وحدت نیوز(پشاور) مجلس وحدت مسلمین خیبر پختونخوا کے سربراہ علامہ سید وحید عباس کاظمی نے کہا ہے کہ نائجیرین حکومت نے معروف بزرگ مذہبی رہنماء علامہ شیخ ابراہیم ذکزکی کو کئی سالوں سے بے جرم و خطا قید میں رکھا ہوا ہے، حکومت پاکستان سفارتی ذرائع کا استعمال کرتے ہوئے ابراہیم ذاکزکی کی رہائی کیلئے کردار ادا کرے۔

 وحدت ہاوس پشاور سے جاری ایک اخباری بیان میں ان کا کہنا تھا کہ شیخ ابراہیم ذکزکی عالمی سطح پر جانے جانیوالی مذہبی شخصیت ہیں، انہوں نے نائجیریا جیسے ملک میں دین اسلام کی تبلیغ کیلئے تاریخی کردار ادا کیا، جس کی وجہ سے کروڑوں افراد مذہب حقہ کی جانب راغب ہوئے، امریکہ کے اشاروں پر نائیجرین حکومت نے محض اسلام دشمنی میں شیخ ابراہیم ذکزکی کے بیٹوں سمیت اب تک سینکڑوں مسلمانوں کو شہید اور خود شیخ صاحب کو ساڑھے تین برس سے زائد عرصہ سے پابند سلاسل کر رکھا ہے، جہاں ان کی حالت انتہائی نازک بتائی جاتی ہے۔

 علامہ وحید کاظمی نے مزید کہا کہ عالم اسلام کے اس عظیم رہنماء کی رہائی کیلئے نہ صرف مذہبی و سیاسی جماعتوں کو آواز بلند کرنے کی ضرورت ہے بلکہ پاکستانی عوام بھی اس حوالے سے اپنا مذہبی و اخلاقی فریضہ ادا کریں۔ حکومت پاکستان سفارتی ذرائع استعمال کرتے ہوئے شیخ ابراہیم  ذکزکی کی رہائی کیلئے کوششیں کرے، اقوام متحدہ اور دیگر انسانی حقوق کی تنظیموں سے بھی اپیل ہے کہ وہ اپنا کردار ادا کرتے ہوئے علامہ ذکزکی کو رہا کروانے کی کوشش کریں۔

وحدت نیوز(لاہور) مجلس وحدت مسلمین شعبہ خواتین لاہور کی جانب سے ضلع کے مختلف یونٹس میں بچوں کی دینی واخلاقی تربیت کے لیے سمر کیمپس کا انعقاد کامیابی سے جاری ہے ۔جعفریہ کالونی یونٹ میں گیارہواں سہ روزہ سمر کیمپ قائم کیا گیا۔

محترمہ حنا تقوی ضلعی سیکرٹری جنرل محترمہ عظمیٰ نقوی ڈپٹی سیکرٹری جنرل،محترمہ فرحانہ سیکرٹری شعبہ تعلیم اور محترمہ نجبہ سیکرٹری شعبہ تربیت نے معرفتِ امام زمانہ علیہ السلام،معرفت اہلبیت علیہم السلام،تفسیر قرآنی آیات و احادیث، اسلامی احکام و عقائد کی موضوعات پر دروس دیے۔

 ایام ولادت باسعادت امام رضا  علیہ السلام کے موقع پر بچوں اور والدین سے گفتگو کرتے ہوئے محترمہ حنا تقوی کا کہنا تھا کہ جو کوئی یہ چاہتا ہے کہ گمراہی اور جہالت سے اپنے آپ کو بچائے رکھے اسے چاہئے کہ وہ معصومین علیہم السلام کے بتائے ہوئے راستہ پر گامزن ہو اور ان کی اطاعت کرے۔محترمہ حنا تقوی اور محترمہ عظمیٰ نقوی نے یونٹ اراکین کے جوش و جذبے کو قابلِ تعریف قرار دیا۔

