا گیا تو پولیس نے ایف آئی آر درج کر دی ہے جو کہ نہایت افسوس ناک عمل ہے پولیس کی طرف سے بانیان جلوس عزاداری پر ایف آئی آر فوری واپس لیا جائیں۔

وحدت نیوز(کوئٹہ) مجلس وحدت مسلمین پاکستان کوئٹہ ڈویژن کے سکریٹری جنرل کربلائی رجب علی نے بیان دیتے ہوئے کہاہے کہ بلاک شناختی کارڈز کا مسئلہ ایک معمہ بن چکا ہے عوام کے لوہے کے بنائے ہوئے جوتے بھی پگھل گئے لیکن بلاک شناختی کارڈ کا مسئلہ حل نہ ہوسکا دس پندرہ سالوںسے عوام اپنا روز گار و کاروبار چھوڑ کر نادرا کے مختلف آفسز کی چکر کاٹ رہے ہیں لیکن انکا مسئلہ حل نہیں ہو رہا، اس مسئلے پر واضح پالیسی کا فقدان ہے حکومت اور ادارے کوئی پالیسی وضع کریں اتنے عرصے میں ایک نسل بوڑھی اور دوسری نسل جوان ہو جاتی ہے لیکن بلاک شناختی کا فیصلہ ہی نہیں ہو پاتا ہمارے جوانوں کا مستقبل داؤ پر لگا ہوا ہے وہ گلی کوچوں اور بازاروں میں آزادانہ گھوم پھیر سکتے ہیں نہ ہی کسی تعلیمی ادارے میں داخلہ لے کر اپنی تعلیم جاری رکھ سکتے ہیں بلاک شناختی کی وجہ سے ایک نسل تباہ ہو رہی ہیں ادارے اپنی غلط پالیسیوں کی سزا عوام کو دے رہے ہیں شناختی کارڈ بلاک کرنا بہت آسان اور ان بلاک کرنا تقریباً ناممکن ہے جس کی وجہ سے نادرا ملازمین نے شناختی کارڈ بنانے کو اپنا کاروبار بنا لیا ہے صرف رشوت نہ دینے پر شناختی کارڈز بلاک کئے جاتے ہیں اور شناختی بلاک کرنے پر ان سے کوئی انکوائری نہیں کی جاتی جس کی وجہ سے نادرا ملازمین جو کے ٹیکسوں پر پل رہے ہیں نیافسر شاہی نظام قائم کر رکھا ہے اور نادرا آفسز میں بادشاہت قائم کرکے عوام کے ساتھ انتہائی ناروا سلوک اختیار کئے ہوئے ہیں جس ملک کے ادارے عوام کی عزت نہیں کرتی وہ ملک کبھی بھی ترقی نہیں کر سکتا حکومت اور ادارے جلد از جلد واضح پالیسی وضع کر کے مختصر ترین مدت معین کرکے مقررہ وقت پر بلاک شناختی کے فیصلے کریں اسی طرح شناخت کارڈ ناجائز بلاک کرنے پر نادرا ملازمین کے لیے سزائیں مقرر کریں تا کہ کوئی بھی بلا جواز عوام کے شناختی کارڈ بلاک نہ کر سکے

وحدت نیوز(لاہور) ملی یکجہتی کونسل کے صدر صاحبزادہ ابوالخیر زبیر کی مجلس وحدت مسلمین پاکستان کے مرکزی سیکرٹری سیاسیات سید اسد عباس نقوی کے ہمراہ گذشتہ کئی دنوں سے لاپتہ چیئرمین امامیہ آرگنائزیشن پاکستان(آئی او) سید رضی العباس شمسی کے گھر میں اہلخانہ سے ملاقات،ملاقات میں مجلس وحدت مسلمین کے رہنمارانا ماجد علی،رائے ناصر علی اور افسرحسین خاں شریک تھے،صاحبزادہ ابوالخیر نے سید رضی شمسی کی جبری گمشدگی کی شدید مذمت کرتے ہوئے کہا کہ جنگل کے بھی کوئی قانون ہوتے ہیں،یہاں محب وطن شہریوں کو غائب کرنا معمول بن چکا ہے،یہ عمل آئین اور قانون کی صریحاََ خلاف ورزی ہے،ریاست کی ذمہ داری ہے کہ وہ اپنے شہریوں کو تحفظ فراہم کریں،لیکن یہاں ہمیں ریاست نام کی کوچیز نظر نہیں آتی ۔

