وحدت نیوز (کوئٹہ) مجلس وحدت مسلمین کوئٹہ ڈویژن کے میڈیا سیل سے جاری بیان میں ڈویژنل سیکریٹری جنرل سید عباس موسوی نے کہاہے کہ حکمرانوں نے عوام کو مایوسی کے سوا کچھ نہیں دیا، جس کی وجہ سے آج پورا ملک بدامنی اور انتشار کا شکار ہے۔ ملک اربوں ڈالر کا مقروض ہو چکا ہے۔ ملکی ترقی کے راستے میں عوام نہیں حکمرانوں کی نیت اور کردار رکاوٹ ہے۔ یہاں قانون امیر کے لئے الگ ہے اور غریب کے لئے الگ ہے۔ کرپشن اور حکمرانوں کی لوٹ مار نے ملک کے معیشت کو کھو کھلا کردیا ہے۔ بدعنوانی اور کرپشن ملک کی ترقی اور خوشحالی کی راہ میں حائل بڑی رکاوٹ ہے۔ بدعنوانی سے ناانصافی، غربت اور میرٹ کی خلاف ورزیاں ہوتی ہیں اور مستحق کو اس کا حق نہیں ملتا۔ کرپشن ملک کو کینسر کی طرح متاثر کر رہی ہے، ملک میں تمام خرابیوں کا بنیادی سبب مخلص اور دیانت دار قومی قیادت کا فقدان ہے۔ سیاست دانوں اور حکمرانوں نے کبھی بھی اپنے ذات سے باہر نکل کر ملک و قوم کے مفادات کو فوقیت نہیں دی۔ ان کی تمام سرگرمیاں اقتدار کے حصول اورکرپشن کے ذریعے دولت کمانا ہے۔

اُنھوں نے سیاست کو سماجی خدمت کا ذریعہ بنانے کی بجائے ذاتی مفادات کے حصول کے لئے استعمال کیا اور عوامی مسائل سے لاتعلق رہے۔ یہی وجہ ہے کہ 68 سال گزرنے کے باوجود عوامی مسائل جوں کے توں ہیں۔ عوام جمہوریت میں گڈگورننس دیکھنا چاہتے ہیں۔ مگر المیہ یہ ہے کہ ہمارے حکمران یہ سمجھتے ہیں کہ وہ حکومت میں آنے کے بعد سیاہ وسفید کے مالک ہو گئے ہیں اور وہ کسی کے سامنے جواب دہ نہیں ہیں۔ دہشت گردی کرپشن اور بیڈگورننس کے خاتمے سے لے کر علاقائی سیاست تک ہماری قیادت نے بہترکارکردگی کا مظاہرہ نہیں کیا ہے۔ پاکستان کے عوام یہ سمجھتے ہیں کہ دہشت گردی کے ساتھ ساتھ کرپشن کا خاتمہ ہونا چاہئے کیونکہ کرپشن ختم کئے بغیر نہ جمہوریت مضبوط ہو سکتی ہے اور نہ ہی پاکستان داخلی طور پر مضبوط ہو سکتا ہے۔

وحدت نیوز (ملتان) جنوبی پنجاب کو مجلس وحدت مسلمین کے علیحدہ تنظیمی صوبے کا درجہ ملنے کی ایم ڈبلیوایم کی شوریٰ عالی کی منظوری کے بعد مجلس وحدت مسلمین صوبہ جنوبی پنجاب کا پہلا  اجلاس صوبائی شوریٰ  (جنوبی پنجاب) مورخہ یکم مئی 2016 بمقام: جامع مسجد الحسین نیو ملتان(گلشن مارکیٹ) میں منعقد ہو گاجس میں خصوصی شرکت سربراہ مجلس وحدت مسلمین علامہ راجہ ناصر عباس جعفری کریں گے، جنوبی پنجاب صوبے میں شامل ضلع ملتان،خانیوال،وہاڑی،لودھراں،بہاولپور،بھاولنگر، رحیم یارخان،ڈیرہ غازیخان،راجن پور،لیہ،مظفرگڑھ،علی پور،میانوالی اور بھکرکے سیکریٹری اور ڈپٹی سیکریٹری جنرل صاحبان نئے صوبائی سیکریٹری جنرل جنوبی پنجاب کا انتخاب خفیہ رائے شماری کے ذریعے عمل میں لائیں گے، کامیاب ہونے والے صوبائی سیکریٹری جنرل سے مرکزی سیکریٹری جنرل علامہ راجہ ناصرعباس جعفری آئندہ تین سال کیلئے ان کے عہدے کا حلف لیں گے۔

