وحدت نیوز(گلگت ) مجلس وحدت مسلمین کے رہنما اپنے امیدواروں کے ہمراہ ایک بڑی ریلی کی شکل میں کاغذات نامزدگی جمع کروانے کیلئے ریٹرننگ آفیسر کے آفس پہنچے اور گلگت حلقہ 1، حلقہ2 اور حلقہ 3 کے امیدواروں نے اپنے کاغذات نامزدگی جمع کروادئیے۔ کاغذات نامزدگی جمع کروانے کے بعد ریلی یونیورسٹی روڈ سے گزرتے ہوئے دنیور چوک اور جوٹیال سے ہوتے ہوئے صوبائی سیکرٹریٹ پر اختتام پذیر ہوئی۔

ریلی کے اختتام پر مجلس وحدت مسلمین گلگت بلتستان کے سیکرٹری جنرل علامہ نیئر عباس مصطفوی نے کارکنوں کے جذبے کو سراہتے ہوئے کہا کہ کارکنوں کے ان جذبات کی موجودگی میں الیکشن میں دھاندلی کے ذریعے عوامی ووٹ چرانے کی کوئی سازش کامیاب ہوتی دکھائی نہیں دیتی اور انشاء اللہ وحدت مسلمین کی الیکشن میں کامیابی یقینی ہے۔ انہوں نے کہا کہ کارکن جدوجہد کو مزید تیز کریں اور اتحاد بین المسلمین کے پیغام کو عام کرتے ہوئے تمام رکاوٹوں کو عبور کریں اور علاقے میں افراتفری اور بے چینی پیدا کرکے سیاسی مفادات حاصل کرنے والے پنڈتوں کوہمیشہ کیلئے سیاست سے دستبردار ہونے پر مجبور کریں۔

انہوں نے کہا کہ وحدت مسلمین گلگت بلتستان کے تمام مسالک کے عوام کی نمائندہ جماعت ہے جس کے پلیٹ فارم سے آج اہل تشیع، اہل تسنن اور شیعہ امامی اسماعیلی امیدواروں نے اپنے کاغذات نامزدگی جمع کروادئیے۔ گلگت حلقہ 1 سے محمد الیاس صدیقی، غلام نبی حلقہ 2 گلگت سے مطہر عباس، ایڈوکیٹ بہرام خان، علی رحمت، ڈاکٹر فرید بیگ اور حلقہ 3 گلگت سے نیئر عباس مصطفوی، امتیاز حسین، اور اکبر حسین نے کاغذات نامزدگی جمع کروادیئے۔حلقہ 4 نگر سے ڈاکٹر علی محمد، ڈاکٹر مستان علی، پروفیسر یعسوب الدین اور شبیر حسین نے جبکہ نگر 5 سے ڈاکٹر علی گوہر،رضوان علی، شیخ محمد عیسیٰ ایڈوکیٹ اور اسلام الدین نے کاغذات نامزدگی جمع کروادیئے۔ہنزہ سے شیخ موسیٰ کریمی اور جلال حسین سابق ممبر ڈسٹرکٹ کونسل ہنزہ نے اپنے کاغذات نامزدگی جمع کروادیئے ۔اس کے علاوہ استور سے لیکچرار اکبر حسین تسنیم اور استور 2 سے عبداللہ خان نے اپنے کاغذات نامزدگی جمع کروادیئے۔

وحدت نیوز (اسلام آباد) مجلس وحدت مسلمین پاکستان کے مرکزی ڈپٹی جنرل سیکریٹری علامہ امین شہیدی نے پشاور میں سابق شیعہ کونسلر عابد حسین قزلباش کی ٹارگٹ کلنگ اور ڈیرہ اسماعیل خان کے علاقے کلاچی میں سیکورٹی فورسز کے قافلے کے قریب دھماکے کے نتیجہ میں سیکورٹی اہلکار کی شہادت کے واقعہ کی مذمت کرتے ہوئے کہا ہے کہ حکومت خیبر پختونخواہ میں اکیسویں ترمیم پر بجا طور پرعمل درآمد کروانے اور اپنی رِٹ منوانے میں ناکام ہے۔ اکیسویں ترمیم کے نام پر قوم سے بھیانک مذاق کیا گیا ہے۔اس آئینی ترمیم کا مقصد یہ تھا کہ ملک دشمن عناصر کے ساتھ آہنی ہاتھوں سے نمٹا جا سکے۔ جو لوگ سیکورٹی اداروں کو چیلنج کر رہے ہیں اور مظلوم عوام کونشانہ بنانے میں مصروف ہیں انہیں قانون کے شکنجے میں لایا جا ئے۔ملک سے عسکریت پسندی کے خاتمے اور ملکی سلامتی کے خلاف مصروف مسلح گروپوں کو غیرمسلح کر کے ان کے خلاف ملکی آئین و قانون کے تحت قانونی تقاضے پورے کرتے ہوئے سخت سزائیں دی جائیں۔لیکن بد قسمتی سے یہ ساری باتیں محض خواب و خیال ثابت ہوئیں۔وطن عزیز میں ملک و قوم کے یہ دشمن آج بھی آزادانہ دندناتے پھر رہے ہیں ۔ان ملک دشمن عناصر کو شکست دینے کے لیے پوری قوت اور نیکی نیتی کے ساتھ آگے بڑھنا ہو گا ۔ان کے مکمل خاتمے کے لیے صرف ان کی کمین گاہوں کا تدارک کافی نہیں بلکہ اس فکری رجحان اور نظریے کو بھی شکست دینا ہو گی جس کے ذریعے دیگر مسالک پر کفر کے فتوے لگا کر وطن عزیز میں شدت پسندی کو فروغ دیا جاتا ہے۔انہوں نے کہا ملک میں امن و امان کو یقینی بنانے کے لیے دہشت گردوں کے ساتھ ساتھ ان ملک دشمن عناصر کے خلاف بھی کاروائی انتہائی ضروری ہے جو دہشت گردوں کی فکری و نظریاتی تربیت میں مددگار ہیں اور ان کے سب سے بڑے سہولت کار کے طور پر ذمہ داریاں ادا کر رہے ہیں۔