انہوں نے مذیدکہاکہ سید رضی شمسی ایک محب وطن اور پرامن شہری تھے ،ان کی جبری گمشدگی قانون نافذ کرنے والے اداروں کی کارکردگی پر سوالیہ نشان ہے،ریاست کیخلاف اعلان بغاوت کرنے والے دندھاتے پھر رہے ہیں،لیکن دوسری جانب پرامن اور دہشتگردی سے متاثرہ افراد دن دیہاڑے غائب ہو رہے ہیں،ملی یکجہتی کونسل اس غیر قانونی غیر آئینی عمل کی شدید مذمت کرتی ہے۔

مجلس وحدت مسلمین پاکستان کے مرکزی سیکرٹری سیاسیات سید اسد عباس نقوی نے کہا کہ جبرگمشدگی کا یہ عمل بنیادی انسانی حقوق کی خلاف روزی ہے جسے کوئی بھی شہری قبول کرنے کو تیار نہیں اگر کسی کیخلاف کوئی بھی الزام ہو تو عدالتیں آزاد ہیں ان کو عدالتوں میں پیش کرکے ان کا محاسبہ کیا جائے،ہم حکومت اور انسانی حقوق کے اداروں سے مطالبہ کرتے ہیں کہ ملت تشیع کے جبری گمشدہ افراد کو بازیاب کیا جائے،اور جبری گمشدگی جیسے غیرآئینی عمل کو بند کیا جائے۔

وحدت نیوز(اسلام آباد) مجلس وحدت مسلمین پاکستان کے فلاحی شعبے خیر العمل ویلفیئر اینڈ ڈیولپمنٹ ٹرسٹ کے چیئرمین علامہ سید باقرعباس زیدی نے مرکزی سیکریٹریٹ سے جاری ایک بیان میں کہاہے کہ امام خمینی ؒکے فرمان اور علامہ راجہ ناصرعباس کی ہدایت پر خیرالعمل ویلفیئر اینڈ ڈیولپمنٹ ٹرسٹ ملک بھرمیں 12تا 17ربیع الاولہفتہ وحدت بسلسلہ ولادت رسول خداﷺ اور امام جعفرصادق ؑ عقیدت واحترام سے منائے گی، ذات اقدس رسول کریم ﷺ تمام امت مسلمہ کے درمیان مرکز وحدت ہے، جس طرح شیعہ سنی نواسہ رسول ﷺ امام حسین ؑ کا غم مل کر مناتے ہیں الحمد اللہ اسی طرح رسول خداﷺ کی ولادت کا جشن بھی تمام شیعہ سنی مل کر مذہبی جوش وجذبےکے ساتھ مناتے ہیں۔

انہوں نے کہاکہ خیر العمل  ویلفیئر اینڈ ڈیولپمنٹ ٹرسٹ کی جانب سےسالہائے گذشتہ کی طرح اس سال بھی ملک بھرمیں جلوس ہائے میلاد النبیﷺ کی گذرگاہوں پر استقبالیہ کیمپس اور سبیلوں کا اہتمام کیاجائے گا جہاں سے شرکائے جلوس کی ٹھنڈے مشروبات سے تواضع کی جائے گی اور ان میں نیاز تقسیم کی جائے گی۔

