وحدت نیوز(اسلام آباد) مجلس وحدت مسلمین پاکستان کے مرکزی ڈپٹی سیکرٹری علامہ احمد اقبال رضوی نے کہا کہ پاکستان کی خوشحالی و ترقی کے لیے پاک چائنا اقتصادی راہدری کی تکمیل انتہائی ضروری ہے۔اس کی راہ میں حائل رکاوٹوں کو ہٹا کر منصوبے کو عملی جامہ پہنایا جائے۔عالمی استعمار اور کچھ خلیجی ریاستوں کی طرف سے اس پروجیکٹ کی مخالفت مضبوط اور خوشحال پاکستان کے خلاف گھناؤنی کوشش ہے جسے ناکام بنانے کے لیے ملک کی تمام مذہبی و سیاسی قوتیں حکومت کے ساتھ کھڑی ہیں۔پاکستان کے محب وطن اور باشعور عوام اس حقیقت سے بخوبی آگاہ ہیں کہ جو عناصر سی پیک کو پایہ تکمیل تک پہنچتا نہیں دیکھنا چاہتے وہ پاکستان کی سلامتی کے دشمن اور غیر ملکی ایجنٹ ہیں۔سی پیک وطن دوست اور دشمن کی شناخت کا بہترین ذریعہ ہے۔انہوں نے کہا کہ سی پیک کی تعمیر میں تاخیرپاکستانیوں کے لیے تشویش کا باعث ہے۔عوام کو اس بات سے آگاہ کیا جانا چاہیے کہ اتنے بڑے اور نفع بخش منصوبے میں روایتی تساہل کیوں برتا جا رہا ہے۔اگر اس میں کوئی تکنیکی رکاوٹیں ہیں تو انہیں دور کرنا ہو گا اور اگر حکومت پر کوئی بیرونی دباؤ ہے تو اسے خاطر میں نہ لایا جائے۔انہوں نے کہا پاکستان دشمن قوتوں زندگی کے ہرمیدان میں شکست سے دوچار کرنا چاہتی ہیں۔ہماری اقتصادی خوشحالی دشمنوں کے ناپاک عزائم کی راہ میں آہنی دیوار ثابت ہو گی۔انہوں نے حکومت سے مطالبہ کیا کہ پاک چائنا اقتصادی راہدری کے حوالے سے اب تک جو پیش رفت ہوئی ہیں ان پر آل پارٹیز کانفرنس بلا کر بریفنگ دی جائے۔

وحدت نیوز(ہری پور) مجلس وحدت مسلمین خیبر پختونخوا کے شعبہ تحفظ عزاداری کے زیر اہتمام ہری پور میں ’’حسین (ع) سب کا‘‘ کے عنوان سے سیمینار کا اہتمام کیا گیا۔ جس میں مختلف مکاتب فکر کے علمائے کرام، عمائدین اور سیاسی رہنماوں نے شرکت کی۔ سیمینار سے مجلس وحدت مسلمین خیبر پختونخوا کے سیکرٹری جنرل علامہ اقبال حسین بہشتی، جمعیت علمائے اسلام کے ضلعی رہنما مولانا قاضی گل رحمان، مسلم لیگ نون کے ضلعی صدر سید حامد شاہ، مجلس وحدت مسلمین کے صوبائی رہنما نیئر عباس جعفری اور دیگر مقررین نے خطاب کیا۔ اس موقع پر مقررین نے امام حسین (ع) کی ذات اقدس کے حوالے سے گفتگو کرتے ہوئے موجودہ حالات میں تمام مکاتب فکر کے پیروکاروں کو متحد ہوکر دین اسلام اور پاکستان کی بقا کیلئے کام کرنے کی ضرورت پر زور دیا۔

وحدت نیوز(اسلام آباد) وفاقی وزیر داخلہ چوہدری نثار علی خان نے مجلس وحدت مسلمین کے مرکزی سیکرٹری جنرل علامہ راجہ ناصر عباس جعفری کی ہمشیرہ محترمہ کے انتقال پر ان کی رہائش گاہ پر جا کر اظہا تعزیت کیا، وفاقی وزیر نے مرحومہ کی بلندی درجات کے لیے فاتحہ خوانی اور پسماندگان کے لیے صبر جمیل کی دعا بھی کی۔علامہ ناصر عباس کی ہمشیرہ گزشتہ روز انتقال کر گئیں تھیں جن کی نماز جنازہ شکریال امام بارگاہ میں ادا کی گئی۔نماز جنازہ میں بڑی تعداد میں سیاسی،سماجی،مذہبی،صحافتی اور مختلف مکتبہ فکر سے تعلق رکھنے والی شخصیات نے شرکت کی۔اس کے علاوہ مختلف سیاسی و مذہبی رہنماؤں نے بھی ایم ڈبلیو ایم کے سربراہ سے ان کی ہمشیرہ کے انتقال پر افسوس کااظہار کیا۔

