وحدت نیوز (اسلام آباد) مجلس وحدت مسلمین پاکستان کے مرکزی سیکریٹری جنرل علامہ راجہ ناصرعباس جعفری نے میڈیا سیل سے جاری بیان میں کہاکہ پلوامہ حملے کے بعدکشمیر مسلمانوں پر بھارتی جارحیت میں اضافے اور پاکستان پر بے بنیاد الزامات کی بوچھاڑکی مذمت کرتے ہیں، پلوامہ میں حملہ مودی سرکارکی الیکشن کمپین کا حصہ تھا،بھارتی حکومت نے ہمیشہ دہشت گردی کے الزامات پاکستان پر عائد کرکے سفارتی سطح پر دبائوبڑھانا چاہا ہے ، بھارت کشمیر میں اپنی ناکامیوں اور کمزوریوں کا سارا ملبہ ہمیشہ پاکستان پر ڈالتا آیاہے۔

 پلوامہ میں بھارتی افواج پر خودکش حملے اور بھارتی حکومت کی جانب سے اس حملے میں پاکستان کو ملوث قراردیئے جانے پر وزیر اعظم عمران خان کے دوٹوک اور منہ توڑموقف کی تعریف کرتے ہوئےعلامہ راجہ ناصرعباس نے کہاکہ وزیر اعظم عمران خان کا بھارتی دھمکیوں پر جرائت مندانہ موقف ہر پاکستانی کے دل کی آوازہے،وزیر اعظم کی تقریر عوامی جذبات اور احساسات کی درست ترجمانی تھی،بھارت کشمیر میں ہونے والی ہر دہشت گردی میں پاکستان کو ملوث قرار دیکر عالمی برادری کی نگاہ میں مظلوم بننے اور پاکستان کو دہشت گردثابت کرنے کی مذموم کوشش کرتاہے ، وزیر اعظم کی پلوامہ حملے سے پاکستان کے اظہار لاتعلقی کی عقلی اور منطقی دلیلوں نے مودی سرکار کی تمام تر سازشوں کو ناکام بنادیاہے،پاکستانی قوم متحد ہے اور کسی بھی قسم کی بھارتی جارحیت یا گیدڑبھپکیوں کا جواب دینے کی بھرپور صلاحیت رکھتی ہے۔

ہندوستانی عوام کو بھی چاہئے کہ وہ مودی سرکار کی نفرت انگیز سیاسی روش کو مسترد کریں ، مودی کے انتہاپسندانہ سوچ اور جنگی جنون سے باہر نکلیں اور خطے میں امن ومحبت کے قیام کیلئے اپنا کرداراداکریں ،مغربی ممالک اپنی معیشت میں مضبوطی کے لئے ایشیائی ممالک کو اپنی سستی منڈی تصور کرتے ہیں ہم اچھے پڑوسی کے ناتے ایک دوسری کے ساتھ تجارتی ، سفارتی اور معاشی تعلقات میں بہتری لاکر مضبوط ایشیائی بلاک تشکیل دے سکتے ہیں ۔

وحدت نیوز (اسلام آباد) مجلس وحدت مسلمین پاکستان کے مرکزی ڈپٹی سیکرٹری جنرل علامہ احمد اقبال رضوی نے کہا ہے سعودی ولی عہد کا دورہ پاکستان اور ان کے وزراء کے بیانات سے خطے میں سعودی ایجنڈا واضح ہو گیا ہے اور ضرورت پڑنے پر پاکستان کو دوسروں کی جنگ میں دھکیلنے کے خدشات کی تصدیق ہو گئی ہے۔ عالمی طاقتیں بالخصوص بھارت اور امریکہ پاکستان کو تنہا کرنے کے درپے ہیں۔ماضی میں امریکہ کے کہنے پر افغان جنگ کا حصہ بنے جس کے نقصانات آج تک بھگت رہے ہیں۔

انہوں نے کہا کہ ہماری سرزمین پر بیٹھ کر ایک پڑوسی ملک کے خلاف سعودی وزیر کے سنگین ترین الزامات نہ صرف سفارتی آداب کے منافی ہیں بلکہ ہمارے قومی مفادات کے بھی برعکس ہیں۔حق تو یہ بنتا تھا کہ پاکستان کو بھارت کی طرف سے دی جانے والی دھمکیوں اور کشمیر میں ہونے والے مظالم کے خلاف سعودی عرب کی جانب سے پاکستان کی تائید کرتے ہوئے اصولی موقف اختیار کیا جاتا اور بھارت کو یہ باور کرایا جاتا کہ وہ کسی مغالطے میں نہ رہے سعودیہ عرب ہر آڑے وقت میں پاکستان کے ساتھ کھڑا ہے لیکن اس کے برعکس برادر پڑوسی ملک کے خلاف الزامات لگا کر ہمارے دوستانہ تعلقات متاثر کرنے کی کوشش کی گئی جو افسوسناک ہے۔

