وحدت نیوز (کراچی) شہید مظفر کرمانی اور شہید نظیر عباس کی 21ویں برسی کے موقع پر مجلس وحدت مسلمین کراچی ڈویژن کے سیکریٹری جنرل علامہ شیخ محمد صادق جعفری نے شہید کے رفقاء کے ہمراہ ان کے مرقد پر حاضری دی اور ان کی بلندی درجات کے لئے فاتحہ خوانی کی۔ اس موقع پر علامہ صادق جعفری نے شہید کی شخصیت پر روشنی ڈالتے ہوئے کہا کہ شہید مظفر کرمانی نے پاکستان میں اللہ کی آواز کو بلند کیا، وہ پاکستان میں مظلومین جہاں کے مدافع تھے، شہید نے عزاداری کے فروغ کے لئے بے پناہ خدمات انجام دیں۔

علامہ صادق جعفری نے مزید کہا کہ شہید مظفر کرمانی قدس کی آزادی کیلئے کراچی میں آواز بلند کرنے والے اولین افراد میں سے تھے۔ ان کا کہنا تھا کہ خدا شہداء کے نام کو ہمیشہ زندہ رکھتا ہے، خدا کے ہاں شہید کا مرتبہ اس قدر بلند ہوتا ہے کہ وہ آرزو کرتا ہے کہ مجھے پھر سے دنیا میں بھیجا جائے اور میں پھر سے شہید ہوجاؤں۔ اس موقع پر منقبت خواں بیرسٹر مرتضیٰ اور اعجاز علی لاڑک نے نوحہ خوانی کی۔ اس موقع پر شہید مظفر کرمانی کے بیٹے محمد تصدق اور شہید نظیر عباس کے بھائی بھی موجود تھے۔