وحدت نیوز(قمراہ)مجلس وحدت مسلمین جی بی کے صوبائی قائدین نے منتخب ارکان اسمبلی کے ہمراہ قمراہ کا دورہ کیا۔ قائدین اور ارکان اسمبلی کو مبارکبادی دینے کے لیے عوام کا جم غفیر موجود تھا۔ آغا علی رضوی اور صوبائی وزیر زراعت محمد کاظم میثم نے اجتماع سے خطاب کرتے ہوئے الیکشن میں بھرپور حمایت کرنے پر قمراہ کے عوام کا شکریہ ادا کیا۔
علاقے کے عوام کی نمائندگی کرتے ہوئے علاقے کے سرکردگان اے ڈی آئی بشیر ، محمد حسن اور دیگر نے ڈاکٹر فاطمہ علی کو اسمبلی میں نشست کیلئے نامزد کرنے پر شکریہ ادا کرتے ہوئے کہا کہ پسماندہ علاقے کی نمائندگی کو گلگت بلتستان اسمبلی میں یقینی بنانا قائدین ایم ڈبلیو ایم علامہ راجہ ناصر عباس جعفری، آغا علی رضوی ، اور دیگر رہنماؤں کا وہ احسان ہے جسے کبھی فراموش نہیں کرسکتے۔
قمراہ کے گلی محلوں سے سینکڑوں مرد و زن مہمانوں کے خیر مقدم کیلئے گھروں سے باہر نکل آئے اور فلک شگاف نعروں کے ساتھ استقبال کیا گیا۔ رکن اسمبلی شیخ اکبر علی رجائی بھی اس دوران کاروان وحدت کے ساتھ تھے جن کی خدمات کے صلے میں اسمبلی میں عوام کی نمایندگی کو عوام نے بھرپور سراہا۔ خواہر ڈاکٹر فاطمہ علی نے خواتین کی طرف سے استقبال میں شرکت کی اور اس عزت افزائی پر شکریہ ادا کیا۔
