وحدت نیوز (جھنگ) مجلس وحدت مسلمین پاکستان کے مرکزی سیکریٹری جنرل ناصر ملت علامہ راجہ ناصر عباس جعفری نے معروف ذاکر اہل بیت (ع) سلطان الذاکرین ضرغام عباس بخاری کی دعوت پر جھنگ کی مرکزی امام بارگاہ میں بزم ذکر حسین (ع) کے تحت منعقدہ مجلس عزا سے خطاب کیا۔ اس موقع پر ضرغام عباس بخاری اور دیگر ذاکرین اہل بیت (ع) سمیت عزاداروں  کی بہت بڑی تعداد ناصر ملت کا خطاب سننے کیلئے موجود تھی۔ اس موقع پر اپنے خطاب میں علامہ راجہ ناصر عباس جعفری نے کہا کہ ولایت اہل بیت (ع) ہماری وحدت کا مرکز ہے، اگر کسی چیز نے ہمیں آپس میں جوڑے رکھا ہے تو وہ ولایت اہل بیت (ع) ہے ، ولایت اہل بیت (ع) ہماری شناخت ، پہچان اور طاقت کا نام ہے ، مجلس وحدت مسلمین اور ذاکرین اہل بیت کا اتحاد شیعہ قوم کے درمیان وحدت کی علامت ہے،ممبر اور محراب کی دوری کسی زمانے کی بات ہو گئی آج یہ مسئلہ تاریخ کا حصہ بن چکا ہے ،آج کسی ماتمی اور نمازی میں تفریق نہیں پوری ملت یک جان ہو کر  شیعت کی ترویج اور بقاءکے لئے کوشاں ہے، ہمیں آپس میں اور اہل سنت کے ساتھ یو نٹی قائم کر نے کے لئے کوشش تیز  کر نی ہے ، اس وطن کو اس ملت کو ہم باہمی اتحاد سے مسائل کی گرداب سے نکال سکتے ہیں ۔

 بعدازاں خطاب کرتے ہوئے سلطان الذاکرین ضرغام عباس بخاری نے مجلس وحدت مسلمین کی مکمل حمایت کا اعلان کرتے ہوئے کہا کہ خدا کا شکر ہے ہمیں علامہ راجہ ناصر عباس جعفری کی صورت میں بہترین مخلص  رہنما نصیب ہوا، جس نے ہر مشکل وقت میں قوم کی صحیح رہنمائی کی اور کبھی قوم کو تنہا نہیں چھوڑا ، ہم تمام ذاکرین قوم کی خدمت کے لئے ہر قدم شانہ بشانہ مجلس وحدت مسلمین کے ساتھ کھڑے ہیں ،خدا ہم سب کو ملت کے درمیان اتحاد و وحدت کی فضاء کو فروغ دینے کی توفیق عطا فرما۔