وحدت نیوز (کراچی) مجلس وحدت مسلمین کراچی ڈویژن اور پاکستان عوامی تحریک کے تحت یوم شہداء کی مناسبت سے صوبائی دارالحکومت کراچی میں نمائش چورنگی ایم اے جناح روڈ پر تعزیتی جلسہ کا انعقاد کیا گیا جو کہ علامتی دھرنے کی صورت اختیار کر چکا ہے۔ علامتی دھرنے میں ہزاروں کی تعداد میں عاشقان مصطفیٰ شریک ہیں، اس موقع پر مجلس وحدت مسلمین، پاکستان عوامی تحریک، مسلم لیگ (ق)، سنی اتحاد کونسل سمیت دیگر سیاسی و مذہبی تنظیموں کے رہنما و کارکنان بی بڑی تعداد میں شریک ہیں اور شہدائے ماڈل ٹاؤن و شہدائے افواج پاکستان کیلئے قرآن خوانی کا سلسلہ جاری ہے۔ علامتی دھرنے سے خطاب کرتے ہوئے ایم ڈبلیو ایم کے رہنماء علامہ علی انور جعفری، علامہ مبشر حسن ، علی حسین نقوی، علامہ حسن ہاشمی،انجینئر رضا نقوی، سنی اتحاد کونسل کے مرکزی رہنما طارق محبوب، مفتی اقبال نقشبندی، پاکستان عوامی تحریک کے رہنما ممتاز سیال، اظہر خان ایڈووکیٹ، عوامی مسلم لیگ کے رہنما محفوظ یار خان، مسلم لیگ ق کے رہنما نعیم عادل شیخ و دیگر مقررین نے کہا کہ نواز حکومت کے دن گنے جا چکے ہیں، کرپٹ حکومت نے عوام کا جینا دوبھر کر دیا ہے۔ انہوں نے کہا کہ دہشتگردی کے ذریعے حکومت کرنے والے جان لیں کہ کفر سے تو حکومت چل سکتی ہے لیکن ظلم کی حکومت کبھی بھی نہیں چل سکتی، کرپٹ نواز حکومت کے اقتدار کا سورج کسی بھی وقت غروب ہونے کو ہے، ظالم حکمران زیادہ دیر اقتدار میں نہیں رہیں گے ۔

مقررین کا کہنا تھا کہ آج نام نہاد شریفوں کے چہرے سے شرافت کا نقاب اتر چکا ہے، آج ضیا الحق کے معنوی فرزند نواز شریف نے اس آمر کو بھی شرما دیا ہے، وہ وردی پہن کر ظلم کرتا تھا یہ جمہوریت کے لبادے میں مظالم کے پہاڑ توڑ رہے ہیں۔ مقررین نے کہا کہ آج وقت آ گیا ہے کہ تم دہشت گردوں کی سرپرستی میں اتنے آگے نکل گئے تھے کہ قاتل اعلیٰ پنجاب نے طالبان سے مخاطب ہو کر کہہ دیا تھا کہ آپ تو ہمارے بھائی ہو، پنجاب میں وارداتیں نہ کرو، آج انہوں نے طالبان کو تحفظ دینے کی بھر پور کوشش کی۔ مقررین کا مزید کہنا تھا کہ بدمعاش حکمران اب الیکٹرونک میڈیا کی نشریات روک رہے ہیں تاکہ آپ کی آواز لوگوں تک نہ پہنچے۔

رہنماؤں کا کہنا تھا کہ حکمران کہہ رہے کہ ہمارا یہ باہر آنا آپریشن ضرب عضب کو ناکام کرنے کی سازش ہے، افسوس قاتل مظلوم بننے کی کوشش کر رہے ہیں، یہ تو خود آپریشن کے مخالف تھے۔ مقررین نے کہا کہ ہر گزرتا دن نواز حکومت کے اقتدار کو بحر ہند میں غرق کرتا جائے گا۔ رہنماؤں کا کہنا تھا کہ ہماری خوش قسمتی ہے کہ تکفیری خارجیوں نے جس طرح کاماحول بنا کر شیعہ سنی کو لڑانے کی کوشش کی تو آج دیکھ لیں کہ شیعہ اور سنی اس پنڈال میں ایک قوت بن کر کھڑے ہیں۔ رہنماؤں کا کہنا تھا کہ کرپٹ حکمرانوں نے ہمیں روکنے کیلئے پوری طاقت استعمال کی، اپنے درندے ہونے کا پورا ثبوت دیا۔

