وحدت نیوز(ماتلی) مجلس وحدت مسلمین پاکستان سندھ کے تعلقہ ماتلی کے تحت کراچی میں شیعہ نسل کشی کیخلاف احتجاجی ریلی نکالی گئی اور دھرنا دیا گیا۔ احتجاج کی قیادت مرکزی سیکریٹری تنظیم سازی یعقوب حسینی نے کی۔ احتجاج میں شرکاء کی بڑی تعداد نے شرکت کی۔ احتجاجی مظاہرے سے خطاب میں یعقوب حسینی کا کہنا تھا کہ پیپلز پارٹی کی سندھ حکومت شیعہ نسل کشی روکنے میں مکمل طور پر ناکام ہے، بلاول بھٹو زرداری ٹوئیٹر پر دہشت گردوں کیخلاف صرف بیانات اور دعووں کے بجائے اپنی سندھ حکومت کی کارکردگی پر بھی نظر کریں، کراچی میں گزشہ 8 ماہ میں ڈیڑھ سو سے زائد شیعہ افراد کو شہید کیا جاچکا ہے اور آج تک کسی بھی ایک شہید کا قاتل گرفتار نہیں ہوا۔ یعقوب حسینی کا مزید کہنا تھا کہ وزیراعلیٰ سندھ اگر صوبے میں امن و امان کے قیام اور بالخصوص شیعہ نسل کشی کو روکنے کے لئے اقدامات نہیں کرسکتے تو فی الفور مستعفی ہوجائیں ورنہ خانوادہ شہداء کی قیادت میں وزیر اعلیٰ ہاوس کی طرف احتجاجی مارچ کریں گے اور ظالموں کو ایوانوں سے نکال کر باہر کردیں گے۔