وحدت نیوز(لاہور) مجلس وحدت مسلمین پنجاب کے صوبائی انٹرا پارٹی الیکشنکا انعقاد،علامہ عبدالخالق اسدی اگلے تین سال کے لئے بھاری اکثریت سے ایم ڈبلیو ایم سنٹرل پنجاب کے سیکرٹری جنرل منتخب ہوگئے،انٹرا پارٹی الیکشن میں سنٹرل پنجاب کے 26 اضلاع کے سیکرٹری جنرلز و ڈپٹی سیکرٹری جنرلز نے اپنی حق رائے دہی استعمال کیا،مجلس وحدت مسلمین پاکستان کے سربراہ علامہ راجہ ناصرعباس جعفری نے نو منتخب سیکرٹری جنرل سنٹرل پنجاب سے حلف لیا،
 
ایم ڈبلیوایم سینٹرل پنجاب کے نومنتخب سیکریٹری جنرل علامہ عبد الخالق اسدی نے خطاب کرتے ہوئے کہاکہ قومی یکجہتی اور اتحاد بین المسلمین کے لئے جدوجہد جاری رکھیں گے،پنجاب میں امن و امان کی حقیقی بحالی کے لئے نیشنل ایکشن پلان پر اس کے روح کے مطابق عمل کو یقینی بنایا جائے،کالعدم جماعتوں اور ان کے سہولت کاروں کے خلاف موثر کارروائی کو یقینی بنایا جائے اور پنجاب سے لاپتہ بے گناہ افراد کو بازیاب جائے،پنجاب میں بیلنس پالیسی کے تحت ہمارے درجنوں پڑھے پرامن جوانوں اور معزز افراد کو شیڈول فور جیسے کالے قانون کے تحت ہراساں کیا جا رہا ہے جو انسانی حقوق کی کھلی خلاف ورزی ہے ،ہم انشاءاللہ ہر مظلوم کے حامی رہیں گے خواہ وہ غیر مسلم ہی کیوں نہ ہو اور ہر ظالم کیخلاف رہیں گے خواہ وہ مسلمان ہی کیوں نہ ہو۔

وحدت نیوز(کراچی) مجلس وحدت مسلمین کے صوبائی رہنما سید علی حسین نقوی کا ایم ڈبلیوایم ضلع ملیر کے سیکریٹری جنرل عارف رضا زیدی ، علامہ نشان حیدر ، علامہ علی انور جعفری ودیگر کے ہمراہ مسجد وامام بارگاہ سلمان فارسی اسٹیل ٹاؤن کا دورہ، تکفیری دہشتگردوں کے حملے کے نتیجے میں ہونے والے نقصانات کا جائزہ، انتظامیہ سے ملاقات ، پولیس حکام سے ملزمان کی فوری گرفتاری کا مطالبہ، علی حسین نقوی کا ایم ڈبلیوایم کی جانب سے متاثرہ مسجد وامام بارگاہ میں سی سی ٹی وی کیمروں کی فوری تنصیب کا اعلان ۔

تفصیلات کے مطابق مجلس وحدت مسلمین صوبہ سندھ کے سیکریٹری سیاسیات علی حسین نقوی  وفدکے ہمراہ متاثرہ مسجد وامام بارگاہ پہنچے جہاں انہوں نے نقصانات کا جائزہ اورمسجد وامام بارگاہ کی انتظامیہ سے وقوعہ کی تفصیلات حاصل کیں ، علاقہ مکینوں نے بتایاکہ چند روز قبل مرکزی مسجد وامام بارگاہ جعفریہ اسٹیل ٹاؤن کمپلیکس میں بھی درگاہ کے چندے کے بکس کا تالا توڑ کر پیسے چوری کیئے گئے تھے اور آج یہ واقعہ رونما ہوگیا ہے ،اس مسجد وامام بارگاہ کا تحفظ اسٹیل مل انتظامیہ کی ذمہ داری ہے لیکن یہاں کوئی سکیورٹی گارڈ موجود نہیں تھا۔

ایم ڈبلیوایم کے رہنما علی حسین نقوی نے اس موقع پر فوری طور پر متاثرہ مسجد وامام بارگاہ کی سکیورٹی کیلئے سی سی ٹی وی کیمرے نصب کرنے کا اعلان کیا اور موقع پر موجود پولیس حکام سے مطالبہ کیاکے اس واقعہ میں ملوث ملزمان کی فوری گرفتاری کو یقینی بنایا جائے، جبکہ انہوں نے جی ایم سکیورٹی پاکستان اسٹیل ملز سے گلشن حدید اور اسٹیل ٹاؤن میںموجود تمام مساجد وامام بارگاہوں کو موثر سکیورٹی فراہم کرنے کا مطالبہ کیا ۔