انہوں نے کہا کہ اسرائیلی افواج کی بربریت کے خلاف آواز بلند کرنے کو دہشت گردی کہنا یہود و نصاری کی خوشنودی حاصل کرنے کے لیے ہے۔امت مسلمہ کو ہوشمندی کا مظاہرہ کرنا ہو گا۔مذموم عناصر مسلم ممالک کو آپس میں الجھا کرمفادات کی تکمیل چاہتے ہیں۔ پوری دنیا جانتی ہے کہ دنیا میں سب سے بڑے دہشت گرد امریکہ اور اس کے حواری ہیں۔ داعش اور القاعدہ سمیت دیگر دہشت گرد تنظیموں کی تشکیل انہی کے ہاتھ سے ہوئی ہے۔انہوں نے کہا کہ قومی سلامتی اور ملکی مفادات کا تحفظ ہماری اولین ترجیح ہے۔ایسے کسی بھی فیصلے یا بیان کی قطعا حوصلہ افزائی نہ کی جائے جو ہمارے لیے نقصان دہ ہو۔انہوں نے عادل الجبیر کی پریس کانفرنس کی مذمت کرتے ہوئے کہا کہ سعودی وزیر خارجہ کو متنازع اور مبہم گفتگو کے لیے اپنی سرزمین استعمال کرنی چاہیے۔

وحدت نیوز (قم )  مجلس وحدت مسلمین پاکستان کے مرکزی سیکریٹری امور خارجہ علامہ ڈاکٹر سید شفقت حسین شیرازی نے کہاہے کہ میونخ جرمنی کی کانفرنس میں شرکت کے دوران پاکستان کے وزیر خارجہ شاہ محمود قریشی کے اسرائیلی چینل کو انٹرویو دینے اور مشروط غاصب صہیونی ریاست کو قبول کرنے اور اسرائیل سے تعلقات کی راہ ہموار کرنے کا بیان دینے کی بھرپور مذمت کرتے ہیں،فلسطین پر طاقت کے بلبوتے پر غاصبانہ تسلط کو قبول نہ کرنے کا پاکستان کے عوام کا موقف ایک اصولی موقف ہےاور جب تک ہمارے فلسطینی بھائی اپنے اس حق کا مطالبہ کرتے رہیںگے پاکستانی عوام ہمیشہ اپنے فلسطینی مسلمان بھائیوں کی حمایت جاری رکھیں گے۔ ناجائز اسرائیلی تسلط کو فلسطین کی سرزمین پر قبول کرنا مسئلہ کشمیر سے ایک بڑی خیانت ہو گی ،سعودی کرسی اقتدار کی بقاء کی خاطر کی جانے والی صدی کی ڈیل کی بھی بھرپور مذمت کرتے ہیں۔

انہو ں نے مزید کہاکہ بیت المقدس اور فلسطین کی مکمل آزادی پاکستانی عوام کا مشترکہ موقف اور نقطہ اتحاد ہے. تمام مسالک ومذاہب کے مسلمان اس نقطے پر متحد ہیں اور اپنے اتحاد کا اظہار ہر سال مشترکہ یوم القدس منا کر کرتے ہیں اور سب مسلمان فلسطین کی آزادی کے لئے کی جانے والی مقاومت کی جدوجہد اور آزادی خواہ تحریکوں کی حمایت کرتے ہیں ،اس لئے ہم حکمرانوں کو ایک نیا فتنہ ایجاد کرنے کی اجازت ہرگز  نہیں دیں گے، انڈیا اگر کشمیری عوام کے حق خود ارادیت کر قبول کر لیتا اور طاقت کا بے دریغ استعمال نہ کرتا تو آج اس قسم کے واقعات رونما نہ ہوتے، گذشتہ 70 سال سے زیادہ عرصہ گزر چکا ہے کہ ہمارے کشمیری بھائی مسلسل قربانیاں دے رہے ہیں، لاکھوں کی تعداد میں شہید اور زخمی ہوئے ہیں اور لاکھوں کی انڈین قابض فوج انکے بلند  ارادوں اور آزادی کے جذبے کو ماند نہیں کر سکی اور اگر دشمن نے جارحیت کی حماقت کی تو پوری پاکستانی قوم اسکا منہ توڑ جواب دے گی۔