وحدت نیوز(اسلام آباد) مرکزی سیکریٹری جنرل مجلس وحدت مسلمین پاکستان علامہ راجہ ناصرعباس جعفری نے بفرمان امام خمینیؒسالہائے گذشتہ کی طرح امسال بھی 12تا 17ربیع الاول ہفتہ وحدت بمناسبت جشن ولادت رسول خداﷺاور امام جعفرصادقؑمنانے کا اعلان کیاہے، اس موقع پر صوبائی اور ضلعی سطح پرمحافل میلاد، نعت اور جشن کا انعقادکیاجائے گا، استقبالیہ کیمپس، سبیلیں ، میڈیکل کیمپس اور نذرونیاز کا اہتمام کیاجائے گا، ان خیالات کا اظہارمجلس وحدت مسلمین پاکستان کے مرکزی ڈپٹی سیکریٹری جنرل علامہ سید احمد اقبال رضوی نے مرکزی سیکریٹریٹ سے جاری ایک اعلامیے میں کیا۔

انہوں نے کہاکہ جشن میلاد النبیﷺ امت مسلمہ کے درمیان نقطہ اتحاد ہے،خاتم النبیین ﷺ کی ولادت کا جشن تمام شیعہ سنی مسلمان مل کر مناتے ہیں ، انشاءاللہ مجلس وحدت مسلمین ملک بھرمیں پیغمبر اکرم ﷺ کی ولادت کی خوشیوں کو شایان شان اندازمیں منانے کیلئے علامہ راجہ ناصرعباس جعفری کی جانب سے صوبائی اور ضلعی سطح پر تمام عہدیداران کو ہدایات جاری کرتی ہے کہ 12تا 17ربیع الاول ہفتہ وحدت کے دوران اہل سنت برادران کے جلوس ہائے میلاد النبیﷺ کا شاندار استقبال کیاجائے، جلوس کے شرکاءپر گل پاشی کی جائے، شرکائے جلوس کی ٹھنڈے مشروبات سے تواضع کی جائے، ان میں مٹھائیاں تقسیم کی جائیں ،استقبالیہ کیمپوں پر شیعہ سنی علماءواکابرین کو اتحاد وحدت کی ترویج کے لئے دعوت خطاب دیا جائے، جبکہ  صوبائی اور ضلعی سطح پرمحافل میلاد، نعت ، جشن، سیمینار، تقریری مقابلے ، کوئزوغیرہ کے پروگرامات کا بھی انعقادکیاجائے۔

وحدت نیوز(آرٹیکل) نواسہ رسول ؐ اسلامی سال کی ابتدامیںہی کربلا میں پہنچ کر خیمہ زن ہو چکے تھے ۔نہ صرف نواسہ رسولؐ بلکہ رسول خدا کے اہل بیت ؑ اور دیگر رشتہ دار بھی کربلا کے میدان میں پہنچ کر مستقبل قریب کے منتظر تھے ۔زمین کربلا مضطرب دکھائی دے رہا تھا جبکہ نواسہ رسول صلی اللہ علیہ آلہ وسلم و با وفادار اصحاب  راز و نیاز اور دعا و مناجات میں مصروف نظر آرہے تھے ۔آل محمد کا یہ قافلہ سال کے شروع میں ہی ایک تبتی ہوئی ریگستان میں پہنچ چکے تھے اور نواسہ رسولؐ اپنے ساتھیوں کو شہادت کی خوشخبریاں سنا رہے تھے ۔ یہ  وہی حسین علیہ السلام تھا جس کی شان میں رسولؐ خدا نے فرمایا تھا :{حُسَيْنٌ مِنّی وَ أَنـَا مِنْ الحُسَيْن، أَحَبَّ اللہ ُ مَنْ أَحَبَّ حُسَيْناً}حسین مجھ سے ہے اور میں حسین سے ہوں۔ یہ رسول اللہ ؐ کا وہی نور نظر تھا کہ جب آنحضرت رب کے حضور سر بسجود ہو ئے تو آپ رسول خدا کے پیٹ پر سوار ہوئے اور رسول اللہ حکم خدا کے منتظر رہے اور رب کی طرف سے حکم ہوا کہ جب تک یہ معصوم بچہ خود سے نہ اترے آپ سجدے کی حالت میں ہی رہیں ۔