واضح رہے کہ گذشتہ شب تکفیری دہشت گردوں نے مسجد وامام بارگاہ سلمان فارسی اسٹیل ٹاؤن پر حملہ کرکےاسلامی مقدسات کو شدید نقصان پہنچایا، ذرائع کےمطابق دو سے زائد حملہ آور رات 1سے 2بجے کے درمیان دروازہ توڑ کر مسجد وامام بارگاہ میں داخل ہوئے اور مسجد میں موجود قرآن پاک کے نسخوں ، شبیہ علم حضرت عباس ؑ، ممبر اور دیگر مقدسات کو شہید کردیا،جبکہ مسجد کے کھڑکی اور دروازے بھی توڑےگئے ، الصبح علاقہ مکینوں نے مسجد وامام بارگاہ میں توڑپھوڑ دیکھی تو متعلقہ تھانے کو اطلاع دی اور یہ خبر جنگل کی آگ کی طرح پورے شہر میں پھیل گئی۔

وحدت نیوز(ایران) مجلس وحدت مسلمین شعبہ امور خارجہ کے مرکزی سیکریٹری علامہ ڈاکٹر شفقت حسین شیرازی کی سربراہی میں ایم ڈبلیوایم کی جانب سے ایران کے سیلاب متاثرہ عوام کی امداد کے دوسرے مرحلے کاآغاز،اس سلسلے میں پر صوبہ خوزستان کے 100 متاثرہ گھروں میںتقریباً 3 لاکھ روپے مالیت کے راشن بیگز کی تقسیم،امدادی سامان بذریعہ وین اور کشی متاثرہ علاقوں تک پہنچایاگیا، سیلاب سے متاثرہ ایرانی مسلمان بھائی بہنوں کی جانب سے مصیبت کی اس گھڑی میں بھرپور امدادپر مجلس وحدت مسلمین اور پاکستانی عوام سے اظہار تشکر  اور نیک خواہشات کا اظہارایم ڈبلیوایم کی جانب سے امداد رسانی کا سلسلہ تاحال جاری ہے کل دیگر علاقوں میں امداد فراہم کی جائے گی۔

تفصیلات کے مطابق آج بروز جمعہ ایم ڈبلیو ایم شعبہ امور خارجہ کے سیکرٹری حجت الاسلام والمسلمین ڈاکٹر سید شفقت حسین شیرازی نے صوبہ خوزستان کے شہر سوسنگرد اور حمیدیہ کے مضافاتی علاقوں میں راشن بیگزتقسیم کرکے امدادی سامان کی تقسیم کے دوسرے مرحلے کا آغاز کیا. امدادی سامان کی تقسیم کے اس عمل کا آغاز پاکستان ایران دوستی زندہ باد کے نعرے سے ہوا جس میں ابتدائی طور پر تقریباً 3 لاکھ روپےکی مالیت کے راشن بنڈلز کی ایک بڑی تعداد سوسنگرد کے علاقے بیت الشخیتر اور حمیدیہ کے علاقے صندیہ میں تقسیم کی گئی۔

 اس موقع پر موجود لوگوں نے ایم ڈبلیو ایم پاکستان کے مسوولین اور پاکستانی عوام کا شکریہ ادا کیا اور پاکستان ایران تعلقات کی مزید مضبوطی اور دونوں برادر ہمسایہ ممالک کی عوام کی ترقی کی دعا کی. امدادی سامان کی تقسیم کے دوسرے مرحلے میں ایم ڈبلیو ایم کی طرف سے کل بروز ہفتہ صوبہ لرستان کے شہر معمولان کے تین مختلف سیلاب متاثرہ علاقوں میں کثیر مالیت کا گھریلو سامان تقسیم کیا جائے گا. یاد رہے مجلس وحدت مسلمین شعبہ امور خارجہ کے مسؤولین کی ایک ٹیم گذشتہ چند دن سے دوسری بار ایران کے سیلاب متاثرہ علاقوں میں موجود اور متاثرین کی ضروریات و نقصانات کا نزدیک سے جائزہ لے کر امدادی سامان کی تقسیم کا عمل انجام دے رہی ہے۔

وحدت نیوز (کندھ کوٹ) جماعت اسلامی ضلع کشمور کے زیراہتمام قبائلی جھگڑوں اور امن وامان کی ابتر صورتحال کے  حوالے سے حرا پبلک اسکول کندھ کوٹ میں آل پارٹیز کانفرنس منعقد ہوئی۔ اے پی سی میں ضلع کشمور کی سیاسی مذھبی جماعتیں اور سماجی تنظیمیں شریک ہوئیں۔ اس موقعہ پر جماعت اسلامی کے ضلعی رہنما غلام مصطفی میرانی نے علامہ ڈومکی کو سندھ کی ثقافتی اجرک کا تحفہ پیش کیا اور سیرت النبی صلی اللہ علیہ وآلہ وسلم کے موضوع پر کتاب کا تحفہ پیش کیا۔

