The Latest
نیل و فرات کی باتیں کرنے والا اسرائیل آج دیواریں کھڑی کرکے اپنےدفاع پر مجبور ہے،علامہ راجہ ناصرعباس
وحدت نیوز(اسلام آباد) فلسطین فاونڈیشن پاکستان کے زیر اہتمام سیمیناربعنوان بیت المقدس فلسطین کا دارحکومت کا اسلام آباد کے مقامی ہوٹل میں انعقاد کیاگیا، جس میں مجلس وحدت مسلمین پاکستان کے مرکزی سیکریٹری جنرل علامہ راجہ ناصرعباس جعفری،جنرل (ر)عبدالقیوم، میاں اسلم ،سنیٹر ستارہ ایاز،ثاقب اکبر ، صابر ابومریم ،عابدہ راجہ ،عبدالحمید لون ،عبداللہ گل،مزمل حسین سید اور دیگر نے خطاب کیا
سیمینار سے خطاب کرتے ہوئے مجلس وحدت مسلمین پاکستان کے سربراہ علامہ راجہ ناصر عباس جعفری نے کہا کہ قرآنی حکم ہے کہ یہود و نصاریٰ ہمارے دوست نہیں ہو سکتے۔ ظلم ان کا شیوہ ہے، ان کا ساتھ دینے والا بھی ظالم ہے۔ ہمیں یہود و نصاریٰ پر اعتماد نہیں کرناچاہیے، چند مسلمان ریاستوں نے غاصب ریاست کے ساتھ تعلقات قائم کئے ہوئے ہیں جو انتہائی افسوسناک امر ہے، بعض ممالک میں اسرائیلی سفارتخانے موجود ہیں، شام ، یمن ، عراق اور افغانستان کی جنگیں گریٹر مڈل ایسٹ بنانے کی جنگ ہے جس کے درپردہ امریکہ اور اسرائیل کی سازش کارفرما ہے۔
علامہ راجہ ناصرعباس نے کہاکہ نیل و فرات کی باتیں کرنے والا اسرائیل آج دیواریں کھڑی کرکے دفاع پر مجبور ہے، حزب اللہ کی اسرائیل مخالف جنگوں کے بعد غاصب صہیونی ریاست کی ہیبت قصہ پارینہ بن چکی ہے۔ یہ ہمت اور حوصلہ امام خمینی نے امت مسلمہ کو فراہم کیا، امام خمینی نے امت مسلمہ سے ماہ رمضان کے آخری جمعہ کو یوم القدس کے نام پر منانے کی اپیل کی۔ اگر عوام اور رائے عامہ نہ ہوتی تو بہت سے مسلمان ممالک اسرائیل سے تعلقات قائم کرچکے ہوتے ، یہی رائے عامہ مسئلہ فلسطین کو دفن ہونے سے بچا رہی ہے، آج یہ مسئلہ انسانیت کا اہم مسئلہ بن چکا ہے۔
فلسطین فاونڈیشن پاکستان کے مرکزی ترجمان صابر ابومریم کا کہنا تھاکہ فلسطینی آج بھی ظالم صہیونیوں کے ٹینکوں کے مقابل ڈٹے ہوئے ہیں۔ رہنما مسلم لیگ ن سینیٹر جنرل (ر) عبدالقیوم نے کہاکہ مشرق وسطیٰ میں آج فلسطین فلیش پوائنٹ ہے، پوری دنیا کی نظریں وہاں لگی ہوئی ہیں۔ یہ سرزمین یہودیت، عیسائیت اور مسلمانوں کے لئے اہم اور متبرک ہے۔ دوسری جنگ عظیم میں ہٹلر نے یہودیوں کو مارا اسے سے جب پوچھا گیا کہ انہیں کیوں مارا تو اس نے جواب دیا کہ چند چھوڑ دیئے ہیں، جن کے ذریعے آنے والی دنیا جان سکے گی کہ انہیں کیوں مارا گیا۔آج اگر فلسطین ظلم کا شکار ہے تو کل کوئی دوسرا ملک بھی ظلم کا شکار ہو سکتا ہے، ضرورت اس امرکی ہے کہ فلسطین و کشمیر کو ہر فورم پر اجاگر کیا جائے۔
