وحدت نیوز (گلگت) آغا علی رضوی کی حقوق کیلئے جدوجہد سے لیگی حکومت کے اوسان خطا ہوگئے ہیں۔حکومت کے عطائی مشیرخودنظام کیلئے خطرہ بن چکے ہیں۔آغا علی رضوی گلگت بلتستان کے مظلوم ومحروم عوام کی حقیقی ترجمانی کررہے ہیں اور عوام کی امیدوں کا مرکز بن چکے ہیں،مجلس وحدت مسلمین گلگت بلتستان کے سیکرٹری اطلاعات شیخ علی حیدر نے کہا ہے کہ مجلس وحدت مسلمین پر تنقید کرکے حکومت اپنے جرائم پر پردہ ڈالنے کی ناکام کوشش کررہی ہے۔ چند ترقیاتی منصوبوں پر کام شروع کرنے سے گلگت بلتستان کے مسائل حل نہیں ہوتے، اصل مسائل کی طرف توجہ دلائی تو حکومت سیخ پاہوگئی ہے۔عوامی زمینوں پر جبری قبضے جمانے کی کوشش کرکے حکومت نے خود ہی اپنے چہرے پر کالک مل دی ہے۔ آغا علی رضوی گلگت بلتستان کے عوام کے حقیقی ترجمان ہیں جنہوں نے گلگت بلتستان کے عوام کو حقوق کیلئے ایک پیج پر یکجا کرنے میں اہم کردار ادا کیا ہے ۔
انہوں نے کہا کہ ٹیکس کے معاملے میں حکومت کی گلگت بلتستان کے عوام کو تقسیم کرنے کی سازش کو عوام خوب جانتے ہیں، ایم ڈبلیو ایم نے عوامی ایکشن کمیٹی و انجمن تاجران کے تعاون سے گلگت بلتستان کے عوام کو تقسیم کرنے کی سازش کو خاک میں ملادیا ہے ۔ وزیر اعلیٰ گلگت بلتستان عطائی مشیروں کے نرغے میں ہے اور عوام کے منتخب نمائندے حکومتی پالیسیوںپر تنقید کرتے نظر آرہے ہیں۔ مجلس وحدت مسلمین کا روز اول سے موقف ہے کہ گلگت بلتستان کے بنیادی مسائل مسلم لیگ اور پیپلز پارٹی کے پیداکردہ ہیں اور آج بھی اسی موقف پر قائم ہیں۔آئینی،سیاسی اور بنیادی انسانی حقوق کے حصول کیلئے جدوجہد کاطریقہ کار مجلس وحدت مسلمین خوب سمجھتی ہے اور شمس میر جیسوں سے مشورہ لینے کی کوئی ضرورت نہیں۔حکومت اگر اپنے آپ کو عوام کی نمائندہ سمجھتی ہے تو عوامی مسائل ان کے دہلیز پر حل کرے ،دھونس دھمکیوں سے مسائل حل نہیں ہوتے۔