وحدت نیوز (ملتان) مجلس وحدت مسلمین جنوبی پنجاب کے میڈیا کوارڈینیٹر ثقلین نقوی نے کہا ہے کہ حکومت کی جانب سے آئی سی آئی جے کے بیان کو غلط رنگ دیا گیا، بعدازاں آئی سی آئی کے سربراہ کے وضاحتی بیان کے بعد حکومتی ''جھوٹوں'' کی قلعی کھل گئی ہے۔ لیکن شریف خاندان اور حکومت کی جانب سے کسی قسم کی شرمندگی کا کوئی اظہار نہیں کیا گیا۔ ملتان میں ہونے والے تنظیمی کنونشن کی انتظامی کمیٹی کے اجلاس کے بعد جاری بیان میں ثقلین نقوی کا کہنا تھا کہ جنوبی پنجاب کے 14اضلاع پر مشتمل نئے صوبے کا پہلا تنظیمی کنونشن یکم مئی کو (جامع مسجد الحسین )ملتان میں ہوگا، جس کی تمام تر تیاریاں مکمل کرلی گئیں ہیں۔ کنونشن میں مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری خصوصی شرکت کریں گے۔ اس کے علاوہ مرکزی کابینہ کے دیگر اراکین سید مہدی عابدی، یعقوب حسینی، علامہ عبدالخالق اسدی اور سنٹرل پنجاب کے سیکرٹری جنرل علامہ اصغر عسکری شرکت کریں گے۔ کنونشن میں جنوبی پنجاب کے اضلاع کی جانب سے نئے سیکرٹری جنرل کا انتخاب کیا جائے گا اور نئے سیکرٹری جنرل کا اعلان شام چار بجے کیا جائے گا۔ جس کے بعد مجلس وحدت مسلمین کے سربراہ علامہ راجہ ناصر عباس جعفری دیگر رہنمائوں کے ہمراہ پریس کانفرنس سے خطاب کریں گے۔

وحدت نیوز (سکردو) مجلس وحدت مسلمین پاکستان بلتستان ڈویژن کے سیکرٹری جنرل علامہ آغا علی رضوی نے اپنے ایک بیان میں کہا ہے کہ صوبائی اور وفاقی حکومت گلگت بلتستان کے عوام کی زمینیں ہتھیانے کا سلسلہ بند کرے، گلگت بلتستان کو دوسرا فلسطین بنایا جا رہا ہے جسے کسی صورت کامیاب ہونے نہیں دیں گے۔ گلگت بلتستان کو اس خطے کے عوام نے آزاد کرایا ہے، اس کی آزادی میں کسی بیرونی قوت کا عمل دخل نہیں ہے اور اسلامی نظریئے کی وجہ سے اجداد نے اس خطے کو پاکستان کی جھولی میں ڈال دیا ہے تاکہ یہ خطے دشمن کے شر سے محفوظ رہے اور خطہ عوام کا رہے۔ صوبائی اور وفاقی حکومت خطے میں جس انداز میں زمینوں کی بندر بانٹ میں مصروف ہے، وہ انسانی حقوق کی پامالی کی بدترین مثال ہے۔ جب حقوق مانگے جاتے ہیں تو اس خطے کو متنازعہ قرار دیا جاتا ہے اور زمینوں پر قابض ہوتے وقت انہیں یہ خطہ متنازعہ نظر نہیں آتا۔ انہوں نے کہا کہ چھومک اسکردو میں عوام کی زمینوں کو ہتھیانے کے لیے ایک طویل عرصے سے جدوجہد جاری ہے، حکومت عوام کو گھروں سے نکال باہر کرنے کی کوشش نہ کرے، چھومک اسکردو میں عوام کیساتھ جاری ناانصافی کا سلسلہ بند کیا جائے۔

