وحدت نیوز(ملتان) مجلس وحدت مسلمین جنوبی پنجاب کے سیکرٹری جنرل علامہ اقتدار حسین نقوی نے کہا ہے کہ ایک عرصے سے سیکیورٹی کے نام پر زائرین کرام اور طلاب کے ساتھ ہتک آمیز رویہ قابل مذمت ہے، حکومت دہشت گردوں کے خلاف کاروائی کی بجائے پُرامن شہریوں کو محصور کرنے پر تلی ہے، جب تک دہشت گردوں کا خاتمہ اور اُن کے سرپرستوں کو عبرتناک انجام سے دوچار نہیں کیا جائے گا ملک میں امن ناگزیر ہے۔ ان خیالات کا اظہار اُنہوں نے ملتان میں قافلہ سالاران کے نمائندہ وفد سے ملاقات کے دوران کیا۔ وفد میں شامل قافلہ سالاروں نے علامہ اقتدار حسین نقوی کو کوئٹہ اور تفتان میں پیش آنے والے مسائل سے آگاہ کیا اور اس حوالے سے لائحہ عمل ترتیب دینے کی اپیل کی۔ علامہ اقتدار حسین نقوی نے وفد سے گفتگو کرتے ہوئے کہا کہ ہم ایک لمبے عرصے سے حکومت کی ان کارستانیوں کو برداشت کر رہے ہیں لیکن اب مزید خاموش نہیں رہیں گے، وفاقی حکومت زائرین کے مسائل کو فوری طور پر حل کرے اور سیکیورٹی کے نام پر محصور کرنے سے باز آئے۔ اُنہوں نے کہا کہ اگر کوئٹہ اور تفتان بارڈر پر زائرین کو تنگ کرنے کا سلسلہ بند نہ کیا گیا تو احتجاج پر مجبور ہو جائیں گے۔ اُنہوں نے کہا کہ محرم الحرام کے موقع پر ملک کے بھر لاکھوں عزادار کربلا معلی میں امام حسین کی روز شہادت پر جمع ہوتے ہیں ہم حکومت کو متنبہ کرتے ہیں کہ محرم الحرام سے قبل زائرین کے لیے خصوصی انتظامات کیے جائیں اگر حکومت نے اہانت کا سلسلہ ترک نہ کیا تو محرم الحرام میں جلوسوں کا رُخ حکمرانوں کے ایوانوں کی جانب ہو گا۔ اس موقع پر زوار غلام رضا، زوار حسن رضا کاظمی، زوار جام مہتاب حسین، زوار عرفان حیدر اور دیگر موجود تھے۔

وحدت نیوز(کوئٹہ) دنیا میں جتنے کامیاب اقوام رہے ہیں ان کی کامیابی میں تعلیم کا اہم کردار رہا ہیں، ترقی یافتہ اقوام یہ جان چکے ہیں کہ تعلیم کامیابی کا راز ہے۔ ہمیں دنیا کے عظیم اقوام میں اپنا شمار کروانا ہے تو تعلیم کا سہارا لینا ہوگا کیونکہ تعلیم ہی وہ زیور ہے جو انسان کے کردار، افعال، افکار اور کارکردگی میں ایسی خوبصورتی لے آتا ہے جو انسان کا رویہ ہ تبدیل کرکے ایسے ایک مثبت سوچ کا مالک اور معاشرے کو سنوارنے والا بنا دیتا ہے دیتا ہے۔ ان خیالات کا اظہار مجلس وحدت مسلمین کوئٹہ ڈویژن کے ڈپٹی سیکریٹری جنرل علامہ ولایت جعفری نے کیا انہوں نے تعلیم کو ترقی کیلئے ضروری اور طلباء کو ملک کا عظیم سرمایاقرار دیتے ہوئے کہا ہے کہ طلباء اپنے تعلیم پر توجہ دیتے ہوئے اپنا سفر جاری رکھیں اور بہترین تعلیمی کارکردگی سے ملک و قوم کے فخرکا باعث بنے۔

