وحدت نیوز(اسلام آباد) سربراہ مجلس وحدت مسلمین پاکستان سینیٹر علامہ راجہ ناصرعباس جعفری نے اپنے ایکس اکاونٹ سے جاری ٹوئٹ میں کہا ہے کہ میں خیبر پختونخواہ اور بلوچستان میں دہشتگردی کی اچانک بڑھتی ہوئی لہر کی شدید مذمت کرتاہوں۔ اکوڑہ خٹک میں ہونے والے خودکش حملے کے بعد آج بنوں میں دہشتگردوں نے بیس سے زائد معصوم شہریوں کو شہید کر کے بربریت کی انتہا کر دی ہے۔ یہ افسوسناک واقعات ہر پاکستانی کے دل کو غمزدہ کر رہے ہیں اور ایک لمحہ فکریہ ہیں۔انہی انتہاپسند خارجی دہشتگردوں نے ضلع کرم کے مظلوم عوام کو بھی کئی مہینوں سے محصور رکھا ہوا ہے، اور افسوس کے ساتھ کہنا پڑتا ہے کہ حکومت اور سیکیورٹی ادارے بظاہر ان کے سامنے بے بس نظر آ رہے ہیں۔ ماہِ صیام کے مقدس مہینے میں ضلع کرم میں محصور اور قیدیوں کی طرح زندگی گزارنے والے ہمارے مسلمان بھائیوں سے اپیل ہے کہ دشمن کی سازشوں کو سمجھیں اور کسی بھی صورت میں آپس کی اتحاد و وحدت کو نقصان پہنچانے والوں کے ناپاک عزائم کو کامیاب نہ ہونے دیں۔
ہمیں اپنے صفوں میں اتفاق، بھائی چارے اور صبر و استقامت کو برقرار رکھنا ہوگا تاکہ دشمن کی ہر چال کو ناکام بنایا جا سکے۔دہشتگردی کے یہ بزدلانہ حملے نہ صرف ملک کے امن و استحکام پر ضرب ہیں بلکہ معصوم جانوں کے ضیاع کا باعث بھی بن رہے ہیں۔ حکومت اور سیکیورٹی اداروں کو فوری طور پر دہشتگرد عناصر کے خلاف مؤثر اور سخت کارروائی کرنی چاہیے تاکہ ملک میں امن و امان کی صورتحال بہتر بنائی جا سکے۔ہم شہداء کے لواحقین کے غم میں برابر کے شریک ہیں اور دعا گو ہیں کہ اللہ تعالیٰ ان شہداء کو جنت الفردوس میں جگہ عطا فرمائے اور زخمیوں کو جلد صحتیابی نصیب کرے۔ پوری قوم کو متحد ہو کر اس عفریت کا مقابلہ کرنا ہوگا تاکہ پاکستان میں پائیدار امن قائم ہو سکے۔