وحدت نیوز(پاکپتن) مجلس وحدت مسلمین پاکستان ضلع پاکپتن کے سیکرٹری جنرل مخدوم طالب حسین اسدی کی نماز جنازہ پاکپتن میں ادا کر دی گئی، نماز جنازہ میں ایم ڈبلیو ایم کے مرکزی سیکرٹری سیاسیات سید اسد عباس نقوی، صوبائی سیکرٹری عزاداری سیل رانا ماجد علی، مرکزی کوآرڈینیٹر سید شہریار زیدی، مسئول صوبائی آفس زاہد حسین مہدوی نے شرکت کی، اس موقع پر سید اسد عباس نقوی نے کہا کہ مخدوم طالب حسین اسدی کی وفات سے بڑا خلاء پیدا ہوا ہے، مرحوم نڈر، فعال اور انتھک  محنت کرنے والے ساتھی تھے، اسدی صاحب کی خدمات کو ہمیشہ یاد رکھا جائے گا، رہنماؤں نے مرحوم کے بیٹوں اور اہل خانہ سے اظہار تعزیت کی۔ یاد رہے کہ مرحوم ٹریفک حادثہ میں انتقال فرما گئے تھے، مخدوم طالب حسین اسدی کی وفات پر مرکزی سیکرٹری جنرل علامہ راجہ ناصر عباس جعفری اور دیگر مرکزی رہنماؤں گہرے دُکھ اور افسوس کا اظہار کیا تھا۔

وحدت نیوز(اسلا م آباد) مجلس وحدت مسلمین کا پاکستان تحریک انصاف کی اعلیٰ قیادت سےوزارت داخلہ کے متعصبانہ نوٹیفکیشن ،ایم ڈبلیوایم اور آئی ایس اوکے دفتر پر چھاپے اور گرفتاریوں پر احتجاج ،ایم ڈبلیوایم کے مرکزی میڈیاسیل سے جاری بیان کے مطابق ایم ڈبلیوایم کے مرکزی پولیٹیکل سیکریٹری اسدعباس نقوی نے وفاقی وزیر خزانہ اسدعمر، پی ٹی آئی کے مرکزی رہنمااعجاز چوہدری ودیگر وزراء سے ٹیلیفونک رابطہ کرکےوزارت داخلہ کی جانب سے جاری کردہ فرقہ وارانہ منافرت پر مبنی نوٹیفکیشن کے اجراء، ایم ڈبلیوایم اور آئی ایس او کے دفاتر پر چھاپوں اور کراچی،سرگودھا،سکھر ودیگر شہروں سے بے گناہ کارکنان کی بلاجواز گرفتاریوں کی شدید الفاظ میں مذمت کی ، بعدازاں فاقی وزراءکی جانب سے وزیر اعظم عمران خان کو ایم ڈبلیوایم کے تحفظات سے آگاہ کرنے کے بعدوزیراعظم نے وزارت داخلہ کے متنازعہ نوٹیفکیشن کا فوری نوٹس لیتے ہوئے ذمہ داروں کے خلاف کاروائی کی یقین دہانی کروائی۔

وحدت نیوز(کراچی) مجلس وحدت مسلمین صوبہ سندھ کے ترجمان اور سیکریٹری اطلاعات آصف صفوی نے وحدت نیوز سے گفتگو کرتے ہوئے سکیورٹی اداروں کی جانب سولجر بازارکراچی میں ایم ڈبلیوایم کے صوبائی سیکریٹریٹ پر چھاپے اور دو کارکنان کی بلاجواز گرفتاری کی سخت الفاظ میں مذمت کی ہے، انہوں نے کہاکہ قانون نافذ کرنے والے اداروں کے اہلکاروں کا ایم ڈبلیوایم کے صوبائی سیکریٹریٹ پر چھاپہ محض افواہوں کی بنیاد پر ماراگیا، سکیورٹی اداروں کو کسی نے جھوٹی اطلاع دی کہ ایم ڈبلیوایم کی جانب سے سعودی ولی عہد کی پاکستان آمد کے خلاف کوئی احتجاجی ریلی نکالنے کی تیاری کی جارہی ہے جبکہ درحقیقت ایم ڈبلیوایم کی جانب سے اس طرح کا کوئی اعلان نہیں کیاگیا تھا تاہم ایک جھوٹی افواہ پر ایم ڈبلیوایم کے دفترپرچھاپہ ، دو کارکنان کی گرفتاری اور دیگر کارکنان کو حراساں کرنا قابل مذمت اقدام ہے ،انہوں نے سکیورٹی اداروں کے حالیہ چھاپوں کی شدید الفاظ میں مذمت کی ہے اور گرفتار شدگان کی فوری رہائی اور اس جھوٹی افواہ کے پھیلانے والوں کے خلاف سخت کروائی کا مطالبہ کیاہے۔