وحدت نیوز(جیکب آباد)  قائد شہید علامہ سید عارف حسین الحسینی ؒ کی 30 ویں برسی اور حمایت مظلومین کانفرنس کے سلسلے میں دعوت کے سلسلے میں مجلس وحدت مسلمین پاکستان ضلع جیکب آباد کے زیراہتمام مختلف یونٹس کا دورہ کیا گیا۔ایم ڈبلیوایم سندہ کے صوبائی سیکریٹری جنرل علامہ مقصودعلی ڈومکی نے ، ضلعی سیکریٹری جنرل مولانا آغا سیف علی ڈومکی، برادر سید شبیر علی شاہ، تحصیل سیکریٹری جنرل سیداشرف علی شاہ و دیگر کے ہمراہ مختلف یونٹس میں مومنین سے ملاقات کی، عوامی اجتماعات سے خطاب کیا۔

اس موقعہ پر گفتگو کرتے ہوئے علامہ مقصودعلی ڈومکی نے کہا کہ شہید قائد علامہ سید عارف الحسینی ؒ فکر امام خمینیؓ کے ترجمان اور اسلام ناب کے علمبردار تھے آپ ؒ نے باطل کے مقابلے میں ہمیشہ کلمہ حق کو بلند کیا اور بہ یک وقت کئی محاذوں پر ڈٹ کر باطل طاغوتی قوتوں کا مقابلہ کیا۔ آپ ؒ نے پاکستان میں ضیائی آمریت کو للکارا اور ملت کو خواب غفلت سے بیدار کیا۔آپ ؒ نے عالمی سامراجی قوتوں خصوصا امریکہ اور غاصب اسرائیل کے انسان دشمن عزائم کو بے نقاب کیا اور دنیا بھر کی انقلابی اور الٰہی تحریکوں کی حمایت کی۔

انہوں نے کہا کہ مجلس وحدت مسلمین فکر حسینی کی محافظ ہے قائد شہید کے مشن کو آگے لے کر چلیں گے اور جو خواب قائد شہید نے دیکھا تھا اسے شرمندہ تعبیر کریں گے۔ دشمن کی یہ بھول تھی کہ عارف الحسینی ؒ کے قتل سے اس کا مشن ختم ہوجائے گا مگر قائد شہید کا مشن ایک زندہ حقیقت بن کر زندہ اور تابندہ رہے گا۔

وحدت نیوز (گلگت)  عوام نے باریاں لینے والی جماعتوں کے مک مکا کی سیاست کو دفن کردیا جبکہ عام انتخابات میں بری طرح شکست کھانے کے بعد پیپلز پارٹی اور مسلم لیگ نواز کو میثاق جمہوریت کی یاد ستانے لگی ہے۔پاکستان تحریک انصاف کو بھاری مینڈیٹ ملنے پر دیرینہ دشمنی دوستی میں بدل چکی ہے۔مرکزی سطح پر زرداری نواز مک مکا کے صوبائی سطح پر بھی اثرات ظاہر ہونا شروع ہوگئے ہیں۔

مجلس وحدت مسلمین گلگت بلتستان کےڈپٹی سیکریٹری جنرل عارف قنبری نے کہا ہے کہ ملک کو دیوالیہ کرنے والے مفاد پرست سیاسی مداریوں کا ایک ہونے سے ثابت ہوگیا کہ یہ دونوں جماعتیں میثاق کرپشن پر گامزن ہیں ۔انہوں نے کہا کہ میثاق کرپشن کے ذریعے دونوں جماعتوںنے طے کرلیا تھا کہ جس جماعت کو باری ملے وہ کرپشن کے مزے لوٹے اور اپوزیشن کی جماعت صرف لفظی وار کرکے عوام کی آنکھوں میں دھول جھونکے گی لیکن بد قسمتی سے اس مرتبہ عوام نے ان جماعتوں کی سیاست کو دفن کردیا تو یہ سارے شکست خوردہ آپس میں بہن بھائی بن گئے۔تاریخ گواہ ہے کہ مسلم لیگ نواز کو جب بھی مشکل وقت آن پڑا تو پیپلز پارٹی نے جمہوریت کے تسلسل کا بہانہ بناکر ان کی حکومت بچائی۔انہوں نے کہا کہ گلگت بلتستان میں پیپلز پارٹی کے رہنمائوں کا کیا موقف ہوگا جو مسلم لیگ نواز کو ملک دشمن اور کالعدم جماعتوں کے سرپرست سمجھتے تھے۔وہی آصف زرداری جو شہباز شریف کو ناسور سمجھتے تھے اور پنجاب میں ان کی سیاست کو دفن کرنا کا ارادہ رکھتے تھے ان کی جماعت شہباز شریف کو وزیراعظم کے انتخاب میں ووٹ دینے کا کیا جواز رہ گیا ہے۔

