وحدت نیوز (سکردو) مجلس وحدت مسلمین پاکستان کے سربراہ علامہ راجہ ناصر عباس جعفری کی کال پر ملک بھر کی طرح  بلتستان کے مختلف اضلاع میں بھی پاکستان کے نامور علمائے کرام اور پرامن شخصیات کو فورتھ شیڈول میں ڈالنے کے خلاف احتجاج کیا گیا ۔ اس سلسلے میں روندو، کھرمنگ اور خپلو میں بعد از نماز جمعہ احتجاج کیا گیا۔ روندو میں مظاہرین نے گلگت اسکردو روڈ بلاک کیا اور اپنے مطالبات کے حق میں نعرے بلند کیے۔ روندو میں احتجاج سے ، شیخ اکبر رجائی ،شیخ نثاراتحادی،،مولانا عباس،مولانا نثار،مولانا صادق حسن ،اقبال دلبر، الطاف عبادی نے خطاب کیا۔مقررین نے اپنے خطاب میں کہا کہ نواز حکومت قومی ایکشن پلان کی آڑ میں سیاسی انتقام لے رہی ہے۔ ملک بھر میں محب وطن شہریوں کو دہشتگردوں سے مخالفت کی سزا دی جا رہی ہے۔ انہوں نے کہا کہ پاکستان کے نامور عالم دین حجۃ الاسلام شیخ محسن علی نجفی کی علمی کی ملی خدمات سے کون واقف نہیں ۔آج حکومتی سطح پر انکی حوصلہ افزائی کی بجائے ان کو فورتھ شیڈول میں ڈال دیاگیا جو کہ سر اسر ناانصافی اور ظلم ہے۔ ان کے علاوہ پاکستان کی نظریاتی اساسوں کی حفاظت کرنے والی شخصیت علامہ امین شہیدی جنہوں نے نہ صرف دہشتگردوں کے خلاف علم بغاوت بلندکیا بلکہ تمام مکاتب فکر کے علماء کرام میں اتحاد کے لیے عملی جدوجہد کیں جس کے سب قائل ہیں،مگر افسوس کہ آج ان کو بھی دہشتگردوں کی صف میں کھڑا کر کے ملی جذبات کو سخت ٹھیس پہنچایا گیا۔انکے علاوہ حجتہ الاسلام شیخ مرزا علی، شیخ نیئر عباس ، شیخ فدا حسین عابدی ،علامہ مقصود ڈومکی ، شیخ علی حیدر،شیخ محمد علی،الیاس صدیقی،سبطین شیرازی اوردیگر سینکڑوں پرامن ، محب وطن پاکستانیوںکوبلاوجواز فورتھ شیڈول میں ڈا ل کرپوری ملت کے جذبات کو ٹھیس پہنچایا گیا۔مظاہرین نے مطالبہ کیا کہ حکومت ظالم و مظلوم ، پرامن و فسادی، عالم و جاہل، محسن و غدار کو ایک نگاہ سے نہ دیکھیں۔ قومی ایکشن پلان کو اسکی روح کے ساتھ نافذ کر ے ،ایکشن پلان کی آڑ میں سیاسی انتقام لینے کا سلسلہ بن کیا جائے۔دہشتگردوں کے خلاف ملک گیر آپریشن کیا جائے۔ کلعدم دہشتگردوں کے خلاف آہنی ہاتھوں سے نمٹا جائے ۔ حکومت سے عوام کا اعتماد مکمل طور پر اٹھ چکا ہے پاکستان آرمی ہی اس ملک کو دہشتگردی سے پاک کرنے کی صلاحیت رکھتی ہے اور ملت تشیع دہشتگردوں کے خلاف جاری ہر جنگ میں پاکستان آرمی کی پشت پر کھڑی ہے۔ پاکستان کی سلامتی کے لیے یہ ملت کسی قسم کی قربانی سے دریغ نہیں کر ے گی۔