آج یہی عظیم ہستی ،اللہ کا یہی محبوب بندہ حج کو عمرے میں تبدیل کر کے کربلا پہنچ چکا تھا تاکہ اموی استبداد اور ظالم و جابر حکمران کےہاتھوں جان بلب اسلام کو ایک دفعہ پھر نئی زندگی عطا کرے اور اسلامی معاشرے کو اپنی خطوط پر استوار کرے جن خطوط پر رسول اللہ صلی اللہ علیہ وآلہ وسلم نے استوار فرمایاتھا ۔ اسلامی تہذیب سے رخ پھیر کر جاہلیت کی طرف پلٹنے والی قوم کو پھر سے قرآن و سنت کے سائے میں بندگی کا درس اور تربیت دے کر پھر سے ایک مہذب قوم میں بدل سکیں ۔نواسہ رسول علیہ السلام پہلے سے مطلع تھے کہ اگر حج کو عمرے میں تبدیل نہ کریں تو شام کے درندہ صفت انسان جو حاجیوں کی روپ میں تھے حسین ابن علی ؑکو خانہ خدا میں ہی شہید کر دیتے۔ نواسہ رسول نے مناسب نہ سمجھا کہ حرم پاک کی حرمت پامال ہو جائے اس لئے آپ عمرہ کر کے بیت اللہ کی حرمت کو محفوظ رکھتے ہوئے کربلا پہنچ گئے  ۔جس اسلام کو رسول خدا صلی اللہ علیہ وآلہ وسلم نے جان کی ہتھیلی میں رکھ کر بڑی کوششوں اور ہزار زحمتوں ، اذیتوں کو برداشت کر کے پالاتھا آج وہی اسلام سرے سے مٹ رہاتھا اور مسلمانوں کے قلب ونظر میں اس کی جڑیں اس حد تک کمزور ہو چکی تھی کہ جب تک خون سے انہیں سیراب نہ کیا جاتا اسلام کازندہ رہنا محال نظر آرہا تھا۔

اس پس منظر میں نواسہ رسول ؐ نے یہ اعلان کرتے ہوئے قیام فرمایا :{إِنّی لَمْ أَخْرُجْ أَشِرًا وَلا بَطَرًا وَلا مُفْسِدًا وَلا ظالِمًا وَإِنَّما خَرَجْتُ لِطَلَبِ الاْصْلاحِ فی أُمَّۃِ جَدی، أُريدُ أَنْ آمُرَ بِالْمَعْرُوفِ وَأَنْہی عَنِ الْمُنْکَرِ وَأَسيرَ بِسيرَۃِجَدّی وَأَبی عَلِیِّ بْنِ أَبيطالِب}میرا مقصد دنیاوی حکومت یا مال و زر کا حصول نہیں بلکہ اپنے نانا محمد مصطفیؐ اور بابا علی مرتضیٰ ؑ کے نقش قدم پر چلتے ہوئے امت محمدی کی اصلاح کرنا  ہے۔ مفسدوں ،ظالموں اور جابروں کے تباہ کاریوں سے دین اور مسلمانوں کو نجات دلانا ہے اور خون کے پیاسے درندہ صفت انسانوں کے مقابلے میں اسلام کی آبیاری کرنا ہے ۔ واقعہ کربلا میں موجودانسانی تربیت کے جامع ترین اور اعلی ترین اصول کا درج ذیل زاویوں سے جائزہ لیا جا سکتا ہے ۔