انہوں نے کہا کہ اب ان جماعتوں کے مابین گلگت بلتستان اور آزاد کشمیر میں بھی مک مکا کا فیصلہ ہوچکا ہے ،پیپلزپارٹی گلگت بلتستان اور آزاد کشمیر میں محض لفظی وار کرے گی۔پاکستانی عو ام نے ان جماعتوں کے اصلی چہرے کو دیکھ کر انہیں مسترد کیا ہے اور گلگت بلتستان اور آزاد کشمیر کے آئندہ انتخابات میں بھی باریاں لینے والی جماعتوں کا صفایاہوجائیگا۔

وحدت نیوز (کراچی) مجلس وحدت مسلمین پاکستان کے مرکزی ترجمان علامہ مختار امامی نے کہا پے کہ حلقہ پی ایس 89میں ووٹوں کی دوبارہ گنتی کا مطالبہ آئینی اور اصولی ہے۔اگرہمارے اس مطالبے کو تسلیم نہ کیا گیا تو ہمیں مجبورا احتجاج کا راستہ اختیار کرنا پڑے گا۔مذکورہ حلقے میں ہمارے امیدوار علی حسین نقوی بھاری اکثریت سے جیت رہے تھے۔مختلف پولنگ سٹیشنز میں پیپلز پارٹی نے اپنے امیدوار کو ہارتے دیکھ کر روایتی حربے استعمال کرنا شروع کر دیے۔ہم اس انتخابی دھاندلی کو تسلیم نہیں کرتے۔حلقہ پی ایس 89 ریٹرنگ آفیسر کی جانب سے ہماری درخواست کو مسترد کرنا بددیانتی ہے جس کی پرزور مذمت کرتے ہیں۔انہوں نے کہا کہ اس حلقہ میں ووٹوں کی دوبارہ گنتی کے لیے چیف الیکشن کمیشن کو درخواست دی جائے گی۔ہم یہ الیکشن جیتے ہوئے ہیں اور آر او کی جانب سے اس غیر منصفانہ اعلان کو تسلیم نہیں کرتے۔انہوں نے کہا کہ جیتے ہوئے امیدوار کے نتائج میں ہیر پھیر کے ذریعے تبدیلی عوامی منڈیٹ کی توہین ہے۔مجلس وحدت مسلمین اس زیادتی کے خلاف سراپا احتجاج ہے۔چیف الیکشن کمیشنر ووٹوں کی دوبارہ گنتی کا حکم دیں تو دودھ کا دودھ اور پانی کا پانی کھل کر سامنے آ جائے گا۔

وحدت نیوز(راولپنڈی) مجلس وحدت مسلمین شعبہ خواتین ضلع راولپنڈی کی جانب سے مجلسِ عزا کا انعقاد کیا گیا تھا۔ مجلس کا اہتمام پروفیسر انجم نقوی کے گھر پر ہوا۔ قرآن خوانی کے بعد محترمہ مہویش نے حدیثِ کساء پڑھنے کی سعادت حاصل کی۔ اور دعائے توسل پڑھنے کی سعادت پروفیسر انجم نقوی کو حاصل ہوئی۔ بعد از دعا محترمہ تسمیہ نے ہدیہ منقبت پیش کیا۔ننھی زاکرہ فاکھہ بتول نے بی بی سیدہ سلام اللہ علیہ کے فضائل و مصائب پیش کیے۔اس کے بعد ایم ڈبلیو ایم کی ضلعی سیکریٹری جنرل قندیل زہرا کاظمی نے خواہران سے خطاب کرتے ہوئے سب سے پہلے شہید علی نقوی کی دختر خواہر زہرا نقوی کی بطور "ایم پی اے" کامیابی سے متعلق آگاہی دی اور الیکشن کمپین میں بھرپور کردار ادا کرنے پر اپنی ٹیم کو سراہا۔اس کے بعد آپ نے 5 اگست کو شہید قائد عارف حسین الحسینی کی برسی کے سلسلے میں منعقد ہونے والی " حمایتِ مظلومین کانفرنس" میں بھرپور شرکت کی دعوت دی اور میزبانی کے فرائض بھرپور انداز میں سر انجام دینے کے لیے لائحہ عمل بھی دیا ۔ آپ نے مزید کہا کہ ہماری آج کی ضرورت صرف اور صرف اتحاد ہے۔ہمیں چاہیئے کہ ہم اپنے تمام اختلافات پسِ پشت ڈال کر ایک پلیٹ فارم پر جمع ہوں اور اپنے حجتِ آخر الزمان ع ج کی آمد کی تیاری کریں۔بعد ازں خواہر نگین زہرا نے امامِ زمانہ ع ج کے فضائل بیان کرتے ہوئے خواتین کو اس بات کی طرف متوجہ کیا کہ ہر ہر مومن کو یہ سوچنا چاہئیے کہ کیا ہم امام علیہ سلام کے ظہور کے لیے خود کو تیار کر چکے ہیں یہ کر رہے ہیں۔ اصل میں ہم کس جگہ stand کرتے ہیں اور اُم المصائب بی بی سلام اللہ علیہ پر ہونے والے مضالم بیان کیے ۔ نوحہ خوانی اور ماتم داری کے بعد شہداء و مرحومین کے اصالِ ثواب کے لیےفاتحہ خوانی ہوئی۔دعائے امامِ زمانہ ع ج اور زیارت پر اختتام ہوا۔بعد از مجلس مومنات کے لیے لنگر کا انتظام بھی کیا گیا تھا۔

