وحدت نیوز (گلگت) سانحہ بھکر حکومت کا دہشت گردی کے خلاف نرم گوشہ رکھنے کا نتیجہ ہے۔ یہ بات مجلس وحدت مسلمین گلگت ڈویژن کے سیکرٹری جنرل شیخ محمد بلال سمائری نے کابینہ کے ایک ہنگامی اجلاس میں کہی۔ انہوں نے کہا کہ موجودہ حکومت دہشت گردی کو روکنے میں مکمل طور پر ناکام ہوچکی ہے حکومت دہشت گردوں کے خلاف ریاستی طاقت کا استعمال کرنے کی بجائے مذاکرات کا راگ الاپ رہی ہے، یہی وجہ ہے کہ دہشت گردوں کے حوصلے بلند ہوئے ہیں۔ نواز حکومت کے مختصر دورانیے میں دہشت گردی کے واقعات میں مسلسل اضافہ ہو رہا ہے۔ انہوں نے کہا کہ بھکر واقعہ میں ملوث دہشت گرد گروہ کا تعلق موجودہ صوبائی اور وفاقی حکومت کی حلیف جماعت سے ہے۔ انہوں نے یہ بھی کہا حکومت دہشت گردی کے خلاف اپنا واضح موقف اپنا کر ایکشن لے، چونکہ حکومت کوئی کارروائی نہیں کرتی، جس کی وجہ سے حکومت دہشت گردوں کے ہاتھوں یرغمال ہوچکی ہے۔