اسلام آباد (پ ر) آئین کے مطابق قانون پر عملدرآمد ہو تو ملک میں کافی حد تک دہشت گردی پر کنٹرول کیا جا سکتا ہے۔ اگر ملک میں قانون پر علمدرآمد نہیں ہو گا اور مجرموں کو قرار واقعی سزا نہیں ملی گی تو ملک کا حال وہی ہو گا جو ابھی موجودہ پاکستان کا حال ہے۔ ان خیالات کا اظہار ایم ڈبلیو ایم کے مرکزی ڈپٹی سیکرٹری جنرل علامہ محمد امین شہیدی نے پولینڈ کے پولیٹیکل کونسل کے رکن پیٹر سے ملاقات کے دوران کیا۔ ایک سوال کے جواب میں علامہ امین شہیدی نے کہا کہ پاکستان کے مسلمان دنیا کے دیگر ممالک میں بسنے والے مسلمانوں سے زیادہ جذبات رکھتے ہیں، یہی جذبات بعض اوقات دوسری قوت کے لیے فائدہ مند ثابت ہو سکتے ہیں۔ انہوں نے کہا کہ دہشت گردی، لاقانونیت اور فرقہ واریت ملک کو دیمک کی طرح چاٹ رہی ہے اور اس کی وجہ یہ ہے کہ ملک میں مجرموں کو آسانی سے چھوڑ دیا جاتا ہے۔ علامہ امین شہیدی نے مزید کہا کہ امریکہ جو کام خود نہیں کرتا وہ دوسرے ملکوں سے کراتا ہے۔ پولینڈ کے پولیٹیکل کونسل کے رکن پیٹر کا کہنا تھا کہ پاکستان میں جس طرح شیعہ قوم کا قتل عام کیا جا رہا ہے اس کی نظیر دنیا میں کہیں نہیں ملتی۔ انہوں نے شیعہ مسلمانوں کے جذبے، حوصلے اور ثابت قدمی کی تعریف کی۔

پشاور میں جاری اہل تشیع کی ٹارگٹ کلنگ کے خلاف مختلف تنظیموں کے زیر اہتمام احتجاجی ریلی نکالی گئی، جس میں ہزاروں کی تعداد میں مرد و زن، بچوں، نوجوانوں اور بزرگوں نے شرکت کی۔ امامیہ رابطہ کونسل کے توسط سے جامع مسجد کوچہ رسالدار سے نماز جمعہ کے بعد احتجاجی ریلی برآمد ہوئی، ریلی کے شرکاء لبیک یا حسین (ع) کی صدائیں بلند کرتے ہوئے قصہ خوانی بازار کی طرف آئے، شرکاء نے مختلف پلے کارڈز اور بینرز اٹھارکھے تھے، جن پر پشاور سمیت ملک بھر میں جاری اہل تشیع کی ٹارگٹ کلنگ کے خلاف نعرے درج تھے۔ علاوہ ازیں شہداء ملت جعفریہ کی تصاویر بھی ریلی میں شریک بچوں نے اٹھا رکھی تھیں۔ ریلی میں سابق سینیٹر اور مجلس وحدت مسلمین پاکستان کی مرکزی شوریٰ نظارت کے رکن علامہ سید جواد ہادی، امامیہ جرگہ خیبر پختونخوا کے سربراہ سردار سجادعلی، مظفرعلی اخونزادہ، مجلس وحدت مسلمین خیبر پختونخوا کے رہنماء ارشاد حسین بنگش، شیعہ علماء کونسل ضلع پشاور کے صدر مجاہد اکبر، امامیہ اسٹوڈنٹس آرگنائزیشن پشاور ڈویژن کے رہنماء سید محمد سمیت دیگر تنظیموں کے رہنماوں، ماتمی انجمنوں کے اراکین نے بھی شرکت کی۔ 

ریلی قصہ خوانی سے ہوتی ہوئی سوئیکارنو چوک پہنچ کر جلسہ کی شکل اختیار کرگئی۔ اس موقع پر علامہ ارشاد حسین خلیلی، علامہ نذیر حسین اور معروف عالم دین علامہ سید جواد ہادی نے خطاب کیا۔ اور پشاور میں جاری ٹارگٹ کلنگ کی شدید الفاظ میں مذمت کی اور فوری طور پر اس سلسلے کو روکنے کا مطالبہ کیا۔جلسہ کے آخرمیں بعض قرار دادیں بھی منظور کی گئیں۔ جو ذیل تھیں۔