1:عدالت خواہی
عدل کا دائرہ زندگی کے ہر شعبے کو محیط ہے ۔انفرادی اور اجتماعی امور میں نظام عدل کے نفاذ کے ذریعے ہی فرد اور معاشرہ فلاح کی منزل سے ہمکنار ہو سکتے ہیں ۔ظلم کے خلاف اور عدل کے حق میں قیام کرنا ہر انسان کی ذمہ داری ہے ۔لیقوم الناس بالقسط۔امام حسین علیہ السلام کے دور میں اموی حکومت غیر شرعی ،غیر عادلانہ اور یر قانونی طریقے سے وجود میں آئی۔امویوں نے آل رسول کے علاوہ دیگر بندگان خدا پر ظلم و ستم کا بازار گرم کر رکھا۔مسلمانوں خاص کر امام حسین علیہ السلام کی ذمہ داری تھی کہ وہ ظلم کے خاتمے اور عادلانہ معاشرے کے قیام کی خاطر کوشش کریں۔چنانچہ امام علیہ السلام نے ایک خطاب میں رسول اللہ صلی اللہ علیہ وآلہ وسلم کے اس فرمان کا ذکر کرتے ہوئے کہ ظالم حکمرانوں کے خلاف قیام ضروری ہے اپنے آپ کو اس قیام کے لئے سب سے زیادہ موزوں اور سزاوار فرد  قرار دیا۔آپ نے فرمایا: { من رای سلطانا جائرا مستحلا لحرام اللہ۔۔ }1.ایک جگہ آپ نے بنی امیہ کو آل رسول پر ظلم کرنے کا مجرم قرار دیا اور کہا:{و تعدت بنو امیہ علینا}2

کوفہ کے روساء کے نام خط میں آپ نے برحق امام کی یہ خصوصیت بتائی کہ وہ عدل قائم کرنے والا ہے ۔{ما الامام الا الحاکم بالکتاب القائم بالقسط۔۔}3۔کوفہ میں امام  کے سفیر مسلم بن عقیل نے اپنی گرفتاری کے بعد ابن زیاد سے فرمایا: میں اس لئے آیا ہوں تا کہ عدل قائم کروں اور قرآن کی طرف بلاوٴں۔4

امام حسین علیہ السلام کی زیارت کا ایک جملہ یہ ہے :{ اشھد انک اقمت بالقسط و العدل و دعوت الیھما۔۔۔} میں گواہی دیتا ہوں کہ آپ نے عدل اور انصاف  کے مطابق حکم دیا اور ان دونوں کی طرف دعوت دی۔ 5۔حق ،عدل اور انصاف کی بالا دستی کی خاطر کام کرنے والوں  کے لئے قیام حسینی میں لا زوال دروس مضمر ہیں۔امام خمینی  فرماتےہیں :سید الشہدا علیہ السلام کے قیام کےابتدائی دن سے ہی آپ کا مقصد یہ تھا کہ عدل قائم کیا جائے۔6

سید الشہداء علیہ السلام نے اپنی پوری زندگی برائیوں کو ختم کرنے اور ظالم حکومتوں کے مذموم مقاصد کی روک تھام کی کوشش میں گزاری۔7 قیام حسینی  نظام عدل کی واپسی اور ظالمانہ نظام کی اصطلاح کی لا زوال تحریک کا نام ہے ۔حضرت زینب کبری سلام اللہ علیہا نے یزید کی مذمت کرتے ہوئے عدل کا تذکرہ کیا اور فرمایا:اے آزاد کردہ غلاموں کی اولاد: کیا یہ عدل اور انصاف ہے کہ تواپنے اہل و عیال کو پردے کے اندررکھے اور رسول کی بیٹیوں کو اسیر بنا کر پھرائے؟ 8

