وحدت نیوز (آرٹیکل)  پاکستان مسلسل امتحانات سے گزر رہا ہے، اس سے پہلے2012 سے2015تک کے عرصے میں بھی پاکستان کا نام ایف اے ٹی ایف واچ لسٹ میں موجود تھا۔ اس لسٹ میں شامل ہونے سے پاکستان کو عالمی امداد کے حصول، قرضوں اور پاکستان میں بیرونی سرمایہ کاری کے سلسلے میں سخت مشکلات کا سامنا کرنا پڑتا ہے۔ایف اے ٹی ایف سےمراد فنانشل ایکشن ٹاسک فورس ہے۔ اس ٹاسک فورس میں خلیج تعاون کونسل اور یورپی کمیشن سمیت137راکین شامل ہیں۔  پاکستان جیسے ترقی پذیر ملک کی معیشت پر  اس ٹاسک فورس کی پابندیوں سے سخت منفی اثر پڑتا ہے۔

پاکستان کا جرم دہشت گردوں کی مالی معاونت کرنا بتایا جاتا ہے،فروری  2018میں پاکستان کو موثر اقدامات کرنے کے لئے تین ماہ کی مہلت دی گئی تھی تاہم پاکستان اس سلسلے میں ٹاسک فورس کو مطمئن نہیں کر سکا اور بالاخر اس کا نام گرے لسٹ میں شامل کردیا گیا جس کے بعد بلیک لسٹ میں شامل کئے جانے کے امکانات بڑھ گئے ہیں۔ ماہرین کے مطابق پاکستان کو واچ لسٹ پر ڈالنے سے جب بھی کوئی پاکستانی بینک، دنیا میں کسی پاکستانی کے لئے کوئی رقم منتقل کرنا چاہے گا تو   تمام مطلوبہ معلومات فراہم کرنے کے باوجود اس سےکسی تھانے یا  ایئر پورٹ پر پوچھے جانے والے سوالات اب بینکوں میں بھی پوچھے جائیں گے۔

اسی طرح  اب  پاکستان کے لئے عالمی مارکیٹ تک  رسائی  اور تجارت کئی گنا زیادہ مشکل ہو جائے گی اس کے ساتھ ساتھ  ایل سی ،، جو کہ  لیٹر آف کریڈٹ ہے اس کا   اوپن کروانا بھی آسان نہیں رہے گا ،باہر سے مال منگوانا یا باہر کو مال بھیجنا یہ سب نیز کہیں سےبھی  قرضہ لینا اب جوئے شیر لانے کے مترادف ہوگا۔ یعنی ہمارے ساتھ بھی  ایتھوپیا ،ایران ، عراق ،شمالی کوریا ،  شام  اور یمن  جیسا برتاو کیا جائے گا۔ اے ٹی ایف کا یہ اجلاس پیرس میں ہوا ، اگرچہ اس میں نگران وزیر خزانہ ڈاکٹر شمشاد اختر نے اپنی ٹیم کے ذریعے عالمی برادری کو منی لانڈرنگ، دہشت گرد تنظیموں اور دہشت گردوں کی مالی معاونت کو روکنے کے اقدام سے آگاہ تو کیا لیکن شایدنا تجربہ کار ٹیم کے باعث وہ کسی کو بھی مطمئن نہ کر سکیں۔

فنانشل ایکشن ٹاسک فورس کے اجلاس میں امریکہ، سعودی عرب ،برطانیہ، جرمنی اور فرانس کی کوششوں، حمایت اور ووٹوں سے پاکستان کا نام گرے لسٹ میں ڈالا گیا۔گرے لسٹ میں پاکستان کا نام ڈالے جانے کی ایک اہم وجہ حافظ سعید کے خلاف کسی تادیبی کارروائی کا نہ ہونا بھی ہے۔ پاکستان نے حافظ سعید کی تنظیم کو نام بدل کر ایک اور نام سے الیکشن میں حصہ لینے کی اجازات بھی دے رکھی ہے، ایف اے ٹی ایف کا اگلا اجلاس ستمبر۲۰۱۸ میں ہوگا ، اب دیکھنا یہ ہے کہ آیا پاکستان اس مہلت سے فائدہ اٹھاتے ہوئے دہشت گرد تنظیموں اور گروہوں پر آہنی ہاتھ ڈالے گا اور ان سے سختی کے ساتھ نمٹے گا یا پھر پاکستان ایسا کرنے میں ناکام رہے گا اور اس کا نام بلیک لسٹ میں ڈال دیا جائے گا۔