1۔ ملک بھر میں شیعہ اکابرین، نوجوانوں، بچوں اور خواتین کی ٹارگٹ کلنگ میں ملوث عناصر کو فوری گرفتار کرکے انصاف کے کٹہرے میں لایا جائے۔
2۔ ملت جعفریہ کا یہ تاریخی اجتماع حکومت اور قانون نافذ کرنے والے اداروں سے پرزور مطالبہ کرتا ہے کہ دہشتگروں کو بیرون ملک سے ملنے والے فنڈز کو روکنے کیلئے فوری طور پر ٹھوس اقدامات کئے جائیں۔
3۔ یہ اجتماع حکومت سے پرزور مطالبہ کرتا ہے کہ دہشتگردوں کی سرکوبی اور نہتے عوام کے تحفظ کے لئے کور کمانڈر پشاور کے زیر نگرانی فوج پر مشتمل خصوصی سیل قائم کرکے دہشتگردوں اور ان کے نیٹ ورک کے خلاف کارروائی کی جائے۔
4۔ یہ اجتماع بے گناہ شیعہ افراد کی بلاجواز گرفتاریوں کو حکومت کی بوکھلاہٹ قرار دیتے ہوئے پرزور مطالبہ کرتا ہے کہ بے گناہ افراد کو فوری طو رپر رہا کیا جائے۔
5۔ یہ اجتماع حکومت سے مطالبہ کرتا ہے کہ دہشتگردی کے نتیجے میں شہید ہونے والے سویلین افراد کو وہی پیکج دیا جائے جو آرمڈ فورسز اور پولیس کودیا جاتا ہے ۔

لاہور( ) مجلس وحدت مسلمین لاہور کے زیر اہتمام بحرین میں جاری تحریک جمہوریت کے دوسال مکمل ہونے ،،یکجہتی مظلومین جہاں،،کانفرنس مقامی ہوٹل میں منعقد ہوا جس میں تمام مکاتب فکرسے تعلق رکھنے والے سکالر ز،دانشوروں نے شرکت کی ۔کانفرنس س کی صدرات مجلس وحدت مسلمین پنجاب کے سیکرٹری جنرل علامہ عبدالخالق اسدی نے کی کانفرنس سے خطاب کرتے ہوئے علامہ ابوذر مہدوی مرکزی رہنماہ مجلس وحدت مسلمین پاکستان نے کہا کہ بحرین میں نہتے جمہوریت پسند عوام پرظالم بادشاہوں کی ظلم و تشدد پر اقوام متحدہ اور اسلامی کونسل کی خاموشی نہایت ہی افسوس ناک ہے۔اس سے اندازہ لگانا مشکل نہیں کہ نام نہادمغربی طاقتوں کو اپنی مفادات ہی عزیز ہیں اور انسانی حقوق کی خلاف ورزیاں صرف ان ممالک کو وہاں نظر آتی ہیں جہاں انکے مفادات ہوں ۔کانفرنس سے تحریک وحدت اسلامی کے رہنماہ علامہ جاوید اکبر ساقی نے بھی خطاب کیا۔انہوں نے کہا کہ عرب ممالک میں اب بادشاہوں کا دور ختم ہورہا ہے اور عنقریب ان ڈکٹیٹروں کا وہی حال ہونے والا ہے جولبیا میں کرنل قذافی اور مصر میں حسنی مبارک کے ساتھ ہواہے۔تمام شیعہ سنی مسلمان بھائی جدوجہد جمہوریت میں اپنے مظلوم بحرینی بھائیوں کے ساتھ اور وہ دن دور نہیں جب بحرین کی سرزمین پر بھی ڈکٹیٹروں کا خاتمہ اور جمہوریت کا بول بالاہوگا۔کانفرنس سے مجلس وحدت مسلمین پنجاب کے سیکرٹری جنرل علامہ عبدالخالق اسدی نے بھی خطاب کیا انہوں نے کہا بحرین میں گذشتہ دوسال سے آل خلیفہ نے وہاں کے عوام پر جو مظالم کیے ہیں ان کی تاریخ میں کوئی مثال نہیں ملتی خواتین کی عصمت دری ،نوجوانوں کاقتل عام ،چھوٹے چھوٹے بچوں تک کو اپنے اقتدار کے نشے میں مست ان ظالم بادشاہوں نے نہیں بخشا۔آج ہم ان مظلومین بحرین سے اظہار یکجہتی کے لیے یہاں جمع ہیں ۔