2: باطل سے مقابلہ
 فکری ،نظریاتی ،دینی ،اقتصادی،سیاسی،اخلاقی اور دیگر میدانوں میں حق و باطل کی جنگ ہر دور میں جاری رہی ہے ۔انبیاء ،اولیاء اور ائمہ علیہم السلام نے ہر دور میں باطل سے جنگ کی ہے ۔{بل نقذف بالحق علی الباطل فیدمغہ فاذا ہو زاہق}9۔خدا ،اسلام ،انبیاء ،ائمہ ہدی ،اسلامی حکومت ،قرآن وغیرہ حق ہیں ۔ اہل بیت اطہار علیہم السلام اور حضرت علی علیہ السلام مجسمہ حق تھے۔ یزید کی ظالم اور باطل حکومت کی مخالفت امام حسین علیہ السلام کی ذمہ داری تھی۔آپ نے اپنے قیام کے اسباب بتاتے ہوئے فرمایا:{الا ترون ان الحق  لا یعمل بہ و الباطل لا یتناھی عنہ} کیا تم نہیں دیکھتے کہ حق پر عمل نہیں ہو رہا اور باطل سے اجتناب نہیں برتا جا رہا۔؟ 10

3:بدعت سے مقابلہ
باطل کا ایک اور مصداق  بدعت ہے۔ بدعت یہ ہے کہ جن امور کا دین سے تعلق نہ ہوا نہیں دین میں شامل کیا جائے ۔بنی امیہ نے بدعتوں کو رائج کیا۔امام حسین علیہ السلام نے ان بدعتوں کا مقابلہ کرتے ہوئے اپنی جان دے دی ۔آپ نے فرمایا:{ فان السنۃ قد امیتت و ان البدعۃ قد احییت}11

اہل بیت علیہم السلام اور بنی امیہ کی جنگ دو خاندانوں کی جنگ نہ تھی بلکہ حق و باطل کا معرکہ تھا ،حق اور بدعت کا مقابلہ تھا۔اسی لئے امام نے فرمایا:{نحن و بنی امیہ اختمصنا فی اللہ عزوجل قلنا صدق اللہ و قالو کذب اللہ} بنی امیہ کے ساتھ ہمارا اختلاف خدا کے معاملے میں ہے۔ہم نے اللہ کی تصدیق اور انہوں نے خدا کی تکذیب کی ہے۔12

4:اسلامی حکومت کا احیاء
قیام حسینی کا مقصد اسلامی حکومت کا احیاء،حق کی بنیاد پر اسلامی حکومت کا قیام اور ظلم کی بنیادوں پر استوار نظام حکومت کے خاتمے سے عبارت تھا۔امام حسین علیہ السلام اپنی حقانیت کے اثبات اور امویوں کی باطل حکومت کے خاتمے کی ضرورت کو بیان کرتے ہوئے فرماتےہیں:خلافت کے ان ناحق دعویداروں کے مقابلے میں ہم اہل بیت علیہم السلام تم پر حکومت کرنے کے زیادہ سزاوار ہیں۔یہ لوگ تمہارے ساتھ ظلم کر رہے ہیں ۔13

5: حق کا دفاع
سید الشہداء علیہ السلام نے اپنے عظیم تربیتی مشن کے پیش نظر لوگوں کو دعوت دی کہ وہ حق کی حمایت کریں،مظلوموں کا ساتھ دیں اور اہل بیت کی مدد کریں۔یہاں تک کہ آپ نےعبید اللہ جعفی کو بھی دعوت دی جو کوفہ کے جدید حالات سے لاتعلق رہنا چاہتا تھا۔امام علیہ السلام نے حر سے فرمایا:توبہ کے ذریعے گذشتہ گناہوں  کے داغ دھو لو۔ میں تجھے ہم اہل بیت کی نصرت کرنے کی دعوت دیتا ہوں۔اگر ہمارا حق ہمیں دیا گیا توہم قبول کریں گے۔اگر نہ دیا گیا اور ہم پر ظلم روا رکھا گیا تو  تو حق کی خاطر میری مدد کرنے والوں میں شامل ہو گا۔14
حق اور عزت کی خاطر کی خاطر مرناسید الشہداء علیہ السلام کے ہاں زندگی ہے۔فرمایا:{ما اہون الموت علی سبیل نیل العز و احیاء الحق} عزت و عظمت کے حصول اور احیائے حق کے لئے مرنا کتنا آسان ہے ۔ 15