یاد رہے کہ اس وقت پاکستان پر دہشت گردوں کی حمایت کو رکوانے کے لئے دباو ڈالنے والے ممالک خود ہی دہشت گرد ٹولوں کے اصلی موجد ہیں اوران کی ناقص پالیسیوں کی وجہ سے خود پاکستان ایک عرصے سے دہشت گردی کا شکار ہے۔ دہشت گردی کو فروغ دینے والے اصلی ممالک اب  اپنی نئی حکمت عملی کے تحت  اور بھارت سے تعلقات کو مزید فروغ دینے کے لئے  پاکستان پر خواہ مخواہ کا دباو ڈال رہے ہیں۔ اس وقت بھارتی میڈیا پاکستان کا نام گرے لسٹ میں ڈالنے پر بغلیں بجا رہا ہے۔ لہذا پاکستان کو بھی چاہیے کہ وہ عالمی برادری کے مطالبات کو سنجیدگی سے لے اور بین الاقوامی فورمز پر  لائق ، سنجیدہ اور تجربہ کار افراد کے ساتھ اپنی  ترجمانی کرے۔

تحریر۔۔۔نذر حافی

This email address is being protected from spambots. You need JavaScript enabled to view it.

وحدت نیوز (پاراچنار) مجلس وحدت مسلمین کے نامزد امیدوار برائے قومی اسمبلی حلقہ  این اے 46کرم ایجنسی , پاراچنار جناب شبیر حسین ساجدی کا حسین آباد کڑمان کا دورہ، شہید قائد علامہ عارف حسین الحسینیؒ کے رفیق  اور دیرینہ ساتھی سابق سنیٹر علامہ محمد جواد ہادی نے ایم ڈبلیو ایم کا نامزد کردہ امیدوار جناب شبیر حسین ساجدی کا استقبال کیااور اہلیان حسین اباد نے بھی شبیر ساجدی کا پرتپاک استقبال کیا اور پھولوں کے ہار پہنائے۔شرکاء سے شبیر ساجدی کا خطاب اور ایم ڈبلیو ایم کا منشور اہل علاقہ کے سامنے رکھ دیا۔سابق سنیٹرمحمد جواد ہادی نےبھی شرکاء سے خطاب کیا اور ایم ڈبلیو ایم کو مکمل طور پر سپورٹ کرنے کا اعلان کیا اور ایم ڈبلیو ایم کی کامیابی کیلئے دعا کی۔

