وحدت نیوز(پاراچنار)مجلس وحدت مسلمین پاکستان کے سربراہ علامہ راجہ ناصر عباس جعفری نے کہا ہے کہ پاکستان ایشیاء کا دل ہے، ایشیاء کے دشمن اس کیلئے مشکلات پیدا کر رہے ہیں، پشاور دھماکے کے متاثرین کے ساتھ انصاف کے دعویداروں نے انصاف نہیں کیا، یکساں نصاب تعلیم سے ہمیں مزید تقسیم کرنے کی کوشش کی جا رہی ہے۔ دورہ پاراچنار کے موقع پر ایم ڈبلیو ایم کے رہنماوں اور کارکنان کے ہمراہ پریس کانفرنس سے خطاب کرتے ہوئے علامہ راجہ ناصر عباس نے کہا کہ پاکستان کا مسئلہ پورے ایشیاء کا مسئلہ ہے اور ایشیاء کے دشمن ہمیں نقصان دینے کے درپے ہیں، ملک میں جاری سیاسی محاذ آرائی اور کھینچا تانی کا ذکر کرتے ہوئے انہوں نے کہا کہ یہاں سیاسی بلوغت کا فقدان ہے، پاکستان میں تبدیلی آئین و دستور کے مطابق آنی چاہیئے، ہم پہلے ہی ملک کو دو حصوں میں تقسیم کرچکے ہیں۔ ملک میں یکساں نصاب کے نظام کے نفاذ کو مسترد کرتے ہوئے علامہ راجہ ناصر عباس نے کہا کہ پاکستان تمام مذاہب کے لوگوں نے ملکر بنایا ہے اور اب یکساں نصاب جیسی حرکتوں سے دوبارہ عوام کو تقسیم کیا جا رہا ہے، جو کسی صورت قبول نہیں۔

پشاور دھماکے کو انتہائی افسوسناک اور بزدلانہ قرار دیتے ہوئے ایم ڈبلیو ایم کے سربراہ نے کہا کہ دھماکے کے متاثرین کے ساتھ انصاف کے دعویداروں نے نا انصافی سے کام لیا اور شیڈول کے دوروں میں مصروف وزیراعظم نے شہداء سے تعزیت تک نہیں کی، پشاور مسجد سمیت ملک بھر میں مساجد اور امام بارگاہوں کی سکیورٹی ایک الگ مسئلہ ہے، جس کے باعث اس قسم کے واقعات پیش آرہے ہیں اور افسوس ناک امر یہ ہے کہ جہاں پشاور دھماکے اور ڈیرہ اسماعیل خان سمیت مختلف علاقوں میں دہشت گردی کے واقعات میں ملوث عناصر کے خلاف کوئی کارروائی نہیں کی جاتی، وہاں پندرہ منٹ جلوس لیٹ نکالنے پر ہمارے خلاف ایف آئی آر کاٹی جاتی ہے۔ مقامی مسائل کا ذکر کرتے ہوئے انہوں نے کہا کہ زمینوں کے تنازعات کے فیصلے بروقت نہ ہونے سے لڑائی جھگڑوں تک نوبت جاتی ہے، جس سے قیمتی جانوں کا ضیاع ہوتا ہے۔ علامہ راجہ ناصر عباس نے کہا کہ پاراچنار سے نوجوان عالم دین علامہ مزمل حسین تحصیل چیئرمین شپ کے امیدوار ہیں اور دیگر کونلسز میں بھی ایم ڈبلیو ایم نے اچھی ٹیم کی خدمات عوام کو پیش کی ہے، عوام ایم ڈبلیو ایم کے انتخابی نشان خیمے کو ووٹ دیکر اپنے مسائل کے حل کیلئے راہ ہموار کریں۔