وحدت نیوز(لاہور) وائس چیئرمین مجلس وحدت مسلمین پاکستان علامہ احمد اقبال رضوی نے بانی پاکستان قائد اعظم محمد علی جناح ؒ کے یوم ولادت پر اپنے پیغام میں کہا ہے کہ دیانت ، امانت اور صداقت قائد اعظمؒ کی شناخت تھی۔ انہوں نے عمر بھر عوامی و قومی وسائل اور اثاثوں کی حفاظت کی، عوامی و ریاستی عہدے کو کبھی اپنی ذات کےلئے استعمال نہیں کیا۔

انہوں نے اپنی کامیاب پیشہ ورانہ زندگی کو پاکستان کی آزادی اور پھر معاشی استحکام کے لئے قربان کیا ۔ ایماندار قیادت سے قومیں عروج پاتی ہیں اور بدعنوان ارباب اختیار قوموں کے زوال کا سبب بنتے ہیں اور آج ہم دیکھ بھی رہے ہیں۔ انہوں نے قیام پاکستان کے فوری بعد اقربا پروری ،رشوت ستانی ،ذخیرہ اندوزی سے بچنے کی ہدایت کی تھی مگر آج وہ سب کچھ مملکت خداداد میں دھڑلے سے کیا جارہا ہے جس سے قائد اعظمؒ نے منع فرمایا تھا۔

وحدت نیوز(رحیم یارخان) مجلس وحدت مسلمین پاکستان کے مرکزی سیکرٹری تنظیم علامہ مقصود علی ڈومکی صوبہ پنجاب کے تین روزہ دورہ کے آخری روز رحیم یار خان پہنچے۔ رحیم یار خان میں ایم ڈبلیو ایم صوبہ جنوبی پنجاب کے صوبائی نائب صدر برادر اصغر تقی کی رہائش گاہ پر انہوں نے مستحق مومنین کے درمیان گرم کپڑے اور سوئیٹر تقسیم کئے۔

اس موقع پر گفتگو کرتے ہوئے علامہ مقصود علی ڈومکی نے کہا کہ کسی بھی الہی تنظیم کے کارکنوں کے لئے تعلیم اور تربیت ضروری ہے۔ مجلس وحدت مسلمین نے ملک بھر میں کارکنوں کی تعلیم و تربیت کے لئے اسٹڈی سرکل کا منظم اور مربوط سلسلہ شروع کیا ہے۔ وہی قومیں ترقی کرتی ہیں جن میں مطالعہ کی عادت ہو مطالعہ اور کتاب سے تعلق انسانی فکر میں جدت اور قوت پیدا کرتا ہے۔

انہوں نے کہا کہ مجلس وحدت مسلمین پاکستان کے شعبہ تنظیم سازی کی جانب سے یونٹس کے لئے جامع پروگرام مرتب کیا گیا ہے اور ہم ماہ رجب کو توسیع تنظیم کے طور پر منائیں گے۔ مسجد محور یونٹ کے ذریعے مجلس کے کارکن مسجد سے اپنے تعلق کو مضبوط بنائیں گے۔ مسجد سے تعلق کارکنوں کے کردار کی پاکیزگی اور روحانیت کا سبب بنے گا۔

اس موقع پر مجلس وحدت مسلمین ضلع رحیم یار خان کے ضلعی جنرل سیکرٹری نے ضلعی سطح پر درس قرآن کریم اور کارکنوں کی تعلیم و تربیت سے متعلق اپنی خدمات سے آگاہ کیا اور دینی تعلیم کی اہمیت اور کارکنوں کی لئے نصاب کی افادیت اور مراحل پر تبادلہ خیال کیا۔

وحدت نیوز(گڑھی یاسین) مجلس وحدت مسلمین تحصیل گڑھی یاسین کے صدر سید نوید علی شاہ نقوی نے گاؤں ڈتل جلبانی، گاؤں جھنگل واہن کا تنظیمی دورہ کیا، دونوں یونٹ کی تنظیم نو کی گئی، یونٹ ڈتل جلبانی کے امیر علی جلبانی، اور یونٹ جھنگل واہن کا امیر حسین صدر منتخب ہوئے۔

