وحدت نیوز(سکردو)گلگت بلتستان حلقہ نمبر 3 سے تحریک انصاف کے امیدوار جی بی اسمبلی کے سابق سپیکر حاجی فدا محمد ناشاد نے مجلس وحدت مسلمین جی بی کے صوبائی سیکرٹری جنرل آغا علی رضوی سے ان کی رہائش گاہ پر ملاقات کی۔ملاقات میں ایم ڈبلیو ایم کے مرکزی سیکرٹری سیاسیات سید اسد عباس اور مرکزی رہنما اعجاز بہشتی بھی موجود تھے۔

ملاقات میں باہمی دلچسپی کے امور اور جی بی انتخابات پر بات چیت کی گئی۔ آغا علی رضوی نے کہا کہ ایم ڈبلیو ایم اور تحریک انصاف جی بی انتخاب میں اتحادی ہیں ۔ مذکورہ نشست پر آپ تحریک انصاف کے امیدوار ہیں لہذا آپ کی جیت میں کردار ادا کریں گے۔تحریک انصاف نے گلگت بلتستان کو آئینی صوبہ بنانے کا اعلان کر کے عوام کے دل جیت لیے ہیں۔

 تحریک انصاف کی جیت صوبے کو آئینی حقوق دینےکی ضمانت ہے۔عوام سے کیے گئے وعدے ہر حال پورے کیے جانے چاہئے ۔فدا محمد ناشاد نے حمایت کایقین دلانے پر مجلس وحدت مسلمین کے رہنماؤں کا شکریہ ادا کیا۔