وحدت نیوز(اسلام آباد) مجلس وحدت مسلمین پاکستان کے مرکزی سیکرٹری اطلاعات سید علی احمر زیدی نے انسداد الیکٹرانک جرائم بل (سائبر کرائمز بل)کی پارلیمنٹ سے منظوری پر اپنے ردعمل کا اظہار کرتے ہوئے کہا ہے کہ مذکورہ بل کی متعدد شقیں اظہار رائے کی آزادی سے متصادم ہیں۔حکومت کے نامناسب اقدامات کے خلاف آواز بلند کرنا عوام کا جمہوری حق ہے۔ عوام سے یہ حق نہ چھینا جائے۔انہوں نے کہاکہ عوامی ردعمل حکومت کے درست سمت کے تعین میں رہنما ثابت ہوتا ہے۔اس لیے اس آواز کو دبانا حکومت کے اپنے مفاد میں بھی نہیں۔ جمہوری معاشروں میں اظہار رائے کی آزادی اورجائز تنقید کو جمہوری طرز حکومت کا حُسن سمجھا جاتا ہے۔پاکستان ایک جمہوری ریاست ہے جہاں عوام کو حکومت پر بجا تنقید کا آئینی حق حاصل ہے۔انہوں نے کہا کہ اس بل میں اصلاحات انتہائی ضروری ہیں۔دہشت گردی کے خاتمے کے لیے قوانین مزید سخت کرنا ہوں گے۔سوشل میڈیا پر تکفیریت و انتہاپسندی کے پرچار کو قومی مفاد اور ملکی سالمیت کےخلاف جرم تصور کرتے ہوئے سخت ترین سزا کا تعین ہونا چاہیے۔