وحدت نیوز(سکردو) وزیر زراعت گلگت بلتستان و صوبائی رہنما مجلس وحدت مسلمین محمد کاظم میثم نے اخباری نمائندہ کے سوال کا جواب دیتے ہوئے کہا ہے کہ خالد خورشید کی حکومت کو گرانے کا خواب دیکھنے والے مخالفین رسوا ہوجائیں گے۔ پوری کابینہ ایک پیج پر اور وزیراعلیٰ خالد خورشید کے شانہ بشانہ کھڑی ہے۔ کابینہ کا ہر رکن مثالی فعالیت دکھانے میں مصروف اور گلگت بلتستان کی تعمیر و ترقی کے لیے جدوجہد کر رہی ہے۔ نہ کابینہ اراکین میں کسی قسم کی دوری ہے اور نہ ہوگی۔ حکومت کو کمزور کرنے کی کوشش کرنے یا منفی پروپیگنڈا سے جی بی کی ترقی و پیشرفت نہیں رک سکتی۔
انہوں نے کہا کہ ہم نے ستر سالہ محرومیوں کے ازالے کے لیے کوشش کرنی ہے اور عبوری صوبہ اسی سلسلے کی کڑی ہے۔ پاکستان کے آئینی اداروں میں نمائندگی اور آئینی حقوق ہمارا بنیادی ہدف اور الیکشن کا پہلا منشور تھا۔ جسکا حصول یقینی ہوگیا ہے۔ کرسی، اختیار، رکنیت اقتدار میرے عوام کے لیے ہے۔ عوام کے مستقبل کے لیے ضرورت پڑی تو کرسی کیا چیز ہے جان بھی حاضر ہے۔ دن کا سکون رات کا چین سب کچھ چھوڑ کر ہر در کی خاک چھاننے کے تیار ہے جس سے عوام کے مسائل حل ہوں۔ وزیراعلیٰ گلگت بلتستان اور اسکی ٹیم کی کاوشوں سے عوام مطمئن اور خوش ہیں۔ بجلی اور گندم کا مسئلہ حل کرنے کے لیے ٹھوس اقدامات اٹھائے جا رہے ہیں۔ بجلی کے میگا پروجیکٹس پر کام ہوگا۔ انفراسٹرکچر تعلیمی و صحت کے اداروں میں واضح بہتری آ رہی ہے۔ خطے کی تعمیر و ترقی اور پیشرفت کو یقینی بنانے نیز وسائل کے بہتر استعمال کے لیے ماسٹر پلان کے تحت منصوبوں پہ کام ہوگا۔