 انہوں نے کہا کہ موجودہ دور میں قوم کے نوجوانوں کا پڑھائی اور تعلیم کی طرف رجحان خوش آئیند ہے ہمارے نوجوان تعلیم کی اہمیت سے واقف ہو گئے ہیں اور بے حد دلچسپی کا مظاہرہ کر رہے ہیں۔ انہوں نے تعلیم کو کامیابی کا بہترین ذریعہ قرار دیتے ہوئے کہا کہ کسی بھی قوم کو اپنی کامیابی کے حصول کیلئے با شعور عوام اور تعلیم یافتہ افراد کی ضرورت ہوتی ہے۔ سماج کی یہی اکائیاں بڑے سرمایوں کا کام کرتی ہے اور تعلیم کے حصول کے بعد طلباء کل کو معاشرے کے اہم ارکان ہوتے ہیں اور بہترین معاشرہ بہترین قوم اور ملک تشکیل دیتا ہے، اسکولوں میں بہتر تعلیمی نظام سے مثبت نتائج نکلیں گے اساتذہ کے قابلیت پر کوئی سوال نہیں اٹھانا چاہتا مگر حکومت کو چاہئے کہ وقتاً فوقتاً اور جدید دور کے تقاضوں کو مد نظر رکھتے ہوئے اساتذہ کیلئے بھی کارگاہ رکھیں جائے۔

وحدت نیوز(ہالا) مجلس وحدت مسلمین پاکستان صوبہ سندہ کے صوبائی سیکریٹری جنرل علامہ مقصود علی ڈومکی نے ھالہ ضلع مٹیاری مدرسہ ابوتراب ؑ و امام بارگاہ میں منعقدہ اجتماع سے خطاب کرتے ہوئے کہا ہے کہ زائرین سے متعلق نواز حکومت کی پالیسی غیر منصفانہ اور تعصب پر مبنی ہے، مجلس وحدت مسلمین ، ملت کی ترجمان اور نمائندہ جماعت ہے ، جو ہر فورم پر ملت کے حقوق کی جنگ لڑ رہی ہے۔ سندہ سطح پر جلد ہی (پیغام کربلا اور بیداری ملت مہم)  کا آغاز کر رہے ہیں۔

                انہوں نے کہا کہ نواز حکومت ملت جعفریہ پر مظالم کا سلسلہ روکے، ملک گیر احتجاج نے ثابت کردیا کہ مجلس وحدت مسلمین عوام کی نمائندہ جماعت ہے ، جو مہذب جمہوری رویوں کی حامل ہے۔ قائدوحدت کی جانب سے پیش کئے گئے مطالبات پر فی الفور عمل در آمد ضروری ہے۔ زائرین کے ساتھ حکومت کا رویہ ناقابل برداشت ہے،  آل سعوداور امریکہ کو خوش کرنے کے لئے زائرین کے خلاف نت نئے اقدامات پر پوری قوم میں شدید تشویش پائی جاتی ہے۔

               انہوں نے کہا کہ سندہ حکومت صوبے میں موجود دھشت گردی کے مراکز اور ٹریننگ کیمپس کے خلاف آپریشن کلین اپ کا آغاز کرے۔وزیر اعلیٰ  سید مراد علی شاہ ، سندہ گورنمنٹ اور وارثان شہداء کے درمیان موجود معاہدے  پر عمل در آمد کرائیں۔  سندہ حکومت نے عہد شکنی کی تو بھرپور تحریک چلائیں گے۔