انہوں نے کہا کہ ہماری قوم ہر بے گناہ خون کے ایک ایک قطرے کا حساب لے گی، تنگ نظر اور ڈکٹیٹر مزاج حکمرانوں کا جمہوریت سے کوئی تعلق نہیں اور نہ پاکستانی نظام جعلی جمہوریت اور جعلی مینڈیٹ سے چلایا جاسکتا ہے۔ پاکستان کی عوام آل سعود کی 35 سالہ غلامی کے نظام سے تنگ آچکی ہے۔ تمام مکاتب فکر اور مذاہب کے لوگ عوامی احتجاجات میں شرکت کرکے نئے پاکستان، اخوت و محبت کے پاکستان، رواداری و ملنساری کے پاکستان، خوشحال اور ترقی یافتہ پاکستان، علامہ اقبال اور قائداعظم محمد علی جناح کے پاکستان کی تشکیل میں اپنا اپنا کردار ادا کریں۔ ہماری سکیورٹی اور دیگر انتظامی اداروں میں سروس کرنے والے افسران اور اہلکار ان ظالموں کے اشاروں پر انکی کرسیاں بچانے کیلئے اپنے ہی بہن بھائیوں کو اذیت دینے اور انکے خون سے ہولی کھیلنے سے پرہیز کریں۔ سانحہ ماڈل ٹاون سے عبرت حاصل کریں، کوئی بھی عوام کی عدالت یا پھر خدا کی عدالت سے نہیں بچ سکے گا۔

وحدت نیوز(اسکردو) مجلس وحدت مسلمین پاکستان بلتستان ڈویژن کے زیراہتمام ڈویژنل سیکرٹریٹ میں دہشت گردوں، ملک دشمن اور اسلام دشمن طاقتوں کے خلاف برسرپیکار پاکستان آرمی کے آپریشن ضرب عضب میں شہید ہونے والے جوانوں اور جعلی مینڈیٹ سے برسراقتدار آئے ظالم حکمرانوں کے ہاتھوں عوامی تحریک پاکستان کے کارکنان جو کہ سانحہ ماڈل ٹاون میں شہید ہوئے کے ایصال ثواب کے لیے قرآن خوانی کا پروگرام ڈویژنل سطح پر منعقد ہوا جس میں مجلس وحدت مسلمین پاکستان بلتستان ڈویژن کے رہنماوں کے علاوہ کارکنان کی بڑی تعداد نے شرکت کی۔ قرآن خوانی کی تقریب سے خطاب کرتے ہوئے سیکرٹری جنرل مجلس وحدت مسلمین پاکستان بلتستان ڈویژن علامہ آغا علی رضوی نے کہا کہ دہشت گردوں کے خلاف پاکستان آرمی کی جانب سے جاری آپریشن ضرب عضب ہزاروں شہداء کے وارثین کی خواہشوں کا ترجمان ہے۔ یہ اور اس طرح کے آپریشن وطن عزیز کی سلامتی اور استحکام کے لیے ناگزیر ہیں۔ وہ سیاسی جماعتیں بالخصوص پاکستان مسلم لیگ نون جو کہ دہشت گردوں کیلئے نرم گوشہ رکھتی ہیں کی مرضی کے خلاف پاکستان آرمی نے آپریشن کر کے ثابت کر دیا ہے کہ موجودہ وفاقی حکومت کی پالیسیاں ملکی سلامتی کے لیے خطرہ ہیں اور اس حکومت کے ہوتے ہوئے نہ دہشت گردی کو ختم کیا جا سکتا ہے اور نہ پاکستان میں حقیقی جمہوری دور آ سکتا ہے۔