علامہ اسدی نے کہا کہ سامراج اور ان کے حواری مسلمانوں کی بیداری سے خوف زدہ ہیں ۔آج ستم کی بات یہ ہے کہ شام میں یہ سامراجی طاقتیں دہشت گردوں کے حامی ہیں شام جیسے پرامن ملک کو تباہ کرنے میں انہی عرب بادشاہوں کا ہاتھ ہے جو مسلمانوں کی حمایت کے بجائے احکامات الہی کیخلاف ورزی کرتے ہوئے یہود ونصری ٰ کے اتحاد ی ہیں ۔شیطان بزرگ امریکہ اور اس کے ناجائز اولاد اسرائیل کی بقا کے لیے آج شامی حکومت کے خلاف دہشت گردوں کی سر عام پشت پناہی کرنے والے عرب حکمران اس بات کویاد رکھیں کہ عنقریب وہ بھی عبرت کانشان بننے والے ہیں۔بحرین میں پرامن جدوجہد کو دبانے کے لیے ہر طرح کے وسائل کابے دریغ استعمال ہورہاہے۔انسانی حقوق کی سنگین خلاف ورزیوں پر خاموش عالمی برادری اور برائے نام انسانی حقوق کے اداروں کا اصل چہرہ دنیا کے سامنے واضح ہورہاہے۔انشااللہ آج ہم اپنے بحرینی بھائیوں کو یہ بتادینا چاہتے ہیں کہ پاکستانی عوام آپ کے ساتھ ہیں اور اسکانفرنس میں تمام مکاتب فکر کے علماء کی موجودگی اس بات کی دلیل ہے کہ بحرینی عوام کے جدوجہد حمایت ہم جاری رکھیں گے اور ظالموں کے خلاف آواز بلند کرتے رہیں گے کانفرنس سے اہلسنت رہنماہ پیر غلام رسول اویسی سے بھی خطاب کیاانہوں نے کہا بحرینی حکومت اپنے عوام پر اس لیے غیر انسانی مظالم کے پہاڑ توڑ رہی ہے کہ ان کا جرم یہ ہے کہ وہ صرف جمہوری حق مانگتے ہیں بحرین کے مظلوم جمہوریت پسند عوام پر پر امن مظاہروں کے دوران بدترین تشدد اور زہریلی گیس کا استعمال کرتی ہے جو جنگوں میں بھی ممنون ہے انہوں نے کہا پاکستان کی عوام بحرین میں ہونے والے شرمناک مظالم سے نابلد ہیں کیونکہ میڈیا ان خبروں پر پردہ پوشی کرتی ہے مجلس وحدت مسلمین لائق تحسین ہے کہ انہوں نے آج یہ کانفرنس منعقد کرکے لوگوں کو حقائق سے اگاہ کیا۔ کانفرنس سے علامہ سید مبارک علی موسوی ، الحاج حیدر علی مرزا،علامہ محمد اقبال کامرانی، آفسر رضا خان ،علامہ سید حسن رضا ہمدانی ،رائے ناصر علی ،سید اسد عباس نقوی ، نے بھی خطاب کیا

آل پارٹیزامن کانفرنس سے خطاب کرتے ہوئے مجلس وحدت مسلمین کے ڈپٹی سیکرٹری جنرل علامہ امین شہیدی نے کہا کہ پوری دنیا میں جاری جنگ کے پیچھے امریکی سازشیں کارفرما ہیں۔ امریکہ جہاں بھی گیا، اس قوم کے لئے تباہی و بربادی کا پیغام لیکر گیا۔ امریکہ کسی کا دوست نہیں ہے، اپنے مفادات کا فیصلہ خود کیا جائے۔ ایم ڈبلیو ایم کے سیکرٹری جنرل کا اے پی سی سے خطاب میں کہنا تھا کہ ملک کی تباہی میں فوج اور ہمارے ادارے برابر کے شریک ہیں۔ ان کا کہنا تھا کہ سیاسی جماعتیں اور ریاستی ادارے دہشت گردی کے خاتمے کے لئے مؤثر کردار ادا نہیں کر رہے اور مصلحت پسندی کا شکار نظر آتے ہیں۔ آج شیعہ اور اے این پی دہشت گردوں کی ہٹ لسٹ پر ہیں اور ان دہشت گردوں کی پشت پناہی امریکہ کر رہا ہے۔