وحدت نیوز(اسلام آباد) سربراہ تحریک تحفظ آئین پاکستان و پشتون خواہ ملی عوامی پارٹی محمود خان اچکزئی کی جانب سے اپنی رہائش گاہ پر اپوزیشن قائدین کے اعزاز میں عشائیہ کا اہتمام۔
سربراہ مجلس وحدت مسلمین پاکستان سینیٹر علامہ راجہ ناصرعباس جعفری اور جنرل سیکریٹری سید ناصر شیرازی سمیت تحریک انصا ف کے مرکزی رہنما و سابق اسپیکر قومی اسمبلی اسد قیصر سمیت مولانا فضل الرحمان،قائد حزب اختلاف قومی اسمبلی عمر ایوب خان، شاہد خاقان عباسی، صاحبزادہ حامد رضا ،شبلی فراز ، سردار لطیف کھوسہ، مصطفی نواز کھوکھر، جنید اکبر، عاطف خان، شہرام تراکئی، سردار شفیق ترین، اسلم غوری، عاقب اللہ خان ،اور دیگر رہنما شریک ہوئے۔
عشائیہ میں ملک کی سیاسی صورتحال اور اپوزیشن کے گرینڈ اتحاد پر تفصیلی گفتگو ہوئی۔ اپوزیشن رہنماؤں نے اس پر اتفاق کیا کہ ملکی حالات اور بحرانی کیفیت اس بات کے تقاضا کرتے ہیں کے تمام جمہوریت پسند قوتیں ایک پلیٹ فارم پر اکھٹی ہو کر ملک اور قوم کو بحران سے نکالیں۔
اپوزیشن رہنماؤں نے مستقبل میں باہمی روابط بڑھانے اور ملک کو درپیش چیلینجز سے نمٹنے کے لیے آل پارٹیز کانفرنس کا انعقاد اور ایک نیشنل ایجنڈا ڈرافٹ کرنے کے لیے ایک سٹیرنگ کمیٹی کے قیام پر بھی اتفاق کیا۔ سٹیرنگ کمیٹی کی سربراہی شاہد خاقان عباسی کریں گے اور اس میں پی ٹی آئی مرکزی سینئر رہنما اسد قیصر، شبلی فراز، سینٹر کامران مرتضیٰ،مصطفی نواز کھوکھر، صاحبزادہ حامد رضا، ساجد ترین ، ناصر شیرازی ،تلمند خان اور اخونزادہ حسین شامل ہونگے۔
