وحدت نیوز(ڈیرہ اسماعیل خان) شہید ایڈدوکیٹ شاہد شیرازی کی نماز جنازہ ادا کردی گئی ، نماز جنازہ میں ایم ڈبلیوایم کے مرکزی رہنمائوں علامہ اعجاز بہشتی، ناصرعباس شیرازی ، نثار فیضی ، ملک اقرارحسین سمیت شہریوں کی بڑی تعداد  نے شرکت کی ،تفصیلات کے مطابق گذشتہ روز عید الفطرکے دن ملتان روڈ پر تکفیری دہشت گردوں کی فائرنگ سے شہید ہونے والے معروف قانون دان شہید شاہد شیرازی ایڈووکیٹ کے قتل کے خلاف مجلس وحدت مسلمین کی اپیل پر مکمل شٹڑ ڈائون ہڑتال کی گئی، کاروباری مراکز اور ٹرانسپورٹ بند رہا، جبکہ شہید کے ورثاءاور شہریوں نے جسدخاکی کے ہمراہ بنوں روڈ کو بلاک کرکے طویل دھرنا دیا، مجلس وحدت مسلمین کے سربراہ علامہ راجہ ناصرعباس جعفری نے بھوک ہڑتالی کیمپ سے شرکائے دھرنا سے ٹیلیفونک خطاب بھی کیا،دوسری جانب ڈیرہ اسماعیل خان کے شہریوں نے روزانہ کی ٹارگٹ کلنگ سے تنگ آکر سات مختلف مقامات پر علامتی دھرنے بھی دیئے جن میں کنیزان زینب ؑ کی شرکت قابل تحسین تھی، شرکاءنے علامہ اعجاز بہشتی کی زیراقتداءنمازظہرین باجماعت دھرنے کے مقام پر ادا کی، بعد ازاں شدید احتجاج کےبعد شہید کے والد کے اعلان پر دھرنا ختم کرکے شہید کی تدفین عمل میں آئی، جبکہ دھرنے کےمشتعل شرکاء کو علمائے کرام نے بڑی منت سماجت کے بعد احتجاج ختم کرنے پر راضی کیا۔

واضح رہے کہ اس سے قبل بھی ڈیرہ اسماعیل خان میں تین وکلاٗ کو شہید کیا جاچکا ہے، جبکہ کئی مومنین بھی ان دہشتگردوں کی بربریت کاشکار ہوگئے ہیں، دہشتگردوں کو مولانا فضل الرحمن کے بھائی کی سرپرستی حاصل ہے ، جبکہ تحریک انصاف کی حکومت یقین دہانی کے باوجود شیعہ نسل کشی روکنے میں ناکام رہی ہے،دوسری جانب ملک بھر میں جاری شیعہ نسل کشی کے خلاف اسلام آباد میں علامہ راجہ ناصر عباس جعفری نے ۵۰ روز سے زائد دن سے بھوک ہڑتال کی ہوئی ہے تاکہ حکمرانوں کی بے حسی کو بے نقاب کیا جاسکے اسکے باوجود نااہل اور ظالم حکمرانوں کے کانوں پر جوں تک نہیں رینگی، لہذا اب اس بھوک ہڑتالی تحریک کو ملک گیر احتجاجی تحریک میں تبدیل کرنے کا وقت آچکا ہے تاکہ ایک بار پھر بلوچستان کے رئیسانی کی حکومت کی طرح وفاقی حکومت کا تحت بھی ہلایا جاسکے۔

وحدت نیوز(اسلام آباد) ملک بھر میں عید الفطر انتہائی جوش و ولولہ سے منائی جارہی ہے، عیدفطر کا آغاز نماز عید سے کیا گیا، شیعیت نیوز کے نمائندگاں کے مطابق ملک بھر میں نماز عید کے خطبات میں دنیا بھر میں جاری امریکی و سعودی دہشتگردی کی مذمت کے ساتھ ساتھ ملک پاکستان میں جاری علامہ راجہ ناصر عباس جعفری کی بھو ک ہڑتال تحریک سے اظہار یکجہتی بھی گیا گیا، علماٗ نےنماز  عید کے خطابات میں کہا کہ علامہ راجہ ناصر عباس جعفری ظلم کے خلاف میدان عمل میں ہیں لہذا عوام کو چاہئے کے اپنے اوپر ہونے والے مظالم کے خلاف اس عالم باعمل کا ساتھ دیں۔