وحدت نیوز (اسلام آباد) مجلس وحدت مسلمین پاکستان کے حمایت یافتہ آزاد امیدواربرائے صوبائی اسمبلی فیصل حیات جبوآنہ سیال پی پی 125 جھنگ سے کامیاب ہوئے،کامیابی کے بعد سیکرٹری جنرل مجلس وحدت مسلمین پاکستان علامہ راجہ ناصر عباس جعفری کا شکریہ ادا کرنے ان کے گھر تشریف لائے۔اس موقع پر مرکزی سیکرٹری سیاسیات اسد عباس نقوی بھی موجود تھے۔فیصل حیات جبوآنہ نے کہا کے میں مجلس وحدت مسلمین ہی کی وجہ سے اس نشست پر کامیاب ہوا ہوں اور مجلس وحدت مسلمین کی ہم آہنگی سے ہی میں نے پاکستان تحریک انصاف میں شمولیت اختیار کی ہے قومی اور ملی معاملات میں میں مجلس وحدت مسلمین کی گائیڈ لائن پر عمل پیرا رہونگا۔

وحدت نیوز (اسلام آباد) پاکستان کے عظیم سیاسی ومذہبی رہنماعلامہ شہید عارف حسین کی برسی شایان شان طریقے سے منائی جائے گی ،اس سلسلے میں 5اگست کو پریڈ گراونڈ اسلام آباد میں عظیم الشان حمایت مظلومین کانفرنس کا انعقاد کیا جائے گا ۔ان خیالات کا اظہار مجلس وحدت مسلمین پاکستان کے مرکزی ترجمان علامہ مختار امامی نے کور کمیٹی کے اجلاس سے خطاب کرتے ہوئے کیا انہوں نے کہا کہ پاکستان میں یوں تو بڑے بڑے سیاسی و مذہبی رہنما گذرے جن میں سر فہرست پاکستان پیپلز پارٹی کے رہنما ذوالفقار علی بھٹو جو ایک سیکولر سیاسی جماعت کے سربراہ ہونے کے ساتھ ساتھ مقبول عوامی لیڈر تھے اسی طرح اس وقت میں پاکستان کی سب سے بڑی دینی جماعت جماعت اسلامی کے بانی مولانا مودودی ایک دانشور ،عالم دین ہونے کے ساتھ ساتھ ایک عظیم سیاسی لیڈر بھی تھے لیکن عارف حسینی کا شمار ان سب میں ایک منفرد حیثیت سے ہوتا ہے وہ نہ صرف ایک مذہبی و سیاسی رہنما تھے بلکہ وہ ایک عالم با عمل ، ایک عارف باللہ، اور ایک ایسے ولی خدا تھے جو خاکی ہونے کے باوجود افلاک سے رابطہ رکھتے تھے ۔

انہوں نے مزید کہاکہ وہ ایک ایسے مرد قلندر تھے جس کی آنکھ بینا تھی یہی وجہ ہے کہ وہ ملت کے فرد فرد کے دلوں پر بسے ہوئے تھے ضیاء الحق کے آمرانہ دور میں جب ہر زبان پر تالے لگ گئے تھے جراتیں تھک چکیں تھیں تو سید عارف بانگ درا کی مانند نمایاں ہوئے اور تمام سکیولر اور مذہبی جماعتوں کے درمیان ایک امید بن کر ابھرے یہاں تک کہ اس وقت سیاسی جماعتوں کے لیڈروں نے کئی بار برملا طور پر اس بات کا اظہار کیا کہ اگر سید عارف حسینی تمام سیاسی جماعتوں کی قیادت کریں تو آمریت کے خلاف ایک متحدہ جدو جہد کی جاسکتی ہے لیکن وہ اس جدوجہد کو جس تناظر میں دیکھ رہے تھے عارف حسینی کو اس سے کوئی دلچسپی نہ تھی کیونکہ اقتدار کا حصول اور کرسیوں کی بندر بانٹ عارف حسینی جیسے عظیم قائدین کے نزدیک سوائے معاشرہ سازی اور عدالت کے قیام کے وسیلے کے علاوہ کسی قسم کی کوئی حیثیت نہیں رکھتی تھی ۔وطن عزیزکی پالیسوں میں بیرونی قوتوں کی مداخلت کی سخت مخالف تھے،پاکستان کے امن اور استحکام کی خاطر مسلسل جدوجہدکرتے رہے اور اسی راہ پر انہوں نے جام شہادت نوش کیا ۔لہذا مجلس وحدت مسلمین پاکستان ہرسال کی طرح اس سال بھی عظیم قائد شہید علامہ عارف حسین الحسینی کی برسی کا پروگرام بھر پور انداز میں عظیم الشان طریقے سے منائے گی اور ر شہید قائد کی خدمات کو خراج تحسین پیش کرنے کے لئے ملک بھر سے ہزاروں عاشقان قائد 5اگست کو پریڈگراونڈ کا رخ کریں گئے۔