وحدت نیوز(سکردو) مجلس وحدت مسلمین پاکستان بلتستان ڈویژن کے زیراہتمام یوم دفاع پاکستان کی مناسب سے ’ ’ دفاع پاکستان بائیک ریلی ‘‘ کا انعقاد ہوا، جس میں جوانون نے شرکت کی۔ ریلی شرکاء نے ہاتھوں میں وطن عزیز پاکستان، ایم ڈبلیو ایم کا پرچم اور پلے کارڈز اٹھا رکھے تھے۔ پلے کارڈز پر 6ستمبر کے شہداء سے تجدید عہد کے نعرے درج تھے۔ ’’ دفاع پاکستان بائیک ریلی‘‘ ایم ڈبلیو ایم بلتستان کے سیکرٹریٹ نکالی گئی جو کہ یادگار شہدا اسکردو، علمدار چوک، بے نظیر چوک اور نیا بازار اسکردو سے ہوتی ہوئی کالج روڈ اسکردو پر اختتام پذیر ہوئی۔ ریلی کے اختتام پر شرکاء ریلی سے مخاطب ہو کر شاہد حسین نے کہا کہ یوم دفاع پاکستان وطن عزیز کی درخشندہ تاریخ کا عظیم باب ہے، جس دن ہندوستان کے تمام تر عزائم کو خلاف میں ملا کر ثابت کیا تھا کہ ہماری تعداد کم ضرور ہے لیکن دشمن سے کئی گنا زیادہ طاقتور ہیں۔ انہوں نے کہا کہ 1965ء کی جنگ میں پاکستان کے شیر دل جوانوں نے دشمن کے ناپاک عزائم کو خلاک میں ملایا تھا اور پاکستانیوں کے سر کو فخر سے بلند کیا تھا۔ آج وطن عزیز پاکستان کے مقابلے میں کوئی بیرونی دشمن کھڑا نہیں ہو سکتا لہٰذا طالبان اور داعش کی صورت میں ہماری دفاعی طاقت کو کمزور کرنے کی کوشش ہو رہی ہے۔ ان ملک دشمن، اسلام دشمن اور پاکستان طاقتوں کے ساتھ نمٹنے کے لیے 65ء کی طرح متحد ہونے کی ضرورت ہے۔ آپریشن ضرب عضب کو ملک گیر کرنے اور دہشتگردوں کی سیاسی ونگ، معاشی ونگ کو ختم کرنے بلخصوص انکی پشت پناہی کرنے والوں والوں کو تختہ دار پر لٹکانے کی ضرورت ہے۔ ریلی کا اختتام پاکستان کی استحکام و سلامتی کی دعا کے ساتھ کی گئی۔

وحدت نیوز(کوئٹہ) وطن عزیز پاکستان کے یوم دفاع کے موقع پر مجلس وحدت مسلمین کوئٹہ ڈویژن کے سیکریٹریٹ سے جاری شدہ بیان میں ان تمام شہیدوں کو خراج تحسین پیش کیا گیا جنہوں نے اس سرزمین کی حفاظت کی خاطر اپنی جانیں قربان کر کے اپنی سرحدوں کی حفاظت کا حق ادا کیا، دنیا ہمارے جوانوں کی قربانیوں کو ہمیشہ یاد رکھے گی۔ مجلس وحدت مسلمین کے مرکزی رہنما ایم پی اے آغا رضا نے کہا کہ 6 ستمبر 1965 ہماری آزمائش کا دن تھا ، شائد دشمن یہی سمجھ بیٹھے تھے کہ وہ ہمیں با آسانی شکست دے کر ہمارے پیارے وطن پر قبضہ کر لیں گے مگر ہم نے اس وقت اتحاد، بھائی چارگی اور ایک دوسرے کا ساتھ دے کر دشمن کو ذلیل کر دیا اور انہیں یہ بتا دیا کہ ہم ایک ہیں اور اس وطن کیلئے ہمیشہ کھڑے رہیں گے۔انہوں نے کہا کہ یہ وہ دن ہے جس دن پاکستان کے جوانوں نے دلیری، بہادری اور جرأت کی نئی تاریخ رقم کردی اور مخالف فوجی قوت جو ایک بڑی تعداد میں تھی، کے ارادوں کو چکنا چور کر کے یہ ثابت کر دیا کہ ہمارا ملک اللہ کے نام پر قائم ہوا ہے اور دنیا کی کوئی طاقت ہمارا وجود اس دنیا سے نہیں مٹا سکتی۔ آغا رضا نے 1965 جنگ کے ہیرو جنرل موسیٰ خان ہزارہ جو اس وقت کے کمانڈر اینڈ چیف تھے، کا تذکرہ کرتے ہوئے کہا کہ تاریخ اس بات کی گواہ ہے کہ ہزارہ شیعہ قوم نے ہمیشہ اور ہر میدان میں وطن عزیز سے وفا کی ہے۔ بات صرف 1965 کی جنگ کی نہیں بلکہ ہر میدان اور ہر معاملے میںشیعہ ہزارہ قوم نے پاکستان کی سلامتی کیلئے کوششیں کی ہیں انہوں نے کہا کہ ہمارے اجداد پاکستان کے بانیوں میں سے ہیں اور ہر مشکل گھڑی میں ہم نے ملک کو بچانے کیلئے قربانیاں دی ہیں۔بیان کے آخر میں انہوں نے کہا کہ اُس دور کے ہم وطنوں نے اپنے فرائض انجام دے دیئے اب یہ ہماری ذمہ داری ہے کہ ہم اس وطن کی بقاء  کیلئے کھڑے رہیں۔ آج پاکستان کو تخریبی اور تکفیری عناصر سے خطرہ ہے اور ہمیں ان تکفیریوں کو ختم کرکے پاکستان کو سلامت رکھنا ہے۔