وحدت نیوز (اسلام آباد)  مجلس وحدت مسلمین پاکستان نے اپنا انتخابی منشور برائے الیکشن 2018پیش کردیا ۔انتخابی منشور کا عنوان ،ایم ڈبلیو ایم کا اعلان ہم بنائیں گے قائد و اقبال کا پاکستان، مرکزی دفتر ایم ڈبلیوایم میں پریس کانفرنس سے خطاب کرتے ہوئے چیئرمین منشور کمیٹی ایم ڈبلیو ایم نثار علی فیضی کا کہنا تھا کہ ، ہم وطن عزیز کو قائد اعظم محمد علی جناح اور ڈاکٹر علامہ اقبال کے وژن کے مطابق پر امن اورترقی یافتہ بنانے کے لئے جدوجہد کا اعلان کرتے ہیں ۔قائد واقبال کا پاکستان ایک ایسا پاکستان ہے جہاں بالادست طبقہ غریب عوام ۔بے آسرا لوگوں ،اقلیتوں کا استحصال نہ کر سکیں ۔بلکہ پاکستان میں بسنے والے عوام کو بلاتفریق نسل ۔لسانی تعلق ،مذہبی علاقائی اور صنفی امتیاز کے ترقی کے برابر مواقع میسر ہوں ۔ جہاں حکمران عوام کے سامنے جوابدہ ہوں اور جہاں انداز حکمرانی سادہ ہو۔ہماری جماعت کا منشور عوامی امنگوں کا ترجمان ہے ۔ہم پاکستان کی قومی خود مختاری اور سا لمیت پر کسی صورت آنچ نہیں آنے دیں گے ۔ہم ملک میں ناامنی ، شدت پسندی اور تکفیریت کے خلاف ہیں اور اس کے سدباب کے لئے کوشش جاری رکھیں گئے ۔باوقار اور خود مختار خارجہ پالیسی ملکی عزت اور سا لمیت کے لئے ناگزیر ہو چکی ہے ۔کرپشن ناصرف ملکی ترقی کے لئے ناسور بن چکا ہے بلکہ داخلی سلامتی کے لئے بھی خطرہ بن چکا ہے ۔ قومی احتساب بیورو کو مکمل طور پر انتظامی اور مالی خود مختاری دی جائے گی ۔یہ ایک غریب دوست منشور ہے اوراس میں ملکی معاشی مشکلات کاراہ حل بھی ہے ۔ ہم ملک میں تعلیمی اور معاشی ایمرجنسی کے نفاذ کے لئے کوششیں کریں گئے بے روزگاری ہمارے ملک کا بہت بڑا مسئلہ ہے ۔سرکاری نوکریاں دے کر اس مسئلے کوہرگز حل نہیں کیا جاسکتا پرائیوٹ سیکٹر کو مذید آسانیا ں دینا ہو نگی ۔توانائی کا بحران ملکی ترقی کی راہ میں ایک بڑی رکاوٹ بن چکی ہے ہم ملکی توانائی کے بحر ان سے نمٹنے کے لئے متفقہ قومی پالیسی لائیں گے ۔ مجلس وحدت مسلمین محض ایک سیاسی جماعت نہیں بلکہ ایک دینی اور نظریاتی تحریک بھی ہے جو کہ وطن عزیزمیں صالح اور محب وطن نمائندوں کو ایون اقتدارکا حقد ار سمجھتے ہیں ۔ہم آئین پاکستان کے مطابق قانون انصاف کی فراہمی کو اپنی اولین ترجیحات سمجھتے ہیں ۔مجلس وحدت مسلمین نے ملک کے تمام صوبوں سے اپنے امیدواران کھڑے کیے ہیں پنجاب کی سطح پر ہمارا پاکستان تحریک انصاف کے ساتھ انتخابی الائنس ہو اہے ۔دوسرے صوبوں میں بھی جماعتوں کے ساتھ بات چیت جاری ہے ۔

وحدت نیوز (اسلام آباد)  مجلس وحدت مسلمین کے زیر اہتمام برسی شہید قائد علامہ عارف حسین الحسینی کی مناسبت سے مرکزی اجتماع کے حوالے سے تیاریاں شروع کردی گئی ہیں، انتظامات کے حوالے ایم ڈبلیو ایم کے زیراہتمام مرکزی آفس میں اہم اجلاس ہوا جس میں علامہ اقبال بہشتی اور نثار فیضی سمیت دیگر رہنماوں نے شرکت کی۔ اجلاس میں رابطہ مہم اور نشرواشاعت بھرپور انداز میں شروع کرنے پر زور دیا گیا۔ برسی کے انتظامات کو بہتر بنانے کے لیے 10 رکنی کور کمیٹی کا بھی اعلان کیا گیا۔ کمیٹی میں ملک اقرار حسین، علامہ اصغر عسکری، ڈاکٹر یونس، علامہ اقبال بہشتی اور میڈیا سیل کا نمائندہ شامل ہیں۔

وحدت نیوز (لاہور) مجلس وحدت مسلمین کے امیدوارخرم عباس پی ٹی آئی کے اعجاز چوہدی کے حق میں دستبردار ہو گئے لاہورمیں پریس کانفرنس سے خطاب کرتے ہوئے مرکزی سیکرٹری سیاسیات ایم ڈبلیو ایم سید اسد نقوی کا کہاکہ پاکستا ن تحریک انصاف کے ساتھ پنجاب کی سطح پر انتخابی الائنس کے بعد مجلس وحدت مسلمین کے امیدوار برائے قومی و صوبائی اسمبلی حلقہ این اے 133اورپی پی 67کے امیدوار سید خرم عباس نقوی پاکستان تحریک انصاف کے امیدوار اعجاز چوہدری کے حق میں دستبردار ہو رہے ہیں ۔