سینیٹر ستارہ ایازرہنما اے ا ین پی کا کہنا تھا کہ آج مسلم امہ فلسطین کے حق میں آواز اٹھانے میں ناکام رہی ہے، کشمیر و فلسطین میں آج بھی نہتے عوام اپنے حق کے لئے پتھر ہاتھ میں اٹھا کر میدان عمل میں ہیں۔ تمام مسلمان ممالک کو یکجا ہو کر اس اہم مسئلہ کو عالمی فورمز پر اٹھانا چاہیے۔ میاں اسلم نائب امیر جماعت اسلامی کا سیمینار سے خطاب کرتے ہوئے کہنا تھا کہ اسرئیل غاصب اور ناجائز ریاست ہے انہوں نے امت کے اتحاد پر ضرور دیتے ہوئے کہا کہ عالم اسلام کو یکجا ہو کر بیت المقدس کو صہیونیوں سے آزاد کروانا ہو گا ۔
ملی یکجہتی کونسل کے ڈپٹی سیکرٹری ثاقب اکبر کا کہنا تھا کہ مسئلہ فلسطین کے حل کے لئے دو قومی نظریہ کی بات کرنا ایک غلط اقدام ہے، پاکستان کے دفتر خارجہ بانی پاکستان کی دی گئی پالیسی سے انحراف کرنے کی کوشش کی ہے اور اس مسئلے کے حل کے لئے دو قومی نظریہ کی بات کی ہے۔ ضرورت اس امر کی ہے کہ قائداعظم محمد علی جناح کی دی گئی پالیسی پر عمل کیا جائے، قائد اسرائیل کو ایک غاصب اور ناجائز ریاست سمجھتے تھے۔
پی ٹی آئی کی رہنما عابدہ راجہ کا کہنا تھا کہ فلسطین میں ظلم کے پہاڑ توڑے جارہے ہیں، عورتوں ، بچوں اور بوڑھوں تک کو معاف نہیں کیا جارہا، بکھرے ہوئے مسلمان صرف اپنے گھروں میں بیٹھ کر نوحہ کناں ہیں، دوقومی نظریہ کی بات کرنے والے فلسطین کے ساتھ مخلص نہیں ہیں۔ آج ہمارے حکمران اپنے چند مفادات کی خاطر صہیونیوں کے مقابل گھٹنے ٹیکے ہوئے ہیں۔ آج ضرورت اس امر کی ہے کہ مسلمان ایک ہو جائیں اور ایک طاقت بن کواسب جوابی حکمت عملی تیار کرنی چاہیے۔
وحدت نیوز (سجاول) مجلس وحدت مسلمین ضلع سجاول کے سیکریٹری جنرل مظفرعلی لغاری ایک بیان میں کہاہے کہ تکفیری عناصر گذشتہ سال کی طرح اس سال بھی سجاو ل میں جلوس شہادت حضرت علی ابن ابی طالب ؑ کے انعقاد میں رکاوٹیں کھڑی کرنے میں مصروف ہیں، انہو ں نے کہاکہ ہم نے ضلعی انتظامیہ کو پیشگی آگاہ کردیا ہے، انہوں نے اپنے بھرپور تعاون کی یقین دہانی بھی کروائی ہے ، مظفر لغاری نے کہاکہ مجالس وجلوس ہمارا قانون و آئینی حق ہیں جس پر کوئی سمجھوتہ نہیں کیا جاسکتا ۔
انہوں نے کہاکہ جلوس ومجلس عزاشہادت مولائے کائنات امیر المومنین حضرت علی علیہ السلام انشاء اللہ 6جون بروز بدھ ٹھیک 4بجے شام کہیری امام بارگاہ سے ماتمی جلوس برآمد ھوگاجو اپنے مقررہ راستوں سے ھوتا ھوا ٹھیک 7شام بجے مسجد الحسینی پر اختتام پذیر ھوگا جہاں مجلس عزاء برپا ھوگا اور روزہ داروں اور مومنین کو افطاری کروائی جائے گی، جس میں خطاب علامہ محمد بخش غدیری علامہ منظور حسین نجفی کریں گے،تمام مومنین سے بھرپور تعداد میں شرکت کی اپیل ہے۔
تکفیری عناصر کی جانب سے سجاول میں جلوس شہادت حضرت علی ؑ میں رکاوٹ ناقابل برداشت ہے، علامہ مقصودڈومکی