 اس موقع پر آل پارٹیز کانفرنس سے خطاب کرتے ہوئے مجلس وحدت مسلمین سندھ کے سیکریٹری جنرل علامہ مقصود علی ڈومکی نے کہا کہ امن اور بہتر معیشت انسانی معاشرے کی ضرورت ہے۔ دھشت گردی اور امن وامان کی ابتر صورتحال حکومت اور ریاستی اداروں کے لئے لمحہ فکریہ ہے۔ گذشتہ دو دھائیوں سے کوئٹہ کے شیعہ ھزارہ کی نسل کشی ہو رہی ہے۔ سانحہ ھزار گنجی کے بعد اوڑماڑہ میں شناختی کارڈ دیکھ کر بے گناہ انسانوں کا قتل عام حکمرانوں کی نا اہلی ہے۔

انہوں نے کہا کہ کندھ کوٹ سے کم سن بچوں کا اغوا اور چوری و ڈکیتی کی وارداتیں انتظامیہ کی نا اہلی کے باعث ہیں۔ آل پارٹیز کانفرنس سے جماعت اسلامی کے صوبائی رہنما عبدالحفیظ بجارانی؛ ایس ٹی پی؛ پاک سر زمین پارٹی؛ عوامی تحریک ؛ شہری اتحاد ؛ ایس یو سی ؛ جمعیت علماء اسلام و دیگر جماعتوں کے رہنما شریک ہوئے۔

وحدت نیوز(کراچی) مجلس وحدت مسلمین کے رہنماؤں نے حالیہ دہشت گردی کے واقعات اور شیعہ افراد کی جبری گمشدگیوں کے خلاف آج (جمعہ) کو ملک گیر یوم احتجا ج منانے کا اعلان کرتے ہوئے وزیر اعظم عمران خان اور چیف جسٹس آف پاکستان سے مطالبہ کیا ہے کہ جبری گمشدگی کے واقعات کا فوری نوٹس لیں، دہشت گردوں اور ان کے سہولت کاروں کے خلاف بلا تفریق آپریشن کیا جائے۔ان خیالات کا اظہار جمعرات کو ایم ڈبلیو ایم کے رہنما علی حسین نقوی،مولانا صادق جعفری،علامہ مبشر حسن،مولانا علی انور جعفری نے وحدت ہا? س میں پریس کانفرنس کرتے ہوئے کیا۔ اس موقع پر مولانا غلام عباس،میر تقی ظفرآصف صفوی و دیگر بھی موجود تھے۔

علی حسین نقوی نے کہا کہ بلوچستان اورخیبر پختون خواہ اس وقت مقتل گاہ بنا ہوا ہے۔کوئٹہ، کوسٹل ہائی وے مکران،ڈی آئی خان میں تسلسل کے ساتھ ظلم و بربریت جاری ہے۔ایسا لگتا ہے کہ بلوچستان میں ریاست کی نہیں بلکہ دہشتگردوں کی رٹ قائم ہے،وفاقی حکومت نیشنل ایکشن پلان پر سختی سے عمل در آمد کرائے اور ملکی و قومی سلامتی کیلئے فیصلہ کن اقداما ت کر ے۔انھوں نے کہا کہ دہشتگرد کسی قسم کی رعایت کے مستحق نہیں،ہمیں ان کے سہولت کاروں کو قومی دھارے میں لانے کی پالیسی پر تحفظات ہیں، ایسا کرنا ان کو آکسیجن فراہم کرنے کے مترادف اور ہزاروں شہدا لواحقین کے زخموں پر نمک پاشی کے مترادف ہے۔

انھوں نے کہا کہ ہماری حکومتیں بلوچستان کو کیوں نظر انداز کرتی ہیں،یہاں کے امن پر پے در پے حملوں پر حکمرانوں کی خاموشی لمحہ فکریہ ہے،مستقبل کے معاشی گیٹ وے کو نظر انداز کرنا انتہائی مغحکہ خیز ہے۔ علی حسین نقوی نے کہا کہ کراچی میں بے گناہ شیعہ افراد کے خلاف کریک ڈاون کیا جارہا ہے، مختلف علاقوں سے80سے زائد شیعہ نوجوانوں جن میں صحافی بھی شامل ہیں انھیں بلاجواز گرفتار کرکے بہیمانہ تشدد کا نشانہ بنایا جارہاہے۔اسطرح کے اقدامات سے ملت جعفریہ میں احساس عدم تحفظ پیداہورہاہے۔ ان اقدامات پرملت جعفریہ کے اکابرین کو فوری اعتماد میں لیا جائے۔

