وحدت نیوز(سکردو)سیکریٹری جنرل مجلس وحدت مسلمین گلگت بلتستان آغا علی رضوی نے اپنے ایک بیان میں کہا کہ گلگت سکردو روڈ کو فوری بحال کیا جائے،کئی دنوں سے گلگت سکردو روڈ بند ہے جس کی وجہ سے بلتستان میں غذائی قلت کے ساتھ ساتھ ڈیزل اور پیٹرول کی شدید قلت پیدا ہو رہی ہے۔بلتستان بھر میں اسوقت آلو کی فصل تیار ہوچکی ہے اور اس وقت کڑوروں روپے کی مالیت کے آلو خراب ہونے کے خدشات میں روز بروز اضافہ ہو رہا ہے۔ اور اس سے معیشت کو بری طرح نقصان پہنچنے کا امکان ہے لہذا اعلی حکام سے مطالبہ کرتے ہیں کہ فوری طور پر گلگت سکردو روڈ کو بحال کرے بصورت دیگر احتجاج پر مجبور ہوں گے۔
انہوں نے مزید کہا کہ گلگت سکردو روڈ بلتستان کی شہ رگ ہے اس روڈ کا ہفتوں بند رہنا دفاعی اہمیت کے پیش نظر کسی طور خطے کے لئے مناسب نہیں اور خطہ ان دنوں میں بلخصوص سیزن کے آخر میں اور الیکشن کے دنوں میں متحمل نہیں کہ بند رہے۔سیاحت کا سیزن بھی ابھی ختم نہیں ہوا ہے اور ہفتوں سڑک بند رہنے سے معیشت کا پہیہ اس وقت جام ہو چکا ہے لہٰذا متعلقہ حکام سے اپیل ہے کہ جلد از جلد گلگت سکردو روڈ کو بحال کیا جائے۔