وحدت نیوز (لاہور) مجلس وحدت مسلمین شعبہ خواتین لاہور کے زیر اہتمام رشی بھون یونٹ میں  تین روزہ  دینی تربیتی سمر کیمپ کا اہتمام کیا گیا۔جس میں قرآن پاک کی تلاوت،حسن قرآت، حفظ و تفسیرسورۃالفجر و احادیث،فقہی احکام، عقائد، معرفت امام زمانہ عجل اللہ فرجہ الشریف اور سیرت اہلبیت علیہ السّلام کے عناوین پر مشتمل دروس کا انعقاد کیا گیاضلعی مسئولین محترمہ حنا تقوی ، محترمہ عظمی نقوی ، محترمہ نجبہ اور محترمہ فرحانہ نے خواتین کو ان موضوعات پر لیکچر دیےتربیتی کیمپ کے تینوں روز ایام ولادت باسعادت امام علی رضا علیہ السلام کی مناسبت سے خصوصی طور  پر سیرت و کردار امام عالی مقام پر روشنی ڈالی گئی۔

اس موقع پر محفل میلاد کا اہتمام کیا گیا اور کیک بھی کاٹا گیا۔امام علی رضا علیہ السلام کی ولادت باسعادت کے حوالے سے گفتگو کرتے ہوئے محترمہ حنا تقوی نے کہا کہ آسمان امامت کے درخشندہ ستارے امام علی رضا ع  نے الٰهی علوم کے ذریعہ اپنے نیک و پرهیزگار آباء و اجداد کی راه کو دوام بخشا اور خالص دینی تعلیمات و اصول کو زائل  هونے سے محفوظ رکھتے هوئے اس پر کوئی آنچ نہیں آنے دی۔

انھوں نے کہا کہ امام علی رضا ع کی کریمانہ شخصیت ، ان کی بخشش و رحم ، مہربانی و لطف و کرم ہر خاص و عام کو اپنی جانب مائل کرتا ہے آج بھی ان کا روضہ اقدس زمین پر جنت کا ٹکڑا معلوم ہوتا ہے جہاں عاشقان سجدہ عشق بجا لاتے ہیں اور اپنے محبوب سے محو گفتگو ہوتے ہیں اور ان کی عنایات و عطا کو اپنے دامن میں سمیٹ لیتے ہیںمحترمہ حنا تقوی اور محترمہ عظمیٰ نقوی نے یونٹ اراکین بالخصوص محترمہ نگین رضوی ضلعی سیکرٹری اطلاعات کو یونٹ میں فعال کردار ادا کرنے اور سمر کیمپ کے کامیابی سے انعقاد پر سراہا اور مستقبل میں ان کاوشوں کو جاری رکھنے کی امید کا اظہار کیا۔

وحدت نیوز(اسلام آباد) مجلس وحدت مسلمین کا4اگست پریڈگراؤنڈ پر ناصران ولایت کانفرنس کااعلان۔ کانفرنس کا انعقاد شہید علامہ سید عارف حسین الحسینی کی 31ویں برسی کی مناسبت سے کیا جارہا ہے اس حوالے سے باقاعدہ دعوتی مہم کا باقاعدہ بھی کردیاگیا ہے۔ ایم ڈبلیوایم کی مرکزی کابینہ کے اجلاس میں کانفرنس کے انعقاد کے حوالے سے انتظامات کا جائزہ لیا گیا اور مختلف امور پر کمیٹیاں تشکیل دی گیں ہیں ۔ دعوتی مہم کے سلسلے میں مختلف وفود بنائے گئے ہیں جو کہ اسلام آباد سمیت پنڈی ڈویژن میں بھی مختلف سیاسی سماجی اور مذہبی شخصیات کو کانفرنس میں شرکت کی دعوت دے رہے ہیں ۔ ناصران ولایت کانفرنس میں ملک بھر بالخصوص وسطی پنجاب سے ہزاروں کارکنان کی شرکت متوقع ہے۔

