وحدت نیوز(جیکب آباد)مجلس وحدت مسلمین کے مرکزی سیکرٹری تنظیم علامہ مقصود علی ڈومکی نے کہا ہے کہ اسلامی ممالک اور ستر لاکھ اسلامی فوج خاموشی سے فلسطینی بچوں اور معصوم شہریوں کا قتل عام دیکھ رہے ہیں۔ دو ریاستی حل اسرائیل کے ناجائز قبضے کو جواز فراہم کرنا ہے۔ ان خیالات کا اظہار انہوں نے جیکب آباد میں پریس کلب کے سامنے فلسطینی عوام سے اظہار یکجہتی کے مظاہرے سے خطاب کرتے ہوئے کیا۔ اس سے قبل مجلس وحدت مسلمین ضلع جیکب آباد کی جانب سے مظلوم فلسطینی مسلمانوں سے اظہار یکجہتی کے لئے مرکزی امام بارگاہ سے پریس کلب تک ریلی نکالی گئی۔ جسکی قیادت ایم ڈبلیو ایم کے مرکزی رہنماء علامہ مقصود علی ڈومکی، ضلعی صدر نذیر حسین جعفری اور ضلعی رہنماء نثار احمد ابڑو کر رہے تھے۔

ڈسٹرکٹ پریس کلب کے سامنے مظاہرے سے خطاب کرتے ہوئے علامہ مقصود علی ڈومکی نے کہا کہ عارضی جنگ بندی کے بعد قابض صیہونی ریاست اسرائیل نے ایک دفعہ پھر فلسطینیوں کا قتل عام شروع کردیا ہے۔ 56 اسلامی ممالک اور ستر لاکھ اسلامی فوج خاموشی سے فلسطینی بچوں اور معصوم شہریوں کا قتل عام دیکھ رہے ہیں۔ انہوں نے کہا کہ مظلوم فلسطینیوں نے اپنے صبر و استقامت سے غاصب صیہونی ریاست کو شکست دی ہے۔ اسرائیلی بربریت پر مغرب اور استکباری قوتیں اسرائیل کے ساتھ کھڑی ہیں۔

یمنی مجاہدین انصار اللہ، ایران، حشد الشعبی اور حزب اللہ لبنان، حماس اور مظلوم فلسطینیوں کے دفاع کے لئے لڑ رہے ہیں، جبکہ 39 ملکی نام نہاد اسلامی فوج خاموش تماشائی بنی ہوئی ہے۔ علامہ مقصود علی ڈومکی نے کہا کہ پاکستانی قوم ایسی آزاد فلسطینی ریاست کی حامی ہے۔ جس کا دارالخلافہ قدس الشریف ہو۔ دو ریاستی حل اسرائیل کے ناجائز قبضے کو جواز فراہم کرنا ہے۔ قبلہ اول بیت المقدس اور مسجد اقصیٰ سے خیانت کرنے والے اور فلسطین میں دو ریاستی حل کے دعویدار کس طرح کشمیر کو انڈیا کے قبضے سے آزاد کرائیں گے؟ قبلہ اول مسجد اقصیٰ اور فلسطین سے خیانت کرنے والوں سے امت مسلمہ کسی خیر کی امید نہ رکھے۔