دوسر ی جانب اسلام آباد میں نیشنل پریس کلب کے سامنے جاری احتجاجی بھوک ہڑتال کیمپ میں بھی نماز عید منعقد کی گئی ، نماز عید علامہ اعجاز حسین بہشتی نے پڑھائی،جبکہ اجتماع سے خطاب علامہ حسن ظفر نقوی نے کیا، انہوں نے کہا کہ عید کے بعد حکومت کے خلاف ہماری یہ تحریک زور پکڑے گی، مرحلہ وار احتجاجات تریب دے دیے گئے ہیں جو لانگ مارچ کی صورت اختیار کریں گے، انہوں نے عراق، ترکی ، بنگلہ دیش سمیت مدینہ منورہ میں دہشتگردی کی مذمت کی اور کہا کہ عرب اور طاغوتی طاقتوں کے پالے ہوئے دہشت گرد آج عالم اسلام کے مقامات مقدسہ کونشانہ بنا کر امت مسلمہ کوکھلے عام چیلنج کر رہے ہیں۔اس سے قبل بھی سعودی عرب کے شہروں قطیف اور دمام میں شیعہ مساجد کو دہشت گردی کا نشانہ بنایا گیا۔حرمین شریفین اور ایران و عراق سمیت دنیا بھر میں عالم اسلام کے مقامات مقدسہ مسلمانوں کے لیے عقیدت کے مراکز ہیں۔شعائر اللہ کی تعظیم و دفاع ہم پر واجب ہے۔انہوں نے کہا آل سعود نے اپنے اقتدار کی بقا اور تحفظ کو حرمین شریفین سے نتھی کر کے عالم اسلام کے جذبات کو ہمیشہ مجروع کیاہے۔دنیا کے مسلمانوں پر یہ حقیقت آشکار ہو چکی ہے کہ حرمین شریفن اور خادمین دونوں مختلف ہیں۔شام ،یمن، فلسطین، بحرین سمیت دنیا کے جن جن اسلامی ممالک میں نفرت و خونریزی کی آگ بھڑکی ہوئی ہے اس میں عرب ممالک ملوث رہے ہیں۔طالبان، داعش اور النصرہ سمیت عرب وصیہونی فنڈنگ پر پلنے والی دہشت گرد قوتیں اب مختلف گروہوں میں منقسم ہوکر سعودی مفادات کے خلاف سرگرم ہونے کے لیے پر تول رہی ہیں۔دوسرے مسلم ممالک کے خلاف لگائی ہوئی یہ آگ اب سعودی عرب کے دامن سے لپٹنے کے لیے بے قرار ہے۔ اگر عالم اسلام نے ان مذموم عناصر کے خلاف مشترکہ لائحہ عمل طے نہ کیا تو مسلم ممالک مزید انتشار اور تباہی کا شکار ہوں گے۔انہوں نے کہا کہ مسلم ممالک دہشت گرد جماعتوں کی لے پالکی ختم کر کے ان کے خلاف فیصلہ کن آپریشن کریں تاکہ دنیا سے دہشت و بربریت کا خاتمہ ہو۔

اس موقع پر نمازیوں سے ملاقات میں علامہ ناصر عباس جعفری نے بھی مدینہ منورہ اور قطیف سمیت بغداد دھماکوں میں 400 سے زائد انسانی جانوں کے ضیاع کو المناک سانحہ قرار دیا ہے۔انہوں نے کہا کہ مسلم ممالک میں تباہی کے ذمہ دار یہود و نصاری اور مسلمانوں میں موجود ان کے ٹکرون پر پلنے والے آلہ کار ہیں۔عراق میں داعش کے خلاف آپریشن مزید موثر اور تیز کرنے کی ضرورت ہے تاکہ امن و سکون قائم ہو سکے، انہوں نے کہاکہ ملک کا وزیر اعظم ایک ماہ سے باہر بیٹھا آرام کررہا ہے اور عوام سڑکوں پر مر رہے ہیں ایسے بے حس حکمرانوں سے نجات حاصل کرنا اب ضروری ہوگیا ہے۔

