وحدت نیوز(ملتان)مجلس وحدت مسلمین جنوبی پنجاب کے زیراہتمام ''انقلاب اسلامی ایران'' کی 42ویں سالگرہ کی مناسبت سے جامعہ شہید مطہری ملتان میں تقریب کا اہتمام کیا گیا، تقریب میں ایم ڈبلیو ایم پاکستان کے مرکزی سیکرٹری تنظیم سازی علامہ شبیر بخاری اور مرکزی سیکرٹری تربیت ڈاکٹر یونس علی نے خصوصی شرکت کی۔

 اس موقع پر مجلس وحدت مسلمین جنوبی پنجاب کے صوبائی سیکرٹری جنرل علامہ اقتدار حسین نقوی، صوبائی رہنما علامہ قاضی نادر حسین علوی، ایم ڈبلیو ایم لیہ کے سیکرٹری جنرل مولانا ساجد رضا اسدی، مولانا امیر حسین ساقی، صوبائی ڈپٹی سیکرٹری جنرل سلیم عباس صدیقی، غلام اصغر تقی۔صوبائی رہنمائوں مہر سخاوت علی سیال، سید ندیم عباس کاظمی، سید اجمل حسین شاہ، مولانا ممتاز حسین ساجدی سمیت دیگر بھی موجود تھے۔

اس موقع پر خطاب کرتے ہوئے مرکزی رہنما علامہ شبیر بخاری کا کہنا تھا کہ امام خمینی راہ کربلا کے حقیقی سپاہی تھے، جنہوں نے اپنے عشق کے ذریعے کربلا کے پیغام کو پوری دنیا میں عام کیا۔ انقلاب اسلامی کی کامیابی میں امیر کی اطاعت اہم عنصر تھا، ایرانی قوم امام خمینی پر لبیک کہنے میں ایک لمحہ بھی نہیں ہچکچاتی تھی، یہی وجہ ہے کہ انقلاب آج ماضی کی نسبت زیادہ پھل پھول رہا ہے، تقریب کے اختتام پر مہمانوں نے انقلاب اسلامی کی سالگرہ کا کیک بھی کاٹا۔