وحدت نیوز(جیکب آباد) مدرسہ خاتم النبیین ص جیکب آباد میں منعقدہ مجلس عزا سے خطاب کرتے ہوئےمجلس وحدت مسلمین پاکستان کے مرکزی ترجمان علامہ مقصود علی ڈومکی نے کہا ہے کہ آل رسول ص نے دین اسلام کی بقا کے لئے بے مثال قربانی دی ، یہی سبب ہے کہ 14 سو سال گذر جانے کے باوجود آج بھی امام حسین عالی مقام اور ان کے اصحاب کی قربانی عالم انسانیت کے لئے مشعل راہ ہے۔آج انسانیت جن مشکل حالات میں پھنسی ہوئی ہے ان مشکلات سے  نکلنے کا واحد راستہ کربلا والوں کی پیروی میں مضمر ہے کربلا ہر دور کے انسان کی درسگاھ ہے کربلا فقط ایک حادثہ نہیں بلکہ مکمل نظام حیات ہے عصر حاضر کے یزیدوں اور فرعونوں سے مقابلے کے لئے ہمیں اسوہ شبیری کو اپنانا ہوگا۔

انہوں نے کہا کہ کشمیر اور فلسطین کے مظلوم مسلمان کربلا والوں کے نقش قدم پہ چلتے ہوئے یزید عصر کو عبرت ناک شکست دے سکتے ہیں۔آج یمن کے مظلوم مسلمانوں نے جارح قوتوں کو شکست دے کر یہ بتا دیا کہ جو خدا کی ذات پر توکل اور ایمان رکھتے ہیں وہی ہمیشہ سر بلند رہتے ہیں۔اور جو شیطان بزرگ امریکہ پر اعتماد کرتے ہیں  انہیں ہمیشہ ذلت و رسوائی کا سامنا کرنا پڑتا ہے۔اس موقع پر مجلس عزا سے ایم ڈبلیو ایم ضلع جیکب آباد کے سیکریٹری جنرل علامہ سیف علی ڈومکی اور ضلعی سیکریٹری تنظیم سازی مولانا حسن رضا غدیری نے بھی خطاب کیا۔