وحدت نیوز (سجاول) مجلس وحدت مسلمین سندھ کے سیکرٹری جنرل علامہ مقصود علی ڈومکی کی ایس ایس پی سجاول فدا حسین جانوری اور ڈپٹی کمشنر غضنفر علی قادری سے ٹیلیفون پر گفتگو ،علامہ مقصود علی ڈومکی نے کہا کہ یوم علی علیہ السلام کے جلوس عزا ملک بھر میں برآمد ہوتے ہیں اور یہ باقائدہ پرمٹ والا جلوس ہے جسے سیکورٹی فراہم کرنا انتظامیہ اور پولیس کے فرائض میں شامل ہے ،تکفیری عناصر کی جانب سے سجاول میں جلوس شہادت حضرت علی ؑ میں رکاوٹ ناقابل برداشت ہے، جبکہ کالعدم جماعت مختلف عناوین سے فتنہ و فساد بپا کرنا چاہتی ہے جسے روکنا حکومت اور انتظامیہ کی ذمہ داری ہے، انہوںنے کہاکہ جلوس وعزاداری ہمارابنیادی شہری حق ہے جس سے ہم کسی صورت دستبردار نہیں ہوں گے، اس موقعہ پر ایس ایس پی سجاول فدا حسین جانوری اور ڈپٹی کمشنر غضنفر علی قادری نے یقین دلایا کہ وہ مسئلے کو حل کریں گے اور جلوس عزا کے منتظمین اور مجلس وحدت مسلمین کے رہنماؤں سے تعاون کریں گے۔
وحدت نیوز (کراچی) مجلس وحدت مسلمین صوبہ سندھ کے پولیٹیکل سیکریٹری علی حسین نقوی نے سجاول میں جلوس شہادت حضرت علی ابن ابی طالب ؑمیں تکفیری عناصر کی جانب سے رکاوٹ کھڑی کرنے کی پرزور الفاظ میں مذمت کی ہے، اپنے بیان میں انہوں نے کہاکہ انتظامیہ حالات خراب کرنے والوں کو قابو میں کرے،عزاداروں کا راستہ روکنے کی کوشش کی گئی تو حالات کی خرابی کی ذمہ دار انتظامیہ ہو گی ،سجاول میں جلوس شہادت حضرت علی ؑکے خلاف تکفیری عناصر کی سازشیں ضلعی انتظامیہ کے لئے چیلنج ہیں،ریاست پاکستان کی جانب سے کالعدم قرار دی جانے والی جماعتوں کو کھلے عام فتنہ وفساد پھیلانے کی کسی صورت اجازت نہیں دینی چاہیے، علی حسین نقوی نے کہاکہ اگر سجاول میں جلوس عزا میں کوئی بد نظمی کا واقعہ ہوا تو پورے سندھ میں شدید احتجاج ہوگا۔
وحدت نیوز (اٹک) مجلس وحدت مسلمین شعبہ خواتین ضلع اٹک زیر اہتمام دس روزہ دروس اور یوم خدیجہ علیہ السلام کا اہتمام کیا گیا ۔دوئم رمضان المبارک سے لے کر دس رمضان المبارک تک درس اخلاق اور روزے افادیت کا اہتمام کیا گیا جس میں معلمہ مہک زہرا از المصطفی یونیورسٹی اسلام آباد نے بہت خوبصورتی سے ان پہلوؤں کو اجاگر کیا نیز آخری دن گیارہ رمضان المبارک کو یوم خدیجہ علیہ السلام کا اہتمام کیا گیا ۔۔جس میں تلاوت قرآن پاک اور حدیث کساء کے بعد نعت رسول مقبول صل اللہ علیہ و آلہ و سلم پیش کی گئی بعد از آن شعیب ابی طالب کی منظر کشی کی گئی ترانہ کے بعد روزہ نہ صرف بھوک پیاس برداشت کرنے کا نام نہیں بلکہ ایثار و قربانی کا نام بھی ہے پر خاکہ پیش کیا گیا ۔