انہوں نے کہاتحر یک انصاف کی جانب سے پنجاب اسمبلی میں خواتین کی خصوصی نشست سمیت بھکر کی صوبائی سیٹ پر ایڈجسمنٹ کے بعد مجلس وحدت مسلمین کے پنجاب کے مختلف حلقوں سے ایم ڈبلیو ایم کے امیدوار پاکستان تحریک انصاف کے حق میں دستبرادار ہونگے،سندھ میں پاکستان تحریک انصاف کیساتھ مذاکرات جاری ہے امید ہے کہ ہم جلد کسی بہتر نتیجے پر پہنچ جائیں گے،انہوں نے کہا کہ مجلس وحدت مسلمین پنجاب میں اپنے سیاسی مخالفین کو عوامی طاقت کے ذریعے انشااللہ شکست دے گی،ملک سے جبر استبداد کے نظام اور خاندانی سیاست کے خاتمے کے لئے انشااللہ پاکستان تحریک انصاف کیساتھ مل کر جدوجہد کرینگے،اس موقع پر پاکستان تحریک انصاف کے رہنما اعجاز چوہدری نے کہا کہ کہ پاکستان تحریک انصاف اور میں مجلس وحدت مسلمین کے قائدین کا شکرگزار ہوں کہ انہوں نے میری حمایت کی انشااللہ ایم ڈبلیوایم کے ساتھ مل کر اس کرپٹ نظام کے خاتمے کا سفر جاری رکھیں گے،اور اس الیکشن میں چوروں،لٹیروں اور مورثی سیاست کے حامی استحصالی ٹولے کو عبرت ناک شکست کا سامنا ہوگا۔

وحدت نیوز(گلگت) حکومت عوام کو آٹا فراہم کرنے میں ناکام ہوچکی ہے۔محکمہ خوراک کی ملی بھگت سے ڈیلر بلیک مارکیٹ کے ذریعے اپنا پیٹ بھر رہے ہیں اور عوام کوٹے کا آٹا بلیک مارکیٹ سے خریدنے پر مجبور ہیں۔آٹا ڈیلروں کو فراہم کیا جانے والا آٹا آبادی کے تناسب سے بہت کم مل رہا ہے۔

مجلس وحدت مسلمین گلگت بلتستان کے ترجمان محمد الیاس صدیقی نے آٹے کے بحران پر سخت برہمی کا اظہار کرتے ہوئے کہا ہے کہ حکام بالا محکمانہ کرپشن کا نوٹس لیں اور آٹے کے مصنوعی بحران کو ختم کریں اور ذمہ داروں کے خلاف قانونی کاروائی کی جائے۔انہوں نے کہا کہ گلگت بلتستان میں کوٹے کے گندم کا کاروبار سب سے منافع بخش کاروبار بن چکا ہے اور آٹا مافیا ملوں سے ہی آٹے کو غائب کردیتے ہیں اور غریب عوام کو اپنے حصے کا آٹا بھی میسر نہیں آتا جبکہ کوٹے کا آٹا بلیک مارکیٹ میں مہنگے داموں دستیاب ہے۔

انہوں نے کہا کہ محکمے کے ذمہ دار آفیسر دادرسی کو سننے کیلئے تیار نہیں ،ان کی مجرمانہ خاموشی قابل افسوس ہے۔انہوں نے کہا کہ گھوسٹ ڈیلر وں کے ذریعے آٹا بلیک کیا جاتا ہے جس کی تمام تر ذمہ داری محکمہ خوراک کی ہے اور یہ گھوسٹ ڈیلر محکمے کے ساتھ ملے ہوئے ہیں۔انہوں نے کہا کہ ارباب اختیار کو چاہئے کہ وہ اس مکروہ دھندے کو روکتے ہوئے ذمہ داروں کو نشان عبرت بنائیں۔