آغا علی رضوی نے کہا کہ پاکستان آرمی کے سربراہ نے خود احتسابی کا جو عمل شروع کیا ہوا ہے وہ انتہائی مستحسن اور باعث فخر ہے۔ انہوں نے کہا کہ پاکستان آرمی میں موجود مجرموں کو سزا دے کر عظیم مثال قائم کی گئی ہے۔ گلگت بلتستان میں ستر سالوں سے خطے کو پاکستان کا آئینہ حصہ بنانے کی راہ میں رکاوٹ ڈالنے اور خطے کی زمینوں پر ناجائز قبضہ کرنے والوں کے حوالے سے آرمی چیف کی توجہ کو مبذول کرنے کیلئے باقاعدہ خط لکھا جائے گا، کیونکہ گلگت بلتستان کو آئینی حصہ بنانے میں وفاقی حکومت تیار نہیں جو کہ وزیراعظم پاکستان کے حریت کانفرنس کو لکھے گئے خط سے واضح ہے۔ دوسری طرف سیاسی جماعتوں نے ستر سالوں سے اس خطے کو دھوکے کے سواء کچھ نہیں دیا۔ موجودہ پاکستان آرمی کے سربراہ کا کردار پاکستان کی حفاظت اور استحکام کے ساتھ ساتھ گلگت بلتستان کی ترقی و استحکام کے لیے اہم ثابت ہوسکتا ہے۔

وحدت نیوز(کوئٹہ ) مجلس وحدت مسلمین کوئٹہ کے میڈیا سیل سے جاری شدہ بیان میں ڈویژنل ڈپٹی سیکریٹری جنرل علامہ شیخ ولایت جعفری نے ملکی استحکام میں شہریوں کا تذکرہ کرتے ہوئے کہاکہ کسی بھی ملک کی تعمیر و ترقی اور عظمت و استحکام میں اس ملک کے افراد ریڑھ کے ہڈی کی حیثیت رکھتے ہیں اور کسی بھی قوم کو دنیا کی صف اول میں لا کھڑا کرنے اور عزت و شرف کی قبا پہنانے میں اس قوم کے افراد نمایا کردار ادا کرتے ہیں ۔ ماضی کا جائزہ لیا جائے تو تاریخ میں وہی قومیں کامیاب رہے ہیں جن کے افراد میں محنت و جدوجہد کا جذبہ،فہم و دانائی اور سمجھداری و شعور ہوتی ہیں ۔جو افراد ان صفات کے مالک ہوتے ہیں وہی ترقی کی دوڈ میں پیش پیش نظر آتے ہیں۔

ان کا کہناتھا کہ اگر ہم چاہتے ہیں کہ ہمارا شمار دنیا کے کامیاب قوموں میں ہو تو ہمیں بھی ان اوصاف کواپنانے ہونگے۔ اقوام کی عظمت اور ذلت کا دارومدار ان کے افراد کے رویوں پر ہوتا ہے کیونکہ کسی قوم کو کامیابیوں کی سڑھیوں چھڑنے اور اوج ثریا سے تنزلی گھاٹیوں میں گرانے میں بھی افراد ہی کلیدی کردار ادا کرتے ہیں ، اگر افراد لا شعور اور محنت و جدوجہد، فہم و دانائی سے محروم ہو تو پستی ہی قوم کی مقدر بن جاتی ہے ، ہمارے ملک میں بھی کچھ ایسا ہی مسئلہ ہے ۔