معلمہ مہک نے بی بی خدیجہ ولادت سے بعثت رسول کریم سے ازواج تک حال زندگی کو بہت خوبصورتی سے روشن کیا ۔معلمہ شازیہ از ایران نے بعثت رسول اللہ ص سے لےشعیب ابی طالب اور نوجوان نسل پر اثرات کے پہلو کو اجاگر کیا ۔بعد ازآن خواہر چمن فاطمہ از ایران نےبی بی خدیجہ اسلام پر قربانیاں اور شیعہ خواتین کی ذمہ داریاں اور آخر میں خواہر زینب نے بی بی کی وصیت اور شہادت کے پہلو پر روشنی ڈالی،نیز کوئز کا انعقاد بھی ہوا۔آخر میں دعا امام زمان سے نشست کا اہتمام کیا گیا ۔
وحدت نیوز(کراچی) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے کراچی ڈویثزن کی جانب سے اسلامک ریسرچ سینٹر عائشہ منزل افطار عشائیہ میں منعقدہ فکر امام خمینی سیمینار کے موقعہ پر خطاب میں کہا کہ امام خمینی وہ عظیم عالمی اسلامی رہنما تھے جنہوں نے امت مسلمہ کو استعماری طاقتوں کی آنکھوں میں آنکھیں ڈال کر بات کرنے کا درس دیا۔ان کی آواز دنیا کی ان طاقتوں کے خلاف تھی جو اسلام کی حقیقی تعلیمات کو مسخ کرکے دنیا بھر میں اسلام کی شکل میں من پسند مذہب کا اجرا چاہتے تھے۔ امام خمینی نے ایران میں انقلاب برپا کر کے اڑھائی ہزار سالہ شہنشاہی کو سرنگوں اور رعونت و تکبر کے بت کو پاش پاش کیا اور امت مسلمہ کو بتایا کہ جہاں بھی اسلام کے تشخص کو خطرہ ہو اس طرح توحید کا پرچار کیا جائے۔ان کا انقلاب اللہ کی زمین پر اللہ کے قانون کو نافذ کرنے کے لیے تھا۔امام خمینی قدس سرہ ایک عارف باللہ اور ایسے عالم ربانی تھے جن کی دوستی و دشمن خدا کی خاطر جن کی تھی۔وہ اللہ کے نظام توحید اور ربوبیت کے نظام پر کامل یقین اور ایمان رکھتے تھے۔ ان کا ایمان تھا کہ اس کائنات میں سب سے بڑی طاقت اور قدرت اللہ کی ذات ہے اور اسی پر توکل کرنا چاہیے۔
انہوں نے ناموس دین کے دفاع کے لیے آواز بلند کی۔ ناموس دین کے دفاع کا یہ تقاضہ ہے کہ دین کتابوں اور الماریوں میں بند نہ رہے بلکہ دین کی اصلی تعلیمات محفوظ بھی رہیں اور معاشرے پر اللہ کے دین اور قانون کو نافذ بھی کیا جائے۔امام خمینی نے اس کام کے لیے اپنے آپ کو آمادہ کیا۔سیر و سلوک اور تہذیب نفس کے مراحل طے کیے۔ عظیم ترین اساتیذ اور مربیوں کے زیر اثراپنے علمی درجات کو بلندی پر لے گئے۔علم و عمل کے زیور کے ساتھ ساتھ تہذیب نفس سے اپنے باطن کو بھی آراستہ کرتے رہے جواللہ کے نظام کو معاشرے میں نافذ کرنے کا بنیادی مرحلہ ہے۔ انبیاء کے نقش قدم پر چلتے ہوئے طاغوتی ا ور سرکش قوتوں کے ساتھ ٹکرائے۔دنیا بھر کے مظلوموں کی حمایت میں آواز بلند کی۔ان کا مقابلہ زمانے کے طاغوتی نظام کے ساتھ تھا۔امام خمینی کے چاہنے والے اپنے رہبر کی آواز پر ظلم و ستم کے سامنے ڈٹے رہے لیکن سرنگوں نہیں ہوئے۔امام خمینی نے کبھی رہنما ہونے کا دعوی نہیں کیا بلکہ دنیا بھر کے مسلمان ان کے طرز عمل سے متاثر ہو کر انہیں امت مسلمہ کا لیڈر سمجھتے تھے۔مسلمانوں کے دلوں میں ان کی محبت موجزن تھی۔ان کی وفات پر ہر شخص غمزدہ اور ہر آنکھ اشکبار تھی۔