 اس موقع پر تحصیل گڑھی یاسین کے صدر سید نوید علی شاہ نقوی نے مجلس وحدت مسلمین کے کارکنان اور عہدیداران سے گفتگو کرتے ہوئے کہا کہ ہمیں فخر ہے قائد وحدت ناصرملت علامہ راجہ ناصر عباس جعفری حفظہ اللہ کی قیادت میں ہم مذہبی اور سیاسی سرگرمیاں انجام دے رہے ہیں، علامہ راجہ ناصر عباس جعفری حفظہ اللہ جیسے بابصیرت لیڈر پر پورے پاکستان کو فخر ہے، جب تک رگوں میں خون کا ایک قطرہ بھی موجود رہے گا مجلس وحدت مسلمین پاکستان کے پرچم تلے کام کرتے رہیں گے۔

انہوں نے مزید کہا کہ امید ہے آپ یونٹس میں بھرپور انداز میں پروگرامات کریں گے ، انہوں نے کہا کہ شہداء شکارپور کی برسی کے موقع پر آپ تمام کارکنان اپنی شرکت کو یقینی بنائیں گے، جبکہ اس موقع پر تحصیل گڑھی یاسین کے نائب صدر معشوق علی جلبانی، میڈیا کواڈینیٹر یاسر عباس ابڑو سمیت دیگر عہدیداران ہمراہ تھے۔

وحدت نیوز (گانچھے) صوبائی صدر ایم ڈبلیو ایم گلگت بلتستان آغا سید علی رضوی نے وفد کے ہمراہ گانچھے کا ایک روزہ دورہ کیا۔ دورے کے دوران مذہبی، سیاسی و مختلف پروگراموں میں شرکت کی۔ جامع مسجد فاطمة الزہراء ڈینس خپلو میں شہادت حضرت فاظمہ زہراءؑ کی مناسبت سے منعقدہ مجلس سے خصوصی خطاب کیا۔ وفد نے مرکزی خانقاہِ معلیٰ بالا خپلو کا دورہ بھی کیا، جہاں خانقاہ کمیٹی کے اراکین نے آغا علی رضوی اور انکے وفد کا پرتپاک استقبال کیا۔

 اس موقع پر سابق ممبر جی بی اسمبلی محمد اقبال، غلام نبی سوشل ویلفیئر آفیسر، صوبیدار بلال، ٹھیکیدار احمد علی، عبد الرحیم، حاجی شکور، ماسٹر شکور، محمد یوسف، غلام محمد اور احسان علی سمیت دیگر اراکین نے آغا علی رضوی اور ان کے وفد کا استقبال کیا۔ محمد اقبال نے خانقاہ کا دورہ کرواتے ہوئے کہا کہ آغا علی رضوی صرف اہلِ تشیع کے ہی نہیں ہمارے بھی بزرگ اور رہنما ہیں، مرکزی خانقاہِ معلیٰ کی تعمیر میں جہاں نوربخشیہ برادری نے تعاون کیا وہیں سیاچن سے لیکر کراچی کے ساحلوں تک شیعہ برادری اور دیگر مسالک سے تعلق رکھنے والے افراد نے بھی تعاون کیا۔

اس موقع پر گفتگو کرتے ہوئے صوبائی صدر ایم ڈبلیو ایم آغا علی رضوی نے کہا کہ مجھے آج مرکزی خانقاہِ معلیٰ کی زیارت کرکے قلبی طور پر روحانی تسکین ہوئی، آپ سب کی محبتوں سے انشاء اللہ بلتستان میں اتحاد بین المسلمین کو فروغ ملے گا اور انشاء اللہ ہم آئندہ بھی ملتے رہیں گے۔ ایم ڈبلیو ایم کے وفد میں آغا علی رضوی سمیت علامہ شیخ غلام حسین جوہری نائبِ امام جمعہ و جماعت جامع مسجد فاطمة الزہراءؑ خپلو، شیخ کاظم سرور، کاچو زاہدعلی خان ممبر مرکزی شوریٰ عالی، آغا سید ہادی ممبر تنظیم سازی، آغا زمانی سوشل میڈیا ایکٹوسٹ، کاچو اختر، آغا سید اطہر، وزیر عیسیٰ خان اور برادر حبیب شامل تھے۔