وحدت نیوز(اسلام آباد) مجلس وحدت مسلمین پاکستان کے مرکزی ترجمان علامہ مختارامامی نے ڈیرہ اسماعیل خان میں شیعہ ٹارکٹ کلنگ کی نا رکنے والی کاروئیوں بالخصوص معروف وکیل اور ایم ڈبلیوایم کے ضلعی کونسل کے رکن شہید ایڈووکیٹ شاہد شیرازی کے بہیمانہ قتل کے خلاف کل شہر بھر میں مکمل شٹر ڈائون ہڑتال کا اعلان کردیا ہے ، میڈیاکو جاری بیان میں انہوں نے کہاکہ ڈیرہ اسماعیل خان میں تواترکے ساتھ جاری ٹارگٹ کلنگ کے خلاف کل   تاجر کاروبارمراکزاور ٹرانسپوٹرز ٹرانسپورٹ بند رکھیں، شہید ایڈووکیٹ شاہد شیرازی کی نماز جنازہ کل بعد ظہر کوٹلی امام حسین ؑ میں ادا کی جائے گی، مجلس وحدت مسلمین کی اعلیٰ قیادت نماز جنازہ میں خصوصی شرکت کرے گی۔

وحدت نیوز(اسلا آباد) مجلس وحدت مسلمین کے سربراہ علامہ راجہ ناصر عباس جعفری نے ڈیرہ اسماعیل خان میں ایڈوکیٹ شاہد شیرازی کی تکفیری دہشت گردوں کے ہاتھوں  ٹارگٹ کلنگ کی پرزورالفاظ میں مذمت کرتے ہوئے میڈیا کو جاری  بیان میں کہا ہے کہ روز عید الفطر دہشتگردوں نے ملک و قوم کے معمار کو نشانہ بنایا،ڈیرہ اسماعیل خان دہشتگردی کے واقعات کا سلسلہ بدستور جاری ہے ،حکومت  عدلیہ اور قانون نافذ کرنے والے آخر کب حرکت میں آئیں گے،شاہد شیرازی ایڈوکیٹ آئی ایس او کے رکن نظارت اور ایم ڈبلیو ایم کے ہمدرد تھے،دہشتگردی کے واقعات خیبرپختو نخواہ حکومت کی سراسر ناکامی ہیں،ڈیرہ اسماعیل خان میں دہشتگرد آزاد گھوم رہے ہیں، عوام کی جان و مال کا کوئی محافظ نہیں، جنگل کا قانون ہے،ڈیرہ اسماعیل خان دوماہ میں 3 وکلا دو اساتذہ اور ایک تاجر کو دہشتگردی کا نشانہ بنایا گیا، وفاقی و صوبائی حکومت ،سیکورٹی ادارے دہشتگردی کےسامنے خاموش تماشائی کا کردار ادا کر رہے ہیں ،ملک دشمن دہشتگرد نیشنل ایکشن پلان کی دھجیاں اڑا رہے ہیں ،عید کےدن قوم کے معمارشاہد شیرازی ایڈووکیٹ کابہیمانہ قتل نیشنل ایکشن پلان پر فاتحہ پڑھ دینے کیلئےکافی ہے،ڈیرہ اسماعیل خان میں ایمرجنسی لگا کر شہر کو فوج کے حوالے کیا جائے، دہشتگردوں کے خلاف فوجی آپریشن کیا جائے،دہشتگرد پروفیشنلز کی ٹارگٹ کلنگ کر کے مسلسل قومی نقصان کر رہے ہیں۔

