وحدت نیوز (گلگت) لاہور دھماکہ پنجاب حکومت کی کالعدم جماعتوں کیساتھ ہمدردی کا نتیجہ ہے۔ پاک فوج کی جانب سے پنجاب میں دہشت گردوں کے خلاف بے رحم آپریشن کی مکمل حمایت کرتے ہیں۔
مجلس وحدت مسلمین گلگت بلتستان شعبہ خواتین کی رہنما و رکن گلگت بلتستان اسمبلی بی بی سلیمہ نے گزشتہ روزلاہور دھماکے کے نتیجے میں شہید ہونے والے بے گناہ افراد کے لواحقین سے اظہار ہمدردی کرتے ہوئے تعزیت و تسلیت پیش کرتے ہوئے کہا کہ سوگواروں کے غم میں برابر کے شریک ہیں۔مٹھی بھر دہشت گردوں نے ملک کا امن تباہ کردیا ہے اور ان دہشت گردوں کے خلاف بے رحم آپریشن ناگزیر ہوچکاہے اور جنوبی پنجاب میں دہشت گردوں کے مضبوط ٹھکانوں کو تباہ کرنے کیلئے آپریشن ضرب عضب کی طرز کا بے رحم آپریشن وقت کی ضرورت ہے۔انہوں نے پاک فوج کی طرف سے پورے پنجاب میں دہشت گردوں کے خلاف آپریشن کو خوش آئند قرار دیتے ہوئے کہا کہ معصوم انسانی جانوں کو کشت و خون میں نہلانے والے دہشت گردوں کے خلاف بے رحمانہ آپریشن ہی اس ملک کو دہشت گردی سے نجات دلاسکتا ہے۔انہوں نے کہا کہ کالعدم تنظیموں اور تکفیری دہشت گردوں کے حمایتی پارلیمنٹ تک پہنچ چکے ہیں جن کے خلاف کاروائی کرنے سے حکومتیں بے بس نظر آرہی ہیں اور ان حالات میں افواج پاکستان سے ہی عوام کی امیدیں وابستہ ہیں کہ وہ ان دہشت گردوں اور ان کے سہولت کاروں کا اس پاک سرزمین سے نام و نشان مٹادیں گے۔انہوں نے مزید کہا کہ آئے روز شاہراہ قراقرم پر دہشت گردی کے خطرات کے عنوان سے صوبائی حکومت کو وزارت داخلہ سے مراسلے موصول ہورہے ہیں ان ممکنہ خطرات کے تدارک کیلئے حکومت کی سنجیدگی نظر نہیں آرہی ہے اس لئے فورس کمانڈر گلگت بلتستان سے اپیل ہے کہ علاقے میں دہشت گردی کے خطرات کے پیش نظرٹھوس اقدامات کریں تاکہ بے گناہ انسانی جانوں کے ضیاع سے بچا جاسکے۔

وحدت نیوز(گلگت) حکومت ہسپتالوں میں بیگار لے رہی ہے ڈسٹرکٹ ہیڈ کوارٹر ہسپتال کو رضاکاروں نے گزشتہ پانچ سالوں سے سنبھالا ہوا ہے جبکہ ریگولر تنخواہ لینے والے 70 سے زائد ملازمین دس سالوں سے لاپتہ ہیں کوئی پوچھنے والا نہیں۔وزیر اعلیٰ پیکیج کے تحت عارضی ملازمین کو ماہانہ 10 ہزار روپے دینے کا اعلان کیا تھا ہیلتھ ایڈمنسٹریشن نے اس سہولت سے بھی عارضی ملازمین کو محروم رکھا ہے۔

مجلس وحدت مسلمین گلگت بلتستان کے ترجمان محمد الیاس صدیقی نے اپنے بیان میں کہا ہے کہ گلگت بلتستان حکومت عوامی مسائل حل کرنے کی بجائے عوام کے مسائل میں اضافہ کرتی جارہی ہے ۔ڈی ایچ کیو ہسپتال گلگت وہ واحد ادارہ ہے جو یہاں کے غریب عوام کو صحت کی بنیادی سہولتیں فراہم کررہا ہے لیکن سابقہ اور موجودہ حکومت دونوں نے اس ادارے کو تباہ کرنے میں کوئی کسر نہیں چھوڑی ہے۔ماہرڈاکٹرز سے ہسپتال خالی ہوچکا ہے جبکہ ہسپتال مذکورہ میں جدید آلات و مشینری کے ضروری لوازمات نہ ہونے کی وجہ سے یہ مشینری زنگ آلود ہوچکی ہے اور حکمرانوں کی عدم دلچسپی سمجھ سے بالاتر ہے۔انہوں نے کہا کہ ڈسٹرکٹ ہیڈ کوارٹر ہسپتال جہاں مریضوں کا بے تحاشا رش ہوتا ہے اور روزانہ ہزاروں مریض یہاں علاج معالجے کی غرض سے پہنچ جاتے ہیں لیکن سہولیات کی عدم موجودگی سے غریب مریض یا تو موت کے منہ میں چلے جاتے ہیں یا پھر انہیں ریفر لیٹر تھمادیا جاتا ہے۔عرصہ دراز سے ہسپتال کو رضاکاروں نے سنبھالا ہوا ہے اور اگر یہ رضاکار ہڑتال کریں تو ہسپتال بند ہونے کا خدشہ پایا جاتا ہے۔انہوں نے کہا کہ ان عارضی ملازمین کی خدمات کے پیش نظر فوری طور پر انہیں مستقل کیا جائے اور جب تک انہیں مستقل نہیں کیا جاتا وزیر اعلیٰ پیکج کے تحت ان ملازمین کو تنخواہوں کا اجراء کیا جائے۔