انہوں نے مزید کہا کہ موجودہ حکومت نے آمریت کی نئی تاریخ رقم کی ہوئی ہے۔ نواز حکومت نے جس طرح عوامی تحریک کے کارکنان پر حملہ کیا اس سے ان کے خونین ارادے معلوم ہوتے ہیں۔ موجودہ حکومت کی غیرجمہوری پالیسیوں کے سبب اسلام آباد اور لاہور دونوں غزہ کا منظر پیش کر رہے ہیں۔ انہوں نے پورے ملک کو یرغمال بنا کر رکھا ہوا ہے۔ لاہور میں عوامی تحریک کی جانب سے اپنے شہداء کے لیے قرآن خوانی انکا جمہوری حق ہے، اسے کوئی نہیں روک سکتا اس روکنے کی کوشش دراصل تخت لاہور کے شاہوں کی بوکھلاہٹ کا ثبوت ہے۔ یہ پاکستان کی بدترین تاریخ ہے جس میں پاکستان کے سکیورٹی ادارے اپنے ہی شہریوں پر گولیاں برسائیں اور درجنوں کو خاک و خون میں لت پت کرنے کے بعد بھی حکومتی شخصیات کو ذرہ برابر شرمندگی نہ ہو بلکہ ہل من مزید کے نعرے بھی لگائے۔ اس طرح کے اوچھے ہتھکنڈے غاصب، کرپٹ، بدعنوان، بدمعاش، ظالم اور آمر حکمرانوں کو غرق کر دیں گے۔ پروگرام میں شہداء کے ایصال ثواب کے لیے قرآن خوانی کی گئی اور شہدائے ضرب عضب اور شہدائے سانحہ ماڈل ٹاون کے درجات کی بلندی کے لیے دعا بھی مانگی گئی۔

وحدت نیوز(کوہاٹ) مجلس وحدت مسلمین صوبہ خیبر پختونخواہ کےذیر اہتمام قومی امام بارگاہ استرزئی پایان میں یوم عزم امام حسین ع بمناسبت برسی شہید قائد علامہ عارف حسین الحسینی ع سے خطاب کرتے ہوئے مجلس وحدت مسلمین کے سربراہ علامہ ناصرعباس جعفری نے کہا کہ ہمارا ایمان ہے کہ ہمارےآئمہ (ع) معصوم اور حجت خدا ہیں۔ ان کے فرامین پر عمل پیرا ہو کر ہم عظمتوں کی بلندیوں تک پہنچ سکتے ہیں۔ وہ قطب عالم امکاں اور لسان اللہ ہیں۔ معصوم (ع) کا فرمان ہے کہ جس نے اپنے زمانے کو پہچانا وہ محفوظ ہو گیا، امن پا گیا۔ تو زمانے کے حوادث اورا پنے دشمن کی پہچان، دشمن سے نبردا ٓزما ہونے کے لئے انتہائی ضروری ہے۔ دشمن کے دوست اور ساتھی کی پہچان بھی ضروری ہے۔ دشمنی کی وجہ، مقصد و ہدف دشمن، دشمنی کا طریقہ کاراور اپنے رہبر کی پہچان یہ سب انتہائی ضروری اہداف ہیں۔ کروڑوں کا لشکر رہبر کے بغیر کامیاب نہیں ہو سکتا۔ سید حسن نصر اللہ نے سب سے پہلے دشمن کی پہچان کی اور طے کیا کہ اصلی دشمن اسرائیل ہے اور اس کے خلاف ڈٹ گئے۔

اسی طرح ہمارا دشمن عالمی استکبار امریکہ و اسرائیل اور عرب ممالک ہیں۔ ملک کے اندر ان کے آلہ کار موجود ہیں۔ ضیاء کے زمانےسے دشمنی کا آغاز ہوا۔ دشمن نے تکفیر کے فتووں کے ذریعہ ہمیں تنہا کرنے کی کوشش کی۔ تکفیریوں کو جعلی سنی بنا کر پیش کیا گیا۔ ایسے میں شہید قائد نے قوم کا پرچم اٹھایا اور قوم میں ایک نئی روح پھونکی۔ دشمن نے قوم کے لئے اندرونی رکاوٹیں کھڑی کیں۔ جن کا قائد شہیدنے حکمت و تدبیر اور جرات سے مقابلہ کیا، دشمن کو بری طرح شکست ہوئی، دشمن نے علامہ عارف حسین الحسینی کو راستے سے ہٹانے کا فیصلہ کر لیا اور شہید کر دیا گیا۔ ہم شیعہ دشمن قوتوں کو معاف نہیں کریں گے ان کا تعاقب کیا جائے گا۔ امریکہ، اسرائیل، سعودی ممالک اور تکفیریت کے منحوس اتحاد نے ہم سے قائد کو چھینا، ہم شہید قائد کا انتقام لیں گے۔ جس کے لئے ہمیں قومی طور پر بھرپور انداز میں منظم ہونا ہوگا۔

