وحدت نیوز(اسلام آباد) مجلس وحدت مسلمین پاکستان کے مرکزی وائس چیئرمین علامہ سید احمد اقبال رضوی نے کہا ہے کہ مرکزی کردار سازی کونسل کی جانب سے الحمد للہ کارکنان اور مسئولین کی فکری، نظریاتی اور اخلاقی تربیت کے حوالے سے آیت اللہ العظمیٰ شہید سید محمد باقرالصدر ؒ کی شہرہ آفاق کتاب ’’آزمائش‘‘ کا اسٹڈی سرکلز کا سلسلہ جاری ہے اور ہر ماہ کی پہلی اور آخری اتوار کو پورے ملک میں یہ نشست منعقد ہو رہی۔ تمام مسئولین کی خصوصی کاوشیں اس پروگرام کی کامیابی کے لیے بہت ضروری ہیں۔ انہوں نے کہا کہ اسٹڈی سرکل کی اہمیت کے پیش نظر مرکزی کابینہ اور صوبائی کابینہ اپنے اپنے متعلقہ اضلاع اور یونٹس کے پروگرام میں شرکت کریں گی (جو بھی ان کو سوٹ کرتا ہو)۔

انہوں نے مزید کہا کہ تمام محترم صوبائی/ضلعی صدور، آرگنائزر سے گزارش ہے کہ وہ اپنے صوبائی اور ضلعی شوریٰ کے اجلاس میں اسٹڈی سرکل کو باقاعدہ ایجنڈے میں شامل کریں۔ اس کے علاوہ مرکزی/صوبائی اور ضلعی شوریٰ کے اجلاسات میں کارکردگی کا جائزہ لیتے ہوئے یہ اسٹڈی سرکل اور دیگر تربیتی امور اہم ترین کارکردگی شمار کیے جائیں گے۔ نئے سال کا پہلا اسٹڈی سرکل یکم جنوری 2023ء بروز اتوار کو منعقد ہوگا۔