وحدت نیوز(اسکردو) مجلس وحدت مسلمین پاکستان بلتستان ڈویژن کے زیراہتمام یوم آزادی کے موقع پر ڈویژنل سیکرٹریٹ میں ایک جشن کا اہتمام کیا گیا جس میں سیکرٹری جنرل مجلس وحدت مسلمین پاکستان بلتستان ڈویژن علامہ آغا علی رضوی اور کارکنان نے شرکت کی۔ تقریب سے خطاب کرتے ہوئے مجلس وحدت مسلمین پاکستان بلتستان ڈویژن کے سیکرٹری جنرل علامہ آغا علی رضوی نے کہا کہ ظالم اور بدعنوان حکومت نے جہاں ایک طرف عوام کی آزادی سلب کی ہے وہاں وطن عزیز پاکستان کو غیرملکی پالیسیوں کی تجربہ گاہ بالخصوص امریکی مفادات کی کالونی بنا دیا ہے۔ انہوں نے کہا کہ جشن آزادی منانے کا مقصد وطن عزیز پاکستان کو درپیش بیرونی اور اندرونی مسائل کو درک کرنا، اپنی اپنی بساط کے مطابق حل کرنے کی کوشش کرنا اور اقبال و قائد کے پاکستان کو اسلام کا قلعہ بنانا ہے۔

 اس موقع پر انہوں نے کہا کہ جو جماعتیں پاکستان کو لیبرل اور فاشسٹ حکومت بنانے کے درپے ہیں دراصل وہ اقبال و قائد کے روح سے خیانت اور وطن عزیز پاکستان سے غداری کرنے کے مترادف ہے۔ پاکستان کسی لیبرل ڈیموکریسی اور فیوڈلزم یا مارکسزم کا نتیجہ نہیں بلکہ الہٰی مقاصد کے حصول کے لیے لا الہ الا اللہ کی بنیاد پر معرض وجود میں آیا ہے جہاں اسلامی اقدار کا لحاظ ہو اور تمام مکاتب فکر اپنے عقائد کی روشنی میں زندگی بسر کر سکیں۔ پاکستان کو اسلامی اور نظریاتی بنیادوں پر وجود میں لایا گیا تاکہ بانی پاکستان کے فرامین کے مطابق اسلام کا قلعہ بنایا جا سکے۔ اپنی تمام تر مشکلات اور مسائل کے باوجود اب بھی اسلامی جمہوریہ پاکستان عالم اسلام کی امیدوں کا محور ہے۔ جشن آزادی کی تقریب کے اختتام پر ڈویژنل سیکرٹریٹ میں سیکرٹری جنرل کے ہاتھوں کیک بھی کاٹا گیا اور آپریشن ضرب عضب کی کامیابی، پاکستان آرمی کے جوانوں کی سلامتی اور پاکستان کے استحکام و سلامتی کے لیے دعا مانگی گئی۔