وحدت نیوز(کراچی ) مجلس وحدت مسلمین صوبہ سندھ کے سکرٹری سیاسیات سید علی حسین نقوی نے کہا ہے کہ ایم ڈبلیو ایم نے پی ایس 127 ملیر کے ضمنی انتخابات میں کسی بھی سیاسی جماعت کی حمایت نہیں کی ہے بلکہ ملیر کے عوام کو انکے حقوق دلانے کیلئے اپنی شناخت کے ساتھ الیکشن میں بھرپور حصہ لے کر جمہوری عمل کو تقویت بخشنے میں اپنا کردار ادا کریں گے،عوام 8ستمبر کو بلاخوف وخطرخیمے کے نشان پر مہر لگاکر ایم ڈبلیوایم امیدوار علی عباس کو میاب بنائیں،اپنے بیان میں ایم ڈبلیو ایم سندھ کے سکرٹری سیاسیات سید علی حسین نقوی نے کہا کہ مختلف سیاسی جماعتوں کی جانب سے مجلس وحدت مسلمین کی حمایت حاصل کرنے کے دعوے بے بنیاد، غلط بیانی، پروپیگنڈہ اور دروغ پر مبنی ہیں، جو عوام کو گمراہ کرنے کی کوششوں کا حصہ ہیں۔ انہوں نے کہا کہ اس حوالے سے واضح کیا جاتا ہے کہ تمام سیاسی جماعتیں مجلس وحدت مسلمین سے حمایت کی طلبگار رہیں، لیکن حلقہ پی ایس 127 ملیر کے عوام کے حقوق کی خاطر ہم نے کسی کی حمایت کرنے کے بجائے خود انتخابات میں بھرپور شرکت کا فیصلہ کیا ہے۔ دوسری جانب انہوں نے ملیر جعفر طیار و دیگر علاقوں میں مختلف کارنر میٹنگز سے خطاب اور عمائدین و معززین کے وفود سے ملاقات کرتے ہوئے کہا کہ مجلس وحدت مسلمین نے قدم بڑھایا ہے، اگر عوام نے اعتماد کیا تو ہم ان کی امیدوں پر پورا اترنے کی بھرپور کوشش کریں گے، عوام کی بنیادی ضروریات کو پورا کرنے میں ہر گھڑی مجلس وحدت مسلمین موجود ہے، تعلیم، صحت اور صفائی جیسے بنیادی حق عوام سے چھین لیا گیا ہے ہم اسے واپس دلائیں گے اور حلقہ کی خوشحالی کو بحال کریں گے۔