وحدت نیوز(گلگت) زینبؑ کبری اکیڈمی میں جشن ولادت باسعادت ابالفضل عباسؑ کا انعقاد کیا گیا جس میں علاقے کی خواتین اور بچیوں کی کثیر تعداد نے شرکت کی۔ جشن سے خطاب کرتے ہوئے ایم ڈبلیو ایم شعبہ خواتین گلگت ڈویژن کی سیکرٹری جنرل اور مرکزی سیکرٹری یوتھ محترمہ سائرہ ابراھیم نے خواتین سے خطاب میں کہا کہ اولاد کی بہترین تربیت و پرورش کے لیے ماؤں کا باشعور اور زمانے کے تقاضوں کے مطابق بچوں کی تربیت کے اسلوب سیکھنا ضروری ہے۔
انھوں نے علاقے کی خواتین سے درخواست کی کہ وہ روز جمعہ کی درسی نشست میں لازما شرکت کریں تاکہ “جدید دور کے تقاضے اور ماں” کے عنوان سے جاری پروگرام سے مستفید ہو سکیں ان کا کہنا تھا بچیوں کے لیے جو احکام و اخلاق اور عصر حاضر کی ذمہ داریوں کے عنوان سے سنڈے کلاسز کا جو سلسلہ شروع ہے اسے پورے گلگت میں پھیلایاجائے،پروگرام کے آخر میں دعائے عرفہ بطور ھدیہ بچیوں میں تقسیم کی گئیں۔
وحدت نیوز(لاہور) مجلس وحدت مسلمین پاکستان فقط مذہب تشیع کی بنیاد پر نہیں بلکہ تمام مسالک اور غیر مسلم اقلیتوں کے حقوق کے تحفظ کے لیے بھی برسر پیکار نظر آتی ہے ،ان خیالات کا اظہار مجلس وحدت مسلمین پاکستان شعبہ خواتین ضلع لاھور کی سیکرٹری جنرل محترمہ حنا تقوی صاحبہ نے اقبال ٹاون لاھور میں یونٹ قائم کرنے کے موقع پر ایم ڈبلیو ایم کے اغراض ومقاصد بیان کرتے ہوئے کیا۔
انھوں نے کہا کہ کسی بھی بڑے ھدف کی تکمیل کے لیے خواتین کا کردار بہت اہم ہوتا ہے اب وقت ہے کہ ملت کی خواتین بیدار و متحرک ہوں اور اور اپنی قوم و ملت کے حقوق کے دفاع اور ملکی سالمیت و استحکام کی جدوجہد میں اپنا کردار پیش کریں اور مجلس وحدت مسلمین پاکستان ان امور کی انجام دہی کے لیے بہترین پلیٹ فارم ہے ،آخر میں ولادت حضرت غازی عباس ع کی مناسبت سے فضائل و مناقب مولا عباس ع بیان کیے گئے۔
وحدت نیوز(لاہور) وحدت یوتھ لاہور کی جانب سے ولادت باسعادت امام زین العابدین علیہ السلام کے سلسلے میں وحدت ہاؤس پنجاب میں جشن کا انعقاد کیا گیا،ایم ڈبلیوایم کے مرکزی سیکریٹری یوتھ علامہ اعجاز حسین بہشتی نے خصوصی خطاب کیا،تفصیلات کے مطابق سیکرٹری یوتھ مجلس وحدت مسلمین ضلع لاہور برادر سید سجاد حسین نقوی کی جانب سے ولادت باسعادت سید الساجدين مولا امام سجاد علیہ السلام کے سلسلہ میں وحدت ہاؤس پنجاب میں جشن کا انعقاد کیا گیا. محفل میلاد میں خطیب ولایت علامہ اعجاز حسین بہشتی ، مرکزی سیکرٹری سیاسیات برادر سید اسد عباس نقوی، سیکرٹری جنرل صوبہ پنجاب علامہ مبارک علی موسوی نے خصوصی شرکت کی اور شعبہ جوان کے کارکنوں سے خطاب کیا. ایڈووکیٹ سید عرفان نقوی نے محفل میلاد کا آغاز باقاعدہ تلاوت کلام پاک سے کیا جبکہ برادر اسد علی نے قصیدہ خوانی کی۔
