وحدت نیوز(کراچی)مجلس وحدت مسلمین سندھ کے صوبائی سیکرٹری سیاسیات سید علی حسین نقوی نے '' تعمیر کراچی تعمیر پاکستان'' کل جماعتی کانفرنس کے کامیاب انعقاد پر اے پی سی میں شریک تمام جماعتوں اور رہنماؤں کا شکریہ ادا کیا ہے۔ انہوں نے کہا کہ آل پارٹیز کانفرنس میں سیاسی و سماجی رہنماؤں کی شرکت سے یہ واضح ہوگیا ہے کہ کراچی کے عوام کی مشکلات کے ازالے کے لئے تمام سیاسی و مذہبی جماعتیں ایک پیج پر ہیں۔ انہوں نے کہا کہ عروس البلاد کراچی کا حُسن بحال کرنے کے لئے ہم سب کو مل کر جدوجہد کرنی ہوگی، کراچی شہر کی خوشحالی پورے ملک کے معاشی استحکام کی ضامن ہے۔
انہوں نے پاکستان تحریک انصاف کے رکن سندھ اسمبلی بلال غفار، متحدہ قومی موومنٹ کے رکن سندھ اسمبلی عباس جعفری، محفوظ یار خان ایڈوکیٹ، عارف شاہ، قمر عباس رضوی، پاک سرزمین پارٹی کے رہنما سید حفیظ الدین، جعفرالحسن، گرینڈ ڈیموکریٹک الائنس کے رہنما سردار عبدالرحیم، عوامی نیشنل پارٹی کے رہنما یونس بونیری، مسلم لیگ (ق) کے رہنما طارق حسن، جے یو آئی (ف) کے رہنما مولانا عمر صادق، آل کراچی تاجر اتحاد کے چیئرمین عتیق میر، پاکستان عوامی تحریک کے رہنما کامران اقبال، آل پاکستان سنی تحریک کے رہنما مطلوب اعوان قادری، پاکستان فلاح پارٹی، انٹرنیشنل لائرز فورم، عوامی ورکرز پارٹی، ایم کیو ایم تنظیم بحالی کمیٹی، مسلم لیگ فنکشنل سمیت سول سوسائٹی کے دیگر رہنماؤں سے اظہار تشکر کرتے ہوئے کراچی کی تعمیر و ترقی کے لئے مستقبل میں بھی مشترکہ جدوجہد کی امید ظاہر کی ہے۔