انھوں نے کہا کہ مکران کوسٹل ہائی وے پر سکیورٹی فورسزکے اہلکاروں کی بہیمانہ شہادت،دہشتگردی، شیعہ کلنگ اور جبری گمشدگیوں کے خلاف آج جمعہ کو ملک گیر یوم احتجاج منائیں گے،خانوادہِ شہدائکے لواحقین کے ساتھ بھر پور اظہار ہمدردی ویکجہتی کرتے ہیں اور اس مشکل کی گھڑی میں انکو کبھی تنہا نہیں چھوڑیں گے۔ہماری صدر اور وزیر اعظم پاکستان،چیف جسٹس پاکستان،آرمی چیف،وزیر اعلی سندھ، گورنر سندھ، کور کمانڈر کراچی، ڈی جی رینجرز سندھ اور آئی جی سندھ سے اپیل ہے کہ شیعہ افراد کی جبری گمشدگیوں کا نوٹس لیں، لاپتہ شیعہ نوجوانوں، عمائدین اور صحافیوں کو فوری طور پر رہاکیا جائے۔ دہشت گردوں اور ان کے سہولت کاروں کے خلاف سخت کاروائی کی جائے، شہدا کے لواحقین کے لئے فوری امدادی پیکج کا اعلان کیا جائے،بصورت ملت جعفریہ ملک گیر احتجاج کی کال دے گی اورحالات کی ذمہ دار ی حکومت پر عائد ہوگی۔

وحدت نیوز(ملتان) مجلس وحدت مسلمین کا سانحہ ہزار گنجی ،اوماڑ ہ اور ڈی آئی خان میں جاری ٹارگٹ کلنگ کے خلاف ملک گیر احتجاج کا اعلان ، ملک بھر کے تمام بڑے شہروں سمیت اہم اضلاع میں جمعے کے روز بھرپور احتجاجی مظاہرے کئے جائیں گئے ، دہشتگردوں اور ان کے سہولت کاروں کے خلاف آواز بلند کرتے رہیں گے ۔ان خیالات کا اظہارجنوبی پنجاب کے سیکرٹری جنرل علامہ سید اقتدار حسین نقوی نے میڈیا سیل سے جاری بیان میں کیا۔

 انہوں نے کہ بلوچستان میں خون کی ندیاں بہانے والے بیرونی ایجنڈے پر عمل پیرا ہیں ۔بلوچستان کی ناامنی میں انڈیا ،اسرائیل اور امریکہ پوری طرح ملوث ہے ۔ سانحہ ہزار گنجی اور سانحہ اوماڑہ کے دہشتگرد عناصر ایک ہی ہیں ۔ جن کا مقصد پاکستان کو غیر مستحکم کرنا ہے ۔ اورہم ہرگز دشمنوں کی اس سازشوں کو کامیاب نہیں ہونے دیں گے ۔ کوسٹل ہائی وے پر سفاکیت کی انتہا کی گئی ہے ۔بے گناہ سیکورٹی فورسز کے جوانوں کو بے دردی سے قتل کر دیا گیا ۔ہم تمام شہدا کے لواحقین سے اظہار تعزیت کرتے ہیں ۔ ڈی آئی خان میںجاری مسلسل فرقہ وارنہ ٹارگٹ کلنگ پر حکومت کی بے حسی اور بے توجہی قابل مذمت ہے ۔ سانحہ ہزار گنجی کے خلاف دھرنے دینے والوں کو تسلیاں دے کر گھروں کو بھیج دیا گیا اب لوگ سنجیدہ اقدامات کے منتظر ہیں ۔ حکومت کو عوام کی مایوسی سے قبل اقدامات کرنا ہونگے اگر عوام مایوس ہوگئی تو ان کے لئے حکومت چلانا مشکل ہو جائے گا۔

ایم ڈبلیو ایم جنوبی پنجاب کے ترجمان ثقلین نقوی کے مطابق یوم احتجاج کے موقع پر ملک کے دیگر شہروں کی طرح جنوبی پنجاب کے تمام اضلاع میں احتجاجی مظاہرے اور ریلیاں نکالی جائیں گی، ملتان میں نماز جمعہ کے بعد جامع مسجد الحسین نے گلشن مارکیٹ تک احتجاجی ریلی نکالی جائے گی، بہاولپور میں شیعہ جامع مسجد سے احتجاجی ریلی نکالی جائے گی، لیہ میں میلاد چوک سے پریس کلب تک احتجاجی ریلی نکالی جائے گی، بھکر میں نماز جمعہ کے بعد شیعہ جامع مسجد سے قصر زینب تک احتجاجی ریلی نکالی جائے گی، رحیم یار خان میں حیدری مسجد سے اڈہ گلبرگ تک احتجاجی ریلی نکالی جائے گی، خانیوال میں نماز جمعہ کے بعد شاہ نجف لاہور موڑ پر احتجاجی مظاہرہ کیا جائے گا۔