وحدت نیوز (اسلام آباد) مجلس وحدت مسلمین پاکستان کے سالانہ مرکزی تنظیمی وتربیتی پیام وحدت کنونشن کا دعوتی عمل تیزی کے ساتھ جاری ہے، اس سلسلے میں چیئرمین کنونشن اقرار حسین ملک نے مرکزی کابینہ کے اراکین نثارعلی فیضی، علامہ اصغر عسکری اورعلامہ علی شیر انصاری کے ہمراہ سربراہ جامعتہ الکوثراسلام آباد بزرگ عالم دین علامہ شیخ محسن نجفی، سینئراساتیذجامعہ علامہ فداحسین مطہری اور شیخ مہدی کروی ، شیعہ علماءکونسل کے مرکزی رہنما علامہ عارف حسین واحدی سمیت تمام علمائے کرام کو شرکت کی دعوت دی،چیئرمین کنوکشن نے نمائندہ وفدکے ہمراہ لاہور میں جامعہ عروۃالوصقیٰ کے سربراہ علامہ سید جواد نقوی ، سربراہ مدارس جعفریہ علامہ سید حسین نجفی اور دیگر اساتیذسے ملاقات کی اور انہیں مرکزی کنونشن میں شرکت کی دعوت دی،چنیوٹ میں جامعہ بعثت کے علامہ مہدی کاظمی اور تمام اساتیذ اور علمائے کرام کو کنونشن میں شرکت کی دعوت دی،جامعہ دارالعلوم  محمدیہ سرگودھا کے مدیر اعلیٰ علامہ ملک نصیر حسین سے ملاقات کی اور انہیں مرکزی کنونشن میں شرکت کی دعوت دی، بعدازاں چیئرمین کنونشن اقرار حسین ملک نے مرکزی صدر آئی ایس او علی مہدی ، مرکزی چیئرمین آئی اولعل مہدی خان کو انکے دفاترمیں جاکر مرکزی کنونشن میں شرکت کی دعوت دی جسے انہوں نے قبول کرلیا۔

وحدت نیوز (لاہور) سربراہ مجلس وحدت مسلمین پاکستان علامہ راجہ ناصر عباس جعفری کے حکم پرمجلس وحدت مسلمین پنجاب کے صوبائی ڈپٹی سیکرٹری جنرل علامہ محمد اقبال کامرانی کی قیادت میں وفد کا جناح ہسپتال لاہور کا دورہ،گلشن اقبال دھماکے میں زخمی ہونے والے شہریوں کی عیادت اور میڈیا سے گفتگو،وفد میں مسئول معاون امور سیاسیات آصف رضا ایڈوکیٹ،سیکرٹری سیاسیات لاہور ڈویژن سید حسین زیدی،ڈپٹی سیکرٹری جنرل لاہور رانا ماجد علی،سیکرٹری یوتھ ونگ لاہور آغا نقی مہدی،شیخ عمران علی ودیگر رہنما شامل تھے،میڈیا سے گفتگو کرتے ہوئے مجلس وحدت مسلمین پنجاب کے ڈپٹی سیکرٹری جنرل علامہ محمد اقبال کامرانی کا کہنا تھا کہ لاہور میں معصوم بچوں،خواتین اور نہتے شہریوں پر شب خون مارنے والوں کا اسلام سے تو کیا انسانیت سے کوئی تعلق نہیں،ہم ان مجروحین اور شہداء کے خانوادگان کے درد کو سمجھ سکتے ہیں کیونکہ گذشتہ کئی سالوں سے ہم اپنے چوبیس ہزار سے زائد پیاروں کو وطن دشمنوں کے ہاتھوں کھو چکے ہیں،طالبان اور دہشت گردوں کیخلاف روز اول سے آپریشن کا مطالبہ ہمارا تھا،لیکن مفاد پرست سیاست دانوں کی غفلت نے ساٹھ ہزار سے زائد پاکستانیوں کو ان درندوں کے ہاتھوں شہید کروادیے۔