انہوں نے کہا دور عصر کی طاغوتی قوتوں کو مقابلہ کرنے کے لیے امام خمینی کی حکمت،تدبر اور جرات کو اپنا طرز زندگی بنانا ہوگا۔افطار عشائیہ میں علامہ احمد اقبال رضوی،علامہ مرزا یوسف حسین،علامہ نثار قلندری،علی عرفان عابدی،علامہ باقر عباس زیدی،علامہ نقی نقوی،علامہ اظہر نقوی،علامہ صادق جعفری،شبر رضا،ضیاء الحسن،علی حسین نقوی،علامہ علی انور،علامہ احسان دانش سمیت دیگر سیاسی و مذہبی جماعتوں کےرہنماوں اور پرنٹ و الیکٹرانک میڈیا نمائندگان کی بڑی تعداد موجود تھی۔
وحدت نیوز (جیکب آباد) بانی انقلاب اسلامی رہبر کبیر حضرت امام خمینی ؒ کی ۲۹ ویں برسی کے موقعہ پر خطاب کرتے ہوئے مجلس وحدت مسلمین صوبہ سندہ کے سیکریٹری جنرل علامہ مقصودعلی ڈومکی نے کہا ہے کہ امام خمینی ؒ عصر حاضر کے عظیم انقلابی رہنما تھے آپ نے امت مسلمہ کو خواب غفلت سے بیدار کیا اور عالمی استکباری قوتوں کے انسان دشمن عزائم کو بے نقاب کیا، آپ نے مستضعفین عالم کو مستکبرین کے مقابل لاکھڑا کیا۔ آپ ؒ نے اکیسویں صدی میں قرآن و سنت اور سیرت آل محمد ﷺ پر مبنی اسلامی جمہوریہ کی بنیاد رکھی، جو بہ یک وقت اسلامی اصولوں کی پاسدار بھی ہے اور دنیا کے مسلمہ جمہوری اصولوں پر عمل پیرا بھی۔
انہوں نے کہا کہ امام خمینی ؒ کی نہضت اور تحریک اب عالمی انقلابی تحریک بن چکی ہے جس سے شیاطین عالم خوف زدہ ہیں، آپ ؒ نے امام زمانہ ؑ کے عالمی اسلامی انقلاب کے لئے راہ ہموار کی۔ جس کے باعث دنیا بھر کی طاغوتی قوتیں خوف زدہ ہوگئیں، کیونکہ انہیں اپنا اقتدار باطل زوال پذیر نظر آرہا ہے۔ آپ ؒ نے قرآنی تعلیمات کی روشنی میں مستضعفین عالم کی عالمی حکومت کی نوید دی۔
انہوں نے پوری قوم سے اپیل کی کہ رہبر کبیر فقیہ مجاہدحضرت امام خمینیؒ کی برسی کی مناسبت سے خصوصی تقریبات منعقد کی جائیں ، جس میں امام راحل ؒ کی شخصیت افکار و تعلیمات سے نئی نسل کو آگاہ کیا جائے۔ یہ بات شک و شبہ سے بالاتر ہے کہ فکر خمینی ؒ ہمارے لئے رہنما اور ہمارے تمام مسائل کا حل ہے۔ انہوں نے کہا کہ ۳ جون کو مجلس وحدت مسلمین کے زیراہتمام( انقلاب اسلامی و افکار امام خمینی ؒ کانفرنس) منعقد ہوگی، جس میں مختلف مکاتب فکر کے رہنما اوراہل سنت علماء خطاب کریں گے۔