علامہ امین شہیدی نے پشاور میں طوفانی بارشوں سے ہونے والے جانی و مالی نقصان پر دلی افسوس کا اظہار کرتے ہوئے کہا ہے کہ قیمتی انسانی جانوں کا ضیاع بلاشبہ ایک ناقابل تلافی نقصان ہے۔اللہ پاک مرحومین کے درجات بلند کریں اور ان کے خاندانوں کو صبر جمیل عطا کریں ۔انہوں نے حکومت سے مطالبہ کیا ہے کہ متاثر علاقوں میں بحالی کا عمل تیز کیا جائے اور متاثرین کی مدد میں کوئی کسر نہیں چھوڑی جائے۔

وحدت نیوز (لاہور) مجلس وحدت مسلمین کے سر براہ علامہ راجہ ناصرعباس جعفری نے کہا ہے کہ (ن) لیگ گلگت بلتستان میں سر کاری وسائل سے انتخابی عمل پر ڈاکہ مارنے کی کوشش کر رہی ہے مگر ہم دھاندلی کرنیوالوں کو رسوا کیے بغیر نہیں چھوڑیں گے، الیکشن کمیشن خاموشی سے سب کچھ دیکھنے کی بجائے سخت ایکشن لیں ورنہ عوام احتجاج پر مجبور ہونگے ۔ صوبائی سیکریٹریٹ  میں مختلف وفود سے گفتگو میں مجلس وحدت مسلمین کے سر براہ علامہ راجہ ناصر عباس جعفری نے کہا کہ(ن) لیگ کو انتخابات میں دھاندلی کر نے کی عادت پڑ چکی ہے مگر انکو گلگت بلتستان میں دھاندلی کر نے کی کسی صورت اجازت نہیں دینگے بلکہ انکا ڈٹ کر مقابلہ کر کے انکی دھاندلی کی تمام کوششیں ناکام بنادیں گے ۔انہوں نے کہا کہ پیپلزپارٹی نے گلگت بلتستان میں جو کر پشن اور لوٹ مار کی ہے اسکی کوئی مثال نہیں ملتی اور اب گلگت بلتستان کے انتخابات میں عوام پیپلزپارٹی سے نہ صرف لوٹی دولت کا حساب لیں گے بلکہ ان کا بھر پور احتساب بھی ہوگا۔ انہوں نے کہا کہ گلگت میں ہر صورت آزاداور منصفانہ انتخابات ضروری ہے اس لیے الیکشن کمیشن کو (ن) لیگ کے سر کاری وسائل استعمال کر نے کا سخت نوٹس لینا چاہیے ۔ ہمارے کارکنوں پر غیر مقامی گورنر کے ایما پر بے بنیاد مقدمات درج کیے گئے ہیں تاکہ الیکشن میں دھاندلی کی راہ میں واحد رکاوٹ ایم ڈبلیوایم کو راستے سے ہٹایا جاسکے۔

وحدت نیوز (اسکردو) مجلس وحدت مسلمین پاکستان بلتستان ڈویژن کے ڈپٹی سیکرٹری جنرل علامہ شیخ زاہد حسین زاہدی نے بلتستان میں آٹا بحران کے خلاف شروع ہونے والی تحریک کی حمایت کرتے ہوئے کہاہے کہ بلتستان میں آٹے کی قلت اور مصنوعی قلت کے خلاف انجمن تاجران کی جانب سے شٹرڈاون ہڑتال کے کال کی بھرپور حمایت کرتے ہیں۔ انہوں نے کہا کہ بلتستان میں مصنوعی طور پر آٹے کی قلت پیدا کرنا وفاقی حکومت کی سازشوں کا شاخسانہ ہے اور اس سے عوام کو گمراہ کرنا چاہتی ہے۔ وفاقی حکومت وہی غلطی دہرانے کی کوشش کر رہی ہے جس غلطی کے سبب پاکستان پیپلز پارٹی کی ساکھ گلگت بلتستان میں متاثر ہوگئی تھی اور انکی قیادت کا ماننا ہے کہ انہوں نے گندم سبسڈی ختم کرکے غلطی کی تھی اور اب یہی غلطی لیگی حکومت دہرا رہی ہے۔

انہوں نے کہا کہ بلتستان میں آٹے کی بدترین قلت سے وفاقی حکومت کے زبانی دعوں اور بلتستان کو جنت کا ٹکرابنانے کی باتیں کھوکھلی ثابت ہو رہی ہیں۔ا نہوں نے کہا کہ بلتستان میں آٹے کی قلت نگران حکومت اور وفاقی حکومت کی ناکامی اور خطہ کے ساتھ معاندانہ رویہ کی عکاسی کر تا ہے۔ شیخ زاہدحسین زاہدی نے کہا کہ وفاقی حکومت بڑے بڑے دعوے کرنے کی بجائے ان بنیادی سہولتوں اورحقوق کو بہم مہیا کریں جو پہلے سے موجود تھیں۔ آٹے کی مصونی قلت پید ا کر کے اور بعد میں ترسیل بڑھا کر گلگت بلتستان کے عوام پر احسان جتانا چاہتی ہے اور الیکشن میں بہتر نتائج حاصل کرنا چاہتی ہے۔ یہ قوم باشعور ہو چکی ہے اور اب اس طرح کی دوغلی پالیسوں کو کامیاب ہونے نہیں دے گی۔