وحدت نیوز(اسلام آباد)عید سعید الفطرکے روز جب دنیا بھر میں مسلمان اپنے اہل وعیال اور عزیز واقارب کے ہمراہ خوشیاں منانے میں مصروف ہیں مجلس وحدت مسلمین پاکستان کے سربراہ علامہ راجہ ناصرعباس جعفری نے اپنی عید کی خوشیاں قوم کے شہداءاور ان کے اہل خانہ کے نام کردی ،علامہ راجہ ناصرعباس جعفری نے ریاستی جبر وتشدد، شیعہ نسل کشی پرحکمرانوں کی مجرمانہ خاموشی اور انصاف کے حصول کے لئےگذشتہ پونے دوماہ سے جاری بھوک ہڑتالی کیمپ میں عید الفطر کا مصروف دن گذارا، نماز عیدکی ادائیگی بھوک ہڑتالی کیمپ میں مجلس وحدت مسلمین کے مرکزی رہنماعلامہ اعجاز بہشتی کی زیر اقتداءادا کی گئی جس میں ایم ڈبلیوایم کے سربراہ راجہ ناصرعباس جعفری ،علامہ حسن ظفر نقوی ، علامہ عبدالخالق اسدی، علامہ علی شیر انصاری سمیت دیگر علمائے کرام ، تنظیمی ذمہ داران سمیت راولپنڈی اسلام آباد کے شہریوں کی بڑی تعداد شریک تھی، جنہوں نے علامہ راجہ ناصرعباس جعفری کی مظلوموں کے حقوق کے لئے جاری پر امن جدوجہد سے اظہار یکجہتی کرتے ہوئے بازوئوں پر سیاہ پٹیاں باندھی ہوئی تھیں ، نماز عید کی ادائیگی کے بعد علامہ راجہ ناصرعباس جعفری نے نمازیوں سے عید ملی اور انہیں مبارک باد دی، مختلف طبقہ ہائے زندگی سے تعلق رکھنے والے افراد نے عید کےپرمسرت موقع پر علامہ راجہ ناصرعباس جعفری کو پھولوں کے گلدستے اور تحائف بھی پیش کیئے، واضح رہے کہ مجلس وحدت مسلمین ضلع سکھر کا ایک اعلیٰ سطحی وفد سیکریٹری جنرل چوہدری اظہر حسن کی زیرقیادت خصوصی طور پرعلامہ راجہ ناصرعباس جعفری کے ہمراہ عید منانے بھوک ہڑتالی کیمپ پہنچا تھا۔

وحدت نیوز(اسلام آباد) وحدت یوتھ پاکستان کے مرکزی سیکریٹری ڈاکٹر محمد یونس حیدری نے جوانوں کے نام عید الفطر کے موقع پر تہنیتی پیغام میں کہا ہے کہ  عید سعید فطر کو نہایت سادگی اور مستضعفیں جہاں خاص طور پر وطن عزیز پاکستان کی مظلوم اور ستم دیدہ عوام بطور اخص شہداء کے خانوادوں سے اظہار یکجہتی کے طور پر منائیں. عید کی نمازوں میں شرکت،سکیورٹی کا مناسب اہتمام،شہداء کے گھروں یا ان کی قبور پر  اظہار یکجہتی کے لئے حاضری کو یقینی بنائیں، بازؤں پر سیاہ پٹیاں باندھ کر آپ کی مختلف عید کے اجتماعات میں شرکت اس بات کی دلیل ہو گی کہ آپ نے اپنے شہداء کو فراموش نہیں کیا ہے.  درحقیقت عید کو اس انداز سے منانا مظلوموں کی حمایت اور ان کے حقوق کے لئے جدوجہد کی ایک کڑی ہے. خوشی کا دن ہو یا غم کا ہم نے میدان میں حاضر رہنا ہے. ہم نے ناصر ملت قائد وحدت علامہ راجہ ناصر عباس جعفری حفظ اللہ اور ان کے باوفا ساتھیوں کی سرپرستی میں علامہ اقبال اور قائد اعظم کے گمشدہ پاکستان کی تلاش کو ایک عوامی تحریک اور عوامی مطالبے میں بدلنا ہے جس کا آغاز یو چکا ہے اور انشاء اللہ عید سعید فطر کے دن اس تحریک کو ایک نئی جہت ملے گی. اللہ تعالی آپ تمام دوستوں کا حافظ و ناصر ہو اور امام عصر عج کی تائید اور نصرت شامل حال ہو۔