مرکزی کابینہ کے اجلاس سے خطاب کرتے ہوئے سربراہ مجلس وحدت مسلمین علامہ راجہ ناصرعبا س جعفری نے کہا کہ شہید علامہ عارف حسین الحسینی نے پاکستان میں بین المذاہب ہم آہنگی کے حوالے سے ناقابل فراموش خدامات انجام دی ہیں۔ شہید علامہ عارف حسین الحسینی ایک دلیر اور بابصیرت لیڈرتھے جو ضیا الحق کے سخت آمرانہ دور میں بھی آواز حق بلندکرتے رہے آپ نے پاکستان میں عوام کوعالمی سامراجیت کی ریشہ دوانیوں سے ناصرف آگاہ کرنے کی کوششیں کیں بلکہ خود بھی استعماری سازشوں کے خلاف سیسہ پلائی دیوار بن کر کھڑے رہے ۔ یہی وجہ تھی کہ عالمی استکباری قوتیں آپ کی دشمن ہو گئیں اور آپ کو منصوبہ بندی کے تحت شہید کر دیاگیا  اور یہ سمجھا گیا کہ شہید عارف حسین الحسینی کا رستہ روک لیاگیا ہے ۔

لیکن ہم ہر سال شہید کی برسی شایان شان طریقے سے انعقاد کرکے یہ پیغام دیتے ہیں کہ شہید کا رستہ رکا نہیں ہے ان کے معنوی فرزندان اب بھی میدان میں ان کا پرچم لئے آگے کی جانب گامزن ہیں اور وطن عزیزکی سلامتی کیلئے اور امن کے دشمنوں کے خلاف بر سر پیکار ہیں ۔اس سال بھی ہم بھرپور انداز میں شایان الشان طریقے سے شہیدعلامہ سید عارف حسین الحسینی کی برسی کا انعقاد کریں گئے ۔

وحدت نیوز(کراچی) مجلس وحدت مسلمین سولجر بازار یونٹ ضلع جنوبی کراچی کی جانب سے علم تجوید اور قراءت کلاس کا آغاز کردیا گیا ۔ ہفتہ وار کلاس کے پہلے سیشن میں مجلس وحدت مسلمین کے مرکزی ڈپٹی سیکریٹری جنرل علامہ احمد اقبال نے خصوصی شرکت کی اور سولجر بازار یونٹ کے ارکان کی اس کوشش اور قدم کو سراہا ۔ کلاس کے دوران قاری کمیل کرجت نے بتایا کہ صرف گیارہ الفاظ ایسے ہیں جن کی پریکٹس سے اپنی نماز کی قرا ء ت صحیح کی جاسکتی ہے ۔ کلاس میں شہر کے مختلف علاقوں سے طلباء نے شرکت کی ۔ پروگرام انچارج کے مطابق جلد خواتین کی اسی طرز کی کلاس کا سلسلہ شروع کردیا جائے گا ۔

وحدت نیوز(اٹک) مجلس وحدت مسلمین پاکستان کے سربراہ علامہ راجا ناصر عباس جعفری حفظ الله نے ضلع اٹک میں مجلس وحدت مسلمین شعبہ خواتین اور امامیہ سٹوڈنٹس آرگنائزیشن کی مسئولین اور کارکنان سے ملاقات کی اور خطاب کیا اور کہایہ عزاداری سیدالشہداء ہے جس نے آئمہ علیھم السلام  اور ان کے پیغام کو زندہ رکھا ہوا ہے۔

انہوں نے کہا کہ استعماری قوتیں اہل تشیع کو توڑنا اور کمزور کرنا چاہتے ہیں دشمنان مکتب اھلیبیت ع نے اس ڈر سے کہ پاکستان میں کہیں دوسرا خمینیؒ بُت شکن نہ پیدا ہوجائے ہمارے عظیم و شجاع قائد علامہ عارف حسین الحسینی کو شہید کر دیا ۔

ان کا مزید کہنا تھا کہ ہمارا فرض اور ذمہ داری ہے کہ شھید کی برسی  میں زیادہ سے زیادہ شرکت کریں تاکہ دشمن وقت کو معلوم ہو جائے کہ ایک حسینی شہید کیا ہے یہاں ہزاروں حسینی ہیں جو ان کے مشن کو لے کر گامزن ہیں۔