سفر کربلا کےدوران ایک بار  حضرت علی اکبر علیہ السلام نے امام حسین علیہ السلام سےپوچھا: کیا ہم حق پر نہیں ہیں ؟ فرمایا: کیوں نہیں۔حضرت علی اکبر علیہ السلام نے عرض کیا: اے بابا؛ پھر ہمیں موت کی کوئی پروا نہیں۔{ یا ابتی اذا لا نبالی بالموت}16

6: خاموش نہ رہنا  
حق وباطل کےمعرکے میں خاموش رہنا جرم ہے کیونکہ یہ حق کو کمزور کرنے اور باطل کی تقویت کا موجب ہے۔جنگ صفین حق و باطل کا واضح معرکہ تھا لیکن کچھ لوگوں نے بے طرفی کی روش اپنائی اور حق کا ساتھ نہ دیا ۔امیر المومنین علیہ السلام نے ان لوگوں کی مذمت کی اور
فرمایا:ان لوگوں نے حق کو بے یار و مددگار بنا دیا اگرچہ باطل  کی مدد نہیں کی ۔ 17
قیام امام حسین علیہ السلام کے دوران بھی کچھ لوگوں نے بہانے بناتے ہوئے امام کا ساتھ نہ دیا۔بعض لوگوں نے امام کی دعوت ان سنی کر دی۔احنف بن قیس نےعصر رسول اور عصر امیر المومنین کی جنگوں میں ان کا ساتھ دیا تھا لیکن امام حسین علیہ السلا م  کا ساتھ نہ دیا بلکہ اپ کو قیام سےمنع کیا۔مدینہ میں امام علیہ السلام نے مروان سےفرمایا: میں نے رسول اکرم صلی اللہ علیہ وآلہ وسلم سے سنا ہے کہ آل ابو سفیان پر خلافت حرام ہے لیکن مسلمانوں نے سہل انگاری کی توخدا نےیزید کو ان پر مسلط کر دیا۔18۔ امام حسین علیہ السلام نے ایک دفعہ لوگوں سے فرمایا:اگر تم لوگ ہماری مدد اور ہمارے ساتھ انصاف نہ برتو گے تو ظالم لوگ تمہارے مقابلے میں طاقتوربن جائیں گے اور تمہارے نبی کے نور کو بجھانے کی کوشش کریں   گے۔ 19۔یوں امام نے سمجھایا کہ اگر لوگ حق اور امام برحق کی حمایت کے معاملے میں کوتاہی برتیں گے تو حق کمزور ہو گا اور طاغوت کو غلبہ حاصل ہوگا۔

7: حامیان حق کی عظمت
قرآن کی روسے حق پائیدار ہے اور باطل ناپائیدار۔20۔  اسی لئے جو حق کی حمایت کرتا ہے اور حق کے مطابق زندگی گزاراتا ہے اسےدائمی فتح ،زندگی اور عزت مل جاتی ہے اگرچہ وہ بظاہر کمزور ، محروم اور مغلوب ہو۔بقول امیر المومنین علیہ السلام: { الحق دولۃ و الباطل جولۃ} باطل عارضی شےہے جبکہ حق ایک دائمی فتح ہے ۔ 21۔حق کی خاطر جان دینے والا حسین علیہ السلام اربوں لوگوں کے دلوں پر حکومت کر رہا ہے اور انسانیت کی پیشانی کا جھومر ہے۔معاویہ کی موت کے بعد والی مدینہ سے ملاقات سے پہلے امام حسین علیہ السلام نے اپنے خاندان کے لوگوں سے فرمایا:میں ان لوگون کا تسلط اور ذلت ہر گز قبول نہیں کروں گا۔