انہوں نے مزید کہاکہ ہمیں اپنے ملک میں غیر سنجیدگی و عدم فہم و شعور کے مظاہر زندگی کے ہر موڑ پر نظر آتے ہیں اور اس حوالے سے ہمارا نوجوان طبقہ پیش پیش دکھائی دیتا ہے، حالانکہ نوجوان طبقہ کسی بھی قوم کا انتہائی قیمتی سرمایہ ہوتا ہے۔ نوجوانوں میں قوموں کو ترقی کی راہ پر ڈالنے کا جذبہ اور اپنے ملک کا نام روشن کرنے کی امنگ ہوتی ہے۔ ان کی قابلیت و صلاحیتیں انہیں حالات کا رخ موڑ دینے کا حوصلہ عطا کرتی ہیں۔ نوجوان طبقے کی صلاحیتوں کو اگر مثبت انداز میں کام میں لایا جائے تو ترقی و کامیابی قوموں کے قدم چومتی ہیں لیکن اگر قوموں کے اس سرمائے کو منفی سرگرمیوں میں استعمال کیا جائے تو یہ صلاحیتیں قوموں کے لیے وبال بن جایا کرتی ہیں۔

وحدت نیوز (نوابشاہ) مجلس وحدت مسلمین بلوچستان کے سیکریٹری علامہ مقصود علی ڈومکی نے قائد عوام انجینئرنگ یونیوورسٹی نوابشاہ کا دورہ کیا، اس موقع پراصغریہ اسٹوڈنٹس آرگنائزیشن پاکستان کی جانب سے یوم علی ؑ کی مناسبت سے منعقدہ تقریب سے خطاب کیا، اور یونیورسٹی کے طلبہ سے ملے۔ اس موقع پرتقریب میں مجلس وحدت مسلمین سندہ کے صوبائی سیکریٹری جنر ل علامہ مختار احمد امامی بھی موجود تھے۔

تقریب سے خطاب کرتے ہوئے علامہ مقصود علی ڈومکی نے کہاہے کہ عادلانہ انسانی معاشرے کا قیام انبیائے الٰہی ؑ کا بنیادی ھدف رہا، انبیاء کے حقیقی وارث وہ ہیں جو اھداف انبیاء ؑ کی تکمیل کو اپنا نصب العین قرار دیں۔ صراط مستقیم انبیائے کرام ؑ اور آئمہ ھدیٰ ؑ کے راستے کا نام جو کامیابی کا واحد راستہ اور نجات کی ضمانت ہے۔

انہوں نے کہا کہ نظام ولایت و امامت ، اھداف انبیاء ؑ کے تسلسل کا نام ہے، جو عصر حاضر کے تمام مسائل کا حل ہے۔ مغربی جمہوریت کے پاس انسان کے کسی درد کی دوا نہیں۔ایسے میں دینی جمہوریت کے علمبردار آگے بڑہ کر بشریت کی رہنمائی کریں۔دین و سیاست کی جدائی اور سیکولرازم سے متعلق علامہ اقبالؒ نے کہا تھا جدا ہو دین سیاست سے تو رہ جاتی ہے چنگیزی۔

انہوں نے کہا کہ ملک سے کرپشن کا خاتمہ ضروری ہے ، جبکہ ملکی سیاسی جماعتوں کو چاہئے کہ وہ ملک و قوم کو دھشت گردی اور کرپشن سے نجات دلائیں۔ کرپشن اور دھشت گردی نے دیمک کی طرح ملکی بنیادوں کو کھوکھلا کردیا ہے۔بے بنیاد مصلحتوں اور مفاد پرستی سے بالاتر ہوکر دھشت گردی کے خلاف ملک گیر آپریشن کامیاب بنایا جائے۔