انہوں نے کہاکہ  میڈیا کے دوست اس بات کی گواہی دیں گے ہم نے پنجاب میں ان کی کمین گاہوں خصوصاََ جنوبی پنجاب میں ان کی صف بندیوں پر چیختے چلاتے رہے لیکن حکمرانوں کی کانوں پر جوں تک نہیں رینگی،آج درجنوں معصوم جانوں کے ضیاع کے بعد آپریشن کا اعلان کیا گیا،کیا ہمیں دہشت گردوں کیخلاف آپریشن کے لئے ہر دفعہ سینکڑوں جانوں کی قربانی دینی ہونگے،پنجاب میں ان دہشت گردوں کے سہولت کار اور سرپرست آزادی سے اپنے گھناونے سازشوں میں مصروف ہیں اور ان درندوں کے ہمدرد حکومتی صفوں میں بھی موجود ہیں،بلاتفریق آپریشن کے بغیر اس ناسور سے چھٹکارا ممکن نہیں،پوری دنیا میں دہشت گردی اور بربریت کے پیچھے کار فرما تکفیر ی قوتوں کے اصل سرپرست ہمارے ازلی دشمن بھارت،اسرائیل اور امریکہ ہے،جو آج پاکستان کی سلامتی کیخلاف سازشوں میں مصروف ہیں،ہمیں ایک قوم بن کر ان ظالم درندوں کیخلاف میدان میں حاضر رہنا ہوگا ،اور اس مٹھی بھر تکفیری سوچ  کو شکست دے کر قائد اور اقبال کے پاکستان کو پھر سے امن محبت کا گہوارا بنا نا ہوگا۔

وحدت نیوز (سکھر) مجلس وحدت مسلمین ضلع سکھرشعبہ خواتین کے تحت پریس کلب آڈیٹوریم میں یوم خواتین بمناسبت ولادت باسعادت حضرت فاطمہ زہرا سلام اللہ علیہا منعقد کیا گیاجس میں سکھر اور گردو نواح سے شیعہ سنی مکاتب فکر سے تعلق رکھنے والی سینکڑوں خواتین نے شرکت کی،تقریب کے مہمان خصوصی  قائد وحدت علامہ ناصرعباس جعفری، مرکزی سیکریٹری جنرل شعبہ خواتین خانم زہرا نقوی تھے جنہوں نےسیرت دختر رسول ﷺحضرت فاطمہ زہراس پر جامع روشنی ڈالی اور جناب سیدہ س کی انقلابی سیاسی جدوجہد کا احاطہ کیا، جبکہ دیگر مقررین میں ضلعی سیکریٹری جنرل ایم ڈبلیوایم چوہدری اظہرحسن اور ضلعی سیکریٹری جنرل شعبہ خواتین خانم شبانہ میرانی شامل تھے، عالمی شہرت یافتہ شاعر اہل بیت ظفرعباس  ظفر نے نذرانہ عقیدت بھی پیش کیا ،تقریب میں مقابلہ حسن قرآت کا انعقاد بھی کیا گیا جس میں مختلف بچیوں نے سیرت حضرت فاطمہ زہرا س پر موضوعاتی تقاریر پیش کیں ، کامیاب ہونے والی بچیوں میں انعامات تقسیم کیئے گئے، تقریب کے اختتام پر علامہ ناصرعباس جعفری،ظفرعباس ظفر، خانم زہرا نقوی، چوہدری اظہر حسن، احسن عباس رضوی اور سکھر ڈویژن کی معروف خواتین بانیان مجالس میں اعزازی شیلڈز تقسیم کی گئیں ۔

وحدت نیوز (اسلام آباد) مجلس وحدت مسلمین پاکستان کے ڈپٹی سیکرٹری جنرل و سیکرٹری امور خارجہ ڈاکٹر علامہ سید شفقت حسین شیرازی نے اقبال پارک لاہور میں ہونے والے بم دھماکے کی شدید الفاظ میں مذمت کرتے ہوئے کہا کہ جب تک دہشتگردوں کے سہولت کاروں کو پھانسی نہ دی جائے، تب تک اس طرح کے دردناک واقعات ہوتے رہیں گے۔ دہشتگرد اپنی بزدلانہ کارروائیوں کے ذریعے ملت پاکستان کے حوصلے پست کرنا چاہتے ہیں۔ علاوہ ازیں ایم ڈبلیو ایم کے مرکزی رہنما نے کہا کہ حکومت اور انتظامی اداروں کو چاہیے کہ وہ ان جیسے واقعات کو روکنے کے لئے عملی اقدامات اٹھائیں، ورنہ اسی طرح خواتین، جوان اور معصوم بچے شہید ہوتے رہیں گے۔ ہم شہداء کے لواحقین کے دکھ میں برابر کے شریک ہیں اور ان کے لئے دعاگو ہیں کہ اللہ تعالٰی تمام خاندانوں کو انصاف اور صبر عطا کرے۔