امام علیہ السلام نے اپنےپیروکارون کو درس دیا کہ حق کی حمایت اور باطل سے ٹکرانے میں ہی عزت اور زندگی ہے جبکہ باطل سے مرعوب ہونا اور اس کا ساتھ دینا موت کےمترادف ہے ۔فرمایا:{ انی لا اری الموت الا سعادۃ و الحیاۃ مع الظالمین الا برما}23

8:حامیان باطل کی ذلت
 مظلوم کاناحق خون ظالم کے دامن کو جکڑ لیتا ہے اور انہیں ذلت و خواری سے دوچار کرتا ہے۔ بطن العقبۃ میں ایک شخص نے امام کو کوفہ کے نامساعد حالات کی خبر دی اور وہاں نہ جانے کا مشورہ دیا۔آپ نے فرمایا: اللہ کی قسم یہ لوگ میرا خون بہا کر ہی  دم لیں گے ۔پس خدا ان پر اس شخص کو مسلط کرے گا جس کے ہاتھوں وہ ذلیل ترین لوگ قرار پائیں گے۔23۔سانحہ عاشورا کے مجرم انتقام الہی  کےشکار ہوئے۔شیخ مفید نقل کرتے ہیں کہ بہت سی احادیث کی روسے شہدائے کربلا کا کوئی قاتل موت ،بلا یا رسوائی سے نہیں بچ سکا۔وہ سب اپنی طبیعی موت سے پہلے کیفر کردار کو پہنچ گئے۔24

خلاصہ یہ کہ امام حسین علیہ السلام نے اپنے قیام کے ذریعے انسانی تربیت کے لئےجامع ترین اور اعلی  ترین اصول دنیا کےسامنے رکھے۔ان اصولوں میں انفرادی و اجتماعی بیداری کا اصل ،امر بالمعروف اور نہی از منکر کا اصل ،ظلم ستیزی اور حق پرستی کا اصل ،بدعت کے خلاف جنگ کا اصل ،عزت نفس ،معاشرتی اصلاح کا اصل ،عدل گستری کا اصل  اور احساس ذمہ داری کا اصل وغیرہ  شامل ہیں ۔

حوالہ جات:
1   ۔موسوعۃ کلمات الامام الحسین علیہ السلام
2   ۔علامہ مجلسی ،محمد باقر ،بحار الانوار،ج۴۶،ص2914۔
3۔    شیخ مفید،الارشاد،ج۲ص39۔
4۔ایضا۔
5۔قمی،شیخ عباس،مفاتیح الجنان ،ص439۔
 6۔امام خمینی،صحیفہ نور،ج۲ص189۔
  7۔ایضا۔
 8۔مجلسی ،محمد باقر،بحار الانوار،ج45ص152
 9۔انبیاء،18۔
10۔مجلسی ،محمد باقر،بحار الانوار،ج44ص381
11۔ابن شعبہ حرانی ،تحف العقول عن آل الرسول۔ایضا،ص360۔
12۔موسوعۃ کلمات الامام الحسین علیہ السلام
 13۔ابن مخنف،وقعتہ الطف،ص144۔تحقیق،حسن غفاری۔
14۔کلمات امام حسین علیہ السلام
  15۔ امین،سید محسن،،اعیان الشیعہ،ج۱،ص184۔
 16۔ابن مخنف،وقعتہ الطف،ص144۔تحقیق،حسن غفاری۔
 17۔ ابن ابی الحدید،شرح نہج البلاغۃ ،حکمت،۱۸۔
18۔خوارزمی ،محمد بن احمد مکی،مقتل الحسین،ج۱،ص236۔
19۔  ابن شعبۃ الحرانی،تحف العقول عن آل الرسول،ص236۔
20۔   اسراء،81۔
21۔  آمدی عبد الواحد ،غرر الحکم ،ج۵ص205۔
 22۔موسوعۃ کلمات الامام الحسین علیہ السلام
23۔ایضا۔
24۔مفیدبن نعمان،ارشاد ،ج۲،ص۷۶۔

تحریر: محمد لطیف مطہری کچوروی