وحدت نیوز (گڑہی یاسین) مجلس وحدت مسلمین ضلع شکارپور کے زیراہتمام ضلعی پولٹیکل کونسل اور معززین کا اہم اجلاس پیر چنڈام میں منعقد ہوا۔ اجلاس کے موقعہ پر خطاب کرتے ہوئے ایم ڈبلیو ایم صوبہ سندہ کے سیکریٹری جنرل علامہ مقصودعلی ڈومکی نے کہا کہ سندہ کے منتخب حلقوں سے مجلس وحدت مسلمین اپنے امیدوار کھڑے کر رہی ہے۔ دھشت گردی اور کرپشن ملک کے دو بڑے مسائل ہیں جن کے خلاف ہم نے ہمیشہ جدوجہد کی ہے۔ مسلم لیگ اور پیپلز پارٹی کا پانچ سالہ دور حکومت ملکی تاریخ کا سیاہ دور رہا، جس میں عوام غیر محفوظ رہے ،ملکی دولت کو دونوں ہاتھوں سے لوٹا گیا، اور امریکی سامراج کی مداخلت رہی۔ ہم کرپشن اور دھشت گردی سے پاک ، پاکستان بنانا چاہتے ہیں۔
صحافیوں کی جانب سے ایم ایم اے کی حمایت کے سوال پرجواب دیتے ہوئے علامہ مقصودعلی ڈومکی نے کہا کہ مولانا فضل الرحمن نے کبھی بھی شیعہ نسل کشی کی کھل کر مذمت نہیں کی، ڈیرہ اسماعیل خان جو کہ مولانا کا حلقہ انتخاب اور گھر ہے میں مسلسل شیعیان علی ؑ کا قتل عام ہورہا ہے مگر وہ کبھی اس قتل عام کے خلاف نہیں بولے اور نہ ہی وہ شہداء کے گھر تعزیت کے لئے گئے۔ ایم ایم اے کو اسلام کی بجائے اسلام آباد کی فکر ہے۔ ایک سوال کے جواب میں انہوں نے کہا کہ شیعہ علماء کونسل نے اپنے امیدواروں کی حمایت کے لئے رابطہ کیا تو پارٹی مشاورت کے بعد جواب دیا جائے گا، ہم باکردار اور صالح افراد کو پارلیمنٹ میں دیکھنا چاہتے ہیں، ایس یو سی کے ساتھ اشتراک عمل کی صورت نکل سکتی ہے۔ملت کی نمائندہ جماعت کی حیثیت سے باکردارصالح شیعہ امیدواروں کو سپورٹ کریں گے۔
تقریب سے مجلس وحدت مسلمین ضلع شکارپور کے سیکریٹری جنرل برادر فدا عباس لاڑک و دیگر نے خطاب کیا۔ تقریب میں ضلعی صدر شیعہ علماء کونسل برادر احمد علی برڑو، مجلس وحدت کے ضلعی رہنما محبوب علی ابڑو،شاکر حسین، مستنصر مہدی، دریا خان جتوئی و دیگر شریک ہوئے۔
وحدت نیوز(سکردو) مجلس وحدت مسلمین پاکستان گلگت بلتستان کے سیکرٹری جنرل علامہ آغا علی رضوی نے اپنے ایک بیان میں کہا ہے کہ صوبائی حکومت بوکھلاہٹ کا شکار ہوچکی ہے اور ذاتیات پر حملہ کر کے گلگت بلتستان کے ظالمانہ آرڈر کے خلاف جاری تحریک کا رخ تبدیل کرنے کی کوشش کر رہی ہے۔ انہوں نے کہا کہ جی بی آرڈر کے خلاف تحریک کو سبوتاژ کرنے کے لیے حکومت علاقائی ، مسلکی اور دیگر تعصبات کو ہوا دینا چاہتی ہے۔ آج داریل تانگیر سے بلتستان تک کے عوام نے جب حکومت کے نام نہاد اصلاحاتی پیکیج کو مسترد کر دیا اور صوبائی حکومت کے چہرہ کو بے نقاب کیا تو انکی چیخیں نکل رہی ہیں۔ عوام اب باشعور ہوچکی ہے کسی دھوکے اور سازش کا شکار نہیں ہوسکتی ۔