علامہ اعجاز حسین بہشتی نے اپنے خطاب میں فضائل و تعلیماتِ امام سجاد علیہ السلام کے حوالے سے گفتگو کی اور امیر المؤمنین علی ابن ابی طالب علیہ السلام کے فرمان کی تشریح کرتے ہوئے جوانوں کیلئے خصوصی پیغام میں کہا کہ جوان فقط جوان نہیں بلکہ مکمل جہان ہیں.علامہ سید مبارک علی موسوی نے دعائیہ کلمات ادا کیے مادر وطن پاکستان کی سلامتی کیلئے خصوصی دعا کی گئی میلاد کے آخری لمحات میں مولا امام سجاد علیہ السلام کی آمد کی خوشی میں بزرگان و کارکنان نے کیک کٹنگ بھی کی.محفل میلاد میں برادر رائے ناصر علی، برادر رانا ماجد علی، برادر علی رضا کاظمی، ایڈووکیٹ سید اسد نقوی، ایڈووکیٹ سید عرفان نقوی، برادر عمار، برادر شعیب، برادر فرقان و دیگر صوبائی و ضلعی عہدیداران و کارکنان شریک تھے۔
وحدت نیوز(کراچی) مجلس وحدت مسلمین پاکستان کے مرکزی ڈپٹی سیکریٹری جنرل علامہ سید احمد اقبال رضوی کا ایم ڈبلیوایم ضلع ملیر کے وفد کے ہمراہ مدرسہ جامعتہ الاطہار جعفرطیار کا دورہ، مدرسہ آمد پر پرنسپل مولانا مہدی علی دانش اور طلاب دینیہ نے انہیں خوش آمدید کہا، علامہ احمد اقبال رضوی نے خیر العمل ویلفیئر اینڈ ڈیویلپمنٹ ٹرسٹ شعبہ فلاح وبہبود مجلس وحدت مسلمین ضلع ملیر کی جانب سے ایک مرحومہ کے ایصال ثواب کیلئے مدرسہ جامعتہ الاطہار میں مسجد کی تعمیر کیلئے ایک لاکھ روپے نقد بطور عطیہ پرنسپل مولانا مہدی علی دانش کے سپرد کیئے، پرسنل مدرسہ حذا نے ایم ڈبلیوایم کی جانب سے خطیر رقم عطیہ کرنے پر شکریہ ادا کیا اور اپنی نیک خواہشات کا اظہار کیا اس موقع پر ایم ڈبلیوایم کے رہنما مولانا غلام محمد فاضلی، مولانا گلزار شاہدی ، احسن عباس رضوی،عارف رضا زیدی، شعیب رضوی، سیدحسن عباس ، ممتاز مہدی ودیگر بھی موجود تھے۔
وحدت نیوز(کوئٹہ) سانحہ ہزار گنجی سبزی منڈی میں بم دھماکے اور قیمتی انسانی جانوں کے نقصان کے خلاف مجلس وحدت مسلمین کوئٹہ ڈویژن کی جانب سے جامع مسجد کلاں کے باہر احتجاجی مظاہرہ کیا گیا جس میں ایم ڈبلیوایم کے رہنما علامہ ہاشم موسوی، علامہ برکت مطہری، علامہ ولایت جعفری اور علامہ حسنین وجدانی نے خطاب کیا اس موقع پر ایم ڈبلیوایم کے مرکزی رہنما آصف رضا ایڈوکیٹ سمیت مظاہرین کی بڑی تعداد شریک تھی، مقررین نے سانحہ کی شدید الفاظ میں مذمت کرتے ہوئے وزیر اعظم، آرمی چیف اور چیف جسٹس سےمجرموں کی فوری گرفتاری اور سخت کاروائی کا مطالبہ کیا ۔