ہم شہید قائد کے نقش قدم پر چلتے ہوئے قومی اتحاد و وحدت کے لئے سفید کاغذ پر دستخط کرنے کے لئے تیار ہیں۔ شیعہ قوم کے اتحا د کے لئے ہمیں ہر طرح کی شرائط قبول ہیں۔ اہل سنت نے سانحہ عاشور کی مشکل گھڑی میں ہمارا ساتھ دیا، ہم باغیرت قوم ہیں مشکل وقت میں اہل سنت کا ساتھ نہیں چھوڑیں گے۔ ان خواتین کا کیا قصور تھا جن کے منہ میں گولیاں ماری گئیں۔ ہم نے فوج اور تکفیر کے مابین موجود معاہدہ کو ختم کرا دیا ہے۔ فوج اب تبدیلی لانا چاہتی ہے۔ نواز حکومت کو گرانا سعودی نفوذ کو کم کرنے کے لئے انتہائی ضروری ہے۔

وحدت نیوز(لاہور) مجلس وحدت مسلمین کے مرکزی رہنما علامہ امین شہیدی نے ماڈل ٹاؤن لاہور میں یوم شہداء کی تقریب سے خطاب کرتے ہوئے کہا کہ کربلا میں امام حسین علیہ السلام نے قربانی دی، اس کے بعد کربلا کے جناب زینب سلام اللہ علیہا اور حضرت زین العابدین علیہ السلام وارث تھے، انہوں نے اس پیغام کو دنیا تک پہنچایا اور یزید کو گالی بنا دیا، آج شہدائے ماڈل ٹاؤن کے وارث آپ ہیں، آپ نے کربلائے ماڈل  ٹاؤن کو زندہ کرنا ہے۔ انہوں نے کہا کہ آج شریفوں کے چہرے سے شرافت کا نقاب اتر چکا ہے۔ انہوں نے کہا کہ آج ضیاءالحق کے معنوی فرزند نواز شریف نے اس آمر کو بھی شرما دیا ہے، وہ وردی پہن کر ظلم کرتا تھا اور یہ جمہوریت کے لبادے میں مظالم کے پہاڑ توڑ رہے ہیں۔ انہوں نے کہا کہ آج یہ وقت آگیا ہے کہ تم دہشت گردوں کی سرپرستی میں اتنے آگے نکل گئے تھے کہ قاتل اعلٰی نے طالبان سے مخاطب ہو کر کہہ دیا تھا کہ آپ تو ہمارے بھائی ہو، پنجاب میں وارداتیں نہ کرو، آج انہوں نے طالبان کو تحفظ دینے کی بھرپور کوشش کی۔

علامہ امین شہیدی نے کہا کہ اب ٹی وی کی نشریات روک رہے ہیں، تاکہ آپ کی آواز لوگوں تک نہ پہنچے۔ انہوں نے کہا کہ حکمران کہہ رہے کہ ہمارا یہ باہر آنا آپریشن ضرب عضب کو ناکام کرنے کی سازش ہے، افسوس قاتل مظلوم بننے کی کوشش کر رہے ہیں، یہ تو خود آپریشن کے مخالف تھے۔ علامہ امین شہیدی نے کہا کہ ہر گزرتا دن ان کے اقتدار کو بحر ہند میں غرق کرتا جائے گا۔ انہوں نے کہا کہ ہماری خوش قسمتی ہے کہ خارجیوں نے جس طرح کا ماحول بنا کر شیعہ سنی کو لڑانے کی کوشش کی، تو آج دیکھ لیں کہ شیعہ اور سنی اس پنڈال میں ایک قوت بن کر کھڑے ہیں۔ انہوں نے کہا کہ حکمرانوں نے ہمیں روکنے کے لئے پوری طاقت استعمال کی، اپنے درندے ہونے کا پورا ثبوت دیا۔ لاہور اور پورے ملک کو سیل کیا، لیکن عوام کا سمندر نکلا اور ماڈل ٹاؤن تک پہنچا ہے۔ انہوں نے کہا کہ یہ لاکھوں لوگ رکاوٹیں عبور کرکے پہنچے ہیں، اگر کھلی اجازت ہوتی آج حکمرانوں کے اقتدار کا آخری دن ہوتا۔