انہوں نے مزید کہاکہ لیگی حکمران چاہتے ہیں کہ گلگت بلتستان میں سانحہ ماڈل ٹاون کا تکرار ہو لیکن عوام نے صبر کا مظاہرہ کرتے ہوئے اپنی تمام تر توانائیوںکو نام نہاد پیکیج کو زمین بوس کرنے اور اتحاد و اتفاق کی پرچار کے لیے صرف کریں، وفاقی سرپرستی کے خاتمے کے بعد حکمرانوں کی عقل ٹھکانے آجائیں گے۔ یہ پہلی بار نہیں بلکہ اس سے قبل بھی لیگی حکمران داعش کو بلواکر عوامی احتجاجات پر حملے کروانے کی دھمکیاں ریاستی اداروں کے سربراہان کے سامنے دے چکے ہیں۔ وفاق میں انکے قائد کے ممبی حملے کے متعلق بیان سے ہی واضح ہوگیا ہے کہ وہ ملک اور ریاستی کے کتنے خیرخواہ ہیں۔
آغا علی رضوی نے کہا کہ گلگت اور بلتستان کو الگ کرنے کی کوشش بہت عرصے سے جار ی ہے لیکن ہر دفعہ عوام نے شعور کا مظاہرہ کرتے ہوئے ایک اکائی بن کر ثابت کیا ہے کہ اب لڑاو اور حکومت کرو والی پالیسی نہیں چلنے نہیں دیں گے۔ جی بی آرڈر 2018ء صوبائی حکومت کی عوام دشمن پالیسی اور وفاق کی کاسہ لیسی کا منہ بولتا ثبوت ہے۔حکمران کاسہ لیسی میں حد سے گزر چکے ہیں اور یہ بھی بول چکے ہیں وہ کس طرح کی شرمناک دھندوں میں ملوث رہ چکے ہیں۔
مولاناسلطان رئیس اور آغا علی رضوی کے خلاف غم وغصہ سے نواز لیگ کی بوکھلاہٹ ظاہر ہورہی ہے،الیاس صدیقی
وحدت نیوز(گلگت) مشیر اطلاعات اور وزیر تعمیرات اپنے گریبان میں جھانکیں تو انہیں معلوم ہوگا کہ وہ کس کھیت کے مولی ہیں۔مولانا سلطان رئیس اور آغا علی رضوی کے خلاف غم و غصہ سے نواز لیگ کی بوکھلاہٹ ظاہر ہورہی ہے۔سلطان رئیس اور علی رضوی گلگت بلتستان کے عوام کے حقیقی ترجمان ہیںجنہوں نے اپنی قائدانہ صلاحیتوںسے خطے کے عوام کے دل جیت لئے ہیں۔
مجلس وحدت مسلمین گلگت بلتستان کے ترجمان محمد الیاس صدیقی نے کہا ہے کہ ہم گلگت بلتستان کے عوامی کے حقوق کی جنگ لڑ رہے ہیں اورآرڈر 2018 گلگت بلتستان کے عوامی امنگوں کے خلاف ہے جسے ہرگز قبول نہیں کرینگے۔نااہل وزیر اعظم کے نااہل کارندے اپنی رسوائی کو چھپانے کیلئے معزز علمائے کرام کے خلاف ہرزہ سرائی پر اتر آئے ہیں۔نواز لیگ جی بی کے عوام کو آئینی حقوق دلوانے میں ناکام ہوکر آرڈر 2018 کو نافذ کرنا چاہتی ہے جو ان کے بادشانہ مزاج کا مظہر ہے۔
انہوں نے کہا کہ وزیر اعلیٰ اور اس کی ٹیم عوام کے احتجاج کا سامنا کرنے کی سکت نہیں رکھتی اور علاقے کے عوام کو تقسیم کرنے کیلئے دھونس دھمکیوں اور مذہبی تعصب کا سہارا لے رہی ہے ۔گلگت بلتستان کا امن یہاں کے علماء اور عوامی ایکشن کمیٹی کی کاوشوں سے بحال ہوا ہے، حفیظ الرحمن کے اقتدار سے امن کو مشروط کرنے والے احمقوں کی جنت میں رہتے ہیں۔گلگت والوں کا دماغ پھراکر کر بلتستان کو ہلادینے کی بات کرنے والے صاف صاف بتادیں کہ وہ کیا چاہتے ہیں۔انہوں نے کہا کہ مجلس وحدت مسلمین نواز لیگ کی ہرسازش کا ڈٹ کرمقابلہ کرے گی اور گلگت بلتستان کے عوام کو جغرافیہ اور فرقے کی بنیاد پر تقسیم کرنے کی ہر سازش کو ناکام بنادے گی۔