وحدت نیوز(مانٹرنگ ڈیسک) اسکردو سے تعلق رکھنے والا پاکستان کا پہلا کوہ پیماء جس نے آکسیجن کے بغیر ماونٹ ایورسٹ پر پاکستان کا پرچم لہزایا، دنیا کی چھ بلند ترین چوٹیاں سر کیں اور تین ورلڈ ریکارڈ بنائے، آج بے بسی کی تصویر بنا راولپنڈی کے ہسپتال میں کسی مسیحا کی امداد کا منتظر ہے۔ حکومتی امداد کے بغیر اپنی مدد آپ کے تحت بغیر آکسیجن کے دنیا کی بلند ترین چوٹی کو اپنے عزم و ہمت اور جواں مردی سے پاوں تلے روندنے والا وطن کا یہ شیر دل سپوت آج کینسر کے مرض میں مبتلا، شدید مالی مشکلات سے دوچار، زندگی کی بازی لڑنے میں مصروف ہے۔ وفاقی اور صوبائی حکومت نے انکے علاج کے لئے زبانی دعویٰ تو کیا ہے لیکن عملی طور پر تاحال کوئی پیش رفت نہیں ہوسکی ہے۔ حسن سدپارا کا تعلق اسکردو کے نواحی گاوں سدپارا سے ہے اور غریب خاندان کے چشم و چراغ ہیں۔ انہوں نے ماونٹ ایورسٹ سمیت دنیا کی چھ اونچی چوٹیاں سر کرکے سبز ہلالی پرچم لہرا کر پاکستانیوں کا سر فخر سے بلند کیا تھا، لیکن اس عظیم قومی ہیرو کی خدمات کو سراہتے ہوئے انکے علاج کے لئے کوئی تیار نہیں۔ دوسری طرف حسن سدپارہ کے پاس اتنی مالی وسعت نہیں کہ وہ اس مہلک مرض کا علاج کروا سکے۔ حکومت پاکستان کو چاہیے کہ انکی خدمات کو سراہتے ہوئے فوری طور پر انکے علاج معالجے کا مناسب انتظام کرے۔

وحدت نیوز(اسلام آباد) مجلس وحدت مسلمین پاکستان کے ترجمان علامہ مختار امامی نے مرکزی میڈیا سیل سے جاری اپنے بیان میں کہا ہے کہ مجلس وحدت مسلمین پاکستان کے سربراہ علامہ راجہ ناصر عباس جعفری کی بڑی ہمشیرہ کے انتقال پر مجلس وحدت مسلمین پاکستان کے مرکزی و صوبائی رہنماوں سمیت ملک اور بیرون ملک مقیم تنظیمی ذمہ داران اور ہمدردوں نے اظہار تعزیت کیااور ملک بھر کے صوبائی و ضلعی دفاتر میں تعزیتی اجلاس و فاتحہ خوانی کا اہتمام کیا گیا،مجلس وحدت مسلمین کے مرکزی رہنماوں علامہ احمد اقبال رضوی،علامہ امین شہیدی،سید ناصر شیرازی،علامہ مبارک موسوی،علامہ مقصود ڈومکی،علامہ سید علی رضوی،علامہ تصور جوادی،علامہ حسن ظفر نقوی،علامہ باقر زیدی،علامہ ہاشم موسوی،علامہ محمد اقبال بہشتی،علامہ اعجاز حسین بہشتی،سید اسد عباس نقوی سمیت دیگر رہنماوں نے جنازے میں شرکت کی،اس موقع پر مختلف سیاسی و مذہبی جماعتوں کے رہنماوں نے بھی شرکت کی اور علامہ راجہ ناصر عباس جعفری سے انکی ہمشیرہ کے انتقال پر اظہار تعزیت بھی کیا،مرکزی ترجمان کے مطابق مرحومہ کی رسم قل 12نومبر بروز ہفتہ ان کے آبائی گاوُں شکریال میں ادا ہوگی۔

وحدت نیوز (کراچی) مجلس وحدت مسلمین سندھ کے صوبائی سیکرٹری سیاسیات سید علی حسین نقوی نے سابق سینٹر سیدفیصل رضا عابدی کی رہائی پر مسرت کا اظہار کرتے ہوئے اسے اصولی موقف اور انصاف کی فتح قرار دیا ہے. انہوں نے کہا کہ کچھ نادیدہ طاقتیں کراچی کے امن وسکون کوخراب کرنے اور فرقہ وارنہ تعصب کو ابھارنے کے لیے مذموم عزائم کی تکمیل چاہتی تھیں. فیصل رضا عابدی اور علامہ مرزا یوسف حسن کی گرفتاری اسی سازش کی کڑی ہے.۔ سندھ میں امن و امان کی خرابی کی ذمہ دار وہ کالعدم مذہبی جماعتیں ہیں جو نام بدل کر ابھی تک ملک دشمن سرگرمیوں میں مصروف ہیں. جب تک ان کو لگام نہیں دی جاتی تب تک حالات کی بہتری ممکن نہیں۔انہوں نے کہا کہ اگر ادارے اپنی ذمہ داری کی ادائیگی میں آئین و قانون کی بالادستی کا یقینی بنائیں تو پھر قانون و انصاف کی حکمرانی ہو گی اور جرائم پیشہ افراد قانون کے شکنجے سے نہیں بچ سکیں گے۔انہوں نے کہا کہ ہم کراچی سمیت پورے ملک میں امن کے خواہاں ہیں۔اس سلسلے میں حکومت کے ساتھ ہماری طرف سے ہر طرح کا تعاون کیا جائے گا۔دیگر سیاسی و مذہبی جماعتوں کو بھی چاہییے کہ وہ کراچی سمیت ملک بھر کی ترقی و استحکام کے لیے مثبت انداز سے آگے بڑھیں۔انہوں نے کہا کہ اربعین امام حسین علیہ السلام کے موقعہ پرتمام جلوسوں کو فول پروف سیکورٹی فراہم کی جائے تاکہ دہشت گرد قوتوں کو کسی شر پسندی کا موقعہ نہ مل سکے۔