وحدت نیوز (کوئٹہ) مجلس وحدت مسلمین کوئٹہ ڈویژن کے میڈیا سیل سے جاری شدہ بیان میںمرکزی رہنما اور سابق وزیر قانون آغا رضانے کہاہے کہ غربت کے باعث عوام کا معاشرے میں زندگی گزارنا مشکل ہو رہا ہے، مہنگائی کے خلاف حکومت کے اقدامات صرف کاغذی کاروائیوں تک ہی محدود ہیں۔ملک میں اکثر و بیشتر افراد خط غربت سے نیچے زندگی بسر کر رہے ہیں، روزگار کے مواقع نہیں اور حکومت اس معاملے پر ساکن ہے۔ بیان میں کہا گیا کہ ملک میں لاکھوں بلکہ کروڈوں افراد زندگی بسر کرتے ہیں ، ہر فرد کو اسی معاشرے میں زندگی گزارنا ہے اور غربت عوام کی زندگی مشکل بنا رہی ہے۔ گزشتہ کہی سالوں سے سطح غربت میں کوئی خاص کمی نظر نہیں آئی، یوں لگتا ہے جیسے اس مسئلے کے حل کیلئے کوئی کام کیا ہی نہیں گیا ہو۔ غربت سے دوچار افراد کو صرف پیسے فراہم کرنے سے غربت کا خاتمہ ممکن ہے۔ مختلف حکومتی اور غیر حکومتی اداروں کی جانب سے دیئے گئے چند روپیوں کی بدولت غریب افراد صرف چند مہینے یا چند دن ہی سکون سے گزار سکتے ہیں، اس کے بعد انہیں پھر اسی غربت اور اسی پریشانی کا سامنا ہوگا۔ملک میں ٹیکسس اور کرپشن کی وجہ سے اشیائے خورد و نوش کی قیمتیں بھی آسمانوں کا سفر طے کر رہی ہے۔
انہوںنے کہاکہ حکومت اعلان کرتی ہے کہ ان اشیاء کے قیمتوں میں کمی کی جائے تاکہ یہ سب عوام کے دسترس تک پہنچ سکے مگر افسوس کی بات ہے کہ یہ اقدامات کاغذ کے ٹکڑوں سے شروع ہوکر وہی ختم ہو جاتے ہیں اور کوئی عملی اقدام نہیں اٹھایا جاتا۔ مہنگائی کے اعتبار سے حکومت کے اقدامات کاغذی کاروائیوں تک ہی محدود ہے۔ بیان میں کہا گیا کہ ملک میں اکثر عوام خط غربت سے نیچے زندگی بسر کر رہے ہیں ۔ بچوں کی ایک بڑی تعداد چائلڈ لیبر کا شکار ہے،ان بچوں کو جس عمر میں اسکول میں تعلیم حاصل کرنا چاہئے اور دیگر سرگرمیوں میں مبتلاء ہونا چاہئے اس عمر میں ہمارے بعض بچے مختلف وسائل سے پیسے کمانے کے چکر میں لگے ہوتے ہیں ۔ یہ نہ صرف قوم کے مستقبل کے ساتھ ایک مذاق ہے بلکہ ہمارے ملک کی ترقی کیلئے ایک بڑے خطرے کی علامت ہے۔حکومت کو چاہئے کہ ملک میں ان تمام افراد کی مدد کرے جو خط غربت سے نیچے زندگی گزار رہے ہیں۔مختلف اقدامات کے توسط سے ان لوگوں کی زندگی بہتر بنائی جا سکتی ہے ۔ بیان کے آخر میں مزید کہا گیا کہ روزگار کے مواقع پیدا کرنے سے ملک سے غربت کا خاتمہ کیا جا سکتا ہے۔
